المساعد الشخصي الرقمي

مشاهدة النسخة كاملة : برنامج حياتي كموظفة

الزوجة البارة
2016-09-28, 23:11
بسم الله ما شاء الله اللهم اعنا يا رب
كوني موظفة وربة أسرة صغيرة تتكون مني انا و زوجي و بنتي الصغيرة جعلني اقع في حيرة في كيفية تدبر اموري و تنظيم حياتي حتى أجعل لبنتي وقتا كافيا و لاحدد مسار يومي كما يجب ان يكون و كذلك كان هدفي دوما ان لا يكون شغل البيت هاجسا بالنسبة لي فعمدت على هدا البرنامج الدي نتمنى من اخواتي الكريمات يقراوه و يقولو ربي يعينك بلاك نفيد بيه وحدة منكم يجعلها ربي في ميزان الحسنات
انا موظفة يعني وقتي من 8 ل 4 مساءا
بالنسبة ليا و الحمد لله نستيقظ للصلاة نصلي و نرجع نرقد يعني الاستقاظ تاع اليوم يكون 6 و الربع تحديدااا
نروح للدوش ندير دوش خفيف دون منغسل شعري و الا نغسل اطرافي كي تفرغ السيتيرنة هههه:D
نغسل وجهي بغاسولي اليومي راح نحطلكم تشكيلة مليحة اذا همكم الامر كي نكمل عندي قارورة تاع معطر الجو فضلي درت فيها شوية جافيل براف و فيري الاخضر و الباقي ماء نرش بيه المرحاض حشاكم و الدوش و غسلة خفيفة ونخرج نخليهم يشعلو هدي الرشاشة قد منقولك مهمة منوفيلهاش حقها انا مدايرة وحدة في الدوش ووحدة في الكوزينة
نمشط شعري و نعدي نوظ زوجي و بنتي
نفتح النوافذ تتنفس الدار و نروح نوجد الفطور على طاولة المطبخ اكيد المهم باش منزيدش التعب تاع هز السينية و حطها نكملو نغسل الماعين اصلا راهم شوية و الكوزينة تبرق
نرجع لبنتي الي قاعدة تتكاسل تكون الوقت تقريبا 7 نديرلها توالاتها و نرضعها نبدللها قشها و هاهي وجدة حبوبتي نمدها لراجلي الي يكون لبس قشو يحكمها و نجري انا نلبس ونوجد روحي نعدل سريري و سرير بنتي وهيا رانا خارجين
بنتي نوصلها للي شادتها اكيد ماكلتها واجدة من البارح ضرك نولي لهدي الفقرة
القش المتسخ نحطو في بلاصتو انا نلوحو في الماشينة عندي الضيق نحيت الكرباية كي نجي نغسل نجبد كلش نفرز و نغسل
رانا رحنا نخدمو نروح للغداء سعات نروح و سعات لالا على حساب الخدمة كي نروح غدايا راهو واجد نجبد نسخن و سلاطتي راهي ناقصها غير الخل فقط نحطو نتغداو غسلة خفيفة للصحون و نروح نتكى ادا مروحتش زوجي يجبد يسخن و يحطهملي بصح ههه ميغسلهمش:mad:
نرجع من الخدمة اكيد راني ميتة بالتعب الحمد لله صلاتي نكون مصليتها في العمل نطيب الحليب منين زيدت عاد يحكم عليا ز نقعدو نحكيو و نلعب مع بنتي ل 5 و النصف
تم العمل تاع الصح بدى
انا متبعة نضامين سعات نطيب عشاء و غداء 'نفس الوجبة' و سعات كي ميصلحش مثلا ندير العشاء شورما و الي بيري نحط نطيب العشاء و ندير الغداء تاع غدوة تاني معاه انا توقيتي في الكوزينة ساعتين قدقد ننصب و نشعل على الطابونة ندير الكسرة راجلي ميحبش الخبز تاني الكسرة رخسيس ميحبش الخميرة نديرها للعشاء و الغداء تاع غدوة
ما يفوتو الساعتين حتى يكون عشايا و غدايا واجدين كسرتي طايبة و حتى السلاطة تاع اليلة و غداء غدوة مزينة في الصحون من تم نخرج راهي 7 و نصف و معظم الاوقات قبل نروح للشمبرة تاعي
نمسح غبرتها اذا شفتها تغبرت و الا نطل على الخزانة كاش ممال نعدلو كلش في بلاصتو نولي للصالة تاني نفس الشيء خلااااص راهي 8 نحطو العشاء و نعشي بنتي تاني و نجري للكوزينة نغسل ماعني يا ويلي مستحييييييييييييل نخليهم الا ادا راح يديوني للمستشفى هههههههههه تعبير مجازي:1:
متكونش 8 و نص كلش يبرق حتى الكوزينة نشفها في اليل قبل منخرج منها
بالنسبة للتنظيف انا نشف في الاسبوع كي نشوفها تعفست و نشف وقت طبخ العشاء نقفل على الكوكوط و نكون طيبت كسرتي 10 دقايق و انا نشفت
نرجعو للويكاند حبيب قلبي
الويكاند بالجمعة يتعبني بصح السبت ندلل روحي الجمعة نوظ على 7 نوجد الفطور و نخلي بنتي راقدة راجلي بطبعو مهوش رقاد نفطرو هو يخرج انا نحط نعجن الرقاق تاع الشخشوخة ندير ديما قيس وجبتين وحدة لغداء الجمعة ووحدة نهار اخر في الاسبوع ننصب غدايا و نطيب الرقاق تقريبا راهي 10 طبعا في هداك الوقت كاين وقت مستقطع تاع ناضت بنتي نروح نرضعها برك منغسللهاش حتى نكمل كوزينتي
نهز الصالة و نلوح الماء في الدار صفارة الشخشوخة راهي تزفر و نلوح القش في الماشينة انا نغسل مرة اسبوعيا الغبرة ديما راني نجوز عليها مكانش وصلت 12 نتغداو و انا نتكى شوية اكيد بعد منكون غسلت الماعن و درت تنظيف عميق للثلاجة و الكوزينيار انا وين نقضيو بالجمعة نمسح الثلاجة و الكويزنيار و نفرغ الاتاجات تاع البطاطا و البصل نغسلهم و نرجهم فيها في بلاصة ضلمة
العشية نروح لدار شيخي بصح نروح قبل 5 لاني عندي عشاء و روتين ماشية عليه الا في ايام العطل هاني نروح فيهااا :D:D:D قلت كي نروح ندير عشائي و غدا غدوة السبت و نطبق القش يكون شاح و نحدد ادا كاين الحديد
السبت نهاري المفظل نروح للحوانت نحوس نسافر واش حبيت ندير نروح لدارنا المهم كيما نحب انا
نصائح
*ديما ندير وجبة في الكونجيلاتور طايبة انا نفضل التليتلي الاحمر لانو ميباااانش ابدا بلي من المجمد نفور التليتلي عادي و نطيب مرقتو و نخبي كل على حدا كي نجبدو ليلة قبل الصباح تاع غدوة غير نجمر كانه طاب غدوة هدا نخليه لنهار منفحتليش نطيب و الا مريضة و الا ضيف فجاة
**كي نحس روحي عيانة نجيب دجاجة محمرة ههههه علينا ان نريح رواحنا مناش روبوات
في الليل من 9* اكيد بعد منرقد بنتي راني فارغة:19: نقرى نكونكتي واش حبيت ندير
اكيد تقولو و بنتك في هدم الاوقات انا نديرها في كرسي الاكل وين نروح نديها نحطلها العابها و هي تلعب قدامي و نحكي معاها في كلش
اذا عجبكم موضوعي نزيدلكم موضوع فيه فكاير عجوزتي في التنظيم و الاقتصاد الصراحة هزيت منها خير ربي ربي يحفضها لاولادها:19::19:
ندرومة49
2016-09-29, 11:53
بارك الله فيك, جهد لايستهان به,, أعانكن الله,, وفقكي لما يحبه ويرضاه

موضوع جد رائع
fati 29
2016-09-29, 13:58
ربي يوفقكويعينك ان شاء الله رانا تقريبا نفس البرنامج الا انا معنديش وقت للاولاد مزال مرزقنيش ربي
دعيلي معاك وربي يفرحك ببنتك وبزرجك ويحفظهملك يا رب ومشكورة على المجهود ويا ريت تعطينا تدبيرات عجوزتك
ريهانة
2016-09-29, 16:45
ربي يعينك اختي
الزوجة البارة
2016-09-29, 19:32
ربي يرزقك اختي و ربي يعينك
loudjaine
2016-09-29, 21:00
رووووعة طبعا ننتظر المزيد
naila166
2016-09-29, 21:29
يعطيك الصحة برنامج منظم بالنسبة للتنظيف العميق في. اي وقت تعمليه
أنا منخدمش و خايفة كي نولي نخدم منقدرش نوفق
بين البيت و العمل زيدي أعطينا أفكار تعيشي🙂
نواعم
2016-09-29, 21:50
ربي يعينك وانا معجبة بك مشاء الله
الزوجة البارة
2016-09-30, 13:34
أختي نايلة انا التنظيف العميق انا نغيبلو الصراحة نهار من العمل كي متكونش عندي ضغط في العمل نغيب و معظم الاوقات نغيب الاحد باش تجيني جمعة وسبت و احد تجيني مليحة 3 ايام وراء بعضاهم
ضرك نقعد برك و نحكي على تنظيفي العميق
ربي يقدرنا يا رب
توبة نصوح
2016-09-30, 15:27
بارك الله فيك على الموضوع
والنصائح هايلين وفيهم اقتصاد للوقت
مشكورة جزيلا وربي يوفقك لما فيه الخير ورضاه
توبة نصوح
2016-09-30, 15:27
بارك الله فيك على الموضوع
والنصائح هايلين وفيهم اقتصاد للوقت
مشكورة جزيلا وربي يوفقك لما فيه الخير ورضاه
ام صفصف
2016-09-30, 17:58
ماشاء الله راكي منظمة وقافزة، ربي يعينك
الزوجة البارة
2016-10-01, 07:52
ربي يبارك فيكن انا قبل صح كلش يبرق في داري بصح نوظ على 5 باش نطيب الغداء كرهت حياتي علاش تزوجت اصلا و انا بطبعي نكره ريحة الماكلة الصباح بكري و الله عانيت ايا هدا العام قررت نلتزم ببرنامجي و الحمد لله بقالي وقت ما شاء الله و من 9 راني حرة من كلش
fatima zohraa
2016-10-03, 16:54
ماشاء الله عليك فحلة ومنظمة ونشيطة.ربي يهنيك
قوت
2016-10-03, 17:39
ماشاء الله ربي يحفظك و بارك الله فيك على النصائح القيمة
سحابة باردة
2016-10-04, 10:03
والله حسينا انشاط معاك
وردة الرمال43
2016-10-04, 10:34
يعطيك الصحة اختي وربي يعينا ان شاء الله لازم نتناصحو مع بعض ونمدو نصائح
Om mimi
2016-10-04, 11:51
عجبتني قصتك هكذا شوي نشاط رغم اني ربة بيت و حامل مع زوج ولاد الفترة هذي جيني شوي صعيبة وغم انه في الايام العادية نحب نشغل وقتي مع افكار المطبخ الحاجة المليحة للمرأة العاملة انه تخرج تخلي دارها نضيفة وولادها في الروضة او يقراو و يتلمو وقت الرجوع للبيت يلقاوه كيما خلاوه انا ولادي صغار لازم تنظيف من وراهم
نتمنى تزيدينا افكار نتعلمو منها و عندي برامج من اليوتيوب لكن نحتاج افكار جزائرية من عاداتنا
ورود عربية
2016-10-04, 11:58
موضوع اكثر من رائع ......متلهفة لقراءة باقي الموضوع

في انتظار التكملة تقبلي احترامي و إعجابي بك
ورود عربية
2016-10-04, 23:04
في انتظار التكملة.....
rimaas
2016-10-06, 15:57
الله يبارك فحلة
ملك 25
2016-10-06, 23:50
يعطيك الصحة يا الحرة ماشاء الله عليك نشاط و فحالة حابة نسقسيك على الاكل مدايرة مينو والا طيبي هكداك برك وفي انتظار الغسول و افكار عجوزتك ربي يحفظك
فاصلة
2016-10-07, 00:04
السلام عليكم. جيتي وحدك هنا وخليتينا وحدنا في صفحة دردشة عاملات بصح لحقناك . رانا جينا كاش ترحيب كاش قهوة.
يعطيك الصحة على البرنامج بالتقريب كما انا بصح أنا وليدي يقرا وأنا عندي خطرات نص نهار نتلاها بالشغل بصح حاجة كرهتلي داري نسكنو في وحد البلاصة فيها الغبرة بزاف في دقيقة ترجع الدار صحرا ههه انا نبلع كلش وهي تدخل والمصيبة راجلي يخلي التاقة مفتوحة خطرات عييت ما نوصي بصح ما يصنتش.
ربي يعينا قاع أن شاء الله
الزوجة البارة
2016-10-07, 15:22
ربي يخليك فاصلة اختي عجبتني الصفحة تاع العاملات بصح رانا راقدين فيها بزااف لازمنا شوية نشاط ههه
لبغيتي قهوة هيااا من قبيل نخمم ندير قهوة و مجاش في خاطري نشربها وحدي
الزوجة البارة
2016-10-07, 15:25
اختي ملك انا مدايرة قائمة راح نحطهالكم مع واش وعدت وادا عجبتكم قولولي راح نحلاول نديرو موضوع اخر غدوة نهاري المفظل كيما قتلكم راح نحاول نكتبو وتشوفوه بربي
ملك 25
2016-10-08, 10:57
اختي ملك انا مدايرة قائمة راح نحطهالكم مع واش وعدت وادا عجبتكم قولولي راح نحلاول نديرو موضوع اخر غدوة نهاري المفظل كيما قتلكم راح نحاول نكتبو وتشوفوه بربي
اكيد راح يعجبنا اختي ماطوليش علينا بزاف راكي شوقتينا
omme Mohamed
2016-10-08, 15:02
بارك الله فيك زيدلنا حنونة انا خدامة و منيش دايرة بروقرام نعيا بزاف
Oum hayet
2016-10-10, 12:02
يعطيك الصحة موضوع جد رائع موفقة اختي الكريمة
maloo
2016-10-10, 20:33
444444444444444444444444444444
أريج13
2016-10-10, 20:45
شكرا لك اختي و اعانك الله في عملك داخل المنزل و خارجه ، و الله اعطيتينا افكارا رائعة بارك الله فيك ....،انا اسكن في مكان فيه غبار كثير يعني لازم عليك كل يوم تمسحي ....بالاضافة الى انه منذ ولادة ابني الثالث احس انني ضائعة بين الاعمال المنزلية و العمل الخارجي .......ارجو من الفراشات العاملات اثراء هذا الموضوع و ارجو منك اختي الفاضلة اضافة المزيد لاننا بحاجة الى دعم بعضنا البعض.....
شكرا لك مرة اخرى،....
Samer78
2016-10-11, 13:17
ماشاء الله اختي ربي يحفظك لعايلتك.انا كي كانوا عندي 2 اولاد كنت لاقية روحي و داري ماشاء الله بصحك بعد 4 اولاد-ربي يحفظهم-احس انني اصبحت robot بدوام كامل العمل دراسة الاولاد غذاء عشاء فطور تنضيف البيت اصبحت افكر جديا في ترك العمل لاني لا استطيع اهمال البيت على حساب العمل وهذا ارهقني كثيرا فاصبحت عصبية مع الاولاد ولا املك حتى الوقت لاعطاء كل واحد فيهم حقه.
دنيا الامل 18
2016-10-12, 17:52
تنظيم الوقت هو الاساس ربي يكون في عون الجميع
djamila16
2016-10-19, 14:56
يعطيك الصحة شحال حاولت ندير برنامج نمشي عليه لكن مع ضغط الشغل داخل وخارج المنزل.
djamila16
2016-10-19, 14:58
من فضلك أعطينا برنامج التنظيف لراكي ماشية عليه و شكرا
الثلج الأبيض
2016-10-21, 14:21
ربي اعينك و يعطيك صحتك
raghado
2016-10-21, 15:27
يعطيك الصحة وربي يعينك
wissem1
2016-10-24, 14:19
برنامجك اكثر من رائع نستعرف بيك يا لفحلة
ان امكن انقليه الى دردشة زوجات عاملات باش يستفيد الجميع و يدعيولك بالخير
انا صراحة عجبني بزاف مي منقدرش نطبقو مسكناش وحدي الله غالب
روعة عجبني خصصتي وقت لكل شيء بارك الله فيك و ربي يعطيك صحتك و يحفظلك عائلتك
قطيطوشة
2016-10-31, 15:06
برنامج رائع انا كيفك عندي بنت وعاملة بصح نلقى صعوبة مع بنتي لي تعطلني تحب نقعد معاها تحب ترضع...........
في انتظار التكملة
أم رمزي
2016-10-31, 17:09
الله الله أنت فاحلة أنتاع الصـح برنامج رائع
sidahmed13
2016-10-31, 19:29
شكرا، شكرا، شكرا