بصراحة؟

[مشكلتي]

السلام عليكم اختي هل تقبلين الزواج برجل لديه أفكار في رأسه من بينها أن الرجل يتزوج باش يجيب المراة تخدم على والديه من بينها أن المراة متخرجش مالدار والخرجة بالقانون 3أو 4مرات اقصى حد فالشهر من بين افكار أن تعيشي مع والديه حياتك طول ميعطيلكش كوزينتك وحدك طول الحياة! مع العلم أن عايلتو متكونة من ام 45سنة الاب51سنة وخدام عند روحو مش عند الدولة والاخ واحد صغير 11سنة واخوات 2يقراو :sdf:واش رايك اختي تقبلي بهذ الشخص ولا لال ؟ وكيف الحل راه عندنا شهرين خطوبة ونعرفو من قبل ويحبني صح نفسخ خطوبتي ولا لال رجاء الادارة متحذفوليش الموضوع ران في حالة

[NIGHTINGALE]

خدمة والديه أختي العزيزة قد يفتح لك بابا من أبواب الجنة أما بقية الشروط فهي معقولة وتدل على أن خطيبك يريد حياة فيها انضباط حيث يكون هناك " راس" يحكم في البيت، وتكون المرأة خاضعة للزوج كما أمر بذلك الله سبحانه وتعالى، بالتوفيق إن شاء الله

[صبرا13]

السلام عليكم اختي هل تقبلين الزواج برجل لديه أفكار في رأسه من بينها أن الرجل يتزوج باش يجيب المراة تخدم على والديه من بينها أن المراة متخرجش مالدار والخرجة بالقانون 3أو 4مرات اقصى حد فالشهر من بين افكار أن تعيشي مع والديه حياتك طول ميعطيلكش كوزينتك وحدك طول الحياة! مع العلم أن عايلتو متكونة من ام 45سنة الاب51سنة وخدام عند روحو مش عند الدولة والاخ واحد صغير 11سنة واخوات 2يقراو :sdf:واش رايك اختي تقبلي بهذ الشخص ولا لال ؟ وكيف الحل راه عندنا شهرين خطوبة ونعرفو من قبل ويحبني صح نفسخ خطوبتي ولا لال رجاء الادارة متحذفوليش الموضوع ران في حالة
السلام عليكم و رحمة الله و بركاته
كأنك تعرضين علينا استطلاع رأي، فَلَو قال الأغلبية لا نقبل ستقولين لخاطبك احشفا و سوء كيلة و و تشيرين اليه الى الباب و تتمنين له السلامة، اما اذا قلنا نعم ... فستعطيه فرصة .
انا لا أعارض الاستشارة و لكن طريقة الطرح وعاء يجب ان لا تغفلي عنه، على كل لن اطيل، مرة و انا اشاهد فيما شاهدت شخص يطلب من رجال اعمال قرضا ماليا و بدأ يشرح في مشروعه، فقال له احد رجال الاعمال: انا استثمر و ابحث عن الشخص الناجح اكثر من المشروع الناجح.
يعني اذا كانت اخلاق و محاسن الشاب يستثمر فيها فنعم الزواج هو و ان سائت باقي الظروف، فكل ممتحن في هذه الحياة و كل عليه ان يصبر على شيء ما، ان تصبري في ظروف الزوج خير من ان تصبري على سوء خلق و طبع الزوج و لو حسنت ظروفه.

[~أمة الله~]

عليكم السلام ورحمة الله وبركاته
يا أختي الأمر أسهل من هذا، إذا لم ترتاحي ولم تساعدك شروطه لا توافقي!
لستِ مُلزمَة بأمر ماراكيش قادرة عليه
راهي شروطه وطريقة تفكيره واضحة بالنّسبة لك،أنتِ حطّي روحك أنّه هذه الشروط لن تتغير أبدا، يعني ماشي تقولي ممكن نغيرو، ممكن كاش نهار يقبل كذا أو كذا، يعني ديري أنّه ماراحش تتبدل وشوفي إذا تقدري تتعايشي معاها أو لالا، واستخيري وخذي قرار...

أمّا فيما يخصّ أنّه الخرجة بالقانون وكذا، فهنا ماكاش مشكل كبير، لكن حكاية تسكني معاهم طول الحياة وتزوجك باش تخدمي والديه، ماذابيك تراجعيه في نظرته للحياة الزوجية، فالله سبحانه وتعالى قال:
{وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ}

وقال رسول الله صلى الله عليه وسلم : { يا معشر الشباب ، من استطاع منكم الباءة فليتزوج فإنه أغض للبصر ، وأحصن للفرج ، ومن لم يستطع فعليه بالصوم فإنه له وجاء (http://library.islamweb.net/newlibrary/display_book.php?idfrom=827&idto=828&bk_no=80&ID=544#docu) }

[شخصية نرجسية]

كفاك مثالية و انفلاطونية مستحيل تقدري تعيشي معاه تعيشي عمرك كامل جارية عنده و ليس زوجة و انت دبري راسك

[شخصية نرجسية]

و على الزواج مستحيل نقبل الزواج بانسان متخلف كما هدا الرجاء عدم الاقتباس و تبداو والديه و منعرفشواش والديه على العين و الراس مي محتمش تعيشي معاهم من حقك تعيشيوحدك و ليس واجب عليك خدمة والديه و خدمتهم تكرما منك فقط و فضلا منك و انت ليست خزانة يخزنها في الدار راكي انسانة من حقك لما تقلقي تزورك والديك و اقاربك و لا اقصد التسكع بالاسواق هدا الانسان متخلف و لا يحترم المراة و لا يفهم معنى زوجة يشوفها خدامة قليللو يروح يشوف خدامة

[lalib40]

الام مازالت صغيرة والاب ايضا......... ستقع المشاكل ..... من الاحسن ان يعيش الزوج مع زوجته وحدهما....

[محمد جديدي التبسي]

فيما يخص الخرجة الامر معقول جدا يعني كل أسبوع تخرجي مرة تقريبا كثيرات يتمنين ذلك
تخدمي والديه ما تكبريهاش والديه مازالو في سن الكهولة يعني لن يعتمدوا عليك كثيرا تتعاونوا عادي حاولي تكسبيهم فقط
قضية ان تبقي مدى الحياة معهم وحالك لن تتغير هذا مبالغ فيها فلا أحد يعلم ما يحدث غدا ربما يمن الله عليه بقطعة أرض أو سكن أويكبر أخوه ويضطر يخرج وحدو يعني كلها في علم الغيب لا تجعلي منها مشكلا
شوفي لأخلاق الشخص وسمعته ولا تجعلي للشيطان حضورا في تفكيرك فهو يريد انهاء هذه الخطبة وربما تندمين وهو سيجد غيرك بلا شك. .ربي يفتح عليك

[خالد عنابي2]

بكل صراحة انا رجل وما نرضاهاش للمرا كيما هك بالزاف

الا اذا كان الرجل طيب واهله طيبين والزوجة كذلك طيبة وهذا من اندر ما ندر اجتماعه ولو ابدت المظاهر ذلك

فما يتكشف بعد الزواج ليس كالصورة التي ترتسم قبله غالبا

[ايمان4]

القرار يرجع لك المهم فكري مليح العرس ليلة و تفوت لكن الزوج حباة كاملة متجيش بعد شهر او شهرين بعد الزواج تشكي خممي مليييييييييييييح

[Rima24k]

شوفي اذا ماساعدتكش شروطو ماتقبليش بيها خاصة انو متعلق بعايلتو ومش قادر يفارقهم انا نظن انو الراجل لي مايقدرش يستقر بدارو وحدو ويفصلو انو يبقى مع اهلو خاصة انو واله عايش يدل انو مازالو مش تاع زواج لانومش قادر يتحمل مسؤولية العايلة لوحده لازم ديما يبقى عند والديه باه يغطيو هفواتو ولا باه يرمي بالمسؤولية عليهم
اما من ناحية انو يشرط عليك الخرجة بالحساب انا عن نفسي مستحيل نقبل بهذا الشرط لانو هك راه يحصرك بعدد وهذا غير معقوووول يعني كون تمرضي مثلا زوز مرات ويزيد يمرضو ولادك من بعد مايخليكش تديهم للطبيب!!!هذا عجب وفرات

[النجمة القطبية]

بصراحة يا اختى هدا الشروط غريبة عجيبة
يعنى مثلا اية امراة تعيش مع والدين الزوج منطقيا راح تتعاون في البيت هدا الامر كامل نعرفوه في مجتمعنا ولا غبار عليه علاه مالا يزيد يشرط تخدمى والديا وكانه يقول لو في يوم من الايام تعبتي او اعترضتى على امر ما راح يفكرك بالشرط مثلا
علاش ما يخليش خدمتك لوالديه محبة منك او محبة خاطر كيما يقولو وحولها لشرط او واجب !!!!!!!!!
ثانيا اين موقعك كزوجة هل تزوجك حبا بك او لبناء اسرة او الهدف الاساسي هو خدمة والديه النية تفرق صراحة
الشرط الاخر عدم الخروج سوى خمس مرات شهريا يعنى راكي في الحبس الاحتياطى مع الاعمال الشاقة ايا كثر خيرو كي عطاك عطلة باين حنين :1:
ووين راهي الحقوق الزوجية في هادي الحكاية كاملة يعنى قاعد يملي شروطو وكانه سلطان او ادا مديتيهش راح تخلاص الدنيا بلا ميتفكر الحقوق !!!!!!
ام انه لا يعتبر انه للمراة حقوق
شوفي انتى طرحتى سؤال وانا نجاوبك بكل صراحة لو كان خطبنى منفكرش اصلا نقبل بيه لانو مكانش سبب اساسي يدعونى للقبول
مهدر على دين ولا اخلاق ولا حكا مثلا على تربية اولاد او تاسيس اسرة سعيدة او طاعة الزوج
ركز فقط على الخدمة تع دارهم مع عدم الخروج !!!!!
وزيد يقولك تعيشي في دارهم للابد يعنى باختصار االحبس المؤبد :d:d
اعلم ان كل هدا في علم الغيب لكن هو من استبق الامور وليس من الدكاء ان يشترط الرجل شروط غير منطقية كان ممكن ان يكتفي بالقول امراة ملتزمة تطيعني وتحترم والديا وتكون متعاونة ومتكثرش الخرجات وانا بالمقابل نوعدها بالاحترام والوفاء وحسن العشرة ووو
اما ان يعطى شروط بلا مقابل هنا دخلنا في الاستغباء والعبودية

[ع.عيسى]

بصراحة من الافضل ان لا تتزوجي اصلا ....لانه من موضوع مشكلتك تؤكد انك ليست بالصبورة ولا تقدرين على تحمل المسؤلية الزوجية ومن النوع المتطلب كثيرا ... .لذلك اعتقد انك اذا تزوجت بهذا المسكين ستفتعلين المشاكل مع اهله من اجل ان تحظي بسكن مستقل ، وتدخلين في صراعات معهم وتقولين له انك مكش خدامة عنده ولا عند يماه ، وفي الاخير ربما يصل الامر الى الطلاق و قد تكوننين بذريتك ............يا اختي ربما قسوت عليك ولكن صدقيني انت فكريا لست ناضجة بعد لتكوني زوجة .

[sunshine2013]

السلام عليكم
اختي من خلال طريقتك. لطرح الموضوع باينة باللي مش عاجبك. الحال و مش عاجباتك. عقلية السيد و طريقة تفكيرو اذن الحل سهل كل واحد يروح في طريق انتي ما تعياي و ضيعي وقتك. و هو ما يضيع وقتو علاخطرش راهو وضع النقاط على الحروف من الاول و صراحتو هي الشيء الوحيد اللي عجبني في عقليتو مش كيما بعض الخطاب يفرشولك. الارض ورود و مبعد يدورو عليك. بعد الزواج
الزواج مفروض يكون مودة و رحمة وومشاركة و مساندة وووو مش اوامر و نواهي

[rose de sable s]

من خلال كلامك يبدو انكما صغيران في السن وهو لا يفكر بالشكل صحيح في مستقبل ليفرض عليك امور كهده
لانه لا يفرق بين حياة عازب ومتزوج هو اكيد يحب عائلته لكن شروطه غير واقعية ووالدته صغيرة السن مع وقت ستحدث غيرة بينكما
وكان من افضل ان تسالي قبل خطبة
لا تتعجلي بامر زواج استخيري الله

[خالد عنابي2]

بصراحة من الافضل ان لا تتزوجي اصلا ....لانه من موضوع مشكلتك تؤكد انك ليست بالصبورة ولا تقدرين على تحمل المسؤلية الزوجية ومن النوع المتطلب كثيرا ... .لذلك اعتقد انك اذا تزوجت بهذا المسكين ستفتعلين المشاكل مع اهله من اجل ان تحظي بسكن مستقل ، وتدخلين في صراعات معهم وتقولين له انك مكش خدامة عنده ولا عند يماه ، وفي الاخير ربما يصل الامر الى الطلاق و قد تكوننين بذريتك ............يا اختي ربما قسوت عليك ولكن صدقيني انت فكريا لست ناضجة بعد لتكوني زوجة .

لا على الاطلاق راك ضالمها ومداير تحيز كبير ضدها

الشروط التي ارادها هذا الرجل ثقيلة والمرا كذلك كائن وانسان ومن حقها تعيش حياتها

قلت من النوع المتطلب ؟ وعلاه هي شرطت فيلا وبيسين وسيارة ورحلة شهر العسل لتركيا مثلا ؟

الراحل هذا باين وش حاب يحوس على مرا تكون تحت رجلين والديه وكيما يدير فيها تسكت

يعني يحوس على جارية تقريبا والا لما كان جاهر بتلك الشروط فهو يبحث عمن تقبل بها حتى لا تستطيع التراجع لاحقا بذريعة انها وافقت

[solinne]

عادي هو مد شروط والي عليك يا اما تقبلي ولا ترفضي ما تقدريش تدي براي حتى واحد خاطر مكاش الي راح يعيش في بلاصتك ....وقصتك فكرتني بواحد فاميلتي عندو يماه وباباه نفس العمر الي قلتي عليه وعندو اخوه صغير وزوج خواتات كيما قلتي بالضبط وراه يحوس على عروسة ومن شروطو تخدم يماه خاطر مريضة عتدها فشل كلوي وما تقدرش تخدم دارها والحد ضرك مازال ما لقاش الي تقبل بشرطو للاسف

[mrmilano1984]

هو باين من النوع لي حب يجي مرا ويخليها في المنزل طبعا يعيش مع والديه وتحترمهم وتقوم بيهم ووو طبعا مش هدا كي شغل بونيشة او خدامة عليهم انا فهمت كل شيءهو كما بعض اشخاص وانا منهم لن اسمح بزوجتي ان تخرج الا للضرورة ولامور طارئة وحتي مع عائلتي وتلبس محترم الخ ... وتقبل بشروطي طبعا نضنك مش عقلية متساوية وتخمام كف كف باينة هو في واد وانتي في واد اخر اختي هو عقليتو هاك ونتي اخري تحبي الخروج واتنزه واللباس ووو باينة عقليتك ولي يقولو ويقولولك بلاكي تبقاي عندهم في الحبس الخ هادو باينة عقليتهم يحبو الحياة السهلة والتفسح الخ ... واش يجيك من وحدة حياتها كامل تربات في التكسال والتفشاش وعدم التدخل فيها والتحكم فيها الخ طبعا راه تجيبلك اعدار هادو وتقولك معقد ومريض الخ ياو ماهوش مريض هدا تفكيرو الا شفتي روحك مستحيل تقدري تعيشي هاك مفروض تفهمي وجبدي روحو لانو صراحة اري التعايش بينكم شبه مستحيل خمي بعقلك كما قالولك وربي يعطيك رجل حسب تفكيرك وعقليتك

[nihal159]

الحل نتاعك هو الهجوم المعاكس؛ يعني قوليلو مادام خوتك البنات قاعدين معانا في الدار فهم أولى مني بخدمة أمهم فمن غير المعقول خوتك قاعدين و حاطين رجل على رجل وأنا لي جيت عروسة نقيم لدار كاملة وحدي؛لكن نهار يتزوجو خوتك ونبقى وحدي مع أمك أكيد رايحة نخدملها لأني مستحيل نطمع في عجوزة تسيقلي أو تطبخلي وشوفي ردة فعله.
وعلى الخروج أنا نشوفها معقولة جدا خرجة واحدة في الأسبوع؛ والراي رايك.

[hamoudz86]

راني حاير في ردود الأفراد
يعني السيد يسمح في والديه باش يرضي المرا؟
و واش هاذي تاع متخلف!! يعني المتقدم هو لي يخلي مرتو نهار و هي في الشوارع ، و الله اتعجب من ردود البعض .