شكشوكة

[رضوان الجنة]

شَكْشُوكَة دَه كان صيَّاد ماهر
عَنده فلوكَة
كانت لصَاحِبنا مَمْلوكَة
كَانت بتجيبله من الأرزاق
أشْكال والوان المَبروكَة
كانت تتهَز بين الأمواج
ده لإن حبَالها مَفكُوكَة
وتشوفهُ بيأدَّف بالعَافية
مأديفهَا في جَنبَهَا مَمْسُوكَة
والحِلم في أوصَال شَكْشُوكَة
هايجيبلهُ مِيت ألف فلُوكة
وبدأ يكبَر شَكْشُوكَة كَمَان
ومعَاه كِبْرِت المَبْروكَة
صَبَحِت مَبْروكَة في غَمْضِة عِين
عبَّارة بخِطَة مَحْبُوكَة
بَدَل العبَّارة صَبَحوا إتنين
ودي كُلَّها أملاَك شَكْشُوكَة
لَو حَب يفُكَّها بالفلاليك
تِصبَح مليون ألف فلوكَة
وبَقِتْ شِركة يَا مَاشَاء الله
وسَرَقنَا وأخدْنَا في دُوكة
وبَدَأ شَكْشُوكَة يلِم فلوس
ملايين في خَزَاين مَسْكُوكَة
ومراكبهُ رايحة وجَاية كَمَان
يا سَلاَم سَلَّم علي شَكْشُوكَة

(2)
وفي نوبة من الأيَّام ياولاَد
وفي وسِط المُوجة المَهْلوكة
جِريت رُكَّابها يمين وشمال
ولقينا المركب مَربُوكَة
بدأت تغرق ومعاها الناس
الواد شحَّات والواد سُوكَة
غرقوا وبقوا فاكهة للأسماك
وبقت أجسادهم مفروكة
أول ما وصَلَهم خَبَر الموت
خَد ديلهُ في سنَانُه شَكْشُوكَة
لابوليس لانيابة ولا دياولو
وصبحنا حقوقنا متروكة
فضيحتنا بقت علي كل لسان
وبقينا للعالم أُضحـــــوكَة


منقول :dj_17: