انا و سلفتي شراكة في زوجي222222

[مشكلتي]

السلام عليكم و رحمة الله تعالى و بركاته
اشكركم على تفاعلكم مع مشكلتي ردودكم افادتني كثيرا حيث اتضحت عندي الرؤيا اني لست الوحيدة التي ارى ان تصرفات سلفتي مثيرة للشكوك
هادا رابط المشكلة الاولى
http://www.djelfa.info/vb/showthread.php?t=1983742
فقط رد واحد اللي حرت فيه هو رد الاخت اللي قاتلي طبيبة متقدمة و كلشي عادي لا حول ولا قوة الا بالله
حبيت نقلكم حاجة قبل ما نحكيلكم واش صرا انا راني متعلمة و عندي ماجيستير و حقيقة هي اجمل مني بمراحل لكنني و الحمد لله جميلة و متخلقة و من اسرة معروفة يعني ماعندو و ما عندها علاه يحقروني
زوجي باه منظلموش انسان خلوق راهي والله هي اللي تتلاح عليه اول ما جات كانت كي تلبس لبسة مش مستورة يغض البصر و مكانش يسلم و مبعد خوه شكا لامو قاللها علاه يتشنف علينا و لا تجنبا للمشاكل يقعد معاها و يسلم عليها
المهم المستجدااات
هاديك الليلة كي حكيت مع راجلي ع موضوع انو يولدها و تناقشنا و فضت ب واش دخلك في خدمتي لغدوة من داك قتله ضاق خاطري اديني لدارنا نبات ليلة قالي اوك رحنا لدارنا في ولاية خلاف و هو بايت معايا تما حكينا في الطريق قالي وسعي بالك و ما يكون غير خاطرك
كي روحنا لقيت الكوفرلي تاع السرير تاعي مبدل سقسيت اخت راجلي صغيرة قاتلي اي فلااانة ===سلفتي===بايتة في لاشومبر تاعك انا تما عقلي طار رحتلها قلتلها نتي متحشميش ترقدي في فراش راجل خلاف و جبدتلها كلشي حكاية لي فوطو و حكاية يولدني قلتلها لمي روحك شوي اييه و حتى هي ماخلاتش الكلمة اللي شفيت عليها مليح قاتلي راجلك ماتستاهليهش ماكش مربية
و راحت شكاتني لعجوزتي هاديك اللي ضرتني ربي عالم حطيتها كي ما جامي تخيلت راح تدور عليا جاتني عجوزتي بهدلتني قاتلي مفتاح لاشومبر انا لي عطيتهولها غسلنا لاشومبر تاعها و قاتلي متحشميش و مراكش رزينة المهم ماخلات ما تقللي جبدت حكايات قدم شوكاتني و غسلتني قدام سلفتي و عيطت لزوجي عمراته عليا انا غير نبكي في لاشومبر تاعي
جا راجلي قالي بهدلتي بيا قاللي مدرتيليش قيمة كاامل و راسك خشين و قالي درك واش راح نقول لخويا غايب و درتيلي المشاكل مع دارنا ربي عالم هاديك الليلة كيماه فاتت و سلفتي قاعدة غير تتمسكن قاتلي راني دايرة اعتبار لحماتي و لزوجك مراحش نرد عليك كي غلطتي فيا و جابت الحق عليا قدامهم

المهم درك راني في دارنا انا اللي قتله يرجعني والله يا خاوتي كرهت من هاد لمعيشة راجلي انسان طيب و يستاهل لكن هاك الحية دمرتلي نفسيتي حسبي الله و نعم الوكيل



ملاحظة الادارة
كل الردود المقتبسة للأعضاء تحذف

[- بصمة خير -]

انت لاه راكي تخليها تفسد حياتك
راكي انت هي السبب
هي نقاتك ضعيفة و تتقلقي بسرعة
راهي نفطة ضعفك
و من فوق روحتي لدار باباك و خليتيلها راجلك
مليح
عيطيلو قوليلو ارواح اديني

هي خبيثة

قوليلها تبعدي عليا و على راجلي
و الا راه عندي ليك
ركعتين في الليل عليك
قوليلها خيري

روحي لدارك اليوم قبل غدوة
**************************************

اللهم اني نجعلك في نحورهم و نعوذ بك من شرورهم
هذا دعاء من خاف قوم

[om_nour]

اخختى ربي يفرج عليك

[أم عروة]

وعليكم السلام ورحمة الله وبركاته

شوفي أختي العزيزة صدقيني غير قلقتيني ماشي من عادتي نتقلق في ردودي مع الاعضاء ولكن لي فيا نكفيني الواحد مقلق وزيد
شوفي اختي دايرتك كي ختي وونضريت بزاف بحكايتك
اسمعيلي مليح
كاين خطوط حمراء واحد مايتجتوزهم ماشي معناها كي راكي ساكنة مع عجوزتك كل شي مباح لالا
يقوللك حرية الاخرين تتوقف عند بداية حقوقك افهمي مليح
يلزم تعرفي حقوقك مليح في هاديك الدار

هداك وش خص غير ترقد في شمبرتك افرضي رايك يالالة هدا حقك ماتخافيش اهدري وعاودي ماكاش لي يتلاح لشومبرتي شوفي كون عجوزتك ولا لوستك بالاك تفوتيها بصح سلفتك مستحيييييييل نوضها كحلة لي حب حب ولي كره الله يسهل عليه حقققققققققك وانتي وش راكي ديري لتما يمالا زيادة!!!!
اوممبعد شابة عليك ماطيحيش بروحك انتي لي حسستيها بلي فيك نقص ياخي راجلك خيرك بارادتو ماشي لقيتيه فالطريق لصقتي فيه
وطبيبة خالعاتك ياخي راكي قارية طبيبة وراسها فارغ الشيطان ومايقدرلهاش

شوفي حنونة عاودي ولي لدارك وبركاكي مالجياحة تاع نروح لدارنا ونخليلها راجلي يااختي ارجعي وافرضي رايك ماتخلعك لا عجوزتك لا راجلك ايه نهدر ونعاودحقي وويلا كثرو حض ي اهلك وعايلتك ونوضيها يا اكا تسقم روحها ولا تخرجي بدارك وحدك

راني متخايلاتك جي غدوة تقولينا زوجي وقع في الزنا مع سلفتي
ياو فيقي على روحك
وهادي تاع يولدها ماكاش مستحيلديري رجل اويد واضغطي على راجلك وهي ماتعطيلهاش الوجه وبالاكي تروحي تعتذري وتطلبي السماح من حتى واحد ياو حقققققققك افهمي
يا اختي هدي خدوود الله تعالى لي يتحاها راهو وقع في الكبائر واتني ماتخليش هاد الشي يصرا على خاطر رايحة تخسري زوجك وزيد تدي الاثم معاه لاخاطر قادرة تغيري

يا اختي نصيحة لوجه الله ماتسكتيش قوليلها راجلي مربي ويستاهلني خاطر مربية ماشي كيما شي عباد رجالتهم يهمبرو وهوما يخونو فيهم ناقصين تربية

شوفي اختي راني نغلي من فضلك ديري وش قتلك وارجعي لبيتك عاجلا غير اجل وافرضي رااااااااااايك مراكيش ديري فالحرااااام ولا تظلمي في ناسك

نسيت حاجة ماتنسايش الدعاء والتضرع لله تعالى وقيام الليل ورايحة تشوفي ربي ينصرك حنونة

والله كون انا نسحب بيها الدار

[*أم كوثر*]

لاحول ولاقوة الا بالله
يعني يغطو الشمس بالغربال والكل يرى تصرفاتها هي طبيعية!!
غرفة نومك مكان خاص جدا ومهما كانت الظروف مش من حقها تدخلها وتبات فيها ولو بامر من حماتك
امامك حلين
اما ان تتغاضي عن تصرفاتها وتحاربينها بنفس السلاح
او تكبري الموضوع ووتخرجي بنتيجة لانو لاربي ولا العبد يرضيهم وش صاري

[زهرة الاوراس]

يا البهلولة زدتي خليتيلها الجمل بما حمل، قادرة تستغل غيابك و دور براجلك، لانها واضحة ليست ببنت اصل، واكبر غلطة درتيها انك بينتيلها ان تصرفاتها السابقة ماعجباتكش، خلاص دوك هنا تتاكد بلي نجحت في اغاضتك واثارة اعصابك وهذا كان هدفها من الاول وانتي بينتيلها بلي نجحت، الله يهديك المفروض انك كنتي تبينيلها انك ولا على بالك اصلا وماتواجهيهاش اصلا، لوكان كي لقيتيها باتت في غرفتك لقلتي لراجلك هو يتصرف وادا اسكت هو انتي اسكتي رغم اني متاكدة كان راح يدير حاجة ولا على الاقل يكلم امو، المهم هادو فاتو، دوك عيطي لزوجك اعتذري منو هو ولو ماكش غالطة والا راح تخسريه، قولو سامحني لاني تعصبت وكذا، ومام عجوزتك اعتذري منها كي تروحي والله راح تموت سلفتك ادا صالحتي راجلك وعجوزتك وخليها تغلي، اكسبيهم في صفك يا الجايحة ماش تقعدي تغضبي وهي فرحانة، بتصرفاتك تهدم البيوت، اياك وترك بيتك مرة ثانية الا للضرورة، هي الحياة اما ان تلعبي بها او تلعب بكي والاختيار لك، سلام.

[~رآقية بأخلآقي~]

لا حول ولا قوة الا بالله العلي العظيم

أختي شدي في ربي أولا وفي راجلك ثانيا وفي أمو ثالثا..صفيها معاهم بشتى الطرق اطلبي السماااح وحتى ولو هوما اللي غلطو في حقك...

وسلفتك وكلي عليها ربي و ماتجيش من طريقها خلاااااص باينة اللي مخافتش من ربي مش راح تخاف من عبااااادو..

كثري من الإستغفااار و الدعاااء و حاااولي قدر المستطاع اختي انك متعيشلهاااااش وارجعي لدارك وحاولي تعيشي وكأن شيئا لم يكن حتى لا تتفاقم الأمور وتصبح أسوأ من هذا الشيء والمفتاح تاع لاشمبر لازم ماتخليها حتى عند واحد حتى ام راجلك ميلزمش تبقى عندها المفتاح كوني ذكية وشوفي كيفاه تهزيها من عندها و ربي يفرج عليك ياااااااااااااربي

[chahinez benyahia]

يا سبحان الله :o
يا أختي وش نقلك نتي غلطتي كي روحتي طول تهاوشي بلا ما تعرفي السبة و هي ثاني غلطت كي ما ستأذنش منك نتي و لا راجلك
و أصلا مدام نتي شايفة بلي راجلك خاطيها و مش عاطيها وجه لاه هدو المشاكل عليك
و غير ارجعي لدارك اليوم قبل غدوة ;)

[kika85]

والله ملي قريت موضوعك الاول وانتي وحكايتك في بالي...لا اله الا الله...قعدت غير نتخيل اسكو صح كاين بيوت جزائرية مسلمة يصرا فيها هاد الشي...لو كان جات واحدة بنت اصل وتخاف ربي هادي سلفتك لو كان مادارتش هكدا حتى ويكون راجلك هو الي دار بيها وزيد راهي داخلة على ولادة عرفت ربي يسلكها منها ولا واش رايح يصرا فيها على الطابلة ...كيفاش تقابل ربي...
بصراحة والله ما عرفت واش ندبر عليك يا اختي....انا لو مكانك ومع اني تمتم نشعل قادرة نخسر كلشي في دقيقة وما نسال على والو....بصح مع واحدة رخيسة كيما هادي لازملها اسلوب ذكي....اولا وقبل كلشي ارجعي لدارك اليوم قبل غدوة..معليش دحسي على قلبك...اطلبي سماح من زوجك واعرفي كيفاش جيبيهالو غير بالعقل وزيدي اتسامحي مع عجوزتك وقوليلها كانت قادرة ترقد في الصالون علاش حتى تدخل لشامبرتي وهادا الي قلقني...هادي لازملها تصرف الي يحطها عند حدها...ممكن تكلفي واحد يخبر زوجها بالتيليفون بلا ما يعرفو ويقولو على واش راهي تدير بالاك يديها معاه وين يخدم ويبعدها عليك وهادا الحل خليه للاخير...درك لازملك تشغلي وقت زوجك خليه هو شغلك...عيطيلو في كل وقت اتقربي منو...اخرجي وادخلي معاه..بدلي اللوك وما تعطيهاش فرصة تحسك ضعيفة ولا ناقصة جمال عليها...ماراهي لاشابة لا والو غير تزين في روحها قدام راجلك باش تحلى في عينو...
حنا سوانينا عند طبيبات وولدونا قابلات ووالله تحسي روحك ميييتة بالحشمة حتى وين هي تحوس خو راجلها يولدها...لا اله الا الله...
اختي ما تسكتيش على روحك حاربيها بكل ما تقدري بلا ما تخسري راجلك راهي غايرة منك واليوم رقدت في شامبرتك وحدها غدوة تلقايها قدام زوجك بالاكي...ربي معاك وانشا الله الي راهي تخططلو يدور عليها

[sunshine2013]

السلام عليكم
اختي حاربيها بسلاحها و شوفي النتيجة علابالي انتي متربية بصح سكتي الحالة و خلي راجلها كي يجي و رايحة نمدلك. مثال حاولي طبقيه و نشوفو النتيجة باش تلقاي الحل
كي يرجع راجلها من الصحرا ولا ماعلاباليش و يكون في الدار و تكوني نتي و راجلك في الشومبرة ادربي حطة اخر صيحة القصير و الماكياج كيما دير هي يعني راجلك و اخلعيه و قوليلو رايحة نسلم على خوك و نسقسيه على حوالو ادا راجلك. قالك. هادي غير مقبولة استري روحك. قول شكون قال هاك ممكن يقولك. الدين قوليلو الدين نتا علاه ما طبقوش و فهميه في الجاست اللي درتيه و نتي اكيد ما تخرجيش من شومبرتك. هاكاك و اذا جاتو عادي يا ختي واش نقولك. لازم انسان متدين عاقل و كبير في راسو يهدر مع راجلك.
و شومبرتك. ديري مفتاح احب من احب و كره من كره و اللي ما يحشمش نتي ما تحشميش و رجعينا الخبر
و نسقسيك. نتي دايرة حجاب و لا لا و راجلك. قالك. ديريه ولا لقاك دايراتو؟ راني حابة نفهم عقلية راجلك. و خوه و ان شا الله ما يكونش من النوع اللي ما يغيرش على مرتو و ما يعرفش الحرمة
انا ووالله و نلبس كيما سلفتك. و ندور قدام راجل وحدوخر ووالله راجلي يذبحني
ربي يهدينا

[*الجنرال*]

المعمول به عندنا- و في اغلب البيوت على ما اعتقد- أن مفتاح غرفة الزوجة - الشومبرة- يكون عند الزوجة طبعا و ليس العجوزة ،،، فتغلق باب غرفتها بالمفتاح عندما تغادر الى بيت اهلها - و زوجها غائب طبعا-
المهم حل مشكتلك يكون في بيتك و ليس و انت عند اهلك

[**د لا ل**]

السلام عليكم

والله ياأختي نبهتك سابقا في الموضوع الاول من جراء التصادم معها لانها راح تقلب الطاولة عليكي بخبث وهذا ماحدث

بغض النظر عن ماحدث ...لحظة غضب ولم تتحملي الموضوع وهذا أمر طبيعي فلكل مكانه الخاص ولا يريد لأحد دخوله والتعدي على خصوصياته

أنا برأي ممكن تجعلي الامر لصالحك لانه انكشف كل شيء وصاركل شيء واضح لها ...وصارت تعلم مدى انزعاجك من تصرفاتها الغير مسؤولة تجاه زوجك

انا نصيحتي لك أن تستهدي بالله وتتصلي بزوجك وتستسمحي منه ومن والدته وتعودي لدارك وتحطي النقاط على الحروف معها ومع حماتك .....بما أنه تكلمت مسبقا مع زوجك في موضوعها

يباقلك حماتك وأختك زوجك إن كانت موجودة تكلمي بالعقل وبكل هدوء وعبري عن انزعاجك من تصرفاتها ومن لبسها وكلامها مع زوجك وأنه يجب ان تكون هناك حدود فنحن

لسنا في غابة ...وإن لم تعرف حدودها علميها مليح مالها وما عليها ...ياخي طبيبة المفروض تفهم

حاولي تثبتي وجهة نظرك بطريقة راقية ومهذبة .....أوصلي فكرتك بعيدا عن الصوت العالي والشجار

فرج الله عنك وأراح بالك

[sarl02]

خالوطة كبيرة ...تحركك جد طبيعي ولا داعي للاعتذار او استسماح احد ..فقط زوجك اشرحيلو الموقف مليح واكيد اذا كان اهمو امرك راح يوقف في صفك حتى ضد امه لن امه ايضا خاطئة 100/100 ...خلطي جدها تصفى ولا داعي للتراجع ..لان زوجك ضعيف شخصية على ما يبدو ..باش تلحق انها تبات في شمبرتك نورمالمو هو اقلبها قبلك انت لانها حتى هو لم تعمل له اعتبار ....زوجك يعلم جدا خبث عاته المراة لكنه لا يجرؤ على مواجهة الامر او انه عجبه الدور وراه عاجبو الحال ...اما بالنسبة لاخ زوجك فهذا ديوث لاقصى درجة ...وخلاصة القول لازم تخرجو مالبيئة المتعفنة هذه باي طريقة لانه يصعب التعايش مع هكذا قوم ما يعرفو حلال وحرام وحشمة ....وفقك الله

[دنيا الامل 18]

ارجعي الى بيتك معززة مكرمة و ارفعي راسك انت لم تفعلي اي شيء خطا زوجك اشرحي له الامر بطريقة دكية يعني خلات الدنيا ما لقاتش وين ترقد غير في غرفتك هدا غير مسموح تماما لو كان استسمحتك انت للمبيت لكان الامر مختلف هي فعلت هدا عن قصد وقد بينت نيتها حين قالت لك زوجك ما تستاهليهش تستاهلو هي كي عادت طبيبة باينة تغير منك و تحسدك على زوجك امالا من الان فصاعدا عامليها باسلوبها انت ما يخصك والو اما عن الجمال يمكنك الاعتناء بنفسك ولبس الملابس الجميلة وما تخليلهاش فرصة زوجك هدا فارغ شغل قاعد غير ليها المفروض طبيب النساء ما عندوش الوقت طبيب النساء اللي نفوت عندو يبدا الخدمة 7 صباحا حتى منتصف الليل اشغلي وقت زوجك المتبقي في اي شيء المهم يبتعد عنها اما عن زوجها عندما ياتي ادا كان جبدو الحكاية احكيلو كلش و ماتخافيش هل تفعل نفس الشيء عندما يكون زوجها حاضرا يعني اللباس ام تستر روحها لا تتراجعي انت لست مخطئة زوجك يجب ان يقف معك

[التـــــــــــــــــــائهة]

أم عروة ......بردتيلي قلبي




راني نغلي ...واش نقولك ولي لدارك و حطيلها الحدودو و التبهدايل تاعهم أما انت فحلة

[سحابة مسافرة]

كي ملقاتش وين ترقد علاه مرقدتش في الصالون و لا في بيت البنات ؟؟
هذي واعرة و ستوتة لازمك تكوني حذرة و يليقلها التحطيط باه تحطيها عند حدها
حيرتني كي قاتلك راجلك متستاهليهش ؟؟ هاد الجملة تبينلك بلي عينها عليه
مالا ردي بالك منها مليح
ربي يكون معاك

[صفاء الروح]

يالطيف راني مشوكيا
راهي حاطة عينيها عليه 200٪
واستخسراتك فيه
هاذي ليووم ترقد في شمبرتك غدوة تلقايها مع راجلك لقدر الله
مخافتش وهي بين روحين من ربي
راككي ماكيش غالطة وحقك كفاه ترقدلك فالشومبرا تاعك ؟؟!!!! عيب
ولعجوزة زعما كبيرة وتهدر الحق يالطيف
ارجعي ارجعي لدارك
متخليلهاش الفرصة راهي حاطاتك في راسها
اطلبي السماح من زوجك قنعيه بلعقل حتى يفهم
واحكمي مفتاحك تاع لاشومبر وحدك
وعسيها ب 4 عينين
ووكلي عليها ربي
وكيلها ربي

[اريج 07]

انا مع كلام الاخت ام عروة 100%100

اختي ارجعي لدارك و تهلاي في راجلك و حاربيها بنفس معاملتها

[أم عبد الله السلفية]

السلام عليكم
عليك بهذا الدعاء:" اللهم اكفينيها بما شئت"

[زبدة ذايبة]

حاولتي في مشكلتك أن تبعدي زوجك منها بأي أسلوب

يعني حبيتي تقنعينا أن زوجك بريء من كل مايحدث

وأنه لاحول له ولا قوة

وهذا لالشيء إلا لأنك تريدين أن إقناع نفسك أولا ثم إقناعنا بأن زوجك مخلص لك

وأن زوجة الأخ شريرة وساقطة

مدار المشكلة برمتها ينبني على تصرفات زوجك

لو ماوجدت هذه المرأة القبول من زوجك والرضى لماكانت تمادت في الموضوع

ففي غياب زوجها يوجد يقاياه والمتمثلة في زوجك الذي هو شقيقه

والأدهى والأمر رضى زوجك بمعاينة زوجة أخيه والاطلاع على عورتها حتى وإن كان هذا من صميم تخصصه

فقد كان من باب الحياء والدين وحفظ أخيه الغائب في عرضه وذلك بأن يرفض هذا رفضا قاطعا

إلا أننا وجدنا العكس

إذن

فيا أختي العزيزة أعيدي حساباتك في علاقتك بزوجك

وحافظي على أصول بيتك وحياتك الزوجية

وانظري للمشكلة التي أنت فيها بكل شجاعة

فصورة الزوج الطيب ( النية) التي حاولت إقناعنا بها لاتنطبق على زوجك مطلقا

فلاتكذبي على نفسك لأن المشكلة واضحة وظاهرة رأي العين وأنت لاتريدين تصديقها

الحل:

ذكري زوجك بضرورة تقوى الله وحفظ عرض أخيه

لأن هذا النوع من المشكلات عواقبه وخيمة ونهايته خسران الدين والدنيا

ضياع للأعراض وضياع للأسرة والدين

لازلنا نتألم من الفساد الذي عم الشوارع والمؤسسات وهاهو ذا يدخل البيوت عنوة ليحطم آخر معاقل التربية والأخلاق والدين

فماعسانا نقول سوى إنا لله وإنا إليه راجعون