انا و سلفتي شراكة في زوجي

[مشكلتي]

السلام عليكم
انا وحد المرة حطيت موضوع نحكي ع سلفتي قتلكم اي هبلتني هي بزاف شابة و قارية و قلتلكم لبستها مفضوحة بزاااف قدام راجلي و حنا كامل ساكنين في فيلا العائلة و قلتلكم لا امل نخرج بداري وحدي كنت دايما نقول بللي راني نغير منها برك بصح صدقوني راهي بانت مع الوقت ولات تديرلي في المكرا مهما حكيتلكم ما تتصوروش يعني ؟؟؟؟

سلفتي راجلها يخدم بعيد شهر معانا و شهر لالا و هي حامل في بداية حملها صدقوني وليت انا و ياها شركة في راجلي تعيطلو طوول في التيليفون منها ليه ارواح اشريلي ارواح اديني لدارنا ارواح خرجني ساعات نسمع صوتو وما يطلعليش كي نهبط نلقاه خرج نعيطلو يقلي اني جبت القضية لفلانة

تصورو تلبس القصير و البانتاكور قدامو نووورمال نكونو في لاشومبر تاعنا تعيطلنا اهبطو اقعدو تفرجو معايا قلقت وحدي
علاقتي ولات متوترة بزاف مع راجلي هو مالقا وش يدير الصح هو خاطيها هي اللي تصرفاتها كل تنارفيني بصح لعبتلي ع المورال راجلي مسكين كل يوم نتشنف عليه
المهم اخر واش دارتلي
انا راجلي طبيب امراض نسائية هاك اليوم قاعدين مع بعضانا حطت ايدها ع كرشها و قاتلو اعمو وكتاه نجيوك باه تديرلنا فحص راجلي شاف معايا قالها انا مرتي كي كانت حامل كانت تسويفي عند طبيبة و صح قاللها هكداك خير
قاتلو لالا انا نحط فيك غير انت ثيقة مادا بيا تبعني انت و انت لي تولدني دبر راسك انا تشوكيت كالعادة تعاركت معاه و اخر كلمة قالهالي ماتدخليش في خدمتي


هاداك ليوم قاتلو ابعثلي هاد التصاور لراجلي محبوش يتبعثو من عندي واش نقلكم :o:o كيما صور الفنانات اللي نشوفوهم في التيليفزون :o و لي غاظتني قلبي يتقطع كل ما راجلي يفتح وحدة

اكيد راح تقولولي راجلها وينهو في لحكاية راجلها معندوش مشكل بالعكس هو لي يعيطلو يقلو تهلا فيها و اهل زوجي يموتو عليها و يموتو منها في نفس الوقت كي راهي طبيبة

ادعولي ربي يفرج عليا

[jasminaty]

معرفتش علاه حسيت بأن تصرفاتها متعمدة من حكايتك ...الله يهديهاا كاين عباد نحير في تخمامهم لا هي لا راجلها ، مع انه الدين حطلنا ضوابط تحددلنا الصح من الخطأ
اكيد راني حاسة بيك ...كي شغل ضرتك .. وش نقولك ابقاي متيقظة الدنيا مفيهاش لمان .. علاش محاولتيش تواجهيها و تقوليلها احشمي فيما معناه

ربي يفرج عليك و يهنيك مع راجلك و يبعد كل اللي يفسد عليكم حياتكم ...

[أم اسحاق]

ياختي باينا هاذي ماتحشمش تصرفاتها ماشي منطقية الله يهديها ويهدينا يارب
واش ننصحك حنونتي كوني اذكى منها
لازم كي يدخل راجلك لدار يلقاك في قمة الجمال

[jasminaty]

شرح حديث (الحمو الموت)


عَنْ عُقْبَةَ بْنِ عَامِرٍ رَضِيَ الله عَنْهُ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: "إِيَّاكُمْ وَالدُّخُولَ عَلَى النِّسَاءِ فَقَالَ

رَجُلٌ مِنْ الْأَنْصَارِ يَا رَسُولَ اللَّهِ أَفَرَأَيْتَ الْحَمْوَ قَالَ الْحَمْوُ الْمَوْتُ".

أخرجه البخاري (5/2005 ، رقم 4934) ، ومسلم (4/1711 ، رقم 2172) .


قال الإمام النووي في "شرح صحيح مسلم": قَالَ اللَّيْث بْن سَعْد : الْحَمو أَخُو الزَّوْج , وَمَا أَشْبَهَهُ مِنْ أَقَارِب الزَّوْج :

اِبْن الْعَمّ وَنَحْوه . اِتَّفَقَ أَهْل اللُّغَة عَلَى أَنَّ الْأَحْمَاء أَقَارِب زَوْج الْمَرْأَة كَأَبِيهِ, وَأَخِيهِ, وَابْن أَخِيهِ, وَابْن عَمّه, وَنَحْوهمْ.

وَالْأُخْتَانِ أَقَارِب زَوْجَة الرَّجُل. وَالْأَصْهَار يَقَع عَلَى النَّوْعَيْنِ. وَأَمَّا قَوْله صَلَّى اللَّه عَلَيْهِ وَسَلَّمَ (الْحَمو الْمَوْت) فَمَعْنَاهُ

أَنَّ الْخَوْف مِنْهُ أَكْثَر مِنْ غَيْره, وَالشَّرّ يُتَوَقَّع مِنْهُ, وَالْفِتْنَة أَكْثَر لِتَمَكُّنِهِ مِنْ الْوُصُول إِلَى الْمَرْأَة وَالْخَلْوَة مِنْ غَيْر أَنْ

يُنْكِر عَلَيْهِ, بِخِلَافِ الْأَجْنَبِيّ. وَالْمُرَاد بِالْحَمْوِ هُنَا أَقَارِب الزَّوْج غَيْر آبَائِهِ وَأَبْنَائِهِ. فَأَمَّا الْآبَاء وَالْأَبْنَاء فَمَحَارِم لِزَوْجَتِهِ

تَجُوز لَهُمْ الْخَلْوَة بِهَا, وَلَا يُوصَفُونَ بِالْمَوْتِ, وَإِنَّمَا الْمُرَاد الْأَخ, وَابْن الْأَخ, وَالْعَمّ, وَابْنه, وَنَحْوهمْ مِمَّنْ لَيْسَ بِمَحْرَمٍ.

وَعَادَة النَّاس الْمُسَاهَلَة فِيهِ, وَيَخْلُو بِامْرَأَةِ أَخِيهِ, فَهَذَا هُوَ الْمَوْت, وَهُوَ أَوْلَى بِالْمَنْعِ مِنْ الْأَجْنَبِيّ لِمَا ذَكَرْنَاهُ. فَهَذَا

الَّذِي ذَكَرْته هُوَ صَوَاب مَعْنَى الْحَدِيث.

[الزوجة البارة]

احقريها اختي و حطي الخطوط الحمراء مع راجلك

[~رآقية بأخلآقي~]

لا حول ولا قوة الا بالله

لازم راجلك هو اللي يدير موقف ولازماتو يعرف بأنو اللي يصرا راهو حراااام عند ربي ابحثي في هذا الموضوع أكثر و جيبي الأدلة والحجج المقنعة وابداي نتي بالتغيير مع اخوته الاخرين يعني اخرجي امامهم بالحجاب متصافحيهمش متكثريش معاهم الهدرة و...و.. واذا سألك جيبيلو الأدلة والحجج اللي قريتيهم وإذا مسألكش نتي اللي قدميهم له ولازم هذا الشيء يكون في أقرب فرصة لأنو ربي سبحانو ما حرم حاجة علينا إلا وفيها مهلكة لكن احنا ربي يهدينا

[*أم سجى*]

يا ختي قلقتيني طلعتيلي السكر هذا جياح من جياح وغباء من غباء الله يهديك يامخلوقة راه صاري فيك الباطل وانتي ساكته.....ملقيتش وش نقولك كفاش تخلي سلفتك تتجاوز حدودها مع راجلك لهذ الدرجة .... قلقتيني راقدة على وذنيك الله يهديك يامخلوقة

[ايمان4]

انت راكي تكبري فيها برك ... البونتاكور و اللبسة بلاك هي متقدمة و سيفيليزي و جايا من المدينة و زيد هي طبيية بلاك تكون شافت الدنيا .. و ما تتعمدش و انت فهمتيها هاكك اما بالنسبة انه يسويفيا هادي خدمة راجلك راهو جينيكولوغ ... عادي في اطار عمل كما راه يفحصها يفحص غيرها انت كبرتيها و درك تخسري معيشتك و تنكديها بغيرتك

[sarl02]

هناك حلقة مهمة جدا في قصتك والكارثة ان لم تكوني منتبهة لها ..قصتك كلها مفهومة من الجملة الاخيرة الي اكتبتيها ..قلتي انو زوجك طبيب وهي طبيبة وزوجها ليس بمستواها اكيد وانت كذلك خارج حلقة العلوم الطبية...يا اختي بين هاته المراة وزوجك كيمياء خاصة بهم وحدهم كاطباء ...واكيد هي ترتاحلو ومنجذب نحوه اكثر من زوجها الي راه يحرث فالصحراء مسكين ...وزوجك اكيد وصلو السينيال وراه ضارب النح وعاجبو الحال يعني حال الكيمياء ...لكن يخشى التمادي معها في وجه اخيه عكسها هي تماما فهي اكثر جراة وذكاء في هاته العملية ...هذا هو التفسير المنطقي لحكايتك بنسبة كبيرة واعملي على تكسير حاجز هاته الكيمياء بذكاء ورديلنا الخبر .

[jasminaty]

هناك حلقة مهمة جدا في قصتك والكارثة ان لم تكوني منتبهة لها ..قصتك كلها مفهومة من الجملة الاخيرة الي اكتبتيها ..قلتي انو زوجك طبيب وهي طبيبة وزوجها ليس بمستواها اكيد وانت كذلك خارج حلقة العلوم الطبية...يا اختي بين هاته المراة وزوجك كيمياء خاصة بهم وحدهم كاطباء ...واكيد هي ترتاحلو ومنجذب نحوه اكثر من زوجها الي راه يحرث فالصحراء مسكين ...وزوجك اكيد وصلو السينيال وراه ضارب النح وعاجبو الحال يعني حال الكيمياء ...لكن يخشى التمادي معها في وجه اخيه عكسها هي تماما فهي اكثر جراة وذكاء في هاته العملية ...هذا هو التفسير المنطقي لحكايتك بنسبة كبيرة واعملي على تكسير حاجز هاته الكيمياء بذكاء ورديلنا الخبر .



والله كان في نيتي قول ذلك .

[لحن الحياة.]

سلفتك كيما قلتي فاتنة الجمال + طبيبة ++++++++++++ ذكية صفات يتمناها كل الرجال بصراحة ونتي فتحتيلها مجال دير فيك المنكر
ربي يفرج

[----------]

اختي حاولي انت تجبدي زوجك ليك ..
تجملي ..البسي ملبيح
و اقراي فيما يخص علاقة الرجل و الأجنبية و حاولي توصليهالو بطريقة جيدة مثلا قوليلو اليوم قريت كتاب ولا سمعت حديث ديني و قوليلو واش سمعتي ...
حاولي تكوني قريبة منو قدر المستطاع
ربي يكون فعونك أختي

[----------]

اختي حاولي انت تجبدي زوجك ليك ..
تجملي ..البسي ملبيح
و اقراي فيما يخص علاقة الرجل و الأجنبية و حاولي توصليهالو بطريقة جيدة مثلا قوليلو اليوم قريت كتاب ولا سمعت حديث ديني و قوليلو واش سمعتي ...
حاولي تكوني قريبة منو قدر المستطاع
ربي يكون فعونك أختي

[لمسة ابداع]

الله يكون في عونك راكي في موقف لا تحسدين عليه
بما انها ذكيه اكيد حست بلي تغيري منها على هديك تستفز فيك وزيد خوها حاللها العين
المهم ديري بروحك ما شفتيش و سمطيها وحطي الحطة هدا هو الحل
سلفتك وخوها متفتحين بزاااااف

[nadjet boumaraf]

يا اختي لعزيزة انا نعطيك كل الحق ليك تغيري منها ونقولك هي حاطة روحها زينة وقارية عليك وشايفة روحها عليك انتي متهمكش هيا يا لوكان تكون ملكةى جمال نتي تاني زينة وشابة على هادا زوجك راجلك ودارك مرتوا نصيحتي ليك انك تجبدي راجلك عليها بكلالطرق متخليهش يقضيلها ربي يسهل عليها عندها شيخها ومتخليهاش تحكي معاه بزاااااف وكي تحكي في حدودو لانوا كون تقعد العلاقة بيناتهم هك راح تتاثري نتي ويروحلك من يدك وتم تطفر فيك وتولي حياتك جحيم ...انتي اعرفي كيفاه تجبديه ومتزيديش تقارني روحك بيها قداموا ولا تنقصي من روحك انتي وريلوا سلبياتها وقوليلوا الدين ميقولش هك الاخلاق وووو وهو تم كي يردها للعقل يولي يبعد عليها لانوا والله متصلح مرا تلبس هكا قدام سلفها مهما كان شوي احترام وربي يسهلك ورانا كامل عندنا ازواج ونحسوا ببعضانا

[sarah ortho]

يا اختي لعزيزة كي تداربي مع راجلك تزبدي الطين بلة وتفرح هيا وكلي امرك لخالق هو يتولاها والبسي انتي تاني الميني والبونتاكور.واكتري من الدعاء لان الامر ابتلاء وسلفتك مشكلتها تحب كل الرجال يخسرو فيها غير هيا يعني تحب الأنظار

[فاصلة]

الغلطة تاع راجلك وتاعك. هذا الشي كله حرام. لازم تفهميه بلي حرام وتوضعيلو حدود ما يتجاوزهاش. وقضية التعري قدامو لازم تنتهي ما شي حالة .اهدري معاها ولا تأخذك في الله لومة لائم

[ع.عيسى]

ديري بالك منها هي تتحرش بيه

[ام رضوان]

يالطييييييف والطف بينا
هذا راجلك تليقلو. ضربة لراس باه يفيق راه منوم ولامهبول
يااختي تاج المراة حياؤها وانت راكي تحكي في كلام تتزلزل فيه الارض
هذا الشيء لازم ماتسكتيش عليه
يخي اخو زوجك مش ماكل لحم الخنزير لانو اللي ياكلو يرجع دايوث ما يغيرش على عرضو
والله وانا نقرا في مشكلتك بغيت نطرطق من الغيض فمابالك انت وزيد تحوس يولدها هو ياخاه ياخاه
هاذي راهي تستفز فيك وعينها على راجلك ولقاتك في طريقها ولا كانت تحبو من قبل وماطارلهاش
ربي يصبرك برك
اختي ادعي ربي يجعل كيدها في نحرها وقولي اللهم اكفنيها بما شأت
ربي يفرج عليك اميييييين

[jasminaty]

[قصيها عليهم ....هو و هي
هي تبين في روحها لا حياء لا حشمة و هو ... لازم يدير حدود ياختي راه راجلك و الا متحركتيش نتي راها تزيد سلفتك قاتلها الفراغ و عاجبتها روحها و بلاك عجبها راجلك و حسداتك عليه و استخسراتو فيك ..شافتو الانسب ليها راكي عارفة طبيب و طبيبة و الخرطي .. و حبت تعيش دور مرتو... وعلى حساب مقلتي نسات بلي راها متزوجة ... ودير من التحت لتحت حركات النساا اللي متدرقش .متلعبهالكش قع تفتح ... قلها اتفتحي بعيد علي انا و راجلي هذي مملكتي ومدخلك فيها ..
املاا ديري موقف متقعديش تدوسي معاه برك حطي حدود ملازمش يتجاوزوها في زوج كما الخرجاااات مع بعض ينساااهاا و زيد التلفونات منها ليه و القصراات و الدصارة لازم تحبس و العراا يا سيدي يروح كيشوفها يتعامل بحزم وين راه غض البصر ... التعامل يكون في إطار الاحتراام برك كما من المفروض يكون ...ع الاقل يبرأ ساحتو لخطر هي تتقصلها نهار اللي يقصهالها هووو
و زيد نتي من جهتك بينيلها بلي مش عاجبك الحال مش تروحي تدوسي معاه اثقلي و اتهلاي في روحك و وضحيلها الأمور اللي معجباتكش لتنساا و تحسبو راجلها و دايما اجبديلها على راجلها و خلي عندكم وقت خصوصي مع بعض متخليهاش تدخل ع الخط ديماا ...

[**د لا ل**]

السلام عليكم

برأي هي قليلة الحياء .... ولا يوجد مصطلح آخر يبرر تصرفاتها أما زوجك عاجبو الحال على مايبدوا

اعتقد انه مش واجب عليه ولا فرض عليه ان يقوم بزوجة أخيه لديها أهلها أوأخوها في غياب زوجها أقرب لها من أخ زوجها تروح عندهم او يتكفل والد زوجها بها كبقية الناس

هي تتقصد ذلك لانه كما ذكر الاخ سابقا في تعليقه توجد كيمياء بينهما اضافة انه زوجها ماعمرش عينها ......فاحذري يااختي

لا أرى الحل في التزين ولا فاللباس لانك تفعلين ذلك أكيد ....إذن فالحل في تغير الحال ...والله لا يغير ما بقوم حتى يغيروا ما بأنفسهم

الحل الأمثل بنظري هو تغير السكن أو تواجد زوجها بصفة دائمة ممكن تحشم شوية وتتقي الله في زوجها

لان المواجهة معها قد تنقلب ضدك وتزيد من تصرفاتها

صدق من قال إن لم تستح فافعل ماشئت

الله المستعان يا أختي

فرج الله عنك وأراح بالكِ

[هدآية]

صراحة المشكل كامل دارو راجلك
لوكان من النهار الاول دار حدود
ما يصراش هاك
على حساب هدرتك راه عاجبو الحال
بالاك كان تسحقيه انت ما يقيمكش
وهي يجيها يجري

ضرك صعيب باه تغيري الوضع
خاطر قلتي ما نقدرش نخرج
و هي راجلها بعيد
يعني ربي يكون في عونك برك

[ساجده 82]

سلام
والله ياخوتي ضرني قلبي .نهدر بالدارجه قالي هذاك لعجب نندب في وجهي .استغفر الله .استغفر الله استغفر الله.
قاتلك طبيبه شايفه الدنيا ومتقدمه .كارنفال في دشره....
متقدمه باش باش بااااش بالميني بالبونتاكوغ بالتلحلح والتملق مع سلفها .متقدمه فاش شافت الدنيا في مدرجات قسم الطب .يخي مدرج عندو باب ودروج ولابوغاتواغ معمر ....قراعي ووو .واش ولات ابن سينا.قالك شافت الدنيا.
راني مغتربه ..وتشوفي اللي شافو الدنيا .اقسم بالله ثلاثا ندخل عند الطبيبه تاعي. مريضه .نخرج صحيحه .قمه التواضع .قمه الرقي .ندخل نقولها جيت نشوف صاحبتي.روحي في بلادنا. قولي لطبيبه صاحبتي ..تقول شادين السماء يعلفو للناس في الدواء .كيما البقر .ويقولو طبيب متقدم.اوووف والله زيدت .جاني طبيب .راجل وحالتي استعجاليه وهو الوحيد المداوم
قتلو من فضلك نحب تكشف عليا امراه .جاء وراء ستار ويفهم في الساج فام واش ديرلي .
والممرضات يمسحو على راسي ويحنو عليا .هدا هو التقدم وهاذو اللي شايفين الدنيا.
تجي لسلفها بكل وقاحه تقولو تكشف عليا.
حنا حاملين ومزوجين وحشمانين نمشيو قدام اهلنا .ولانتناقشو في الموضوع ...علاش طبيبه لازم تتجرد من الحياء .
والله مانيتي نزيد ليسونس على النار ولكن اختي كان الله في عونك .الله يكفيك شرها
بدل ما تدابزي زوجك حطيها في بلاصتها .كيف راك امراه وانت اللي عايشه الوضع فكري مع روحك وماتستسلميش.
عذرا جماعه الطب انا لااعمم استسمحكم والله كاين ردود صراحه تخليك تهدر من جنبك.مره اخرى عذرا.

[ساجده 82]

قالك شر البليه مايضحك.
الاخت لمسه ابداع .هذا راه سلف ومرت خوه يعني مش خوت
كاين مناطق في الجزائر زوجه اخ الزوج يقولولها السلفه.

[kaderr09]

السلام عليكم
لا حول ولا قوة إلا بالله
أولا أنصحك من منطق الرجال و من جانب الدين أن تقترحي على زوجك أن تحكمي رجلا من أقربائك الذين يفقهون في الدين لأن الوضع إن كان كما وصفته ليس من المعقول شرعا و لا عرفا، لا أقصد تضخيم الأمر و لكنه الواقع الذي ذكرته أنت،حتى وصل الحد أن تقول له ’خرجني...!!!!’ ، هذه خلوة بأجنبي وفيها حديث مشهور ثم إن كلا منهما متزوج!!!!!
ثم الإطلاع على الصور!!!! وما أمقته في بعض الرجال هو دراسة التخصصات النسائية و الله أعلم بالنيات.
وهذا لا يعني تعنيف زوجك و الشجار الدائم بل النصح و تحكيم الشرع لعله لا يعلم الأحكام لأنه ربما انشغل بطب النساء عن تعلم أحكام الدين. و الله ولي التوفيق.
و من جانب آخر فهذه عبرة أخرى للنساء و البنات المتابعات لمثل هذه المواضيع، فقبل الزواج يسأل عن العمل و المنصب عادة. و لكن المطلوب هو الدين و الخلق، ونتائج الزواج التي نراها في أيامنا مما يندى له الجبين ليست إلا لتحكيم العواطف و الأهواء.
اللهم سلم سلم.

[دنيا الامل 18]

انا رايي تهدري معاها مباشرة حتى وان وصل الامر لقطع علاقتك بها و زوجك توقفيه عند حدو لانه هو اللي عاجبو الحال ومستمر في افعاله عن قصد لو كنت في مكانك لن اصبر دقيقة واحدة على هدا الوضع

[سحابة مسافرة]

عاى حساب حكايتك و قولك هذي لا حياء لا حشمة
انا ندبر عليك احكميها هي و حمري فيها العين مليح و زيدي لراجلك
و ربي يكزن معاك و متزيديش تخليها تهدر معاه بهاذ الطريقة و متخافيش منها
ربي يكون معاك