راه عقلي قريب يخرج من فظلكم نصيحة لوجه الله

[مشكلتي]

السلام عليكم
اتخاذ قرار الزواج اصعب وين حسيتلو قرار بنسبة للبنت
انا بنت عمري 24.5 سنة هدا العام كملت قرايتي ماستر
والله حمد لله انا متخلقة خاطني ماشكل مدينة نلبس مستوروهادا تمسخير تع تلفون ولا فيس جامي وزيد شكلي حمد لله ماعندي مانقول
نموت على طياب وكوزينة نبغي نتعلم خياطة وووو كون نصيب نعرف على كلش حمد لله مكاش لي متعرفنيش ومتتمنانيش
المهم في هدا العام ربي فتح ليا ابواب وجاو خطبوني 4 اشخاص المهم الاول كان رفض من عندهم
وزاوجين في دارنا معجبهمش ومنبعد عرفت بلي طفل مريض ووحدخرين سقسا عليهم خويا قالك طفل تاع لادروق
يعني بمختصر حتى حد ما عجبني
هدا اسبوع جا واحد من طرف زوجة خالي هو ابن اختها
ضلات تشكر فيه حتى اني قبلت يجو لدار
المهم هو يسكن على برا يعني في جبل + وحيد في دارهم +وعندو 3 اخواتوا بلا زواج اكبر وحدة 42 واصغرهم 29 امو وباباه وهو مسؤول على دارهم
شرط عليا لعجار وقالك خدمة مكاش ونبقاو مع دارنا مع العلم انو هو مكمل قرايتو كما انا لكن في العسكر يعني هو ميلتار مزالوا 6 سنين وبانلي خاطيه نساء وو قالك كنت معول نفري كلش في هدا اكتبر يعني مجرد يشفني صاي انا معجبتنيش تع راجل يشوف وخلاص اموا يعرف عقلتي منبعد يقرر.
دارنا قبلوه بيسك قالك قلاليل مي انا راني متردة فوق الحد قتلو اعطني فرصة باش نخمم صليت استخارة مي مزالني متردة
مع العلم اني جامي تمنيت هدي لحياة تع نسكن على برا ولعجار ولخرجة مكانش ومكاش انترنت
والله من كثرة تخمام نقص 5 كيلو في اسبوع
منيش باغية نتكبر عليهم او مامتو خايفة من لبنات ومعيشة معاهم وانا والفت في دارنا وحدي راني مخلطة كامل لي سقسيتهم قالو متتقلقيش

[مصطفى_س]

السلام عليكم و رحمة الله

الامر في غاية البساطة قولي لماماك منيش باغياتو و هي تخبر الوالد و مكانش زواج بالسيف

قضية انترنت و خرجا برا مكانش هذي خممي فيها مليح ..انت راح تبني اسرة ماشي راح تكونكتي و الخرجة ماشي كل يوم خرجة

استخيري مرة و اثنين و ربي يجيب لي فيه الخير

[الجزائريه]

استخيري_ربي_يجعل_لكي_فيها_مخرج

[لحن الحياة.]

كي راهم قاااااااااااااااااع هاذ الافكار في راسك
ما تقبليش

[Bibicha01]

مدام استخرتي و مزلتي مترددة مكالاه

[اريج 07]

اختي قبل ماتخمي في النت و الخرجة خمي في مسؤولياتك اتجاه هذا الراجل و عايلتوا الا كنت راح تقدريلها ولا لا مي الا راكي تخمي في النت و الخرجة وووو اقعدي في داركم خير انا عن نفسي نلقى راجل متهلي في خاوتي و والديه و خاطيه النساء و لباس عليه نقبل و مكانش عايلة مافيهاش مشاكل لكن نتي تقدري بتعاملك تكسبي العايلة كل و تحبيهم فيك مام خوتوا كي يلقاو مثل اخت ليهم اكيد مراحش يقيسوك و الراجل مافيه حتى عيب و كي يكون هو لباس عليه وعلاه تخمي في الخدمة لمرا ليها دارها و راجلها و ولادها و الخدمة حاجة زايدة برك

زيدي استخيري و ربي يقدملك لي فيه الخير

و راه كلشي مكتوب

[sunshine2013]

اختي راكي ماتزوجتيش و راكي تعاني نفسيا غير ماكاﻻه ماكيش مرتاحة غير اخطيك. انتي عايشة زي و معيشتهم زي راح توقع مشاكل زيدي اصبري

[om mouez]

يا اختي استخيري احسن و انا من عندي انتي انسانة مثقفة وعندك ماستر كاش ما بقات مرا متخرجش و دير العجار جدواتنا وطيشوه وانتي 24 سنة انا نسميه سجن مش زواج مزلتي صغيرة ومزال يجيك مكتوب خير من هذا يبقى هذا راي الشخصي وانتي شوفي مخروجك الا عارفا روحك تنجمي لهذه المعيشة اقبلي وربي يهنيك اما بالنسبة للانترنيت راهي حاجة مهمة جدا في وقتنا الحالي مش بالضرورة انك تكونكتي رايحا تحتاجيها في كلش حتى في الطبخ هذا ابسط شئ

[dr_amal]

مزلتي صغيرة علاه ترغمــي روحك تعيشي معا انسان فرض عليك قوانين اشبه بالسجن
لدرجة ان مجرد التفكير بها مزعج فما بالك تعيشيها صح زيدي اصبري يجيك نصيب أحسن

[أحلام مؤجلة]

انا في بلاصتك مانقبلش العجار والخدمة مكانش والخرجة مكانش اتغميت في بلاصتك مازلتي صغيرة ويجيك راجل اللي يعرف قيمتك خمي مليح هذا سجن مش زواج

[لحن الحياة.]

شوفي بمنطق

العجار نقدر نقبلوه الخرجة مكانش ممكن ما نخدمش ممكن مؤبد مع دارهم ممكن
بصح مؤبد مع خواتات مستحييييييييييييييييييل نقبل لانني اخت و عاااااااااااااااااااارفة شعور الخواتات تجاه الكنة وتكذب عليك وحدة تقلك راكي كي اختي
انا اووووووووووووووول شعور نحسو تجاه الكنة انها هاذ المرا سرقتلي خويا خصوصا اذا كانو متعلقين بيه والكنة بالفطططرة تحب تدي هذاك الراجل ويعيشو في دار وحدهم و تتفنن في دارها في الطياب واللبسة والديكور ووووووووووو

[أمة الله 12]

سقسي مجرب و ما تسقسيش طبيب، نصيحة ما تبنيش حياة على حشمة تاع ساعة و تفوت،
مكانش كيما السكن المستقل لنجاح الزواج، لا دخلة لا خرجة ؟؟؟؟ وين صرات ع الاقل يقلك تخرجي معايا برك و نديك وين تحبي، مهم جدا التقارب في المستوى الاجتماعي و الفكري.
كوني صريحة مع روحك معيشة ما تقدريش عليها ما تضغطيش على روحكو هذا ماهوش تكبر، الله غالب كل واحد واش والف.
مزالت قدامك الفرص

[الماسة النادرة]

هذا انتحار بكل صراحة دار في الجبل وهذا الشروط كارثية

[دنيا الامل 18]

كون جيت في بلاصتك ما نقبلش اي حياة هده تسكن مع اهله وزيد عندو خواتاتو عوانس وما تخرجش وما تخدمش وانت عندك ماستر وساكن في الجبل وفوق هدا ديري لعجار صدقيني لن تتحملي حياة كهده خاصة ادا موالفة بحياة اخرى مازلت صغيرة وسياتيك غيره واحسن منه لا تقلقي

[خالد عنابي2]

ماهيش آفار خلااااااااااااص

[kika85]

حبيبتي نقولك غير اخطيك في رايي خاصة انك باينة مش موالفة هاد المعيشة...نحير في ناس كيما هكدا هوما في راس الجبل ورايح يدي واحدة من البلاد...وقارية ويحوسها ما تخدمش...شوفي ادا رفضتي هادا مش تكبر هو رايح يلقى الي على حسابو وكاين بزاف منهم كاين بنات قاعدين في الدار وموالفين بلا خرجة علاش حتى يجي ليك انتي الي موالفة حياة غير حياتو ويحوس يفرض عليك قوانينو...هو رايح يلقى الي تعيش معيشتو وانتي رايحة تلقاي الي يوالمك وزيد مازالك صغيرة...قضية انك تسكني مع والديه عادية بصح خواتاتو ما ظنيتش تقدري هوما راهم كبار عليك وزيد ممكن تكون بينكم حساسية انك قارية وبنت المدينة وصغيرة عليهم وزيد تزوجتي وهوما ربي مازال ما بعث نصيبهم...ربي يفرج عليك

[samara lara]

أختي بما انك مترددة لا تقبلي و هني راسك

[حذيفة بن اليمان]

يعني مادام انتي ماكيش مرتاحة لهذا الأمر انتظري خاطب احسن منه واذا هو باغي هكذا كاين بزاف بنات يستناو غير يتزوجو بأي الشروط

[مياسم الصمت]

السلام عليكم ورحمة الله و بركاته

يا أخت باين عليك انك رافضة الفكرة لكن العائلة مأثرة عليك
وانت بين عدم اقتناعك الداخلي و بين تأثير العائلة علي
فكري بالعقل حياة هذا الخاطب مختلفة تماما عليك
الفتاة اذا عاشت في المدينة صعب عليها انها تتأقلم مع حياة الريف او القرية فما بالك كما قلت في جبل
ما تكلم على الانترنت او الخرجة برا لانهم قضية تعود
و العمل كاين بزاف قاعدين في الدار و جامعيات و رفضوا العمل عن طواعية
لكن المعيشة في الجبل بالنسبة لفتاة ما تعودت عليها راح يكون صعب
اذا انت في بداية حياتك 24 سنة مازالك صغير ة و تخممي تقبلي بكل هذه التنازلات مالا لي و توصل للثلاثينات تقبل بأي كان
يا اختي الزواج مسؤولية و سكن اقصد بالسكن الطمأنينة و راحة البال
و الشي المستغرب حقيقة كيف اهلك مقتنعين بانتقالك للعيش في جبل و حتى خالتك يا هل ترى حابة تودك انت او تود قريبها
طبعا ماتي قاعدة نقلل من قيمة سكان الريف او الجبل لكن كل واحد و الوسط اللي تعود عليه
كاين من تزوجت للخارج و ما قدرت تتأقلم

الزواج يا اختي حطي في بالك ماشي تجربة تخوضيها و اذا ما عجبتك تخرجي منها

ربي يرزقك الخير

[أبوا مسلم الجزائري]

السلام عليكم
اتخاذ قرار الزواج اصعب وين حسيتلو قرار بنسبة للبنت
انا بنت عمري 24.5 سنة هدا العام كملت قرايتي ماستر
والله حمد لله انا متخلقة خاطني ماشكل مدينة نلبس مستوروهادا تمسخير تع تلفون ولا فيس جامي وزيد شكلي حمد لله ماعندي مانقول
نموت على طياب وكوزينة نبغي نتعلم خياطة وووو كون نصيب نعرف على كلش حمد لله مكاش لي متعرفنيش ومتتمنانيش
المهم في هدا العام ربي فتح ليا ابواب وجاو خطبوني 4 اشخاص المهم الاول كان رفض من عندهم
وزاوجين في دارنا معجبهمش ومنبعد عرفت بلي طفل مريض ووحدخرين سقسا عليهم خويا قالك طفل تاع لادروق
يعني بمختصر حتى حد ما عجبني
هدا اسبوع جا واحد من طرف زوجة خالي هو ابن اختها
ضلات تشكر فيه حتى اني قبلت يجو لدار
المهم هو يسكن على برا يعني في جبل + وحيد في دارهم +وعندو 3 اخواتوا بلا زواج اكبر وحدة 42 واصغرهم 29 امو وباباه وهو مسؤول على دارهم
شرط عليا لعجار وقالك خدمة مكاش ونبقاو مع دارنا مع العلم انو هو مكمل قرايتو كما انا لكن في العسكر يعني هو ميلتار مزالوا 6 سنين وبانلي خاطيه نساء وو قالك كنت معول نفري كلش في هدا اكتبر يعني مجرد يشفني صاي انا معجبتنيش تع راجل يشوف وخلاص اموا يعرف عقلتي منبعد يقرر.
دارنا قبلوه بيسك قالك قلاليل مي انا راني متردة فوق الحد قتلو اعطني فرصة باش نخمم صليت استخارة مي مزالني متردة
مع العلم اني جامي تمنيت هدي لحياة تع نسكن على برا ولعجار ولخرجة مكانش ومكاش انترنت
والله من كثرة تخمام نقص 5 كيلو في اسبوع
منيش باغية نتكبر عليهم او مامتو خايفة من لبنات ومعيشة معاهم وانا والفت في دارنا وحدي راني مخلطة كامل لي سقسيتهم قالو متتقلقيش

السلام عليكم انا أنصحك بعدم الزواج ولا عيب في الرجل حقيقة

ولكن ارى انك كما تقولين \\ حابة المدينة وتكونيكتي \\ واضح من

عدد المشاركات في عضويتك انك مدمنة نت والله اعلم لهدا اليوم

انت سيدة القرار لكن لقدر الله وتزوجت ويكون هناك مولود ما دنبه

وأنت بهده العقلية لا اعتقد انك سوف تعمري مع أي رجل هده رايي

الرجل الدي يطلب من خطيبته التستر هدا اعلمي انه رجل ومسؤول

على النقيض يا اخية عليك بمراجعة نفسك ودع الرجل وشأنه قبل ما

تصبح الامور معقدة اكتر

بالتوفيق

[أثيلة]

السلام عليكم و رحمة الله و بركاته
اختي بصراحة هدا ليس تكبر و لكن ان تتزوجي و يكون زوجك بعيدا عنك و لاترينه الا من الشهرين للشرين ربما فلما تتزوجين؟ ابقي في بيت أهلك افضل
انا مش نحرش فيك مي والله الزوجة لازم تبقى مع زوجها الامر صعيب بزاف عليها و لاني بنت عارفة واش راني نقول
و تاع العجار الشرع مافرضش علينا نغطو وجوهنا و لله العلم
و ايضا فالجبل عادي بالعكس تعجبني لو مش بالشروط هادو كلهم كنت نقولك وافقي مي هكا خممي مليح ماتغبنيش روحك تروحي ماتشوفي والو نهار كامل مربوطة في شمبرة مع ناس ماتعرفهمش و راجلك بعيد وحتى لو تتعرفي عليهم من بعد راح تبقاي غريبة مادام راجلك بعيد
سلام

[صفاء الروح]

راح تروحي للنار برجليك
اقعدي فدار باباك خير