خبيرات البقلاوة تاع العراس

[سلمى_2008]

السلام عليكم ورحمة الله وبركاته نتمنى تساعدوني امي كلفتها خالتي بالبقلاوة تاع العرس وحبت تسقسيكم هي ديما دير الحشو بماء الزهر تبلو مي قالتلها جارتنا ديريه بالبيض عادو كامل يديرو في تاع العراس البيض باش الحشو يجي متماسك هاذ الهدرة حبيتكم تقولولي صح ولا راهي حابة تجربها هك وخافت لانها تاع عرس والمقادير المضبوطة تعيشو

[بريق الدجى]

انا من لي خلقت و انا نشوف البقلاوة يبلوها بماء زهر و العسل هداك لي تتعسل بيه هو ليخلي الحشو متمسك اما البيض نعرف بلي بياض البيض ييبس و العلم لله
يزيد يدخلو الاخوات و يفيدوك

[شمس الملوك]

يااختي انا مازلت ماسمعتش حشو البقلاوة بالبيض يتلم بماء الزهر وتجعي عادي مايتفتتش اما البيض كيما قالت الاخت يبس خاصة اذاكان كاوكاو وطاب شوية مليح لاني جربت في الحلويات المعسلة مايجيش كيمانتاع اللوز طري فقط في المخبز يجي طري لخطراش مايطولش وغير يتلم البيض نحوه يعني واحد5د ومادام راه نتاع عرس ديرها كيما مالفة وتجريب تخليه مرة اخرى

[خوخة02]

سلام اختي
انا نخدم الحلوه بصح مزال ماسمعتش الحشو بالبيض هذا يخليها يابسة مع العسل من بعد يجمد شويه وخمي كيفاه تولي
شوفي ديري 3 اعبار كاوكاو ونص عبر سكر و مبشور القارص وشمخيه بالماء الزهر يعني غير افتليه كيما الكسكس
وجيك طريه وشاده روحها ومبروك عليكم

[إيزابيل]

عمري ما سمعت بالحشو يندار بالبييض شمخي بماء زهر بحيث يجيك كي الكسكس مالزمش يتشمخ بزاف باش يجي متماسك وبالتوفيق اختي

[abd_ser05]

هههههههههههههه هادي جارتكم بغات توخدكم بقلاوة اوملات ههههههههههههه

[حياتي نبع امل]

انا جامي سمعت بيها هاذي
اون بليس ادا حبت تجربها تجرب ف سنيوة صغيييرة للدار ماتريسكيش بتاع العرس

[HADIL2044]

حنونتي ديما الحشو تاع البقلاوة بماء الزهر
عمرنا ولا سمعنا بيها بالبيض على قدر ما سمعنا وشفنا وصفات

[سلمى_2008]

سلاام حبيباتي بارك الله فيييكن على المساعدة حبيت نشوف الاراء نتاعكم مي لقيتكم تصنعوها كيفنا قلت الي تصنعها بالبيض تقوللنا واش سر البيض هل هي فكرة جديدة للاعراس مثلا ؟
لانو تاعها تبعثهالنا وصح ديرها بالبيض تبان عادي يبان صح الحشو متماسك حبيت الي أكدلي هاذ المعلومة وزدت لقيت فيديو وحدة دارت ثاني العضام وسقسينا حتى وحدة تصنع الحلويات للاعراي نفس الكلام قاتلي ندير البيض علبيها تخلتط علينا قلت ندخل نسقسيكم المهم حنا رايحيين نديروها بماء الزهر وخلاص لانو تاع عرس ومرة اخرى نجربو صينية صغيرة سلااام حبيباتي

[samara lara]

نو نو نو ختي ما جيش بالبيض الحشو يولي يابس كي الحجر و متتعسلش امبعد

[ام صفصف]

اختي البقلاوة تلمي الحشو بماء الزهر وتزيديلو غير القرفة،والبقلاوة بالبيض مابقاتش بقلاوة غير يبدلولها اسمها

[فستقية]

اختي من زمان وحنا نديروا البقلاوة من غير بيض اعتقد راح يعطيها قساوة
بياض البيض البعض يدهن بيه الطبقة الاخيرة اللي تجي من تحت ويحطو عليها الحشوة مرشوشة بماء الزهر من بعد يدهنو وجه الحشوة بالبياض ايضا
ويحطو عليه الطبقة انتاع عجينة البقلاوة وفوقها طبقة ثانية ويدهنو بالزبدة وهكذا حتى يكملو والبياض يساعد الحشوة تلتصق بالعجين استيس فقط

[كريمة الجزائرية 48]

اختي يلا بغيتي تدي النصيحة الموالفة خير من التالفة ديرها كيما متعودة خير ملي تسيي لانو تاع عرس كي تبغي ديرها لدارها تجرب
البقلاوة الحشو تاعها يرشوه بالماء الزهر هاذي تاع البيض جديدة و بالنسبة لواش يلم الحشو هو السكر الي ديريه ففيه مع العسل

[مياسم الصمت]

السلام عليكم ورحمة الله وبركاته
انا الباقلاوة نديرها بماء زهر
لكن حبيت نفيدك في حاجة من قبل خدمت مقروظ سوريا
وكان الحشو مكسرات وسكروصفار البيض فقط لانه البياض دهنت الوجه به ومرغته في المكسرات
ودرته حربوش وقصيت غير شووية ما وصلت للتحت وطيبت الحروبش كما راه
ولما طاب كان متماسك روعة
لانه قبل جربته بلا بيض وخرج لي الحشو
لكن بالباقلاوة تجي متماسكة عادي المهم العسل يكون ثقيل لانه لما يكون خفيف هو اللي يخليها ما تكون متماسكة

[أم محمد اسلام]

صح سمعت يحلو حبة بيض في ماء الزهر و يبخو الحشو يقولو الحشو يجي متماسك انا ماما قاتلي عليه و ما يضرش البيض ما يدير والو بالعكس يشد الحشو

[سلمى_2008]

سلام بارك الله فيكم حبيباتي حبيت نقوللكم ماما دارت تاع العرس غير بماء الزهر وجات تهبل لكن انا قتلني الفضول ورحت سقسيت وحدة تخدم في المخبزة ومختصة في البقلاوة قاتلي نديىرها بالبيض تجي متماسكة وليت جربتها بالبيض سني صغير بقا لماما من تاع العرس المستلزمات وجاااات روعة هو لازم منحكموش على الحاجة حتى تتجرب الحشو متماسك اكثر من الي نديروها بماء الزهر فقط وجات طرية تهبل وحسب تجربتي تاع البيض احسن ههه ومنعرف والله فكرة جديدة

[ام ابتهال]

شكرا على المعلومة، ممكن المقادير المضبوطة لعدد البيض مع كيل اللوز او الكاوكاو.

[سلمى_2008]

سلام. العفو اختي درت ثلاث كيلات لوز بكيلة سكر درت كيلة متوسطة للبلاطو تاع الفور الصغير مع بيضة واحدة مع شوية ماء زهر وانا سقسيت المراة هذيك الي تخدم في المخبزة كيما قلتلك قاتلي ندير سني كبير تاع العراس في الحشو دير ثلاث كيلات كبااار مت كيلة سكر وثلاث بيضات مع وحدة فاني مع العلم حنا جامي درنا فاني في الحشو هي قاتلي ندير والله ذقت من تاعها جااات تهبل وتاع ثاني جات تهبل جاء الحشو متلاصق مع العجين الكبة تجيك معدولة احسن من الي بماء الزهر عن تجربتي

[ام ابتهال]

جزاك الله عني كل خير اختي.ساعتمد الطريقة بكل ثقة.

[أثيلة]

السلام عليكم و رحمة الله و بركاته
أختي لم يسبق ان سمعتو انو الحشو يديرولو البيض في خلقي وتاع عراسنا نديروهم فالدار و اخوتي كلهم يخدمو حلويات و يديروها بماء الزهر و تربح

[سلمى_2008]

البرنسيسية لمذا هذه العصبية اختي انا ثاني مصدقتش الفكرة لانو البقلاوة تقليدية وطول عمرها بماء زهر حنا ثاني مالفين نخدموها والحمد لله ربي يخليلنا سميرة ومنتدى اللجلفة الناس كامل عادت محترفة في الحلويات هذه فكرة جديدة حبيت نهار الاول نسقسيكم عليها كي لقيت مكانش حتى واحدة تعرفها قلت نجربها ونشوف ضقتها اولا عند المراة الي تخدم في المخبزة وهي اعطاتني ثقة قلت نجرب مفيها واالو ولقيتهااا هايلة وعن نفسي عجبتني اخسن بالماء الزهر وكل واحد رأيو لازم نحترامو اراء بعضانا والله كون عندي الصور راني حطيتهم سلااااااام

[سلمى_2008]

ضرك نحطلك رابط فيديو يوتيوب لقيتو بااش تشوفي بعينيييك

[ghaloula]

اختي عمرنما سمعت ديري فيها البيض نبلوها بماء الزهر خليها ترقد برك هذا هو سرها 👍👍👍👍👍👍👍

[yasmina mileuve]

حنا في الشرق في الشرق نبلو الحشوة بماء الورد و كون ديريه بالبيض تجي فيه الريحة ومايطولش و يفسد

[كوثرنيل]

انا نعرف في المخبزات اخدموها الكاوكاو بقشورو وغبرولو الريحة انتاعو احطو معاه البيض يعني ابلوالحشو بماء الزهر وضيفولو البيض بصح كما قالت الاخت لوكان تبليها بالبيض ما تقدريش تحتفضي بها بزاف وتفسد

[mamado71]

اختي بلي بما وما زهر واظيفي شويه زبده ولا مرقرين دائماً للخليط وسوف تاتي طريه فانا مجربتها