كيف انظف هاته الخزانة؟

[omelbanin]

السلام عليكم، شريت خزانة للاولاد بيضاء اللون ها هيhttp://www.up.djelfa.info/uploads/146968627582861.jpg

وحبيت نعرف هل هذا النوع من الخشب عندو produit معين نمسحو بيه ولا لالا.

وكي دخلت للنت يقولك امسحيها بالماء وصابون سائل تاع الاواني.

واش رأيكم ما تخسرش كون نمسحها بالماء ؟؟


ارجو منكم الاجابة :)

[mariamalak]

السلام عليكم
واش راكى ام البنين ان شاء الله تكوني على احسن حال
النوع هذا من الخشب شكلو شباب لكنو يحتاج عناية خاصة و خاصة اذا كانت الخزانة للاطفال
لانو يتاثر بالماء و يبدا يتفتت ردي بالك كى تسيقى نشفى ملييييح تحتها و ايلا حبيتى تنضفيها شمخى فوطة تاع الفيبر تجى كيما السربيتة و امسحى بيها و ارجعي نشفيها مليح بفوطة ناشفة
و حاولي تستحفظي عليها مالحل و التبلاع و كى تفوتى تركبيها فى بلاصة ما تحوليهاش على خاطر كانت عندي وحدة و خسرتلي
و ننصح الناس الي يشروها كى يجو يركبوها يستعملو لاكول مع هذوك اللي يركبو بيهم باش ما يتحركش

[mariamalak]

نسيتك و القجورااااا ايلا عندك اولاد عسيهم راهم يخسرو بلخف و تقعد عايبة بلا قجر ههههه
ايلا قدرتي شفتى كيفاش تركبي القجر ديريلو لاكول قاع وين يركب و ما ديريش حاجة ثقيلة فيه
و الله رانى ننصح فيك من قلبي على خاطر تاعى غاضتنى كى خسرت بدات بالقجورا طارو و مبعد الكربلاكى الي يجى ملور طار

[omelbanin]

شكراً حبيبتي ماريا ملاك، بصح كي قلتيلي تخسر والله غير غاضتني، وراح نعمل بالنصائح نتاوعك، شكراً للمرة الثانية :)

[mariamalak]

عفوا اختى كون تستحفظى بيها ما تخسرش ان شاء الله انا ما كنتش عارفة

[arwa alaa]

بصحتك ام البنين الخزانة
منعرفش كيفاش ينضفوها

[غزالة1]

بصحتك ام البنين و بصحة الاولاد

[omelbanin]

الله يسلمكم حبيباتي اروى وغزوولة.

[حياتي نبع امل]

انا عندي وحدة بيضا باللزرق فالحق مزالت جديدة. بالصح المكتب تاعها لي الادراج تاعو تكسرو. راكي تعرفي الاولاد ماعدا ذلك والله قعدتلي صحيحة الان عندها 8سنوات .ونمسحها بسائل الاواني ونعاود نشفها مليح هي والمكتب ولاتابل دو نوي والبونك تاعها فقط ك تسيقي حاولي ماتقيسيهاش بالما وماتخليش الما تحتها نشفيه مليح. والتحوال نظل نحول فيها وكنت نبدل الشومبرة تاع ولادي تان نظل نجر فيها من شومبرة لشومبرة والحمد لله مازالت جديدة.

[جهينة اليقين]

يا ام هارون انا شفت خطرة فالنت واحدة قاتك ديري قرعة خلطي فيها الخل الابيض وزيت الزيتون وامسحي بمنشفة ناشفة والماء راه يفسدها

[omelbanin]

شكراً لك حبيبتي، حياتي نبع الامل ريحتيني، وشكراً لك أيضاً حبيبتي ام راضية.

[زهور العمر اولادي]

انا من مدة شفت فيديو لاخت مغربية مدت تدابير بزاف في مطبخها بهاذ المادة mdf قاتلك امسحيه باي كريم مرطب مث نيفيا او الي عندك جيبي قطعة قماش و حطي لكري و امسحي قاتلك ينح ليطراس بصحتك

[omelbanin]

شكراً اختي زهور نجرب انشالله هذه الطريقة ونشوف.

[ابو نذير]

احسن حاجة امسحيها باللانجات تع les bebe.

[zokhrofa]

في آخر المطاف باش مسحتيه أختي أم البنين ؟

راه عندك 7 اشهر من امتلاكه ياك ؟

هل يمكنك التصريح بسعره اذا لم يكن الامر يزعجك طبعا ؟

[ابني نور عيني]

اختي انا عندي كيفها وننظفها بملمع الزجاج او الماء والخل ترشي غير شوسة وتمسحي مليح ترجع تشعل وماصرالها والو نتمنى نكون افدتك

[أميرة بيتها]

أحسن شي الخشب الطبيتعي هذا النوع يشتكو منهم بزاف كاين العرايس اللي يديرو شنابرهم هكا و يخسرولهم بالخف لازملهم عناية خاصة

[أميرة بيتها]

القجور حطي فيهم حاجات ماشي تاع كليوم باش ميحلوهمش الاولاد واستعملي القجور تاع بلاستبك ليراههم يتباعو للملابس الداخلية تاع الأطفال

[omelbanin]

السلام شكرا لكل واحدة اهتمت وجاوبتني .
زخرفة انا الان راني نمسح فيها بلانجات ونعاود انشفها بشيفونة ناشفة ومين ذاك انجوز عليها يالخل غييير شوية نمسحها ونعاود انشفها .
وبالنسبة للسعر شريتها بمليون وثمنمية من عند النجار .

[Nadjla05589]

بالبركة عليك ام البنين ولعقو بة لحوايج اخرين ان شاء الله

[أم سيفاكس]

انا عندي وحدة عندها اللهزيباركر10 سنين
تنظفيها بلافات بشوي ازيس او اي نوع اخر عادي المهم تنشفيها مليح وماتشمخيهاش فقط
وانا لقجور خسرولي عاودتلهم les glissières تسريهم عند كانكايري وتركبيهم او يركبهملك النجار عادي
الكنتر بلاكي تع الخلف ديريلوا une planche en bois على شكل مسطرة عريضة وسمريها من الوراء
من الاحسن بديرهالك النجار
وانا هاد العام عاودت سبغتها هههه
عل خاطر كانت تع بنتي فيها لون وردي
والان هي بدلتلها واعطيتها لولدي درتلها ازرق خرجت هايلة .
وتعاود تولي جديدة كل اللي شافوها ظنوا انها جديدة