زواج اختي مرتبط بتعاستي

[مشكلتي]

السلام عليكم و صح رمضانكم
خالتي تسكن في المانيا عندها زوج ولاد ولادها لاباس عليهم يعني عاداتهم زي عاداتنا يصلو و يصومو و ماديا مرتاحين جدا

جات في اول الصيف حكات معا والديا قالتلهم حابة ندي لبنات في زوج لولادي يعني حابتني انا و اختي لزوج و حطتها شرط حنا لزوج

اختي راح تهبل بالفرحة و توجد في روحها ولات تحكي غير على الموضوع هدا يعني نحسها كون ماتكملش لحكاية تهبل ولا كشما يصرالها ووالديا فرحانين
انا منحبش الزواج بالطريقة هادي و مرانيش حابة نروح و حابة نخدم هنا في بلادي و نديه جزائري و معجبتنيش طريقة خالتي تاع في زوج ولالالا
ماما لمحتلها بللي راني مش قابلة قالتلها ادا في زوج نجو بعد العيد ادا مقبلتش وحدة فيهم ربي يفتح من جيهة خلاف

المهم الدار و اختي معادييني معرفتش كي ندير

ملاحظة انا 23 سنة نقرا طب اسنان و كملت و اختي 28 قرات ترجمة و كملت و تخدم استادة ابتدائي
اختي قاتلي كون تضيعيلي هاد الفرصة عمري مانزيد نعرفك

[amoulette]

و لماذ ا التعاسة
"اذا جاءكم من ترضون دينه فزوجوه"
لا ارى سببا مقنعا للرفض ولكن انت ادرى بمصلحتك
الافضل ان تستخيري

[sarl02]

اولا طريقة الشراء بالجملة طايحة بزاف والتقدم لبنات الفاميليا لا يكون بهاته الطريقة...يعني تدي زوج ولا لالا؟؟دلاع هذا ول؟.....ثانيا الشيء الذي استغرب له هو خلعة العائلة الجزائرية ودهشتهم عند تقدم واحد ميقري فالخارج لبناتهم فتراهم لا يصدقون ويفرضون الزواج على بنتهم فرضا وكانها صفقة العمر وهذا الرجل سوف يخرج هاته العائلة من تحت الانقاض ...ونفس الشيء يحدث معك وعائلتك يا صاحبة المشكلة ...ربي اوفقك لما فيه الخير والصلاح .

[خالد عنابي2]

اولا في الشرع لا يجوز هذا النوع من الشروط للزواج ( تع في 2 ولا ماكانش )

ثانيا واش يحسابو فيها ؟ هذا زواج وليس شراء صناديق الموز بالجملة

ثالثا كل واحد ربي يسهل عليه اختك فرحانة بالموضوع فلتعمل لنفسها طريق ولكن بعيدا عنكي

[طيور الجنان]

اختي استخيري وان شاء الله يكتبلك ربي كل خير. بصح هاذي تاع 2ولالا ماعجبتنيش نقولك الصح ياخي عقلية ياخي.

[أثيلة]

لايسعني سوى القول ربي يجبلكم لي فيه الخير

[هبة الله 26]

الله يصلح الامور

[الراغبة فى رضا الرحمن‎]

عجزت عن النصح
الله يسهلك امرك عليكي بالإستخارة
ولفيه الخير ربي يجيبوا
إن شاء الله ربي يكتبلك لي فيه الخير ليك دنيا وآخرة
بالتوفيق

[لمسة ابداع]

لا الله الا انت سبحانك اني كنت من الظالمين
ربي يوفقك و يكي في عونك

[رزيقة16]

ربي يجيب لي فيها الخير نشالله ربي يسهل امورك اختي

[ing.Youcef]

نصيحةٌ إلى مقيمٍ في بلاد الكفر (http://ferkous.com/home/?q=art-mois-85)

لا تجوز الإقامة في بلد يظهر فيه الشرك والكفر إلا للدعوة إلى الله (http://www.binbaz.org.sa/fatawa/2158)

[جوهرة الشرق سكيكدة]

اول حاجة تعمليها صلاة الاستخارة

[الدفن قبل الموت]

حسنا...لنترك جانبا موضوع " la commande en gros " الذي تريده خالتك ،الذي هو بالاساس غير مقبول و فيه شيئ من عدم الانصاف لكم،حتى لا نقول شيئ من الاهانة.اذ انها تظن ان المال و الاقامة في بلد كالمانيا يخولان لها طلب ما تشاء ممن تشاء..
انصحك بمعالجة الامر من جميع الجوانب ووضع الامور في ميزان و ترجيح كفة عن اخرى.
انت طبيبة اسنان حديثة التخرج،درست 6 سنوات بالجامعة،بعدما تحصلت على تقدير " جيد " على الاقل في البكالوريا..ان كنت تريدين العمل سواء في القطاع العام او الخاص الذي هو مناسب للمراة المسلمة باعتبارها تستطيع العمل فقط مع النساء و الاطفال في عيادتها،فالامر متاح و تستطيعين البدء في الاجراءات من الان حتى و ان لم يتوفر راس المال،فالدولة تمنح قروضا بدون فوائد لاصحاب الشهادات لاسيما الاطباء..اما اذا كنت تريدين الذهاب لالمانيا و الاختيار بين امرين احلاهما مر،المكوث في البيت او اجتياز مسابقات و امتحانات ماراطونية لسنوات مع تعلم اللغة فقط من اجل ان يعترف بك كطبيبة اسنان و لتضطري بعدها للعمل في الاختلاط،فلن يسمح لك احد هناك بالعمل مع النساء دون الرجال...
الامر الثاني..انت تقولين انك تريدين جزائريا و تودين الاقامة في بلدك، قفي وقفة شجاعة مع نفسك و اساليها، هل يمكنني فعلا ان اضحي بارادتي لمجرد ارضاء رغبة اختي التي قد تتزوج في المانيا كما تريد و تجد نفسها تعيسة و تندم عن هذا القرار..فظاهر الامور شيئ و باطنه شيئ اخر،فالسعادة ليست في مال او بريستيج او في اقامة في دولة كالمانيا .
ثم انكما الان في بلد مسلم ،بالرغم ما نراه من فساد للاخلاق و انحراف،لكن يكفي ان ينشا ابناؤك على صوت الاذان و اجواء العيد و... فكيف نستبدل بيئة " اسلامية " ان صح القول باخرى كافرة لمجرد توفر متطلبات الحياة و مظاهر البذخ..
اختك ترى بانها فرصة العمر بالنسبة لها،ربما انتظرتها لسنوات و لا تنسي انها على مشارف الثلاثين.تخييب املها قد يسبب حساسية بينكما حتى لانقول العداء و الضغينة، على الاقل في الوقت الراهن،فان رفضت عليك تقبل الامر على الاقل الى حين تقدم عريس مناسب لها،عندها ستنسى الامر شيئا فشيئا و تعود المياه لمجاريها،لكن ان لم يحدث هذا ، فستحملك المسؤولية طيلة حياتها و يرجع الامر الى درجة ايمانها بالقضاء و القدر.....

[hana bekkar]

السلام عليكم اختي
شوفي انا من جهتي اكره هذا النوع من الزواج كثيرا
وما هذا الذي تشترطه خالتك ؟ يا زوج يا خلي ؟
قلها كل واحد حر في حياتو
انا مانقدرش ندفن عمري في حاجة منيش قادرة عليها ونتغرب على بلادي
واختك وعائلتك لازم تتقبل وجهة نظرك تاني
اختك هابلة تتزوج ولد خالتها
يا اختي الجزائريين غير هوما تلقى خير منهم بالف مرة
صح راحة اختك وسعادتها تهمك
ولكن راحتك ومستقبلك اولى
وتذكري مزالك صغيرة يا اختي
باه تروحي وتدفني روحك في امور الزواج من درك هادا شيء لا يطاق

[ضآحكة مستبشرة]

و الله هاذي حلوة
في زوج و لالا راهي تشري في القش تديكم في زوج و لا تبطل
ايه بطلي
سبحان الله الناس كيفاش تخمم
وحد الجياحة نيفو طايح بزاف
انتي احكي مع اختك و حاولي تفهميها بلي راكي حابة تكملي قرايتك و مراكيش حابة تبعدي على بلادك و بلي انتي حابة تديه جزايري و ربي يجيب الخير
و هي 28 سنة اكيد رح تموت من الفرحة لانو مصابت وقتاش جاها واحد
استخيري و ان شاء الله فيها خير

[آسيا 25]

و الله عجب الشي هذا, أختي أنا نقولك إذا راكي رافضة هذا الزواج ما تخلي حتى واحد يحتم عليك سبحان الله وأختك هادي قوليلها كي راكي حابتني نضحي بسعادتي على جالك عله ما تضحيش أنت على جالي?هادي أسمها أنانية مطلقة أختي صلي الإستخارة و ربي إن شاء الله يمشيها من عندو و ما يكون غير خاطرك بإذن الله.

[روح المي]

السلام عليكم أختي
خالتك مع إحتراماتي إمرأة متسلطة
وإن وافقتي على زواج بالجملة فحتى الطلاق يكون بالجملة بعيد الشر عنك
فكثيرا من زواجات التي تكون من أختين إن أخطأت الاخت الاولى تتحمل الثانيه معها
وتأكدي أنه إن قبلتي بسبب أختك فلن تعترف بجميلك ولن يعطيك أحد جائزة على نبل أخلاقك
وتدمير نفسك ...هذه ياتك أنت إستخيري الله \أول شيء
تذكري حياتك الخاصه لا أحد يحق له أن يضغط عليك ويجبرك
وإنهاحياة
وعمر كامل وليس يوم اويومين
أختك هي تريد ان تتزوج به فهي حرة

[sunshine2013]

السلام عليكم
اختي القرار يرجع ليك و نتي واش رايك. في العريس مرتاحالو او لا تعرفتو على بعض او لا ؟ و اقصد عن الطريق الشرعي و الخاطبين مفروض عليهم الامر من عند خالتك. او لا كاين عناصر ناقصة هدا من جهة،
من جهة اخرى، كل واحد و نظرتو للحياة و العمل و الزواج وووو
هي الفكرة مليحة تتوانسي نتي و ختك. بصح مش بهاد الطريقة نتاع يا اما او اما فالزواج يكون بالرضا و عن قناعة و الفرحة لازم تكون فرحتين فرحة اختك. و فرحتك. مش فرح وحدة و تعاسة اخرئ و على حساب الوضع انت و اختك. نظرتكم مختلفة عن الحياة
واش نقولك. استخيري و زيدي خمي و رايك. في الخاطب واش هو؟؟

[lalib40]

المشكل من ستختارين من العرسان ؟؟؟

[@رنيم الأمل في الحياة@]

اختي القرار يعود لك
خالتك مش محتمة عليك
و اختك وعلاه متشوفش ليك
تانيت القرار يرجعلك وحدك باه غدا متجيش و تقولي انتم السبب في المشاكل تاعي
ربي يسهلك بالتوفيق

[اريج 07]

والله مالقيت مانقلك راكي في وضع لا تحسدين عليه ربي يقدم لي فيه الخير استخيري اختاه و ربي يفرج انشاءالله

[trainer mebarka]

السلام عليكم
أختي الكريمة أبشرك فقط أنه لكل مشكل حل
أول شئ الاستاخارة بعدها ادرسي الموضوع من كل جوانبه رغم ان الطريقة التي جاءت بها الخالة في حد ذاتها مرفوضة
ان لم تري في الامر ما يشجعك على القبول الحل واضح هنا
أما أختك فان لم تقتنع بقرارك وأرادت منك ان تضحي من أجلها فاطلبي منها نفس الشئ أن تضحي هي من أجلك وإن كان إبن خالتك راغبا بها فسيأخذعا بدون شروط
أختي الكريمة الموضوع يحتاج لتروي فكري فيه فقط من كل الجوانب . ستجدين الكثير من الحلول انصحك بتدوينها بعدها اختاري ما يناسبك منها .
ربي يسهل قلوبنا معك

[..بسمة أمل ..]

منكذبش عليك سعادتي اولى من سعادت

اختي مانسخرش حياتي على جال اختي

نقعد مهمومة واختي فرحانة مكانش منها

وزيد حكايت زوج خوتات يتزوجو ب زوج خاو

متعجبنيش و شخصيا نحسها تزيد المشاكل بين

الاخوة و لخوتات نظن تقدري تدي فكرة من

رايي ومتنسايش هذي راها حياتك وشوفو

قلبك لمن يرتاح والله الغربة صعيبة مكانش

ما احسن من بلاااادك حرت في والديكم كفاه

مدوكم في زوج للبعد وحدة نورمال مي زوج

يااااسر ربي يسهلك ومتنسايش كل شيئ

بالمكتووووب

[eltorrero]

لا إكراااااااااااااااه استخيري ولا تخضعي لضغوط البيت لان هذا مكتوب فإن قدّر لأختك ستتزوج فلا تجعلي مصيرك مرتبط بها فبعد الليلة الأولى كل واحدة ستذهب في طريقها اما السعادة او الندم فكري جيدا الاستخااااااااااااااارة هي الحل

[مسك القعدة]

يا ختي إستخيري والخير فيما إختاره الله
لكن طريقة العرض لي جات بيها خالتك ماشي معقولة يا في زوج يا لالا هاذي تقال على سلعة ماشي على زواج
وباه تحطمي حياتك باه تفرح ختك هاذي ما يرضاها لا ربي لا العبد وخاصة في في أمر كيما الزواج
ربي يسهلك إن شاء الله