ارائكم تهمني تفضلوا بالدخول

[مشكلتي]

السلام عليكم ورحمة الله و بركاته
عندي مشكلة من مدة وملقيتش لمن نفرغ قلبي
المهم هاد المشكل تقريبا من 10 سنوات عايشة في الدار مع اخي وامي و الوالد متوفي لما كان عندي سنتين وعندي اخوتي اخرين متزوجين وكل واحد عايش وحده ( خاوتي كبار وعايشين في الخارج ويجو على انهم ضياف لا اكثر)
في داك الوقت كنت اخر سنة في الجامعة وكنت رايحة نتخرج. الحمد لله كانو يتقدمولي بزاف خطاب وكنت وافقت على واحد انسان ماشاء الله. في نفس الفترة قرر اخي يخطب وانا كنت شايلة هم الوالدة لانها مريضة وماتقدرش تخدم نفسها مين قال خويا راح نخطب فرحت لانه راح نطمن على امي
نهار لي خطب اخي وتفاهمو على الشروط قالنا انا قررت نسكن بوحدي قلتله والوالدة تبقى بروحها قال انا خلاص راح نخرج. الوالدة في داك الوقت انهارت وبكات وانا ماستحملتش قررت اني نلغي زواجي ونبقى مع امي لانها عاجزة ولا يمكن تعيش بوحدها.
من داك الوقت وانا نرفض الزواج او بالاحرى مالقيتش عرض يوالمني يعني مانخليش امي بوحدها وفي الاخير كنت نرفض لعله ربي يعوضني خير.( البعض راح يقول وعلاش ماتتزوجيش وتسكني مع والدتك. نقولهم انه الدار دار العايلة والدار الكبيرة ومن سابع المستحيلات نتزوج فيها)
اخي كان يعلم سبب رفضي للخطاب ولا مرة كلمني في الموضوع او حاول يناقشني
في البداية تغيرت معاملتي معاه يعني صارت معاملة رسمية فقط بعد ماكان اكثر من اخ كان صديق واب لكن مع الوقت بديت اتناسى وقبلت بالواقع لكن الان تغير الامر وماعرفتش وعلاش قلبي راه كحل من جيهته مانيش نحكي معاه يعني اذا جا للدار مانقابلوش وندخل لبيتي ونبكي خاصة مع معاملة الوالدة اللي اصحبت مختلفة اذا جا للدار هو وزوجته و اولاده تعاملني على اني خادمة ولازم نسهر على راحتهم هذا التصرف راه يوجعني وفي كل مرة احتسب الاجر ونكبر خاطري لكن طفح الكيل اصبحت عندي امراض مزمنة بسبب التوتر قرحة في المعدة وقولون عصبي اللي هلكني.
بديت نتبع عند اخصائية نفسية وين ماقنعتنيش بكلامها وانصفت اخي وراني معاها في شهرين الا انني مالقيت حتى فائدة
مشكلتي اني حبيت نتغلب على هذا المشاعر السلبية و الشعور بالحقد اللي خايفة يولي كره خاصة انه حرمني ايضا من بعض الحقوق الاخرى غير الحق بالزواج واعلم ان الزواج نصيب ولا اعترض فالحمد لله لكن نفسيتي مضطربة احتاج دعم نفسي او دعاء فاتمنى من الاعضاء اعطاء اراءهم سواءا ذكور او اناث
وبارك الله فيكم

[الرميصاءْ]

وعليكم السلام ورحمة الله وبراكاته
ربي يعوضك ان شاء الله بالجنة على التضحية من اجل والدتك
وحاولي تسامحي خوك باه تريحي
قال تعالى
الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ (http://quran.ksu.edu.sa/tafseer/katheer/sura3-aya134.html) (134 (http://quran.ksu.edu.sa/tafseer/katheer/sura3-aya134.html))ال عمران
وربي يفرج عليك

[نور لاتراه]

السلام عليكم
أكثري من الاستغفار والدعاء
يسّر الله حالكم ورزقكِ زوجا صالحا

[طاعة زوجي ..]

ربّي يفرّج عليك حنونة ويرزق من واسع فضلا مايسرّ قلبك وخاطرك
ثقي أنوّ اللي يدير حاجة لوجه الله عمرو مايخسر إن شاء الله وربي راح يعوضك خيرا بإذن الله

و الله ياأختي نحير في الرجال اللي يخلو أهلهم وحدهم ويروحو يستقلو بدارهم ، على الأقل يقعد واحد مع الوالدين ، راكم غير نسا في الدّار ومهما كان ماشي كيما يكون معاكم راجل يتلهى بأموركم

أنتي حنونة ماعليك غير تفهمي والدتك بالعقل بللي كي يجي خوك وعايلتو تخدم معاك مرتو وبزاف عليك كلش وحدك ، وخوك مهما كان ماتقاطعيهش أعفسي على قلبك وأهدري معاه لاحبّ كلام خفيييف المهم مايجوزش تقاطعيه نهائيّا

أكثري حبيبتي من الإستغفار والدعاء في جوف الليل وإن شاء الله تتحسّن الأحوال

[FELLA BIO]

إلهي يا كريم يا مجيب ارزق اختي الخير الكثير وعوضها خيرا يسعد بها قلبها
اللهم لا تجعل للحقد مكانا في قلبها وعدها سبل الرشاد آمين آمين

[خالد عنابي2]

ايوالاااااااااااا

يسمى انتي ضحيتي بزواجك ومستقبلك من اجل امك - وهذا من بر الوالدين -

وهي عوض ان تقدر لكي ذلك لا بل تحرص على ارضاء ولدها الذي تركها وفضل الزواج عليها

وتريد منكي ان تكوني كالخادمة لزوجته واولاده فقط لاسترضائه ؟

يسما في بالها راهي ضامنتك ولا خوف من تلك الناحية تستعبدك نورمال المهم ترضي وليدها العزيز لي رماها

نعم نعم اعرف ماذا ستكون بعض الردود

لكن دعوني اقول لكم ان البر بالوالدين شيئ والعبودية للاعراف الاجتماعية البالية شيئ اخر

ويجب على صاحبة الموضوع ان تكون لها وقفة ومراجعة هنا وان تتكلم مع امها وتخبرها انها كانت تستطيع ان تحذو حذو ابنها

وان برها بامها شيئ وان تصبح خادمة لزوجة ولدها شيئ اخر تماما

[لحن الحياة.]

ايوالاااااااااااا

يسمى انتي ضحيتي بزواجك ومستقبلك من اجل امك - وهذا من بر الوالدين -

وهي عوض ان تقدر لكي ذلك لا بل تحرص على ارضاء ولدها الذي تركها وفضل الزواج عليها

وتريد منكي ان تكوني كالخادمة لزوجته واولاده فقط لاسترضائه ؟

يسما في بالها راهي ضامنتك ولا خوف من تلك الناحية تستعبدك نورمال المهم ترضي وليدها العزيز لي رماها

نعم نعم اعرف ماذا ستكون بعض الردود

لكن دعوني اقول لكم ان البر بالوالدين شيئ والعبودية للاعراف الاجتماعية البالية شيئ اخر

ويجب على صاحبة الموضوع ان تكون لها وقفة ومراجعة هنا وان تتكلم مع امها وتخبرها انها كانت تستطيع ان تحذو حذو ابنها

وان برها بامها شيئ وان تصبح خادمة لزوجة ولدها شيئ اخر تماما




بارك الله فيك اخي
بصراحة يا اختي الله يكون فالعون

وهاذا خوك كي راهم كل خطرة يجوكم هو مرتو والعزوج ضرك ولات زينة و هاذا الحب وين كان ملي دارو دار وحدهم ؟؟ يجو يسكنو عندها ويخلوك تتزوجي او روحي واديها معاك و لي يتوحش اميمتو يجي يديها عندو يدللها و و تقعد عندو نهيرات

[**د لا ل**]

السلام عليكم

لاحول ولا قوة الا بالله

آلمني حالك يا أختي ...واللهِ

عسى الله أن يجعلها في ميزان حسناتك وأن يعوضك خيرا في الدارين باذن الله

لن أقول لكِ كلام واه بأن تنسي وتسامحي أخاك وانتهى الامر ...لأنه ليس بالسهل أعلم ذلك

لكن حاولي تفويض أمرك لله وحده واصبري وصابري واثبتي وباذن الله لن يضيع الله أجرك أبدا ....فهو لا ينسى أحدا من فضله ياأختي

يقول الله عزوجل **إنما يوفى الصابرون أجرهم بغير حساب**

جعل الله لكِ فرجا قريبا ورزقكِ الستر والعفاف أختي

[آسيا 25]

السلام عليكم
أختي الفاضلة بداية تحية إجلال و تقدير لك على تضحيتك في سبيل الوالدة, معليش الزواج قسمة و نصيب تأكدي أنو حتى لو قبلت بأحد الخطاب لما اكتمل زواجك به إذا لم يكتبه الله لك أما بالنسبة لمشكلتك مع أخوك أنا من رأيي ما تقاطعيهش باش ما تقطعيش صلتك برب العالمين لكن حاولي أنك تطلبي بنفسك من زوجة أخيك لما تجيكم تعاونك بضرافة يعني مثلا أجبدي موضوع أحكي معاها فيه ثم قوليلها راح الحال على العشاء هيا نروحو نوجدو و نكملو لحكاية بهاد الطريقة و راح تضطر تعاونك وإدا ما عجبهاش الحال أتأكدي أنها تعود ما تجيكمش وبالتالي تتهناي منها.

[روح المي]

السلام عليكم أختي
الحقيقة ربي يفرج عنك
بر الوالدين من أعظم أمور وأم باب من أبواب الجنة
من رأيي يجب أن تتخذي بالاسباب أمك لن تدوم لك ومعظم الأمهات أكبر أمنية لهم أن يستروا بناتهم فالزواج نصف الدين
لاتيأسي من رحمة الله وهنانجد امرين لا ثالث لهم اما تجدي زوج يسكن معكم او تشرطي ان تعيش معك امك وأرى أن يعيش معكم أحسن لانه هناك الكثير من الشباب لايستطيعون تحمل نفقت الكراء
وأخوك من رأيي لن يرفض لأن زوجته لن تسمح له بأن تعيش والدته معها
وأكثري من الدعاء وربي يفرج همك
لكن أين شهامته يترك أخته تعيش مع والدته وحدها
ربي يهديه
من رأيي يكون عندك راجل في دار أحسن لانه الحيط القصير نناس كل تستحقروا

[*أم سجى*]

اختي والله قرأت قصتك وأنا أتألم معك...أما نصيحتي لك أنك تقبلي بأول خاطب يجيك ماليوم ورايح مش معناه اي خاطب....وانما اذا كان لاباس عليه متزيديش تضيعي على روحك ...اسمحيلي راكي تخسري فحياتك .....امك عاشت حياتها وخلاص وخوك راه عايش حياتو ...راها مطفرة غير فيك خمي مليح....وزيد مكيش راح تتلامي ولا راكي مقصرة فبر والديك بالعكس......ونزيدك حاجة خوك راك مخبزها كي لقاك قاعدة فدار ومهوش سماع بيك أصلا ومذابيه تقعدي تخدمي على يماه ...ولكان تتزوجي اكيد راح يجيب مرته ويجي يقعد مع يماك.....امالا خمي مع روحك يالالة هاذي راها حياتك ونفسك لي تحاسبك........ملاحظة :هذه وجهة نظري نتمنى عدم التقييمات مالناس المفعمين بالمثالية

[قدور بن عاشور]

روحي تزوجي على روحك يالأخت، تطفر غير فيك أنت.
هل فكرتِ لا قدر الله و توفيت الوالدة، سيأتي الجميع لبيع البيت و اقتسام الميراث و هو حق لهم، أين ستذهبين حينها؟؟؟ يعطوك زوج دورو و في أحسن الأحوال تصيري من بيت لبيت تخدمي على أزواجهم.
مادامك صغيرة تزوجي بأول خاطب ترتاحين له، و إن قبل بالسكن مع والدتك فبها و نعمت و إلا فاستقلي ببيتك، فالرجل أولى بخدمة أمه.

و خوك هذا أناني و ما عندوش القلب، كيف يقبل بفسخ خطوبة أخته من أجل أن يستقل هو ببيته و يترك أمه؟؟؟

[أناييس الربيع]

نصيحتي لك روحي تزوجي صح بر الوالدين واجب ولكن امك مادومش والديك كذلك
ولي خلق مايضيع ، وربي يجيبلها شكون لي عينها ، وانتي علا تقلقي في روحك
اذا جاك لي ترضاي دينو وخلقو لا تنتظري ، كي تعطلي حياتك بيدك راكي تندمي
انا امي متوفية ولي أخت صغرى قررت عدم الزواج الى حين تتزوج وقد حصل ما اردت
مجرد زواج أختي تغيرت معاملة أخوتي لي وأصبح الجميع يراني عائقا على كتفه
رغم اني ماشاء الله من جميع النواحي
ولكن الزمن لايرحم

[(( هبة الرحمن ))]

السلام عليكم
شوفي أختي لو جاءك خاطب الان اقبلي وأمك لها رب ...وتأكدي أنه بعد زواجك سيتكفل أخاك بأمه .
ممكن أختي ترزقين برجل يعينك على الاعتناء بالوالدة ويتركك تذهبين إليها. ....
عزيزتي أمك مادوملكش وراكي تشوفي زوجة الأخ كي جي ضيفة راكي تخدميها مع ولادها ..أنت ثاني شوفي حياتك ....
أحيانا نضحي بمستقبلنا لكن لا أحد يقدر ذلك .

[سارة البوسعادية]

ربي يعوضك اختي تاكدي تماما ان الله يمهل ولا يهمل

[thorpe]

صبر جميل والله المستعان
اذا كنتي صادقة في كلامك كامل
تاكدي بلي ربي ماراحش يضيعك وموحال يضيع انسان باع نفسو لربي
بعض الاخوة انانيين وبعض النساء كي يجو تقول جاو من برا يا لاطيف ما يعرفوش قيمة الام عند ولادها انانية محضة
لمهم ختي صبري ونشالله ربي يعوضك بما هو خير
ماشي الزواج هو كلش فهاد الدنيا

[علي لقواطي]

الله المستعان