الفرق بين البر و الضعف2

[مشكلتي]

السلام عليكم و رحمة الله و بركاته

شكرا لكل من رد على مشكلتي و لكن اريد ان اعقب على بعض الردود القاسية!!!

انا لوكان ماجاش الراجل مقصر معايا عمري مانشكى من البروفيتاج تاع يماه كل حاجة منقصها عليا رمضان ماكليناش كما الناس كل شيئ بالشح و الكماليات ماشفتهمش عندو خلاص و الادهى و الامر انو ولى طامع فيا في اي دورو يجيني و يظل يشكيلي من الدين و كي يكون مع اهلو يسكت تماما :(

حتى العيد على حسابها ماكاش كسوة و انا عروس جديدة حابة نفرح خاصة انو ماعنديش كسوة الصيف كلش جهازي شتوي

على العموم ربي يسهل و يهديينا اجمعين :o

[زبدة ذايبة]

عندك شهرين زواج !!!!!!!!!!!!!!!

ماتغلطيش روحك وماتحاوليش تغلطي نفسك

رانا حابينلك الصلاح

هذوين قلتي بسم الله في الزواج

90% من حوايجك مالبستيهمش

وقلتي راجلك عندو الديون تاع العرس (لوكان مادارلكش العرس كانت ماتفراش لامعاك لامع داركم)

دار الدين وتحمل في جالك

وانت راكي تزني على خراب عشك

وش راكي حابة من المشكل هذا؟؟؟؟؟؟

حابة تداوسي معاه

حابة تشدي LA CAISSE تاع راجلك وتعودي تعطيلوا يصرف بالشوية

حابة مايمدش ليماه دوروا من مالو

حابة وين يجي يخرج دراهمو يسيقسيك ويطلب الإذن وانت اللي تقرري إذا يصرف ولا Non

مافهمتش !!!!!!!!!!!!!!!!!!!!

وضحنالك في الرد وقلنا لعل وعسى تغلقي باب الفتنة عليك وعلى راجلك

لكن مازالكي دوري وماراكيش رايحة تريحي حتى يرفدك يديك لداركم

انتبهي مليح لروحك وحافظي على زواجك

ديري كي شغل هذا الأمر مايعنيكش وسعي خاطرك ومهما كان ماتجيش انت في مكان الأم

يقدر يسمح فيك ومايسمحش فيها

ماعندك علاه تبداي حياتك بالمشاكل

شهرين بزاف شوية باش تبداي ديري هذ الملاحظات

راكي في قترة تجربة وهو حديث عهد بعزوبية

نسب الطلاق كبيرة و90% منها تكون في العام الأول من الزواج

ان شاء الله تكوني إنسانة عاقلة وتحافظي على بيتك


كي تكوني غالطة ماتستنايش نصفقولك على الخطأ

ودائما لما يكون الرد مايخدمش الهوى تاع صاحب المشكلة يزعف علينا ويتهمنا بالتجريح

ويبقى في الأخير الرأي ليك اللي تشوفيه من الآراء يخدمك ومناسب ليك ديريه

[Basketteuse]

يا اختي ماقريتش المشكل من الاول، بصح ننصحك نصيحة، في بداية الزواج، الراجل راهو يبقى مرتبط باهله كأنه عازب، اصبري عليه عندك غير شهرين!!!! وابديتي تشكي ؟ مع الوقت يوالف ،وإمكان لاه تمديلو الملاحظات يولي يخشن راسو ! خليه على راحته حتى يتأقلم مع اسرته الجديدة، صدقيني انا كون نحكيلك كيفاه كان راجلي تحيري، والله كنت نبكي ونلعبها توحشت ماما، وانا في قلبي نبكي على زهري بانتلي تزوجت رجل بخيل واناني،والله كنت نموت بالجوع ، والفليكسي قداه شهر بعد الزواج باه فليكسالي ماكانش يتوله ، وانا حشمت حتى قالتلو اخته! وكان مايحبنيش ندير القاطو في العيد يقولي اخته اللي تدير وانا بداري وحدي، وكلش يخصني يفوته عندها، ولا يشاورها !!! بصح انا ماهدرتش ومع الوقت ولى اللي موالف يديه عند اخته يجيبو ليا، بلا مادخلت ولا اظهرت اي انزعاج والحمد لله وبلا ماننسى الملابس والطبيب ووووووووو اصبري اختي ماتخربيش دارك

[روح المي]

ربي معاك ويصبرك

[صيد الصيد]

صبرا صبرا صبرا ...ربي افرج ...المتاعب المادية للرجل وعدم صبر المرأة ...اقول من باب التجربة إن لم صبري ...ستنغص حياتكما ....ويتحول بيتكما من بيت مبني على الحب والتضحية والتعاون ....إلى بيت مبني على الأنانية والمصالح المادية .....
احمدي ربك انك عارفة وين راهي اتروح ...الوالديه....فهما اأوسط ابواب الجنة ... وان صعب عليك الامر ...حتى ولو فرضنا ان امه كما وصفتها اوصيك ختي بالصبر ولا تقارني نفسك بغيرك ..وابعدي عنك الوساوس كفاه انا عروسة جديدة وما يكسينيش فالعيد وكيفاه اشوفوني اهلي وكي يسقسوني صحاباتي وووووو
احمدي ربك ..كاين رجال والعياذ بالله دراهم ما تبانش لا عند مرتو لا عند اهلو لا عندو هو ....يصرفهم في ابواب اخرى والعياذ بالله .......؟؟؟؟؟؟... والمجتكع مليء بهم
اصبري الي صبرت دارها عمرت ..