اخي والزواج

[مشكلتي]

السلام عليكم ورحمة الله صحا رمضانكم خاوتي وربي يتقبل ان شاء الله صيامنا وقيامنا ويجعلنا نصيب من جنته المهم:

خاوتي خواتاتي أنا عندي خويا كبير عليا حمد الله ياربي عامل وسيم لاباس بيه بسيارتو والكل يشهد له بحسن الخلق والسيرة حمد الله الكل يقول ماشاء الله عليه من ابن المهم خويا هذا اهدرلو على كلشي متهدرلوش برك على الزواج يصرف على الدار طايع حمد الله ولكن زواج خط احمر ماما وبابا يظلو وراه يولي يتعصب ويتحجج لالا مالقيتش لالا هكا سيليباتار خير المهم ماخلينا ما عملنا رقينالو والو تبعناه والو بابا حكا مع صحابو حاولو معاه دون جدوى خلاص
راني خايفة ويدا يريح حياتو كومبلي هكاك والله العظيم لبنات هما لي يبريزونطو روحهم ليه وهو يجي يقولنا ماما نتقولو يا وليدي اتستر وبني دارك مخصك والو وهو قالها لالا هكا راني مليح
ناس قاع مستغربين علاش موش دايرزواج فراسو جيران قاع زوجو وساكنين مع جيش نتاع لافامي كيتقولو شوف صغار عليك ودارو ديارهم يضحك ويقولها ويبنو ويطلعو للمريخ ماعلاباليش بيهم لا هما لا الخرطي ماما تظل تبكي كي يشوفها تقولو يا وليدي اتزوج هنيني نشوف ولادك مرا تعاوني تونسني يقولها خلاص ادا عييتي نجيبلك خدامة صحابو قاع مزوجين يظلو موراه كي كره منهم خطاهم يضلو يعيطولو والعمر راه فايت ومشكلة مقلقتنا يكون يضحك مبسط اجبدلو على زواج يقولنا انا نوض من جمعة نسا تعيي خطرا ماما قاتلو والله نروح نخطبلك حتى تلقاها فدار قالها ونورمال نخليهالكم ليكم ونروح
خويا بزاف وسيم ورياضي ولاباس بيه وانيق كي نشوفو نولي نبكي نقولو علاش يا خويا راك غابن روحك علاش هكا قاع علاش متزوجش مافهمناش والمشكل فرحان وعادي بصح اغلب الاوقات يريح وحدو يلعب لي جو ولا يونطريني ولا يدور بطونوبيل يدينا نحوسو بصح حابينو يتزوج شباب سوغتو وش يكون السبب رانا خايفين وراهو كبير ميش صغير ماما تقولنا نشتهي يقولي روحي خطبيلي يكون سعد الهنا ياربي فرج عليه وعليكم

خاوتي سمحولي يبلاك طولت عليكم تعيشو رانا في شهر مضان والاواخر ادعولو ودعو لكل شباب وبنات المسلمين بسترة بلاك تكون ساعة استجابة والله لا يضيع اجلر احد
صح فطوركم

[مراد سابقا]

انا في عمري 35 سنة

وقررت عدم الزواج وورغم انني في كامل قدراتي النفسية والجسدية

انا بصراحة اؤؤمن انه لم يبقى هناك زواج في يالجزائر

انا نعرف بزاف صحابي هوما طيبيين وزوجاتهم طيبات بصح بعد زواج 6 سنوات 7 8 تطلقوا

زيد وين راهم البنات لي يصلحوا للزواج في بلادنا

فيف الحرية وإذا قدرلي ربي نخرج من الجزائر نزوج بصح احنا لا والف لا

[*أم سجى*]

اخوك حالته فيها احتمالات....ربما أحب فتاة وتزوجت ....وربما به عين أو ماشبه ذلك وعليه أحسن حل رقيته ....ولا داعي للتعقيدات في أمور الزواج ...فهنالك العديد من البنات الطيبات مشاءالله عليهم والجزائر غنية بهن....

[mina1333]

ربي يفرج عليه ويرزقو ببنت الحلال آمين

[روح المي]

السلام عليكم
الحقيقة أنها مشكلة شاملة والكثير يعاني منها
الخلل في المحيط ربما او لتشائم او لعدم وجود شخص مناسب
فأخوك لا يريد الزواج لأجل الزواج وإنما شخص يخليه يزوج
وأكيد أن مواصفات شريكة حياته لم يرها في أي فتاة بعد
وحاجة مكتوب وزواج مثل رزق وقت الذي يأتي لايمسكه أحد
في رأيي موضوع شخصي يعني لا أنت ولا والدتك يحق لكم تدخل
عندكم حق نصح بصح راه كبير ويعرف صلاحوا
إحتمال أخر وأنه أب إمرأة وكره النساء من بعدها وعاهد نفسه أن لايتزوج بعدها
وإحتمال أن به مرض نفسي او روحي فاذا تأكدت بالرقية أنه سليم فهو قضاء الله في كل الحالات
وانت ادرى باخوك وربي يرزقه بزوجه صالحه

[سفيان31]

انا الحمد لله متخرج وموظف عند الدولة وعمري 30 سنه

ولا اريد الزواج ولا افكر فيه بتاتا البته


شئ عادي ماتكسروش رسانكم

[خولة لبابة]

السلام عليكم........
ماذا اقول لك اختاه فالزواج نصف الدين....و هو حصن من الوقوع في الاثام و غيره اجرنا الله منها.....ما استطيع قوله فقط ادعوا له و ان يكثرا والداك بالدعاء خاصة دعاء الام مستجاب خاصة في هذا الشهر الفضيل.....اعرف كثيرون مثل حالة اخوك و لكن الحمد لله بعد مدة صحيح تاخرو كثيرا لكن تزوجوا أخيرا.....فاسال الله جل و علا ان يرزقه الزوجة الصالحة التقية .....اللهم امين.....

[yacine-08]

استغربت من ردود الاعضاء
عمري 25 سنة و لو استطعت الزواج في عمر 23 لفعلتها
لماذا هذا التهرب من زواج لدى شباب جزائري !!!! فعلا هناك من لم يستطع وليس ميسور الحال
لكن عندما تسمع ان شخص مقتدر ماليا و قادر بدنيا و تتوفر فيه كل شروط للزواج ولا يتزوج والله غريبة و شيئ غير طبيعي الا اذا كان له سبب وجيه
من يقول لا يوجد نساء للزواج ، راك غالط 100/100 و من عيب قول كلام كهذا فانت تقذف بنات ناس بدون حق .
اعتقد ان اخوك لا يريد المسؤولية ؛ لا يريد ان يجد نفسه مربوط بعائلة عليه الاعتناء بها فهو مرتاح كيما راه لماذا التغيير مع انه من عير طبيعي لرجل ان يتجاوز التلاتينات بدون ان يجد عاطفة المراة .
عليكم ان تخرجوه من راحة التي تقدمونه له ؛ فاذا اراد شيئ عليكم القول له اجلب زوجتك تقوم بها وتعتني بك ؛ فلا يمكن امك و اختك تطيبلك و تغسلك ملابسك كل حياتهما

[melissa lola]

ربي يهديه ويرزقو ببنت الحلال

[حياتي نبع امل]

مازال ربي ما اذنش
ربي يرزقو ببنت الحلال

[لمسة ابداع]

مازال برك ما لقاش الطفلة الي تناسبو
نهار يلقى البنت الي فيها. اموصفات الي حابها او يجي يقولكم اخطبولي
انا نعرف ذراري بزاف. في ايلتنا كي
ما خوك.

نصيحتي بركاو ما تنسيستيو على الطفل مادامك وراه راح يبقى يسمط
خليوه براحتو اكيد رايح يجي نهار انشاء الله و يقولكم وجدو روحكم تروحو تشوفو لعروس

[mtoussa]

تتغير سيكولوجية الرجل عند اقترابه من سن الاربعين -40- فقد تبدو عليه مظاهر السكينة هذا ربما يجعله يفكر بشكل مختلف اتجاه المراة في هذا السن فهو يريدها ان تكون ناضجة العقل بشكل كافي كي لا تارقه -- تتعبه فكريا --

اقول - ربما اخوك في هذه الحالة

[ramzi-messi]

الرسول قالك من اراد منكم الباءت فليتزوج

و تجي انت و تقولي انا منتزوجش ياو ماراك مسلم ا سي محمد

اقتدي برسولك و صلي صلاتك و الابناء راهم زينة الحياة الدنيا

و الدنيا فانية خلي لك ولد ولا بنت يقولو الله يرحم ابي

فكر في هاد الشي

و الله عجيبة كرة القدم هههههههههههههه

انا راني في 22 سنة لوكان نلقى خدمة من غدوة نمشي نتزوج

االله يهديكو يا خوتي سيرتو جماعة الي تقولك مكانش بنات الزوج في بلادنا , الطيبون للطيبات و الخبيثون للخبيثات , شيء مفروغ منو انك انت راك مخبزها و خايف مرتك تجي كيفك و هادي حلها ساهل و هو

اتقي الله

[anissa90]

يمكن اخوك عنده مرض و محبش يقولكم

[(( هبة الرحمن ))]

السلام عليكم
الزواج مكتوب
يوجد ثلاث أسباب رئيسية لعزوفه عن الزواج:
1 ) - ربما سحر
2 )- يوجد امرأة معينة في حياته أو في مخيلته يبحث عنها.
3 ) - أهم مشكل والذي لا يمكنكم اكتشافه مهما فعلتم أن به مرض عضوي ولا يعلمه الا هو ( ؟؟؟؟؟؟؟؟ ) يمنعه من عيش حياة زوجية سليمة .

[سجل أنا جزائري]

كم عمره ؟

أهم أسباب لشباب الي ما يحبش يتزوج

أكثر الأسباب تلقاهم يوشوفو في زواج تقييد لحريتهم و خاصة اذا كان له علاقات كثيرة خارج أطر الشرعي يقولك نعيش حياتي قبل و غالبا هذا نوع تلقهم غير ملتزمين بالدين

و كاين سبب أخر ممكن مر بتجربة فاشلة فأصبح ينظر الى النساء نظرة سوداء

و اذا اخوك متأكدين من أنو ليس من هذا النوعين يبقى احتمال أنه له مشكلة في ميله للنساء او مرض و الله أعلم

[MuSLiMaN]

انا في عمري 35 سنة

وقررت عدم الزواج وورغم انني في كامل قدراتي النفسية والجسدية

انا بصراحة اؤؤمن انه لم يبقى هناك زواج في يالجزائر

انا نعرف بزاف صحابي هوما طيبيين وزوجاتهم طيبات بصح بعد زواج 6 سنوات 7 8 تطلقوا

زيد وين راهم البنات لي يصلحوا للزواج في بلادنا

فيف الحرية وإذا قدرلي ربي نخرج من الجزائر نزوج بصح احنا لا والف لا

اسمحلي خويا مي راك تخرط برك هذي ماهي هدرة و ماهو تفكير

زعما راه في عمرك 35 .

[علي لقواطي]

ممكن صرالوا مشكل مع الجنس الأخر قعد معقد منهم

[الفاتحة]

خليه على راحتو هو وحدو يعرف سبب عدم رعبته في الزواج ربما غير قادر جسديا يعني مريض أو نفسيا ليس له رغبة في النساء لا داعي لاجباره يخسر هو والاسوء تخسر بنت الناس لي راح تدمرولها حياتها اتقو الله