حقرتو بزاف

[مشكلتي]

مشكلتي مع خطيبي لي مسكين حياتو طول وهو حاب يخطبني حاب يكون معاي حبني مدة سنين ودار البوسيبل وجا خطبني ديما يحب يرضيني وكي نتضاربو مظلوم ويجي يحللني وأنا ندلل ومنرجعش ليه حتا يولي يحلل ديما يعيطلي يحب يحكي معاي بزاف فتلفون وأنا نليكديه ومنحبش نطول معاه والله المشكل ران مندمة بزاف سوايع نقعد وحدي نبكي يغيضني نحس كلي حقرتو نحس ران غالطة فحقو وكي نقولو يقولي مادرتيلي والو ومعاك نهنا ومعاك نفرح ووو...وانا والله ضرك ران مندمة بزاف وليت نشوف فروحي قاسية وأنانية وقلبي أكحل وما نستاهلوش وليت نكره نفسي ونكره حياتي حاسة بلي غلطت بزاف في حقو كفاش ندير ياربي راه ضميري يأنبني بزاف ران نبات ونظل نخمم واش ندير باش نرجعلو خيرو ساعدوني راح نجن ..

[nasser26]

واش نقولك ... الصبر عندو حدود وكل شئ عندو حد وصبرو هذا ماشي معناه ضعف منو معناه يحبك وماشي حاب يخسرك

حذاري تكملي في هذي العقلية معاه ومن بعد تندمي

[مصطفى_س]

مفهمتش كلمة خطيبي و حاب يخطبني

اذا كان تهدروا مع بعض بدون خطبة شرعية هنا حرام عليكم
اذا خطبك خطبة شرعية و انت موش باغياتو خليه يشوف حياتو و شوفي حياتك

[روح المي]

سلام اختي
متخافيش لانه القط يحب خناقوا وكون مجيتيش صعيبه ممعاه كان مل منك ومحبكش هكذا
ومدامك شعرتي بهذا الشعور معناها بديتي تميلي او تحبيه وبالتالي نقصي
اما رجال كامل يحبوا دلال وحقك تدللي بصح بطريقه معقولة فقط
لانه الشيء اذا زاد عن حده انقلب ضده

[michaella]

مادام يقول لك أنك لم تقوم بشيء يغيظه فلماذا تضغطين على نفسك هكذا و تعطين الأمور حجما أكبر من حجمها ، هو يتقبلك كيف أنت فيكفي أن تسامحي نفسك مادام مسامحك .

[~أميرة أميري~]

صايي لي فات مات ،،، هي صح مش حق عليك ديريلو هكدا لانو في الاخير انسان كيفك ويحس وحرام عليك نهار تخسريه تعرفي قيمتو بصح ديري في بالك للصبر حدود وراه يفوتلك برك لانو يبغيك بصح نهار يتعمر قلبو من جيهتك راح تاكلي روحك على جالو تبكي عليه الدم وماتلقايهش
مادام راه خطيبك حاولي تسقمي روحك وعقليتك وعوضيه في الشي لي فات كوني حنينة معاه وعامليه على انو راجل وكلمة ماتعلى فوق كلمتو واعطيه حقو عيب عليها المرأة ترفع صوتها فوجه راجل لانو اصلا ماتبقاش امرأة ماتبقاش عندها انوثة
ادللي من حقك بصح مش لهدي الدرجة وين تحتقريه وطيحي من قيمتو
حاولي تعرفي قيمة الشي لي بين يديك قبل ماتخسريه

[mrmilano1984]

حمد لله كاين نساء بنات فاميليا تاع الصح الصح وعندهم عقل الله يبارك يحترمو الراجل ويقدروه ويحشمو صح وبنات عائلة من الصح حمد لله كي بقاو رغم انهم قلال ولكن مازال الخير كي نسمعو ردود تفرح المراة الانثوية صح لي ماترفدش وماتعليش صوتها علي الراجل وتتكبر عليه مهما كان الرجل هادي صفة من صفات النساء الطيبات والفحلات

[لحن الحياة.]

اذا بقيتي بهاذ العقلية ......= سوف تخسرينه خطيبك
و اذا خسرت خطيبك ............= الناس تهدر عليك و تشيعي بلي انتي مش مليحة (و خصوصا انه السيد ناس ملااااااااح فوق الملح بكثير)
و لما الناس تهدر عليك...........= مستحيل تلقاي شخص مثل هذا تقبلك بعيوبك و التشوكير تاعك
بصراحة هاذا راه صابر عليك تحملك كل هاذ الأزمنة الغابرة و مزال متمسك بك

باختصار
فات وقت الندامة خلاص ضرك خططي للمستقبل و ما تزيديش تعاودي ذالخصايل راها قلة حياء وانساي لي فات كما قالولك

و ربي يوفقك و يفرج عليك

[mrmilano1984]

المشكلة نضن لي عندها عقلية تبقي هكدا والله اعلم عقلية تسلط وتشوكير وحب التملك والسيطرة علي الرجل والاخد بزمام الامور طبعا حسب كل راجل نهطك مثال لي صديق جد جد مقرب اليا تزوج وحدة يعني هي مثقفة جامعية ومستواها مقبول ايا هو كي خطبها عرف شكون دا مراة عاقلة ومتفهمة وتاخدلو راي وهو لي يسيطر عليها ايا مرة برك غلت معاه يحكلي حبت ترفع صوتها عليه نهار كي جابت بنت اولي دارت القرون قال لي والله قال لي قالها دك نبعثك لداركم تعرفي قيمة ونعمة الرجل خافت جدا ومن بعد طلبت منو السماح هام الرجال تاع الصح لي يقؤضو منطقهم وهيبتهم وشخصيتهم مش العكس مراة مسيطرة ومتسلطة وتزيد تتكبر وتتعالي والله نحير كي نشوف مرا تتحكم فيا نجن ونفقد صوابي الحمد لله ربي طيحنا مع نساء يخافو ربي وعندهم عقل ورزينات
اما هدا الرجل ماعندو مايعمل لان شخصيتو هكدا عاملة لدا نضن مستحيل يفؤض نفسو عليها ياربي يقوم بنفسو لو طاحت مع راجل اخر عقلية يوريلها معني الرجولة ويحطها في مكانها وحجمها

[~ فآيـزة ~]

ربي يهديك يا اختي ، ادا كنتي تحبيه و خايفة تخسريه بدلي المعاملة تاعك هادي ،،
الذين يسامحون كثيرا اذا رحلوا لن يعودوا أبدا، فحذاري !

[*أم سجى*]

اختي لي فات مات ومادام ندمتي وغاضك معناها بديتي تصحاي من غفلتك امالا اعطيك حقو وعوضيه لي فات خير من يبحث عليه في جهة اخرى ان شاءالله ميكونش ردي قاسي معاك...وفقك الله

[يسمينة البجائية]

هاااااااااااااااااااااااااابليك البنات اللي تستحق طريييحة قاسحة باش ما تعاوديهاش مرة اخرة ههههههه
واش نقول لك اختي وعلاش كل هاذ الاحتقار ؟ منين جات ؟ eceque تحبيه صراحة ولا لا ؟ و راني نهدر على الحب اللي مبني على العقد الشرعى ماشي خطبة نتاع الكلمة . هذا ماشي حلال سمحيلي نكون directe معاك
و زيد eceque راكي مستعدة تتغيري في أقرب وقت يعني المعاملة القاسية ؟ ولا ما تقدريش تتحكمي على روحك ؟
هذه الاسئلة لازم تكون ليك اجوبة صريخة لانو نعرف وحدة كانت ثاني مخطوبة و كانت مثلك تحتقر خطيبها و تتطاول عليه كي يتعاركو علما انها هي المذنبة .
و في الاخير تساءلت وعلاش دايرا معاه هاك ؟ و الجواب انو ما حباتوش يعني ما تحس بوالو اتجاهه لا اعجاب و لا مودة و ما تحبش تكمل معاه و خايفة من الزواج و كانت تتهرب منو و ما تتكلمش معاه بزاااف .يعني في الاخير خافت تدير خطأ تخليه و خايفة من اهلها و في نفس الوقت حايرة من احاسيسها و ما تقدرش تتفهم واش يصرالها يعني خلطت الامور بين الخوف و الارتباك و عدم الاحساس بالاي شيء اتجاهه . و في الاخير تفارقت معاه و ارتااااااااااااااحت كثيرا و لكن 4 سنوات بعد عاودت شافت خطيبها اللي تخلات عنو و لكن هذه المرة ندمت بزااااف لانو الخطيب راح لكندا باش يعيش هناك و عندو كلش و هي كي كانت بكري معاه كان خدام بسيط مع مشاكل في العائلة نتاعو و هناك كانت تحتقره . يعني ندااااامة لا توصف حتى انها كانت تحللو يرجع لها و في الاخير رفض كليا .

كل واحدة كيفاش بالاك انتي ماشي نغفس القصة و لكن فكري مليح و اطرحي الاسئلة وعلاش تحقريه ؟

[rose de sable s]

حاولي تحسيه بالحب و لحنلن لي يحتاجو
ابسط شئ عامليه مثل ما يعاملك

[yako02]

اذا هو حبيبك و خطبك يعني انتي حلاله الان وراح يتم الزواج انتي يمكن انغريتي بحبه و كي شفتيه يحبك حابة تذليه لكن يا اختيي اذا بقيتي على هذه المعاملة معاه راح يجي نهار و يحس هو بلي مكيش تبادليه نفس الاحاسيس و المعاملة اذا كنتي تحبيه لما لا تتوددين الية و تعاملييه بالمثل اما اذا كنتي لا تحبينه فصارحيه و اتركيه يعيش حياتو رغم اني نشوفها ظلم اكبر ليه لان هو راه يحبك بجنون و ذا حسرك اكيد راح تكون مصيبة بالنسبة له و صدمة كبيرة فاتقي اله فيه يا اختي اذا تحبيه و شايفاتو يستاهل انك تحبيه و يكون زوج صالح لا تفرطي فيه قبل فوات الاوان لان هو الان يتعامل معك باحاسييسه و لكن يا خوفي نهاركبريائه يحسو انجرح من اعز انسانة عندو واش راح يصير فيك اتقي الله فيه

[naimori]

كون لقيتي رخيس يوريك الزوتي ويدير فيك المنكر ويسوطك تولي لصوابك وعقلك افضل حل ديريه اعتذريلو وصارحيه اذا متحبيهش وحاولي تعوضيه بمعاملة مليحة ورزينة دافعي عليه الظاهر هذا رجل بيتوتي او حنون هذا النوع يطيح في المصفارات الي يتشوكرو عليه وهو يرضا لحقاش ميحبش العنف....

[الماسة النادرة]

انا نصيحتي من نوع اخر بلاكي كي يدك يدور عليك لانو كاين بزاف الي يحفى باس يديها وكي يديها يوريلها كمل واش دارت فيه

[الراغبة فى رضا الرحمن‎]

والله أختي محاباش نجرحك ولا حاجة اخرى كل الاأعضاء لهدروا معاك وانا خلاف حتى واحد فينا ما كامل الكمال لله
بصح ختي والله متعرفي للقيمة تاع حاجة حتى لتخسريها وفيهذيك اللجظة مبنفعش ندم
شوفي معايا حاجة خسرتيها فحياتك وندمت عليها ؟ خممت فيها . شفت الندم هذاك شحال قاسي ! أكيد متحبيش تزيدي دوقيه
نصيحة من اختك راجعي امورك اقعدي مع روحك ‘كاين زوج حالات إلا متحابيهش خلي راجل يروح فطريقوا وكيما يقولوا دوقا خير من بعد
وإلا تحبيه وتباني تحبيه .... راجعي روحك وحاولي يدلي تسلط تاعك بلحنانة راجل كيما يكون الحال الكلمة ترجع ليه تددلي بصح في حدود
صح يحبك وصح يعديلك لغلطات تاعك ويسامحك هاذوا كامل صفات تاع واحد يعزك كيفيض الكاس ........ غير ربقي ليستر

المهم هدي نصيحتي وسمحيلي الا غلطت معاك في كلمة
وإن شاء الله ربي يصلح لحوال ويجمعكم فالحلال ويسر اموركم

[thorpe]

صراحة تبانلي كون غير يخليك
باسك ماهوش تاعك بصراحة
لازمك داوي نفسك
اما بخصوص خطيبك هذا
غير بعدي عليه باسك عاجلا او اجلا تصرا الروبلا
روحي شوفي واحد لي يخرج عليك وخليه يشوف لي تخرج عليه
هكذا تبانلي وربي العالم

[saoud.badis]

سلام اختي
متخافيش لانه القط يحب خناقوا وكون مجيتيش صعيبه ممعاه كان مل منك ومحبكش هكذا
ومدامك شعرتي بهذا الشعور معناها بديتي تميلي او تحبيه وبالتالي نقصي
اما رجال كامل يحبوا دلال وحقك تدللي بصح بطريقه معقولة فقط
لانه الشيء اذا زاد عن حده انقلب ضده
:mh92::mh92::mh92:
لا أحب التعقيب على مشاركات الغير لكن الجملة الأولى في ردك استفزتني
إذا كانت هذه إحدى قناعاتك فقد تخسرين أعز الناس
قال تعالى :
"وَتِلْكَ الأيَّامُ نُدَاوِلُهَا بَيْنَ النَّاسِ "سورة آل عمران:140
آسف على الإزعاج لم أستطع تمالك نفسي .
صح فطوركم .

[بحيرة اللؤلؤ]

** السلام عليكم **

لديا بعض الكلمات ساقولها لك كفاكي دلال وعودي الى صوابك قبل ان تخسريه لان الرجال امثاله قلائل والدليل على ذلك صبره عليك كل هذا الوقت

اتمنى انني افدتك ولو بالقليل


** وتقبل الله صيامك **