المرة السابعة

[مشكلتي]

السلام عليكم ورحمة الله تعالى وبركاته
انا من قبل درت موضوع واقيل عندو عام ملي درتو
أنا قتلكم فيه راني خطبت 6 مرات يعني ست عائلات ورفضوني والسبة منيش عارف علاه لكن كل مرة وكيفاه يحتجوا بحجة .. أنا في بالي كاين سبة وحدة هما برك مايحبوش يصرحوا بيها وبعد كي قعدت وحدي وبديت نخمم لقيت مكاش سبب واضح الي يرفضوني عليه
خطر انا لباس بيا يعني موظف كيما الموظفين والشكل عادي كيما الناس الي راها في الشارع يعني مش معيوب
وزايد سمعتي واهلي لباس بيهم . بالمختصر منيش عارف علاه يرفضوني
المهم يخي امي قاتلي في رمضان نروحوا لدار فلان عندهم طفلة في سن الزواج
بصح انا رافض لانو النتيجة باينة اكيد يرفضوني كيما الاولين واصلا المرة السادسة والاخيرة مكنتش حاب نروح راها برك امي الي سيفت عليا . راها ظل قاعدة عند راسي نروحوا نروحوا وانا منيش حاب حتى مرة انفجرت في وجها قتلها انتي عندك راجل وما خصك تخطبيلو ويناههم ذو الي قيموك ويعطولك ستة مرات راني كرهت .
راني قتلها ماتروحيش خلاص راه ولى ماعندي حاجة في النساء ولا رغبة فيهم أصلا ذاك الميل ماعنديش
كرهت بصح أمي تظل واقفة عند راسي وكل مرة تمعنيلي البارح كي قتلها علاه ما طيبتوش ذيك الماكلة قاتلي ها جيب امرأة طيبهالك .
مع أن أمي عارفة بلي راني مرفوض من الجنس الآخر إلا انها تصر على ازعاجي

[~أميرة أميري~]

عليك بالرقية اخي هدا الشي راه واضح من كلامك قلت ماخصني والو وعلاه حتان يرفضوك؟؟؟ الشي راه واضح الرقية هي الحل
وزيد واش راك خاسر روح زيد شوف هدي الطفلة بالاك تكون من مكتوبك
وتفكر بلي عسى ان تكرهو شيئا وهو خير لكم
كون شاف ربي سبحانو فيهم خير ليك مايبعدهمش عليك
وادعي ربي يرزقك بالزوجة الصالحة ماتبقاش غير قاعد وتندب على زهرك وطلع في الحسابات وعلاش ماقبلوش بيا!!!!

[*أم سجى*]

بالفعل كيم قالت الاخت بلاك بيك عين أو سحر اذهب وارقي نفسك وتوكل على الله هذه المرة وأكيد راح تفلح هذه المرة ونسمعو بخبر خطوبتك ونفرحولك.....يلا بادر واخرج نفسك من قوقعة الاحباط واليأس راهم مايديرو والو ياكلو الصحه برك..........وفقك الله اخي

[dont be sad]

السلام عليكم صح رمضانكم

أخي أنظر للجانب المشرق و تأكد من أن إختيار الله لنـــــــــا خير من إختيارنا لأنفسنا
فعسى الله يحدث بعد دلك امراا
ان شاء الله ماهو قادم أحسن و أجمل ^_^

وأوافق إخوتي أن ترقـــــــــــــي حصن نفسك
الله يفرج علينا و عليك

[أم سلوى]

بالصحةةالهنا...راح تلقى الي توالمك..ادعي الله بالزوجة الصالحة وليس من هب ودب...زواج وفقط

[علي لقواطي]

شعور صعب أن تكون مرفوض من الجنس الأخر خاصة عند الزواج و كون صرالي أنا هذا المشكل رايح نبطل من فكرة الزواج.
شوف يا أخي راك فالشهر الفضيل أكثر من الدعاء
و ربي يرزق الزوجة الصالحة

[زهر التوليب]

اخي الفاضل لا تياس من رحمة الله يمكن هاذ المرة يتم االقبول
اعانك الله و وفقك

[الراغبة فى رضا الرحمن‎]

السلام عليكم
اولا اوافق الأخوات لهدروا على رقية حصن روحك عادي
اما على تلك ست مرات فالله لم يرى فيهن الخير لك وسيرزقك بإذنه زوجة صالحة فيها الخير الكثير
عليك بالدعاء
ولا تيأس ولا تحتقر نفسك هناك خلل في الموضوع نوعا ما قم بتحصين نفسك بالرقية ثم توكل على الله وتقدم لتلك الفتاة لعل فيها الخير وتكون مكتوبك
لا تنظر بمنظور سلبي للموضوع بل بإجابية ماذا تفعل انت بزوجة غير صالحة وتقعد في مشاكل وووو ......عندما يوصل مكتوبك لو يجمعوا كل الناس على بطل تلك الزواج سوف يحدث فالله قادر على كل شي
رزقك الله الزوجة الصالحة

[لحن الحياة.]

مما بيك والو
مكتوبك ما لحقش وخلاص اصبر بالاك تلقى قريبا اصلا الزواج فوق كل الحوايج مكتوب

ربي يفرج

[orchid violet]

لماذا ها التشاؤم اخي .مكتوبك مازال ملوصلش هدا ماكان..لا تدري لعله خير ..

[mrmilano1984]

اخي لاتقلق كل واحد ومكتوبو صدقني كاين لي خطبو النساء اكثر منك ياحسراه وعادي المهم زد شوف يماك حابة تفرح بيك ماتخليهاش تغب راها علابالها قيمة المراة والزواج باش تتهني معاك الكبدة واعرة بزاف وراها محروقة بزاف بزاف يماك زد شوف طيح مرا تسترلك دارك وتحصنك الزواج حاجة مليحة بزاف تولي عندك مرا تعتني بيك واولاد وعائلة وهكا مع حلالك تكون مرتاح اوك خمم مليح مليح لايعني رفضوك النساء يعني انت عيان بلاك كل وحدة واش راها تشرط اوك
ا

[- بصمة خير -]

لا تيأس
من بعد تكبر و تقول ياحسراه
لا حبست نحوس على الزوجة

مكتوبك مازال ما لحقش
و راني معاك صعيب الرفض
انت كمل حوس
و ان شاء الله تنقا بنت الحلال
اللي تنسيك في كل واش فات عليك
ييييييييارب
و انت قبل ما دير اي خطوة للزواج
و قبل ما يماك تهدر معاهم
صلي الاستخارة
و كمل في الخطوبة
كملت الحمد لله
ما كملتش
ربي يخلفك عليك
و في دعاء الاستخارة
في الاخير نقولو
و اقدر لي الخير حيث كان و رضني به







ربي يفرحك

[wafafawaafaw]

ربي يسهلك ان شاء الله

[kameljijeli]

السلام عليكم ورحمة الله وبركاته
ما دام أنك مستقر في عملك و شكلك عادي , أظن أن مشكلتك تكمن في نوع الفتيات اللواتي تتقدم إليهن. حسب تخميني, ربما تتقدم إلى من هن صغيرات في السن, أو من هن جميلات جدًّا ( لاأقول أنه ليس لك الحق في أن تفعل ذلك). في هذا الوقت, الكثيرات ممن بلغن سن الزواج, خاصة من جاوزت ال 26 سنة, يبحثن عن رجل يسترهن ولا يشترطن كثيرًا, لذلك أعد حسابتك, وابحث عن إمرأة '' شاربة عقلها''

[abdallah1983]

اعرف خويا كلشي بالمكتوب انا خطبت 10 المرات ومكان والو ودرك في عمري 33 وحمدلله ربي رزقني بزوجة اخلاق و خِلقة واهلها اكرم واجود ناس والحمدلله بيننا حب ود كون نوزعه على الناس يكفيهم ويقعدلنا شوية ....اصبر برك والله مكتوبك مجاش راهي تستنا فيك غير اتقي الله

[روح المي]

فما بالك بقتاة اعرفها خطبة وصلت حتى حوالي 15 ام الخطيب تحدد معاها موعد رؤية شرعيه واحيانا يشووفها خطيب ومتعجبوش وتخطبة مرة وبطل خطيبها
ثم لا يتم شيء بدون سبب والبنت اخلاق وجمال و بنت فاميليا
بصح تزوجت هي شهر لي فات ...هي مسكينة كانت تبكي وتقول ربي يحبني ابتلاني
هو ابتلاء واصبر راك راجل مكانش حاجه تعيبك
واكيد ربي مخبيلك وحدة احسن منهم ثق في الله
وعادي حاجه مكتوب انت واش دخلك
شيطان برك دخلك من هذا الباب باه تبطل تزوج بحكم مكانش من تقبل تزوجك و لبنات كيفكم انتم رجال تحطوا شروط احتمال شروط تاعها متتوافقش معاك بركا
لا تنظر للقضية انها مسالة تلمس رجولتك وكرامتك لانهم رفضوك بل بانه مكتوب ربي عارفه حاجه مش ساهله اما كلش بالمكتوب

ادعي ربي والصبر ثم الصبر
وربي يرزقك زوجه صالحه

[loulou88]

السلاعليكم
انا حطيت غير لبنات مغبونات /امزح/
الزواج مكتوب و رزق من عند الله
عليك بالدعاء و حصن نفسك بالقرآن و الافضل ان ترقي نفسك
متقلقش روحك تدكر ان الله رحيم رؤوف بالعباد كريم حنان منان
تتزوج امرأة اللي تهنيك و تهنيها وتجيب اولاد و يترباو في عزك ان شاء الله
رمضان كريم

[أم سلوى]

اعرف خويا كلشي بالمكتوب انا خطبت 10 المرات ومكان والو ودرك في عمري 33 وحمدلله ربي رزقني بزوجة اخلاق و خِلقة واهلها اكرم واجود ناس والحمدلله بيننا حب ود كون نوزعه على الناس يكفيهم ويقعدلنا شوية ....اصبر برك والله مكتوبك مجاش راهي تستنا فيك غير اتقي الله

اللهم بارك. ........

[manothebest]

ربي يسهل لك.

[**د لا ل**]

السلام عليكم
فرج الله عنك أخي ورزقك بالزوجة الصالحة باذن الله

لا تقلق كثيرا فالظاهرة عامة ويعاني منها الجميع رجال ونساء

عسى الله فرجا قريبا

[rose de sable s]

ربي يرزقك عادي حتي نساء يصرالهم هكدا
يجو يشوفو طفلة ز يتفرجو فيها كانها سلعة ثم لا رد
انا مثلك يجو يخطبو وحمد لله لا يخصني شئ ثم لا رد و لا شئ اخر كرهت
اخر مرة امي قاتلي كاين واحدة حبت تخطب لابن اخيها رضت فكرة احس انني سلعة يتفرجو و يروحو
لكن كل هدا مكتوب
استخر الله قبل ان تدهب امك