زوجي و الانجاب

[مشكلتي]

السلام عليكم و رحمة الله تعالى و بركاته ، أنا متزوجة من اربع سنوات ابلغ من العمر 27 عام أنا خريجة إعلام الي و لكن لا اعمل حاليا زوجي إنسان طيب فيه مساوى و عيوب متل كل البشر ، حياتنا عادية ووضعنا متوسط ، نعيش مستورين و الحمد الله اتفقنا على عدم الإنجاب اول عامين نظرا للظروف القاسية آنذاك ( استقال من عمله السابق و لم يجد عملا في الحين ) و لكن الحمدالله على كل الأحوالتحسنت احوالنا بفضل عمله الجديد ( منذ عامين تقريبا ) ، مشكلتي ان زوجي يرفض فكرة الإنجاب حاليا رغم مرور اربع سنوات تقريبا على زواجنا ، رغم تلهفي للأمومة طاوعته في انتظار ان تتحسن امورنا أحسن و لكن منذ أسبوع و خلال زيارة روتينية اكتشفت أني حامل (اول شهر ) و عند اخباره أقام الدنيا و لم يقعدها و طالبني بالإجهاض ، رفضت رفضا تاما و بدون نقاش فأصبح لا يكلمني و لا يأبه بي و يدعي الله ليل نهار ان لا أكون حامل و ان يكون مجرد خطأ طبي ، زرت الطبيبة البارحة للتأكد من الامر و أكدت لي أني حامل و الحمل يتطور بصورة طبيعية ، و عندما اخبرته جن جنونه و قاطعني ، من البارح لا سلام و لا كلام !!!!!! أنا في حالة صدمة استطعت تفهم خوفه من المسؤولية و خاصة انه اول حمل لنا و استطعت عذره و ان أقول انه في حالة صدمة و لكن ما لا افهمه هو هاذه الانانية في التعامل !!!!!! والدي و والدتي سافرا لأداء مناسك العمرة اشعر أني وحيدة و لا سند لي ، لا اعلم ماذا افعل من غير الاستغفار و التوكل على الله ، انصحوني من فضلكم .

[dania12]

شهدي واسنغفري اختي ممكن ضيق ويزول
ربي يفرج عليك اختي ويعطيك صحتك

[*أم سجى*]

اختي مبارك عليكما الحمل هذه النعمة التي مغبون فيها كثير من الازواج فهناك من يبحث عنها بشق الانفس مابال زوجك مكتئب وقنوط من نعمة حرم منها العديد من البشر......اختي زوجك يفكر بطريقة خاطئة فطفل واحد لا يعيقه من تحمل المسؤلية كم سيستهلك ياترى هذا الولد؟؟؟؟ كاين رجال يخدمو عند الناس فالاعمال التي لاتتطلب اي جهد ويعيلو بها عائلة متكونة من ست الى سبع افراد وزوجك طفل واحد مقدرش عليه نظن راه متخوف فقط أخبريه أن الامر ليس صعبا لتلك الدرجة أخبريه أنه لو حرم من الاطفال لتغيرت نظرته...فاجهاض هذا الولد يعتبر قتلا للنفس وقد حرم الله تعالى ذلك(لاتقتلو أولادكم خشية املاق).....ان لم يتع زوجك فأخبريه بطريقة غاضبه وقولي له سيتم الاجهاض وسنحرم من الذرية وهذه آخر فرصة (كي تثيري مخاوفه فقط).........ثم في الاخير اقول لك إيااااااااااااااااك عزيزتي ان تفقدي ولدك فهو اغلى نعمة من المولى عزوجل

[زبدة ذايبة]

ماتحوسيش عليه نهائيا

اسمحيلي :

يخبط راسو في الحيط

جعل الله عزوجل الزواج من اجل الذرية وعمارة الأرض

الرسلول صلى الله عليه وسلم قال: تزوجو الولود الودود

الحمد لله

الولد حلال محلل من علاقة شرعية حلال

لا إجهاض ولاهم يحزنون

ماتحوسيش عليه يزعف ويولي

نساء كثيرات يتمناو هذ اللحظة اللي أنعم بيها رب العالمين عليك

احمدي الله على النعمة اللي رزقك بيها

وزوجك يروح عليه الزعاف ويرجع ليك

التصرف تاعو ماشي منطقي نهائيا

لو كان جا الحمل الثالث أو الرابع ممكن نتفهم الأمر

هذا الأول وماشي حاب يجي

كان النهار الأول يتزوج بعقيم ويهني روحو

حافظي على النعمة اللي رزقك ربي بيها

وحافظي على نفسك

ماتعمريش راسك بزوجك هذا الوقت اللي تكثري فيه الدعاء لجنينك

حتى يجعله الله من الصالحين

هذه الفترة يكتب الملك حياة جنينك وينفخ فيه الروح ويقسم رزقه وشقي أم سعيد

جعله الله من مواليد السعادة

يتربى في عزك وعز باباه

ماتنسايناش في الطمينة

[ياسمين قدسي]

لا حول ولا قوة الا بالله
يا ختي برووك عليك وربي يكملك علئ خير ... زينة الحياة الدنيا كيفاش ناس يحوس عليها وناس لقاوها ومش حابين
ربي يهديه انتي تهلاي في روحك يمكن هو خايف ا يقدرش يراعهم ولا خايف الابناء كي يجو يخلوكي تلهاي عليه
انتي تقربي منه وحاولي تعرفي السببب حاولي تفهميه بنعمة ربي ...
ربي فرج عليك يا اختي

[محمد جديدي التبسي]

لا يمكن ان يكون هناك سبب يقبله الشرع والمنطق لنظرة زوجك لمسألة الانجاب الا اذا كان ناوي يطلقك وهذا مستبعد طبعا...ربي يهديه ..والله تجي تفهم دوخ من عباد كيما هاذو ناس عشر سنوات وعشرين سنة يجريو من طبيب لطبيب ومصاريف بالملايين لانجاب طفل وآخر تأتيه النعمة ويرميها ..ادعيلوا بالهداية وخليه هو يرجع يطلب السماح من ربه اولا ثم منك..

[طاعة زوجي ..]

ربي يتمملك حنونة على خير وربي يعطيك وقفة ساهلة ويكون ذرية صالحة معافاة يارب
صراحة ماعرفتش واش نقولك ، حتى فرحة الحمل اللي يبكو عليها الكثير ليل ونهار حرمك منها ، ربي يهديه
أنتي حنونة وسعي خاطرك وأكثري من الإستغفار وارمي حمولك على ربّ العباد وبربّي فترة وتجوز ، نبّهيه للجانب الدّيني وبللي الإجهاض بلا سبب كالإعاقة المؤكدة مثلا حراااام واضربي عليه السّكتة ماطلّعي معاه في الهدرة ماتهبطي وخليه يزعف على روحو ،ديري واجبك إتّجاهو والباقي خليه مع الوقت ، يعيا ويرجع لعقلو إن شاء الله
والله يا أختي الذّرية ونعمة الأمومة نعمة كبيييييرة وماكانش إمراة ماتحبش تكون أم وزوجك تاني نورمالمو يحب يكون عندو طفل ، نحسّ أنو كاين حلقة مفقودة من جهتو والله أعلم
المهم أنتي تهلاي في روحك وصحتك ورمضان على الأبواب أدعي ربي سبحانو وألحي في الدّعاء وستفرج بإذن الله

[خدمات تسويق]

لا حول ولا قوة إلا بالله نعمة من عند الله إنه رزق من الله ساقه الله إليكم أو كيما يقولو بكري المولود إيجي برزقو لأن الله هو الرزاق

[faty05]

افرحي و زيدي
و هو بالشوية يوالف
اتصلي بوالديك و اطلبي منهم يدعولك في هذه الايام المباركة و انه الله يهدي زوجك
اياك و اياك الاجهاض قادر ما يفوتش بخير و تفقدي القدرة على الانجاب من جديد

[abdellah36]

اعوذ بالله و هل هناك رجل جزائري مسلم يفكر بهذه الطريقة ,,,,,,,,,,وو يبدوا انه شخص غريب عن بلاد الاسلام ....انا شخصيا اشك في اسلامه ,,,,,,,خشية الفقر يريد منك الاجهاض ,,,,,,,,,,,,,,,,,,,,,

ربما هناك اسباب اخرى ,,,,,,,,,,,,,,, بعض الازواج لا يريدون الاولاد لانهم لا يرغبون في استمرار العلاقة كان يكون طامعا في امراة اخرى عليكان تتاكدي من الاسباب الحقيقية

[(( هبة الرحمن ))]

لا حول ولا قوة إلا بالله

لو أنا منك والله العظيم مانجيب عليه خلاص
سبحان الله ، الكافر يسعد بحمل زوجته ما بالك بالمسلم ، وأي حمل ...هو الأول ..
راكي في دارك قومي بواجباتك اتجاهه ، كلميه عادي ، وإياك ثمّ إياك إجهاض الطفل مهما حاول معك وحتى إن هدّدك لا قدر الله بالطلاق ، لا الدين ينصفه ولا القانون ولا المجتمع ، من يدري عزيزتي مع مجيء هذا الطفل تضحك له الدنيا وتستقيم أموره المادية .
أوصيك ثم أوصيك لا تطيعه فيما يطلب أبدا أبدا .
هداه لله

[انغام المنى]

ربي يكملك ويثبت حملك
انا وزوجي البارح بكينا على طفل يملا حياتنا ماخلينا حتى طبيب ومكاين والو قلبلو هذي نعمة ناس بزاف محرومين منها ماتكفرش بيها وانت تمسكي بيه لاخر درجة وربي يكون في عونك

[أم أماني أريج]

ربي يتمملك بالخير أختي ......
ما تتقلقيش من ردة فعل زوجك بالاك هو من النوع لي ما يحبش يبدل روتين حياتو و يخاف من المستقبل بزاف .
المهم أنت تقدري تروحي لداركم بعد ما يرجعو والديك بالسلامة ان شاء الله و تقعدي يامات تخليه فيهم يهدا و يقعد مع روحو شوية و من بعد بإذن الله رايح يحس بالخطأ تاعو ...
و ثان تقدري تستعاني بأم زوجك و أظن أن هي أكثر وحدة تقدر تأثر على وليدها على خاطر العجايز يحبوا بزاف الأولاد و أكيد ماراهيش رايحة توقف مع وليدها في هذي الحالة ....
و زيدي قوليلوا يتعوذ من الشيطان على خاطر كاين ناس بالسنوات و هي تحوس على طفل واحد يعمر عليهم حياتهم و مارزقهمش ربي كيما أنا عندي 8 سنوات زواج بدون أطفال حتى تكفلت هذا العام بطفلة دخلت الفرحة بيها لبيتي .
ربي يفرج عليك

[melissa lola]

الله يهديه كي تزوج واش معول امالا لوكان جا كل شهر عند الطبيب ويصرف بالملاين على النعمة اللي اعطاهالو ربي وماهوش حاس بيها ان شاء الله يتكاكا مع روحو وربي يكملك علابالي خسرلك الفرحة انتاعك

[رَكان]

المشكلة لاتكمن في ردة فعل زوجك على ما وقع من حمل ..بل الأكبر منها مشكلة هو عدم علمك بما يدور في رأس زوجك والذي أدى لردة الفعل تلك ؟
ماذا وراء الأكمة ؟ هل هو متعلق بمدى إحساسه بك كزوجة رفيقة درب ؟
جالسيه محاورة إياه ..حتى تعرفي كما يقولون رأسك من رجليك ..فيم يخص وجودك في حياة الرجل كزوجه ..
احذري موافقته الإجهاض ..اللهم الا اذا رأيت أن داعيه لما طلبه منك عظيما ثم ألا يكون الإجهاض في مرحلة يوافق عليها الشرع ..

[lydiareve]

جال يتمناو يرفدو نساهم بالكرش والجوف وهو لاييد اولاد اكيد جدا كاين اسباب انا راني ندعي ليل نهار يرزقني بزوجة واولاد منها وهو عندو مرتو بولد ويحب يجهض غريب واش يخمم الله اعلم انا نستني اللحضة هاديك تجبلي مرتي بيبي نفرح

[islam02]

لا تلوميه ولا تقاطيعيه مهما فعل صبرت 4سنوات اصبري 8اشهر وانا ااكد لك انه عندما يري المولود سوف يتغير المهم انلا تزيد المشاكل ولا تقضي على بيتك

[نورسين.داية]

السلام عليكم

مادام الوضع المادي سليم معناه هذا الإنسان لديه مشكلة مسؤولية بمعنى خايف من المسؤولية

مسألة عدم تواصلكما مع بعض أنا لو مكانك ....نقولو أضرب راسك على الحيط ..............

هذا النوع سوف تتعبين معه بكل صراحة لأنه أي علاقة الإجتماعية عندما يسقط فيها معيار الشرع والقانون و الأخلاق ....يعني من أي باب سوف تدخلين عقله ؟؟؟؟؟

[sabrina.nia]

ربي يهديه اتجاهليه و عيشي حياتك عادية و مع الوقت راح يتقبل الوضع

[مصطفى_س]

مسألة عدم تواصلكما مع بعض أنا لو مكانك ....نقولو أضرب راسك على الحيط ..............


تخيلي تسمع لكلامك و تقلو و يكبر المشكل موش راح تكوني سبة ؟


يا جماعة الخير انصحوا بالتي هي احسن

يا اختي احسن شيء في حالتك هو التحاور و التشاور شوفو كبار العائلة يحلو هذا المشكل هذا بالطبع بعد ما تتحدثي مع زوجك متمليش ثم ثم زيدي احكي معاه ديريلو حوايج يفرحوه و احكيلو المهم اعرفي منو علاه موافقش كي تعرفي السبب ممكن تعرفي تقنعيه و اذذا الطرق الحوار بيناتكم تغلقت
شوفو كبار العائلة الحكماء طبعا هوما لي يحاولو يحلو المشكل و تاكدي بلي مكانش مشكل و متنحلش
الله يجمع شملكم و ربي يبعد عليكم الشيطان

[djazia87holi]

لا اله الا الله محمد رسول الله ربي يهديه ان شاء الله وشدة وتزول ان شاء الله خليه بينو بين نفسو وسوف يرجع للصواب ان شاء الله انت متقلقيش روحك وانت سورتو في الفترة هده مهمة جدا للمراة الحامل وصدقيني تفرج ان شاء الله

[seridz]

ولا تقتلوا أولادكم خشية إملاق نحن نرزقهم وإياكم " الإسراء
سطر تحت نحن نرزقهم و اياكم يعني رزقهم مضمون من فوق سبع سماوات