استشارة بخصوص خطبة

[نوال زهرة]

السلام عليكم نشالله راكم كامل بخير انا اختكم محتاجة نصيحة من عند الرجال و النساء مكاش شكون اللي ينصحني
انا وحدة عمري 32 سنة جميلة و متخلقة و الحمد الله حبيت ندي رايكم انا في حيرة من امري خطبوني 3 اشخاص و معرفتش واش نخير وامي مستحيل تقعد معايا و تنصحني المهم انا اعمل متصرف
الاول قبائلي يسكن معايا في بلد وحدة وقابل بشروطي و مصلي و عندو حانوت هذا منعرف عليه معلبليش شايفتها صعيبة ندي واحد معندهمش نفس العادات و مهوش عربي
الثاني يسكن في بلدية بعيدة على دارنا ب25 كلم و مزال مسقسيتش عليه اذا يصلي ولالا الحاجة الوحيدة اللي نعرفها انو خدام قاتلو عليا صحبتي مزال مهدرش مع خويا انا اللي عارفة فقط
الثالث خدام في البلدية و بعيد عليا 23 كلم هي شكرتلي في اخلاقو بصح مزال مسقسيتش عليه مع العلم
معرفتش واش نخير او بالاحرى كيفاش نتصرف ذوي الخبرة افيدوني و انصحوني مع العلم انو امي علابالها بهاذ التفاصيل
صح تخطبت من قبل بصح في كل مرة كنت نرفض بدون سبب و بلا ما نسقسي وفي كل مرة ولا واحد من دارنا حب يعرف علاش راني نرفض ولا سالني حتى ولا نصحوني بلي راني نكبر وخلاص تفرت فيا م
نيش حابة الفرصة تفوتني

[*أم سجى*]

اختي حنا منعرفوش ظروفك وطبيعة هذ الخطاب لي راكي تحكي عليهم....برك نصيحتي ليك لازم تقبلي هذ المرة متزيدش تضيعي فرص على روحك ....صلي الاستخارة أولا......واستعيني بأخوك الأكبر هو أدرى بيك وبمصلحتك ....وأنا من جهتي ندعيلك انشاله ربي يطيحك فالنفس الحلالية وربي يهنيك انشاله

[Marc Edouard]

اللي يجي من الباب وقليك من الناس تشكر في فلان وفلتان كما قاتلك امل 95دري استخارة ربي يسهل

[نسيبة2012]

زيدي سقسي على لخرين قبل ومن بعد راكي تميلي لواح فيهم وصلي واستخيري ربي سبحانوونشاله طيحي في لي يرضيك ويصونك ....ربي يسهل ان شاء الله

[نوال زهرة]

شكرا ليكم انا صليت صلات الاستخارة و اللي قاتلي قولي لخوك الكبير انا الكبيرة في الدار و اخي اصغر مني وبابا مطلق و ماما جامي نصحتني على ذيك طلبت رايكم

[محمد جديدي التبسي]

هذه المسافات بسيطة جدا ونصف ساعة تكوني في بيت أهلك
استخيري و اللي يتقدملك الأول مرحبا به المهم يأتي من الباب واذا ارتحت له يوم الرؤية الشرعية كملي معاه ...ربي يفتح عليك

[mounyabiskra]

ربي ييسرلك امورك و ينورلك طريقك ان شاء الله زيدي شوفي 2 الباقين و شوفي اذا قبلو بشروطك و المسافة راهي صغيرة ميش عائق و متنسايش الاستخارة .... و الله الاختيار صعيب بزاف مريت بهذ المرحلة و خليتها على ربي و صديقتي كانت تنصحني و تقولي خيري لي يقبل بشروطك خطرش كاين رجال لي يملي عليك قائمة تع شروط و يقلك دبري راسك ! انا منحبش هكذا حتى المراة عندها شروطها ..... و الخير فيما اختاره الله.

[aroua]

ربي يسهل امورك
صلي صلاة الاستخارة وخلي لحكاية تمشي وحدها ولي قصدك شوفيه ومن بعد قرري والله هو المسير للامور مرت حد مايديها حد

[أنور سعيد]

سلام أختي , أولا كما أشار عليك الزملاء لا تتهاوني في الزواج فسنك كبيرة والفساد عم خصوصا انك عاملة وهو نصف الدين والحمد لله ارى انك تركزين على الاخلاق .... الخطوات كاتالي والله المستعان :
أولا ترينهم فالأرواح جنود مجندة وادع الله ان يرزقك فراسة لتختاري الطيب (العاقل) .....
ثانيا تجلسين لوحدك و تجمعين معطياتهم في ورقة وتختارين واحدا بعد ان تدع الله أن يوفقك للطيب
ثالثا خلاص اخترتيه وفقا لاستراحة روحك وقلبك له ولأخلاقه ... صل صلاة استخارة والى الامام الى الامام لا تنظري للخلف ولا تترددي حتى اذا وسوسك الشيطان وقال لك ربما الآخر أفضل .... أو يقول لك هذا ظهر أنه كذا و كذاا اطردي الشيطان ووساوسه .. فالكمال لله عز وجل وحده .. وطبيعي كلما تعرفت على شخص أكث كلما تبينت طبيعته وكما انتِ لك سلبيات فكل الناس كذلك كما قلت لك الكمال لله وحده
رابعا يسري عليه تكاليف الزواج فالزواج المبارك هو الاقل كلفة وشهرة ومغالاة وتباهي . برجاء التوسع في الموضوع .
خامسا اعلمي أن المراة مراة والرجل رجل .. عامليه دائما باحترام و احبيه وبالغي في اكرامه تكسبي وجدانه
اتمنى لك التوفيق لك وللاخوات المسلمات جميعا .... سلام .

[mrmilano1984]

اختي نتكنالك من كل قلبي راجل يكون يحاف ربي تاع الصح متدين متخلق متربي يخاف ربي في مرتو وصح ولد عائلة وطبعا مستوي ثقافي يهمك كما انتي طبعا تكونو متوازنين اوك ومعتدلين يعني نفس وحتي دهنيات ادا جا هاك ومتاكدة من دلك مش مانع تقبلي وصح راح سن خمي في الزواج والدار والاولاد
مهم ربي يرزقك اجلا لا عاجلا بحلالك لي يصونك ويسترك وتستريه في الحلال هدا واش نقولو في العواشير وان شا الله تربحي علي هدا المنتدي الرائع

[روح المي]

استخيري الله فيهم وادعي للهم اختر لي ولا تخيرني...واجعلي ميزان اختيارك دين واخلاق ...وربي يختارلك الخير

[loulou88]

السلام عليكم
الامر لا يتعلق بالمسافة اختي شوفي الدين والاخلاق وسقسي عليه مليح مليح و اللي يتوافق معاك من جانب الثقافة و الوضع الاجتماعي من الافضل يكون تكافؤ
و الشخص لازم انتي ترتاحيلو
و الدعاء و صلاة الاستخارة اهم حاجة
ربي يوفقك في اختيار الزوج الصالح المناسب ليك يا اختي
والله يا اختي نتمنالك الخير ربي يسرلك هذه الخطوة يا رب / اللهم لا سهل الّا ما جعلته سهلا وانت تجعل الحزن اذا شئت سهلا/و متقنطيش من رحمة ربي :، الله منّان حنّان كريم رزّاق وهّاب
و بالنسبة للأم تاعك هي مخليتلك الاختيار ليس من باب عدم الاهتمام بيك وانما تركت لك المجال للإختيار لأنها حياتك انتي اخيتي..
رمضانك كريم

[om.mohamed]

السلام عليكم نشالله راكم كامل بخير انا اختكم محتاجة نصيحة من عند الرجال و النساء مكاش شكون اللي ينصحني
انا وحدة عمري 32 سنة جميلة و متخلقة و الحمد الله حبيت ندي رايكم انا في حيرة من امري خطبوني 3 اشخاص و معرفتش واش نخير وامي مستحيل تقعد معايا و تنصحني المهم انا اعمل متصرف
الاول قبائلي يسكن معايا في بلد وحدة وقابل بشروطي و مصلي و عندو حانوت هذا منعرف عليه معلبليش شايفتها صعيبة ندي واحد معندهمش نفس العادات و مهوش عربي
الثاني يسكن في بلدية بعيدة على دارنا ب25 كلم و مزال مسقسيتش عليه اذا يصلي ولالا الحاجة الوحيدة اللي نعرفها انو خدام قاتلو عليا صحبتي مزال مهدرش مع خويا انا اللي عارفة فقط
الثالث خدام في البلدية و بعيد عليا 23 كلم هي شكرتلي في اخلاقو بصح مزال مسقسيتش عليه مع العلم
معرفتش واش نخير او بالاحرى كيفاش نتصرف ذوي الخبرة افيدوني و انصحوني مع العلم انو امي علابالها بهاذ التفاصيل
صح تخطبت من قبل بصح في كل مرة كنت نرفض بدون سبب و بلا ما نسقسي وفي كل مرة ولا واحد من دارنا حب يعرف علاش راني نرفض ولا سالني حتى ولا نصحوني بلي راني نكبر وخلاص تفرت فيا م
نيش حابة الفرصة تفوتني

ما تفرت فيك ما والو.اختي العزيزة ما دامك متقرب من ربي ما تخفيش ما عليك الا انك تتوكلي على الله وانشاء الله ترديلنا لخبر تكوني قانعة بيه ... رمضان كريم:)