ما دنبي ان اردت بيتا لي وحدي

[مشكلتي]

السلام عليكم لازالت مشكلتي متواصلة مع من قهرتني مع ام زوجي
اصبحت لا اقوي علي البقاء رغم ان زوجي هو وحيد امه ووالده متوفي
في السابق كنت اراعيها دوما لكن الان زاد المشكل عن حده اريد الابتعاد عنها لا استطيع حتي ان اراها تمشي امامي بسبب ققسوتها وجبروتها ولسانها الدي لا يدخل الي فمها كلما راتني
والمشكل هو ان زوجي يرفض الفكرة كليا بسبب الاوضاع المادية وانا اريد الرحيل حتي لو اكلت الماء والملح اريد الهناء وفقط
اريد بيت ياويني انا وطفلي وزوجي بيت ارتبه بمزاجي واتجول فيه كما اريد واطبخ ازوجي كل ما يشتهيه لكن زوجي يرفض الفكرة ولا يفتح لي بابا للنقاش
حاله اسوا من حالي اقصد نفسيا لكن لم اقتنع بعد لم الرفض والاصرار علي الصبر والتحمل
انا الان حامل بالطفل الثاني واعلم ان المشاكل ستزيد اكثر عند قدوم هدا المولود بادن الله
مادا افعل?
اخاف كثيرا ان افقد اعصابي يوما وارحل دون عودة خصوصا انها تطردني يوميا من البيت لانه ملكها اخاف من يوم اندم فيه علي فعل اشياء
والله طلبي بسيط وراتب زوجي الحالي لا اقول متوسط بل ساقول باستطاعتنا استاجار بيت والاكل كيما يقولو واحد ما يموت بالجوع واللي خلق ما يضيع
والله تعبت وتعبت وتعبت من هدا الحال واريد لاستقرار مع عائلتي الصغيرة
ارجو مساعدتكم والدعاء لي بالفرج وجزاكم الله خيرا

[نورسين.داية]

لا أتحدث عن مشكلتك لكن تصوري نفسك مكان والدة زوجك :

أم أنجبت طفل ثم زوجته يروح و خليها وحدها ..........هل هذا منطق ألا يعتبر هذا الإبن عاق بوالدته و لو كانت سليطة اللسان ؟؟؟؟؟

تسمعي بأم عايشة وحدها و إبنها كاري على قولك و مخليها وحدها .....في رأيك مانفع دلك الإبن الذي أنجبته ؟؟؟؟؟

و الله عز وجل ألن يحاسبه على واجب بر والدته ؟؟؟؟؟

ضعي نفسك في مكانها ........و تخيليها والدتك ......

و لربما أنتي من تخطئين معها ......إستشيري و أدخلي أطراف أخرى في المشكلة بينكما ......لربما لم تفهميها فقط .....ربما ....حاولي انتي أن تجدي حل لمشكلة علاقتكما في التفاهم

الوالدين مجبرين على تحملهما ......مهما كانت الظروف و حثك لزوجك على هجرها كأنك تحثينه على عقوق والدته ....إنتبهي لهذا عزيزتي

وفقكي الله

[نسيم الريح ش]

لا دنب لك بل من حقك ولكن امه تبقى امه مهما دارت ولي ديره حسبيه اجر عند ربي فوضي امرك لله وادعي ربي يهديها في كل صلاة رانا في ايام مباركة ومازال الشهر العظيم الدعوة فيه مستجابة

[طاعة زوجي ..]

أعرف أختي أنّ من يده في النّار ليست كمن يده في الماء وأعرف أنّ الخبر ليس كالمعاينة ، وأيضا يقال أنّ القاضي يسمع من إثنين ، فربّما أنت تصوّرين الوضع من وجهة نظرك فقط ، ربّما تكونين في حالة غضب وسوء مزاج خصوصا وأنّك حامل ومعروف عن الحامل تغّير الهرمونات والقلق لأتفه الأسباب
لهذا عليك بالتعقّل أختي قد تكون حماتك فيها ماذكرت ولكن لا خيار في نظري مادام زوجك وحيد أمه وأبوه متوفّي حتى وإن لم يكن متوفّي لا يمكن أن يترك أمه وحدها
يا أختي نحن في بلد مسلم قيمنا وعاداتنا مختلفة عن الغرب ، صدقيني لي طفلين أكبرهما 8 سنوات لا أستطيع أن أتخيل نفسي أعيش لوحدي في كبري
إصبري أختي واحتسبي أجرك وتعبك على الله تعالى فالله لا يضيع أجر عامل في الدنيا قبل الأخرة إن شاء الله
أنا هذا هو عامي التّاسع مع العائلة وأفرادها كثر صحيح العامل النّفسي يؤثر سلبا ولكن يكذب عليك من يقول أنّه لا توجد ضغوطات ، المثل يقول إذا شفت زوج متفاهمين عرف الدّرك على واحد ، سواءا في عمل البيت أو التّدخل في الكبيرة قبل الصّغيرة وعدّة أمور لا داعي لذكرها
كنت في وقت مضى مثلك أتوق إلى بيت لي وحدي ولكن بعدها قنعت بوضعي وحمدت الله كثيرا وفوّضت أمري إليه وأيقنت أنّ رزقي لن يأخذه غيري فاطمأنّ قلبي
نصيحة أخيّة أحسني الظنّ بالله وتفائلي خيرا ، لا تقولي سيكون هناك مشكلات بسبب المولود الجديد ولكن قولي ستتحسّن الأمور وتفرج من حيث لا أدري وأعيني زوجك على طاعة أمّه ولا تكثري من شكواها إليه فمهما كان هي أمّه ولن يقبل حديثك وشكواك الدّائمة منها

فرّج الله همّك أختي ورزقك الله من حيث لا تحتسبين وربي يتمّملك على خير ويعطيك وقفة ساهلة ياااارب

[& زكية &]

هل انت حمل وديع
لكل فعل رد فعل لابد وانك قمت بأشياء لا ترضيها .
تذكري أن الأيام دول ( وتلك الايام نداولها بين الناس )
حتى انت يكبر وليدك ويتزوج ويصرا فيك كيما هي.
تأخذين ابنها ابوحيد والله خرام عليك
تحبو غير الراجل وتكرهوا فاميلته.

[bello angel]

======jتطلقي======او تحملي
اما انك تتزوجي براجل وحيد امه و تديه و تخليها وحدها مسكينة هادي مايقبلها ربي لا لعبد

[*أم سجى*]

اختي حاولي ايجاد حل وسط لا الهروب وترك العجوز لوحدها ...لا العيش وسط جبروتها......حاولي مثلا أن تنفصلا في البيت فلا تربط بينكما لا ساحة ولا باب الدخول ..هكذا باش متتلاقاي بيها متتوسوسو من بعضاكم....واذا كانت كبيرة وعاجزة ابعثيلها فطورها وعشاها ومرة علا مرة روحي نظفيلها البيت والملابس....وانشاله ربي يفرج عليك وربي يهديها هذ العجوز انشاله......نصيحتي لك لا تغضبي فهذا أمر يعود بالسلب عليك وعلى الجنين حافظي على صحتك الى غاية قدوم طفلك الذي سيرسم البسمة علا وجهك وينسيك همك .....وفقك الله

[إنسانة بسيطة]

اولا لست ممن يربط البّر بالمكوث بين نفس الجدران الاربعة لكن في حالتك بما انه وحيد امه فلا يعقل ان يتركها لوحدها لا المنطق يقول ذلك ولا حتى العاطفة نحو معاناتك فعليك بالصبر

[loubna86]

راكي تسوفري فهمناك بالصح فكرة أنك تسكني وحدك و الآن مسحيلة . ما ديريش خطوة تندمي عليها . عليك بالصبر و نحن بشر و الموت حق بالاك ربي يمتحنك لفترة و وين علا بالك بالاك تموت عجوزتك ( ربي يطول في عمرها , الموت حق و لا مفر منهاو لا أتمناه لأحد و كل أجله ) و تفراي من المشكل . صرات لكثير من العائلات لذلك إصبري و إجعلي العلاقة بينكما جيدة فأنت أصغر منها شوية قدر و شوية فهامة . ربي يفرج عليك . بالصح راجلك ما تعاوديش تسمعيه هاذ الهدرة بيت لوحدك و تخليها وحدها . قولي لو يهدر معاها بالاك تحن .

[ام رضوان]

السلام عليكم
اختي احتسبي عند الله وادعي ربي يحنن قلبها عليك
لايعلم الغيب الا الله
ماتتوقعيش بلي كي يزيد المولود الجديد راح تزيد المشاكل قولي دايما ربي يجيب الخير
وثاني اختي ماتضغطيش على زوجك مسكين راهو بين نارين
نار انو وحيد امو ونار انو شايف زوجتو تتالم وهو ماعندوش حل
كوني سند لزوجك وعقبي من اجلو وماتكلفيهش فوق طاقتو راهي صعيبة باه يروح يكري وامو عايشة وحدها والله ماتدخل الراس
يعني انت ابنك مازال صغير وقلتي نحوس نعيش مع ابني
يعني مازال ماتعبتي ماكبرتي ماقريتي مازال ومازال وتحوسي تضمني ابنك معاك
وهي اللي كيما يقول المثل مايجي وين يكبر راس يشيب راس تحوسي تخليها وحدها وتديلها بنها والله ناكدلك بلي راح تغضب على زوجك وتاذيه وعلاه تكوني سبب في اذيته
ماتلوميهاش راهي حاسبة بلي راكي اديتيه عليها وخاصة كيعاد هو وحيدها
ننصحك اختي كثري من الدعاء يحنن ربي لقلوب وحاولي تعقبيلها وديريها كانها امك
حاولي تتقربي ليها بالهدايا راهم لعجايز يحبو الهدايا
قولي لزوجك يخرجكم تحوسو وعامليها معاملة حسنة
ربي يهنيك ويسعدك يطيب خاطرك اميييييييين

[نور الفجر02]

ادا رحت الام تبقا وحدها حرام هدا شي ...الحل اذا كان عندكم حوش اقسموه وديري بيت وكوزينة لروحك حداها يعني هكذا يكون عندك بيت وهو يبقا حدا يماه

[faty05]

ما يصلحش اختي
عاوني زوجك على بر والدته
اليوم الاول كي قلتي ايه و قبلتي براجلك كان علا بالك بلي وحيد امه
المهم انتي صغيرة و هي كبيرة ديري الشغل لي تقدري عليه لانك حامل
طيبي وش يحب زوجك و طيبيلها وش تبغي و اذا قادرة تطبخ لنفسها وش تحب اذا ما عجبتهاش ماكلة تاعك
المهم حاولي تكسبيها و اذا صح تع مشاكل و شفتي روحك راح تقلقي او تغلطي
اذهبي لغرفة تاعك و اغلقي الباب موراك
المهم ما تعذبيش زوجك بطلب المعيشة وحدكم
الله يصلح لحوال بينكم

[beautifulmin85]

اختي الكريمة اولا فرج الله كربك وكرب كل مسلم

ثانيا اعلمي هداك الله ان ما تمرين به ابتلاء لابد عليك بالصبر وليس امامك الا الصبر

ولما تقولين انه يعاني نفسيا فلو فعل كما تقولين وهجر والدته وتركها وحيدة فستزيد نفسيته معاناة اكثر واكثر

ولن تنهئي معه في عيشكما وان سكنتما في قصر من القصور فالله عز وجل جعل في الوالدين حكمة

لابد من طاعتهما والصبر عليهما حتى لو امرا ولدهما بالشرك وهو اكبر الكبائر فامره الله ان لا يطعهما

ولكن يصاحبهما بالمعروف فالوالدين ان دعيا على ولدهما فلن ينجح في حياته وان ملك الدنيا باسرها

فاياك اياك ان تفرقي بين الولد وامه فهذا لا يقل عن جرم التفرقة بين الزوج وزوجته

والام كما تقولين زوجك الوحيد عندها يعني عندما تقول لك كما ذكرتي ان تخرجي من البيت

يعني بربك هل هي حقيقة تقصد ما تقول يعني تطردك وبالتالي تطرد ابنها لتعيش وحدها في معاناة الله وحده العليم بها ؟؟

اختي الكريمة اصبري واعلمي ان لك أجر كبير لتحملك أذيتها وسيعوضك الله يوما ما فقط اصبري

واسالي الله ان يلين قلبها ويهديها ويكفيك أذيتها وربي يفرج على كل المسلمين

[yasmine700]

شا نقولو حسبنا الله ونعم الوكيل انا المسكن لزوجي وكل عاءلته ساكنين معانا وامه تعتبره بيتها ونحن ضيافها مع العلم انها ما حطتش دورو فيه ومع هذا انا وزوجي تركنا لهم المنزل و خرجنا للسكن وحدنا

[nilly]

ولكان جات يماك كنتي غادي تقولي واعرة ومنستحملش نشوفها وكنتي غادي تقولي عيوبها الجواب اكيد لا امي ملاك .....امي متغلطش....

علاه بلاك هي راهي توريلك صالحك بلاك تيط في مصلحتك . قولوا بلي ماتحبوش اهل زوج برك وماتحوسوش على سبايب ا
حبيتي تفتحي دار وحدك باش اهلك يدخلوا ويخرجوا واهل زوجك ممنوع دخول

[محمد...عبد النور]

السلام عليكم
اختي الفاضلة ...عيشي الواقع ...لا الامال

انت تريدين و لكن ...لابد من دراسة واقعك جيدا ...هل زوجك سيترك امه؟؟؟؟؟؟؟....و قد قلتِ انه وحيد أمه
و هل من العقل و التعقل احداث القطيعة بين ام و فلذة كبدها
لديك طفل ....تخيلي انه ربما يأتي زمان و تأتي بنت و تريد ان تنفرد بابنك في معزل عنك
فما ردك و ما تفعلين حينذاك
من حسن تدبير الأمور ان يفكر الانسان مثل لاعب الشطرنج قبل ان يحرك قطعة من قطعها ....وجب ان يتبادر الى ذهنه ردة فعل خصمه ....فهل وضعتِ نفسك مكان هاته الام التي ربّت ابنها و كبر امام عينيها ...فهل يهون عليها ان ينفرد ببنت من بنات حواء و لو كانت حليلتة و يتركها
هل يتمنى الانسان سعادته و يبنيها على شقاوة غيره و من غيره ....أم زوجك...ماذا لو فعل هذا الزوج ما تتمنين . و بعد حين ...ربما استيقض من غفلة ترك الام او ربما ...قدر الله ان فقدها ....فلتعلمي علم اليقين انه سيمقتك ما بقي في الحياة
حاولي يا ايتها الفاضلة ان تغمري هاته الام باحسانك...فطالما استعبد الاحسان قلوب البشر و قيدت مصانع المعروف و غلت رقاب من نحسن اليهم ...الا تعلمين ان الكلام الطيب و حسن الاصغاء و تجاوز الإساءة و مقابلة الشر بالخير تقلب النار ثلجا ...
اليس لك تجارب في الحياة ان الرفق خير ما نسترِق به قلوب العباد
اليستِ اما لطفل
الا تحبين ان يحبك ابنك ....فهل ترضين يوما من أيام الدهر ان ينازعك فيه احد و خاصة واحدة من بنات حواء ...تحبه كحبه و تبغضك لبربما لانها لا تتفق معك
فيا ايتها الكريمة الفاضلة احسني الى ام زوجك كما تحبين امك فو الله لن تحتاجي لا الى بيت و لا الى الانفصال و ستنعمين بأم ثانية
و ان لم تفعلي فستبقين فيما انت فيه
فرّج الله عنك هاته الازمة و رزقك الحلم و الصبر
بارك الله فيك و اقر الله عينيك بما تحبين
ســـــــــــــــــــــــلام

[djazia87holi]

شوفي اختي والله نفس معاناتي لكن الحمد لله راني الان بمنزل وحدي لكن المشكلانو زوجي كان الاخ الاصغر لي تزوج لكن تطورت الامور بيناتنا الي درجة كبيرة يلزم من الزوج انو يكريلك وكرالي دار بصح عندي سلافي متزوجين يسكنو بالقرب منها يعني مخليتهاش وحدها لكن في حالتك اختي زوجك وحيد امه ونقلك عن طيب خاطر وقلب شاف المعاناة لي تحسي بيها وانت ادري عندك حل من اثنين والل غير كيما نحكيلك حنونة تخرجي وتعيشي وحدك كيما تحوسي وتقعد العجوز وحدها ما تدري لوكان يحكم عليها ربي تموت يقولو ماتت في دار وحدها وتقعدي تتحصري ولا كان مازال العمر الطويل تقعد عجوزك النهار مع الليل تبكي وتزيدي دعوة الشر لالا واش دارهالك نحمل والله صدقيني كما تدين تدان يكبر الابن ويصرا كيما صرالها هدا بحال الدنيا خلاص الدنيا قبل الاخرة وشوفي انت واهلك وزوجك هده مجرد نصيحة ومبدا ادا حبيتي تمشي عليهم وربي يفتح عليك ان شاء الله وعلينا امين يارب

[أم أماني أريج]

ربي يكون في عونك حبيبتي راني حاسة بكل كلمة قلتيها لأن مشكلتك هي نفس مشكلة زميلة لي في العمل عزيزة بزاف على قلبي و هي ثان راهي تعاني من أم زوجها
تعرفي كانت مثل الوردة المتفتحة و راني نشوف فيها تذبل يوم بعد يوم و بكل صراحة ما عرفت واش ننصحها و خاصة أنها تفكر في الطلاق بعد سنتين من الزواج لأن زوجها أيضا وحيد أبويه و من المستحيل باش يخرج عليهم .
رايحة نقولك فقط كيما نقللها ديما كي تشكيلي أولا بعدي فكرة الطلاق من ذهنك لأن دوام الحال من المحال و ما تعرفي قادر ربي يغير كل ظروفك في رمشة عين و يجيك الفرج من حيث لا تدرين .و من جهة أخرى كيما يقولوا .....طنشي ترتاحي .....يعني حاولي تعيشي حياتك مع زوجك و أولادك و كأن حماتك مش موجودة ا
اخدمي شغلك في البيت في حدود واش تقدري ألبسي و تزيني و طيبيلو لزوجك واش يحب وحاولي تصنعي جو صاف خاص بيك مع عائلتك الصغيرة يعني كيما تقول الحكمة تستطيع أن تصنع من الليمون شرابا حلوا ...
أما ام زوجك إذا تكلمت معاك بكلام موزون عادي ردي عليها أما إذا زادت عليها ما ترديش عليها قوليلها برك ربي يهديك و روحي خليها ....
و برأيي تقدري تتجاوزي آلامك النفسية و لو نسبيا على خاطر زوجك راهو في صفك و حاس بيك .
ربي يفرج عليك أختي ...

[ali.dje]

تحسبو السكنة ساهلة

[رصاصة رحمة]

حبيبتي ربي يعينك والله ماعرفت واش انلك حنونتي راني حاسة بيك لن حالتي تشبه حالتك انا تاني عندي6 سنوات مع اهل زوجي امو وابوه واختو اكبر مني وغرفتي ضيقة ومقابلة المطبخ يعني ماكانش تهوية والمشكل انو عندنا سكن خاص لكن زوجي وهو اصغر اخوته يرفض ان يترك اهله انا تعبت من الضيق مع العلم اني متحجبة عن اخوته الدين يزورون والديه فهو قريبون منهما في السكن نفسيتي في الايام تعبانة ولا اعرف مادا افعل ارجوكم يا اخوتي واخواتي ان تعطوني رايكم وانا بامس الحاجة اليها ارجووووووكم اسفة اختي لاني ادخلت موضوعي داخل مساحة افكارك ولكن رايك يهمني ايصا ربي يفرج علينا انشاء الله