ورطتي مع زوجي

[مشكلتي]

السلام عليكم ولرحمة الله وبركاته اخوتي في الله انا امراة متزوجة وعندي ولدين واحب زوجي وزوجي يحبني رغم بعض عيوبنا اعيش وحدي والحمد لله و زوجي فيه مل الىصفات الحميدة الا صففة واحدة وهي سبب مشكلي وهو البخل وبالتفصيل افان اشتري لنا لباس العيد لن يشتري بعده اي لباس اخر في العام كامل وان تحدثت معه عن الموضوع يتهرب بالرغم من ان اوضاعنا الحمد لله لسنا بالاغنياء ولا بالفقراء متوسطين لكن احتياجات اولادي والمنزل اكثر ملابس ووافرشة وووووووووانا صراحة كنت اسرق منه النقود لقضاء حاجيات منزلي واالله العظيم كنت اشتري كل ما يخص المنزل وانتم ادري الا الالحاجيات الغدائية فهو من يشتريها ويوم بعد يوم اقول سوف يتغير وانا انتهي من خوفي ان يكتشف سرقتي له الي هدا اليوم والله يا اخوتي مانيش عارفة شكون لي كتبلو رساله وقالو بلي راني نسرق فيه ونخسرلو في دراهمو ووضعهالو تحت الباب في الوقت لي انا فيه غير موجودة في المنزل بعد ماقرا الرسلة ماقاليش قعد يعس فيا بالمعني يحسب دراهمو ويشوفني شحال نحيت ويكتب الي ان خلا نهارين وقالي بلي راكي تسرقي فيا والناس عارفاتك وهاهو الدليل ونا مصدقتش عينيا كي شفت الرسله لانو العباد ماتعرفنيش بلي نسرق فيه الا في حديث نسا عادي بيناتنا ولوكان تراعو اغلب النسا تسرق باه تغطي مصروف البيت ومن بعد برررتلو بلي راني كنت نشري فيهم لوازم البيت والاولاد وهو شاهد على اشياء ياسر يلقاهم في الدالر ومايسالنيش منين جاوني الدراهم هدا الشي لي حيرني بالرغم من اني غير عاملة من بعد تقلق مني لدرجة انو خرج من الدار وخلاني وحدي في الليل وغدا في النهار داني لدارنا انا والدراري ونحالي التلفون كي قتلو منروحش لدارنا هددني وقالي روحي احسن من ان تتطور الامور اكثر انا خفت ومشيت لدارنا بصح اليوم عندي 4 ايام في داارنامعرفتش الحل وانا زوجي اتهمني بلي هادي خيانة وعمرو ما عاد يثق فيا وطبع زوجي اخوتي انو امايتسامحش خاصة فيما يتعلق بالدراهم قولولي اخوتي الحل وين راه والمشكل زوجي مايخليش الانسان يبرر اسبب المشكل ىالمهم اتمني اني نتهني من المصيبة هادي في اقرب وقت ان شا ء الله وادعولي اخوتي الله يستركم يا رب

[زبدة ذايبة]

شوفي شكون من جاراتك اللي دارتلك هكذا

هذا أولا

ثانيا

الشيء اللي درتيه حلال xحلال

ماتتسماش سرقة

الرجل كي يكون بخيل أسوء صفة فيه

ثالثا:

وهذا الأهم

إدارة المشكلة الزوجية لازم يكون باحترافية

انت الآن في دار باباك

والحل وانت بعيد على دارك صعيب

غلطتي كي هددك وخرجتي

تلو كان ( لو تعمل عمل الشيطان ولكن قدر الله وماشاء فعل) بقيتي في دارك كان يكون للحل شكل آخر

بما أنك في داركم ماعندك حل غير تستناي وش يقرر فيك

ماعليك غير الصبر ثم الصبر

ديري جهدك باش مايكونش الحق فيك

لبسيه الغلط وخليه يحصل

ماديريش الحق فيك نهائيا

ماتحاوليش تعيطيلوا ولا تهدري معاه

خليه حتى يشبع برأيه ماتتنازليش

أي غلط يصدر منك يتدفعي ثمنه غالي

زوجك يحسب للمال أكثر من حسابه لك ولأبنائك

انت غلطتي كي حكيتي على نفسك لجاراتك ولأهلك

ماتظنيش بلي كل وحدة تضحك معاك وتقولك عندك الحق يعني تعزك وتحبلك الخير

هذ الإنسانة استغلت سذاجتك وانتقمت منك بطريقة سهلة

ممكن عينها على زوجك أو تحقد عليك

المهم وصلت للأشياء اللي حبت توصل ليها

بالنسبة ليك

خليه وانتظري

اترفعي عليه حتى يبان

مانقدر نعطيك حتى جواب حتى يبان واش راه حاب يدير زوجك

أصبري فقط وقوي قلبك واللي مخبي يبان

نتمنالك كل التوفيق

[ام رضوان]

السلام عليكم
شفتي يا لعزيزة اللي يحكي سرو للي للناس وشفتي كيد النساء وين يوصل
شوفي اختي والله تكذب عليك اللي تقولك مانديش الدراهم لزوجي يالوكان حتى الصرف اللي يبقى في السروال
يخي انت اديتي الدراهم واصرفتيهم على اولادو امالا راكي مادرتي والو
روحي اتوضاي وصلي لربي ركعتين وادعيه ينتقم من الشيطان ولا الشيطانة اللي كتبولو الرسالة وخربو بيناتكم وادعي ربي يهدي زوجك ويرجعو لجادة الصواب
في مشكلتك اختي ماينفعك غير الدعاء والتضرع لله
وكي تفرج عليك ويلم ربي شملكم ماتزيدي تحكي حاجتك حتى لوحدة
ربي يفرج كربك و يلم شملك مع زوجك ووليداتك ياااااااااربي يا لحنيييين

[الأرض المقدسة]

السلام عليكم وبعد :
عن عائشة أن هندا أم معاوية جاءت رسول الله صلى الله عليه وسلم فقالت إن أبا سفيان رجل شحيح وإنه لا يعطيني ما يكفيني وبني - فهل علي جناح أن آخذ من ماله شيئا قال خذي ما يكفيك وبنيك بالمعروف. ...صحيح ابن ماجة
- فليكن هذا جوابك - وحجتك عليه وعلى شحه - و لا انصحك بالعودة الى مثل هذا الصنيع - ليس لأنه غير جائز - بل لأن تعظيم كلام رسول الله -عند بعض المسلمين - صار غير التعظيم الأول - كما أن هضم حق النفس صار عزيزا - والله المستعان .

[محمد جديدي التبسي]

هذا يشبهلي :)
لا اظن زوجك بخيلا والا كان عرف انك تأخذين من ماله فهو اكيد يعرف كم ترك في جيبه مثلي
ثم انه لا يبخل عليكم بالمأكل والمشرب وهذا كافي بنظري ما دام تجدون ما تلبسون
انت الان في بيت أهلك والقرار بيدك ان اتصلت واعتذرت وان كان الامر مهينا بالنسبةلك انتظري واصبري واكثري من الدعاء بصلاح الحال..ربي يفتح عليكم

[توحيد الجزائرية]

اصعب شيء في الموضوع،،،: الرسالة
اختي الكريمة ،حافظي على بيتك،،،
فهناك الزوج البخيل،،،وهناك المسرف،،،،هناك الفاسق وهناك الصالح
فاصبري واحسني التصرف،،،واتمنى ان الرسالة تكون عبرة لك ولنا جميعا في الالتزام بالتستر والتكتم عما يخص بيوتنا
اما السرقة من زوجك فلا ارى لذلك داع ،مادام الاكل والشرب موفر لك، عندي ١٢ سنة زواج ولا مرة اخذت من الزوج لله الحمد ،حتى ما اجده سقط منه سهوا او عند غسل الملابس اعيده واعلمه به
اصلح الله بالك وردك لزوجك وجعل الود بينكما

[أم شروفة]

ما استغربتش البخل في زوجك بقدر استغرابي شكون كتب الرساله ؟اكيد حكيتي لكاش وحدة سرك .....والله اختي رانا في زمن الغلاء ..مرة كاينة ومرات ماكانش ...لازم تصبر المرا مع زوجها ..المهم راه يوفر الاساسيات ...اتصلي واعتذري منه

[صبرا13]

السلام عليكم و رحمة الله و بركاته
اولا انا لا أقول ما فعلتيه حلال، قد يكون معظمه حلال و لكن قد يكون فيه بعض من غير ذلك، لان حديث الرسول (ص) واضح، فقد قال ما يكفيك بالمعروف، اما الافرشة و الاكسسوارات فلا ارى فيها ضرورة، و لان هذا الموضوع يعني الرجل الشحيح كثرت الشكوى فيه من كثير من النساء اللائي أعرفهن، و من خلال ما سمعت و ما رأيت، عادة يكون لهذا المشكل العديد من الزوايا
اولا ان يكون الرجل فعلا شحيحا، يعني آلة حاسبة على هيئة بشر، يحاسب على الاكل و اللبس، و الكهرباء، و لو يجد الا يخرج درهما واحدا لكان اسعد الناس، و الحقيقة هذا منقص من مروؤة الرجل، اولا لان نفقته على أهله وولده يؤجر عليها عظم الأجر ان اخلص النية لله، و هذا هو النوع اللذي ممكن للزوجة ان تأخذ من ماله خلسة ما يكفيها بالمعروف،
ثم لماذا هذا الحرص، قد يترك ماله الذي لم يتمتع فيه يوما لوارث قد لا يترحم عليه ، ناهيك ان اللهفة لا خير فيها، فقد كان والدي رحمه الله يشتري أطايب الطعام و يقول لي كلي بنيتي و اسألي أباك ما شئت مما كان في استطاعته ،فاني اخشى ان تشتهيها في حرام فأهلك عندما يحاسبني الله فيك، و قد كنت اعجب أشد العجب لهذا القول، حتى لما كبرت رأيت من كانت من لهفتها تبيع عرضها لتأكل اللحم و تلبس افخر الثياب. فاللهفة لا خير فيها و اللهفة لا علاقة لها بالفقر، فقد يكون المرء فقيرا و لكنه قرير النفس.

الجهة الثانية ان تكون نفقة الزوج لا توافق اهواء الزوجة، و هذا السائد و قد لا يخلو هذا ايضا من و لو قليل من الحرص، فتجد هذا النوع لا يعطي مجال و لو لقليل من الحرية للزوجة، و يريد ان يكون هو المتصرف، فلما تقعد النساء في جلسات " العادي" التي لا تخلو من كثير من المحرمات كانميمة و كفران العشير، و إفشاء الأسرار و قد تنتهي بخراب البيوت، يتحدثن عما اشترين من زينة لهن و لأولادهن و لبيوتهن، فتجد من يكون مصروف البيت في يدها، و تجد التي يدللها زوجها، فتجد نفسها يا حسرة من ذلك، فتغلب العاطفة و تزين النفس المعاصي لابتغاء الشهوات، هناك من تترك المنزل و تبحث عن عمل، هناك من تتصرف بطرق اخرى لتكون كمن سمعت من النساء في الفضل و ليس الحاجة، لان تغير اللباس كل حين و تزين المنزل بالفرش ليس حاجة.
المفيد الان و قد اشتريت الفرش و غيره من أشياء المنزل، لكي لا يعيبكم الناس بالفقر، ثم وصلت لما انت عليه اليوم، الزوج اللذي و صفتيه بالشح ، على شحه يصول و يجول في بيته و في الأخير سيقال رجل لا يعيبه شيئا اما انت فسيقال ابوك لم يربيك و قد توصفين بالسارقةً، أين عقلك؟؟؟؟؟
كان عليك ان تدعين أولاده يخرجون في الهلاهل، يدخل الناس بيته يقعدون فوق الحصيرة، يشربون الماء يخرجون تبقى النفقة عليه و عيبه في وجهه، و عمر الفقر ما كان منقصة في المروؤة اما الوصف بالسرقة فنعم ، ان شاء الله تعودين الى بيتك اولا يجب إفهام الزوج انه ما من درهم صُرف في غير ولده و بيته، ثم اذا رجعت الى بيتك فطبيعي ستجدين بعض التنغيص و الكثير من الحذر من الزوج، اولا يجب ان تظهري الحرص على الاقتصاد في المنزل كي تغلقي باب ان يوسوس في انك لا تشفقين عليه و لا تحسين بكده في طلب الرزق، ثم اذا اعطاك بعض الدراهم في شيء او حاجة تاخذي دفتر و تدوني كل ما أنفق و فيما بالدينار و السنتيم، اول ما يقول أين ذهبت تلك الدراهم تحاسبينه بالورقة و القلم، و لا تناقشيه على الاقل في الاول حتى تسترجعين ثقته، و اصبري و ستنتصري باْذن الله

[beautifulmin85]

اولا هل عرفتم الآن لماذا مصير النمام نار جهنم وان صلى وصام ؟؟؟

ففهل النمام مثل فهل الساحر التفرقة بين الزوجين وذلك من الكبائر الموبقات والله المستعان

وبالمقابل اظن ان زوجك لم يقصد الخيانة بمعنى اخذ المال فكما قال الاخ التبسي الرجل كان يعرف

انك تاخذين المال لكن ان يأتي شخص من الخارج ويعرف بسر زوجك وانه بخيل كما تصفينه فهذا ما قصده بالخيانة

المفروض ان تستري على زوجك وتغطي عيبه وهذا درس لك في مرات قادمة ان لا يخرج من بيتك سركما

فهل اذا كان فيك عيب هل ترضين ان تاتيك احداهن وتقول لك انها سمعت من زوجها عن عيبك لام زوجك حكا له عن ذلك ؟؟

ماذا ستكون ردة فعلك حينها ؟؟

الحياة الزوجية مبنية على الثقة والستر واينما اهتزت الثقة وتفشى السر فهي معرضة للخطر

وما نفعله الان لك سوى الدعاء ان ينصلح حالكما وان يغفر لك زوجك ما حصل وان تعود الامور لمجاريها

واكثري من الدعاء ان يصلح الله امركما وربي يسهلك ولكل المسلمين يا رب

[مصطفى_س]

السلام عليكم و رحمة الله

اختي ممكن جدا زوجك زعف من كي لحقاتو الهدرة من برا عبر الرسالة يعني مبغاش اسرار البيت تخرج برا و هذي صح انا راجل منقبلهاش خلاص و ان شاء الله يتحل المشكل بالصح انت لي تحاولي تحليه
انا من رايي انك تتحاوري معاه و تطلبي منو السماح السماح عمرو مكان ضعف بالعكس راهي كلمة كبيرة و مليحة بزاف


الي قالك الشيء لي درتيه حلا في حلال انتبهي مليح لانو السرقة سرقة مهما كانت

الراجل البخل موش اسوء صفة فيه احنا نشوفو الصفة الحسنة لي فيه علاه نركزو غير على الصفة السيئة

لبسيه الغلط وخليه يحصل
يا اختي اتقي الله في نفسك ما هذا الذي تنصحين به
هذا زوجك يا اختي تعاوني انت و هو و حلو المشكل هذا مراهوش غريب عليك

خليه وانتظري

اترفعي عليه حتى يبان

مانقدر نعطيك حتى جواب حتى يبان واش راه حاب يدير زوجك

يا اختي موش هكذا تكون النصيحة


المهم ادعي بزاف و اذا لا قدر الله كبرت القضية حاولي تستعيني بكبار السن

و هذا رايي فقط و اراء الاعضاء انت فكري مليح و اخرجي بنتيجة تفيدك
تلاي في زجك و ربي يفرج عليك و يجمع شملكم

[نسيم الريح ش]

ادعي ربي ترجعي لدارك

[loubna86]

اسمحيلي مشكلتك كبيرة . خاصة مع البعد عن زوجك . بالاك يحن قلبو و يجي يديكم . بالصح نتي غالطة بزاف . هو بخيل و قستيه في بخله . و هو لم يتقبل الفكرة . كل بخله راح عالفاضي . ادعي ربي هو قريب و يجيب دعوة الداعي إذا دعاه . قومي الليل و ادعي ربي يفرج همك . إن شاء الله ما يكون غير الخير

[Samer78]

السلام عليكم اختي وفرج الله همك.عليك بكثرة الاستغفار و الدعاء في الثلث الاخير من الليل .

[نور الفجر02]

خطؤك انك بحت باسرار بيتك لجاراتك كيف مراة تقول على رجلها بلي بخيل قدام ناس واذا كان بخيل سرقيلو وصرفي وماتفضحيهش برا ربي يوفقك اعتذري منه اكيد سيسامحك

[(( هبة الرحمن ))]

يداكِ أوكتا وفوك نفخ
درتيها بيدك حاولي تصلحيها ، الحل بيدك أختي الكريمة ، اطلبي السماح من زوجك ليس عيبا طلب السماح ،
زوجك لم بزعجه سرقة المال ، أغلب النساء تفعل ذلك الذي آلمه أنّ طرفا من الخارج أخبره ، هو الآن يقول في قرارة نفسه هذه الزوجة ليست أمينة لابدّ وأنها تتحدث عن أسرار أخرى للناس ( ممكن عقله يروح لأبعد من أسرار المال والطياب وووووووو.....).
تعلمين أختاه ، والله العظيم مشكلتك هذه درس لنا جميعا .
أحيطك علما صاحبة الرسالة جارة لك لأنها تراقب زوجك وقت وصوله إلى البيت وضعت الرسالة ....تذكري لمن حكيت .

[faty05]

انا من رأيي انتي لي غلطتي باشاعة امر زوجك للنسوان
الله الله على النسوان
راها كتب رسالة لزوجك بش تخربلك دارك
المهم اتصلي بزوجك و اطلبي السماح
و ابحثي عن شعالة النار هذه لي تخرب لبيوت و ديريلها درس

[beautifulmin85]

اياك ان تسمعي لمن يقول لك ابحثي عن من ارسل الرسالة وانتقمي ووو

اذا فكرت هكذا فانت الخاسرة ولن يعود عليك اي نفع بل العكس هذا درس لك

لا تكرريه مرة اخرى حاولي الاتصال بزوجك كما قال لك الاخوة واطلبي منه السماح

واعترفي بخطئك وعديه ان لا يتكرر اما من ارسل الرسالة فدعي امره لله فمن صفاته تعالى ذكره

المنتقم هو الذي سينتقم لك مما فعل ذلك وانت عودي لبيتك وزوجك وابدءا صفحة جديدة

وانسي المتسبب في المشكلة وكلي امره لله نصيحة ارجو ان تاخذي بها لتهنئي في حياة دون مشاكل

والله المستعان

[djazia87holi]

تفرج ان شاء الله والنمامات كثرو والعياد بالله ماعليك الا بالصبر لانو ربي سبحانو مافيه غير الخير ان شاء الله ويا رب ترجعي لدارك قبل رمضان وان شاء الله يجمع شملكميااااااارب لكن اجعليها درس ولي دخل بيناتكم وكلي عليه غير ربي سبحانو اولي بيه صدقيني

[mrmilano1984]

هادي باينة خدمة تاع مرا فتانة حسادة غيورة قلبها مليء بالحقد انتقمت منك ضحكت معاك شوية امنتها وصدقتها وقلتي راها صاحبتي وجارتي ياو فيقي هادي كانت تعطك من التحت ونتي بحتي سرك فهمتي درس ليك مرة اخري سلام بزاف عليها

[sarah rose]

فرج الله كربك
اختي هدفك الآن هو استعادة زوجك و الرجوع لبيتك اما شكون لي دارت ننصحك ما تلاحقيهاش و ما تخليهاش تتشفى فيك ...خذي العبرة فقط و احكمي فمك منا والفوق و بعد ما ترجعي لراجلك حطي معاه النقاط على الحروف ...و عندك الحق في كل كلمة قلتيها من ناحية انو المصروف ماهوش مواد غذائية و خلاص
الله المستعان

[nilly]

كيفاش راجلك يحبك وهو ماجاش حتى يعتدر منك وخلاك بلا ميسقسي عليك هدا مايحبك ماواولو راكم تتوهموا على هدا راكم تطلقوا لانكم ماتعرفوش واش هو تعامل بين زوج وزوجة.