عروسة جديدة ساعدوووني

[sweet Giirl]

السلام عليكم و رحمة الله و بركاته
عندي بعض الاسئاة اتمنى انكن تجاوبوني
غندي شهرين و نصف على زواجي و زوجي من الناس لي تحب الفن في الطبخ:mad:
و المشكل انا مبتدئة :D
و ديما بسلامتي ندير كوارث احيانا نهرب من الجريمة و نحبي كل البصمات:D
و احينا تصدم عليا قوات الامن :cool:و نتفضح:mad:
و قلت ما عندي غيركم تساعدوني ربي يفتح عليكم و كل من تجاوبني ربي يسهلها احوالها و يفتح عليها ابواب الخير
اول سؤال: انا عايشة غير انا و راجلي حبيت ندي قاعدة عامة مشكلتي مع الملح يا تجي مالحة يا سامطة مام نزيد ملح مجيش بنبنة او تجي مالحة:mad: و المشكل كل وصفة تقولك شوية ملح ياو هادي شوية شحال مثلا مقوقو كل كاس ماء شحال يرفد و هكذا :)
السؤال الثاني: الطماطم المصبرة تاني شحال ندير مثل ملح لانو ديما جيني قارصة و تاني واشمن مركة بنية و كي نديرها مع طماطم مرابية كيفاش ندير الكمية
السؤال الثالث: الجومبو كتين لي يقولولي الماكلة بيه تجي احسن و هنا اغلب الوصفات منشوفوش في المقادير لهدا شكون خير بيه و لا بلا بيه
السؤال الرابع:D اسمحلولي كثرت:D تاني بالنسبة للماء كيفاش نكيل لانو يا نديرها تسونامي تمحي كلش يقعدو غير معالم تارخية للمكونات:D او ندير شوية مطيبش او مغرف صوص مل تسعى:cool: سميتها صوص متقشفة :)
شكرا لكيم مسبقا

[ibtihal18]

اولا الف مبروك ربي يهنيك
ما تتقلقيش اختي انا نهار تزوجت كنت كيما انت على خاطر في دارنا كنت نطيب لكازيرنا و كي تزوجت غير انا و راجلي و ارواحي انت و فكيها مرة مالحة مرة سامطة مرة فيها ليدام مرة زغلي و الما يغلي هههه و بالشوية حتى حكمت الميز و درك الحمد لله طيابي يجي مسقم و بنين
المهم انا عن نفسي عيني ميزاني و نطيب غير بالملح و تجي الماكلة مليحة درك راني دبرت شوية التوابل من عند لستي يعجبوني نطيب بيهم كنت في دارنا نطيبو غير بالملح و فلفل كحل و كي تزوجت نحيتو يضرني بالبواسر و الامساك
ثانيا انا الجومبو ما نستعملوش جامي طيبت بيه
انت كي تطيبي اولا لازم البصل يتقلا مليح ديري بصل و حبات ثوم و التوابل و الملح ديري قرصة ملح يعني بصباعيك الثلاثة و ملحي و كي تقرب الماكلة تطيب ذوقيها اذا مليحة ولا ناقصة زيديلها شوية و خليها تزيد تطيب شوية و الزيت على حساب الماكلة كاينة اللي تقبل الزيت كيما شربة فريك و كاينة اللي ما تقبلش الزيت كيما العجائن على خاطر كي تطبيهم و ينشفو خلاص يصفيوالزيت و تزيد تملاح و الكسكس ثاني ما يقبلش بزاف الزيت و مبعد زيدي اللحم ولا الجاج اللي طيبي بيه قليهم قبل و حد 5 دقايق و مبعد زيديلهم قيمة كاس ولا زوج ماء سخون و خليهم كي تنشف حركي مليح حتى يذوب البصل كي تلقاه بدا يلصق فالبرمة ولا المرميطة معناه راه دايب تما مرقي بماء سخون و نركز على سخون شوفي كي تكوني تطيبي ديما حطي الما يسخن على جهة و استعمليه هو و الطماطم المصبرة كاينين اللي يحطوها تتقلى مع البصل و كاين اللي يحطوها في اخر الطياب كي تطيب الحاجة تاعك تحطي الطامام انا نتبع هذي الطريقة ما نحطهاش تتقلى و مبعد كي تمرقي و تخلصي و يغلا الما تاعك لوحي الشي اللي رايحة تطيبيه و خليه يطيب على نار هادية و هذا هو السر لانو كي يكون الغاز قليل الحاجة تطيب براحتها و تطيب مليح اما لوكان يكون الغاز قاوي الما ينشف بالخف و الحاجة تاعك ما طابت تقعدي انت غير تزيدي فالما و مبعد تسماط الماكلة فهمتي علابيها قتلك ديما عندك الما سخون حتى كي تنشفلك الماكلة و تزيديلها الما سخون ما تسمطش و كاين تاني اكلات انا نستعمل فيهم المعدنوس فالتقلية كيما الفريك و الشربة فرميسال و اللوبيا خضرا و العدس
هذا المبدا على العموم و كاش سؤال سقسي راني حاسة بيك ياما خليت راجلي بلا ماكلة مي ديما كانت عندي الكسرة احتياط فالفريجيدار حتى كي تكون الماكلة مش مليحة ياكل الكسرة و اللبن خخخخ بصح درك الحمد لله ماوليتش ندير الكوارث

[اريج 07]

هههه قتلتيني بالضحك
ربي يهنيك اختي
انا نخدم كلشي عيني ميزاني و ماكلتي ماشاءالله مالقري مش مزوجة صغيرة خخخخ
اختي تبعي الوصفات لشاف هنا و راح تكوني احسن شاف شوفي اطباق ام اماني و ام كوثر و شافات الكوزينة و طبقي الوصفة بحذافيرها اكيد راح تنجحي

[sweet Giirl]

اولا الف مبروك ربي يهنيك
ما تتقلقيش اختي انا نهار تزوجت كنت كيما انت على خاطر في دارنا كنت نطيب لكازيرنا و كي تزوجت غير انا و راجلي و ارواحي انت و فكيها مرة مالحة مرة سامطة مرة فيها ليدام مرة زغلي و الما يغلي هههه و بالشوية حتى حكمت الميز و درك الحمد لله طيابي يجي مسقم و بنين
المهم انا عن نفسي عيني ميزاني و نطيب غير بالملح و تجي الماكلة مليحة درك راني دبرت شوية التوابل من عند لستي يعجبوني نطيب بيهم كنت في دارنا نطيبو غير بالملح و فلفل كحل و كي تزوجت نحيتو يضرني بالبواسر و الامساك
ثانيا انا الجومبو ما نستعملوش جامي طيبت بيه
انت كي تطيبي اولا لازم البصل يتقلا مليح ديري بصل و حبات ثوم و التوابل و الملح ديري قرصة ملح يعني بصباعيك الثلاثة و ملحي و كي تقرب الماكلة تطيب ذوقيها اذا مليحة ولا ناقصة زيديلها شوية و خليها تزيد تطيب شوية و الزيت على حساب الماكلة كاينة اللي تقبل الزيت كيما شربة فريك و كاينة اللي ما تقبلش الزيت كيما العجائن على خاطر كي تطبيهم و ينشفو خلاص يصفيوالزيت و تزيد تملاح و الكسكس ثاني ما يقبلش بزاف الزيت و مبعد زيدي اللحم ولا الجاج اللي طيبي بيه قليهم قبل و حد 5 دقايق و مبعد زيديلهم قيمة كاس ولا زوج ماء سخون و خليهم كي تنشف حركي مليح حتى يذوب البصل كي تلقاه بدا يلصق فالبرمة ولا المرميطة معناه راه دايب تما مرقي بماء سخون و نركز على سخون شوفي كي تكوني تطيبي ديما حطي الما يسخن على جهة و استعمليه هو و الطماطم المصبرة كاينين اللي يحطوها تتقلى مع البصل و كاين اللي يحطوها في اخر الطياب كي تطيب الحاجة تاعك تحطي الطامام انا نتبع هذي الطريقة ما نحطهاش تتقلى و مبعد كي تمرقي و تخلصي و يغلا الما تاعك لوحي الشي اللي رايحة تطيبيه و خليه يطيب على نار هادية و هذا هو السر لانو كي يكون الغاز قليل الحاجة تطيب براحتها و تطيب مليح اما لوكان يكون الغاز قاوي الما ينشف بالخف و الحاجة تاعك ما طابت تقعدي انت غير تزيدي فالما و مبعد تسماط الماكلة فهمتي علابيها قتلك ديما عندك الما سخون حتى كي تنشفلك الماكلة و تزيديلها الما سخون ما تسمطش و كاين تاني اكلات انا نستعمل فيهم المعدنوس فالتقلية كيما الفريك و الشربة فرميسال و اللوبيا خضرا و العدس
هذا المبدا على العموم و كاش سؤال سقسي راني حاسة بيك ياما خليت راجلي بلا ماكلة مي ديما كانت عندي الكسرة احتياط فالفريجيدار حتى كي تكون الماكلة مش مليحة ياكل الكسرة و اللبن خخخخ بصح درك الحمد لله ماوليتش ندير الكوارث
يعطيك الصحة اختي ربي يعيشك تعبتك معايا
ربي يوفقك في حياتك

[sweet Giirl]

هههه قتلتيني بالضحك
ربي يهنيك اختي
انا نخدم كلشي عيني ميزاني و ماكلتي ماشاءالله مالقري مش مزوجة صغيرة خخخخ
اختي تبعي الوصفات لشاف هنا و راح تكوني احسن شاف شوفي اطباق ام اماني و ام كوثر و شافات الكوزينة و طبقي الوصفة بحذافيرها اكيد راح تنجحي

شكرا على المرور و العقوبة ليك الراجل الصالح كاشي الطوارث المطبخية هههههههه
بارك الله فيكي

[@رنيم الأمل في الحياة@]

الف مبروك للعروسين بالهناء إن شاء الله

[sweet Giirl]

يبارك فيك ز في ايامك شكؤا على المرور رنيم و لن شاء الله الواحد الأحد تدي الباك باللمعدل لي تحبيه

[alaa mimo]

ههههههههههه انا عيني ميزاني برغم اني صغيرة16 سنة كي نطيب كل مرة نذوق واي حاجة خاصة نديرها ولكن بل ما نكثر ملح ندير في بلاصتو التوابل ويجي طيابي بنين وهايل ممكن تتعودي على الشاف ____ عينك ميزانك ____

[زينب 83]

ههههههههه نورمالون لي عندو عسولة كيما انت في الدار ما يهدرش خلاص على الماكلة
ماشاء الله عليك
شوفي دوك راني خارجة و كي نرجع نجاوبك
و راكي عطيتيتي فكرة واقيل نفتح موضوع للمبتدئات باه ياخذو راحتهم في الاسئلة و مايحشموش

[om obaida]

مبروك عليك وربي يهنيك كامل جازت علينا انا كان طيابي يجي يهبل وكي تزوجت خليت يماها كامل مي درك الحمد لله السر في التقلية قلي مليح ومتكثريش الملح كي تقرب تطيب ذوقي اما جومبو انا نستعملو ويزيد البنة صح لكن استعملي ماجي بنين خير من جومبو وربي كملك ان شاء الله بالنسبة للشوربات فريك فرميسال لسان العصفور متبعة هذي الكيلة وتصلحلي دائما في لتر ونصف نتاع ماء نستعمل 5مغارف نتاع شربة وتبعي المنتدى فقط رايحة تتعلمي بزاف حوايج

[sweet Giirl]

زينب اختي انتي هي العسل في انتظارك ربي يحفظك
ام عبيدة شكرا اختي ربي بحفظك

[نسيم الريح ش]

انا كنت نطيب للدار والضياف يجو عندنا دايما نطيب وندير ديسار وقاطو مشي راني نشكر في روحي كل صبع بصنعة .ةلكن كي تزوجت انصدمت طياب دار راجلي غير طيابنا في البيت لانهم يطيبو مرق مختلف وبالثوم بزاف ةبالجمبو وحنا غبر وكي كنت عروسة الماكلة لي نحطها تبقى كيما هي .من بعد قلت لعجوزتي ويلي طريقنكم في الاكل وراتلي وليت نطيب كيفهم .علابالي طولت عليك ولكن تفكرت روحي فيك .روحي في المنتدى تبعي وصفات الشافات ام اناني وكوتر وبزاف هنا الله يعطيهم الصحة ابحتي هناﻻفي الننتدى تولي شافة بمعنى الكلمة

[catia]

اولا مبروك زواجك او ربي ايهنيك او يرزقك الدرية الصالحة
اما الطبخ يا عزيزتي ايحب الصبر وعليك وعلى بنات الجلفة الفحلات راهم الله ايبارك شاطرات انا انقولك ابداي بالاساسيات يعني المطلوع والرخساس والشربة والكسكسي و وبعض العجائن وشوي سلاطات وحاولي ان تضبطي الملح والزيت والطماطم باش ماتجيش الماكلة انتاعك مالحة ولا صامطة ولا قارصة ولا ميدومة يعني ديري كميات صغيرة اوشوفي و ما تنسايش اتقلي المرقة انتاعك مليح يعني اعطيها وقت كافي قبل التمريق بالماء اما جومبو انا لااستعمله ابدا وايضا النار دائما احرصي على ان تكون متوسطة وليست عالية والماء ما تلوحيش بزاف ديري شوي واتفقدي كل مرة اوربي يوفقك وان شاء الله تولي طباخة ماهرة وانجو نتعشاو عندك

[abd_ser05]

هههههههههههههه معليش كامل صراتلنا انا كيتزوجتش زعما درت كسرة رخساس كي لفحلة و راجلي مسكين يستنى ههههههه كي طابت ولات حجرة نضرب بيها الحيط يتشقق تشوكييييييييييت مالقري موالفة نديرها تجي مليحة و قعدت يومين و انا نخمم واش خصها يوميييييييييييين باش تفكرت بلي ما دخلهاش الزيت هههههههههه حشوووومة صح ........... شوفي ختي انا الملح ندير شوية على راس المغرف و كي طيب نضوق اذا مخصوص نزيد و الماء ما تمرقيش بزاف و نقصي النار باش ما تنزفش و ادا درتي اللحم ولا الجاج لازم يتغطى بالماء ماشي تغرقيها ههههههه غير يتغطى برك و الطماطم ندير حبة( اذا حمرا و مليحة و اذا صفرا و حامضة ندير نص) و مغرف طماطم مش معمرة بزاف ( cab بن عمر) اما الجومبو مانعرف للولبارح درتو في الروز مابانتش بنتو يبالي ماعندو حتى معنى بصح اذا درتيه ما ديريش الملح بزاف هومالح انا هادا واش عندي نقولك و ربي يهنيك

[Asmaa.B]

الله يبارك الاخوات قالو كل شيء... المهم الطبخ لازمو الصبر و تحكمي يدك فيه مع الوقت و التجارب الكارثية هي لي تعلم... لازم تحبي الكوزينة و ما تنسايش تسقسي صاحبات الخبرة حتى تتقني الصنعة

رانا معاك ان شاء الله

[anfal12]

معليش اختي بشوية دوك تتعلمي

[anfal12]

معليش اختي بشوية تصدق معاك

[دانية لينة]

ضحكتيني اختي بالتسونامي انا كي تزوجت قد ا نقص تقعد الماكلة حق 3 ايام ما ناكلوش بزاف و انا عيني كيييرة
شوفي لازم تتعلمي تنصبي مرق احمر هو اساس كل الطبخات الحومر و مرق ابيض اساس الطبخات البيضة و منهم تبدلي التواببل و الثوم او البصل و كمية الماء على حسب الطبخة
البصل اساس البرمة هو لي يبنن ديريه على حسب اللحم قدما يكون بزاف تزيدي كمية البصل و سنات ثوم 4 و 3حبات طماطم الكسبر ملعقة كبيرة معمرة فلفل اسود نصف ملعقة صغيرة فلفل احمر ملعقة صغيرة و نصف ملح نصف ملعقة كبيرة موشي مليانة بزافوزيت ملعقتين كبيرتين على الاول تسخن و تبداي باللحم تقليه يطلق الماء نتاعو لبنين جيدا و زبدي بصل مقطع رقيق و ملح رشة باه يذبال لبصل ثم الطماطم و ااتوابل و كطي كاس ماء قدامك و اضيفي كل خمس دقايق الماء و حركي ثم غطي هكذا كي يخلص الماء زيدي كاس اخر تتحصلي عاى صوص ثقيل هنا انتي و طريقتك بعد مرور نصف ساعة او اكثر يا تصفي بماء ساخن

[دانية لينة]

او تضيفيه على المكونات ساخن دايما انتي لتر و نصف يكفيك مع المرق المتحصل عليه اولا اغلقي و خليها طيب على حساب اللحم نتاعك ساعة الا ربع بالنسبة لي ثم اضيف الخضار مثلا و مزيدلها عشرين دقيقة الى نصف ساعة و الطبخ اختي بالتعود توبي تعرفي قداه لازم في اي حاجة حتى الملعقة ممكن تستغناي عليها تعرفي ملعقة صغيرة قداه و كبيرة قداه و كاس مأء قداه فيه و هكذا ربي يهنيك م

[sweet Giirl]

شكرا بنات على المرور بارك الله فيكم
اختي لينة العين كبيرة مشكل هههههههه مع التقشف
يعطييك الصصحة اختي على النصائح ربي يهنيك و يباركلك في زواجك
رمضان كريييم

[*أم سجى*]

مبروك عليك اختي ربي يهنيك...ههههه انتي اوموا خلطتي وجاتك أضرار خفيفة أنا يلا طيبت تشوفي الحرب في القدرة مش الخضر....وران بديت نتعلم من الفحلات هنا ...حطيت موضوع فدردشة وذرك يعاونوني انشاله يلا عندك تساؤلات ولا تقرعجات حطيتهم تماك ونستفادو مع بعض ...هه مام انا ران خايفة التبهديل مع ناس داري ههههههههه

[أماني بلعلى]

السلام عليكم
ربي يهنيك ، والله فكرتيني كيما كنت نخرب ، المرقة جامي نديرها والشربة ناكلها غير عند ماما وفي الشتاء ندوروها دوبارة أمبورتي ، وجبات الي نعتمد عليها وتكون ناجحة الغراتان والفريت أوملات ، وبالتجربة اكتسبت الخبرة في تقنيات الملح ، رمضان الأول عقبتو مع زوجي كان راضي عليا وذلك بعد ما فاجئني بدعوته لثمانية من أصدقائه في يوم واحد ، بديت نقولو هيه منعرفش نطيب وكون هكذا وهكذا قالي متحوسيش واعطاني قائمة الأطباق ألي كنت درتها وعجباتو ، كان يلاحظ فيا في كلش ومايحاسبنيش أبدا على الخساير ، وكي يجيب الصياف هو ألي يقترح قائمة الأطباق وطريقة الانتقاد تكون مضحكة بعد ما نطيح شوية دمعات .
أما الملح فيكون على حساب القدر نتاعك أنا عندي قدر 2ل نكيلو بالمغرفة نتاع علبة التوابل ( تباع مع العلبة ) ندير حوالي 2 ، والجمبو نديرو احتياط فقط كيما تتعقدش المرق نديرو ،
والخبرة وتقنيات الطبخ تعلمتها من هذا المنتدى من خلال مواكبة كل الجديد الذي ينشر في المنتدى نحمل وكي تتوفر عندي المكونات نجربو والنتيجة مضمونة .
ونصيحتي ليك : تبعي كلش بالعين وحاولي تمزجي الطرق مع بعض ، واسمعي النصائح وحاولي تجربي الجديد واكيد هذا المنتدى .

[~أميرة أميري~]

سلام اختي ربي يهنيك ويسعدك ليوم دالتك وغدوة دالتنا ههههه حتى انا راني قريب نولي كيفك
صح كي تكوني في دار باباك كيما تقولي طيبي لكازيرنة وكي تروحي تتلفلك
وماشاء الله لبنات راهم كفاو ووفاو ماخلاو شي ماقالوه
اما بخصوص الجومبو انا عكسكم تمااامااا بالعكس ماكلتو جي بزاااف بنينة انا شخصيا كي نستعملوو مانديرش الملح كاااامل نخلي حتان مع تالي ونذوق ادا خصها نزيد لانو جومبو قي حد داتو يجي مالح ديفوا نقلي بيه ديفوا نخليه حتان نمرق
وكي نمرق عيني ميزاني لازم تتغطى الحاجة برك لانو كاين خضرة طيب بالخف وادا كترنالها لماء تتفتت وتدوب
ماعندي مانزيدفوق كلام الاخوات
ربي يهنيك مع مولا بيتك

[sousou52]

الف مبروك ربي يهنيك

[منال الامورة]

رمضان كريم يا صبايا

[sunshine2013]

ضحكتيني اختي مع الكوارث المطبخية شكون اللي ما عاناتش منهم
المهم تبعي الوصفات اللي فيها المقادير مضبوطة و كي تنجحي فيها اعتمديها اكتبيها في كتاب ليك. خاص بالوصفات المجربة و الناجحة و مع الوقت راكي تستغناي على المقادير الدقيقة سيرتو مع الاطباق اليومية كيما الشربة الكسكس الدولمات و غيرها
و كاين قنوات الطبخ كاين بعض الطباخين الله يبارك يقولك. حتى الما شحال من سل او ل و الملح تاني تقولك 5غ او 10 غ و شحال يعادلها مغرف صغيرة و لا كبيرة و غيرها كيما الطباخة بن بريم في بنة تيفي تمد مقادير دقيقة و كيما الشاف مصطفى و حسيبة الله يبارك تبعيهم و جربي و كي تنجحي اكتبي الوصفة و في الاخير يكون عندك كتاب وصفات تحتاجيه كي يجوك ضياف مثلا و جربي ما تخافيش سينو ما تتعلميش ازدمي
صح فطوركم

[سناء الشقراء]

بشويا تتعلمي

[om wafaa]

تبانلي عينك هي ميزانك

[casscada]

ربى يوفقك و يوفك جميع المبتدئات

[naila166]

اول شي المثابرة يعني ماتفشليش الا ما صلحتلكش للعكس إبقاي تعاودي حتي تعرفي سر نجاحها و جربي بكميات قليلة باه متبذريش
و سقسي الكبارات كيما عجوزتك و أدي من عندها و توكلي علي ربي

[nesrinwarda]

السلام عليكم
نعطيك نصيحة على الملح كيتطيبي ديري شويا في الاول و كل مرة دوقي و زيدي بالشوية . انا كي نقلي ندير من بعد كي انمرق نزيد من بعد كي تغلي ندوق و كي قريب تطيب نعاود ندوق

[فضيلة.ف]

ربي يهنيك يا اختي روحي غير بلعقل وكيما قالولك الاخوات تبعي وصفات الشافات و مع الوقت ان شاء الله تولي طباخة ماهرة الله يسهلك

[حياتي جنة]

عندي نفس المشكل هههههههه

[manel 16]

شوفي اختي ما تتقلقي ما والو كامل كنا كيفك .اول شيء في الطبخ انك اتحبي تتعلمي ممبعد والله كلشي ساهل.انا كنت ما نعرفش من غير الفريت اللوبية و العدس هههه الاني قضيت فترة طويلة في الدراسة بعدين تزوجت مباشرة.بفضل حراير المنتدى ناس داري خلعتهم ههههه.نطيب و نبعثلهم زكارة باش يشوفو لانهم كانو يمعنيو و.....كي عزلت عليهم.يقولولي هدى انت درتيها و يموتو بالقنطة ههههه.مثلا المطلوع و المسمن و المحاجب اخدتهم من الوهرانية انشاء الله تعود لينا.طريقتها في الكيس المبلل و الله تنحي الغبينة و تردك فحلة من عرايس زمان ههههه.الشوربة بالتكرار تتعودي و الصح في التحماص لازم اللحم تقريبا يطيب في التحمإص.و اختي شوفي و صفات ام وليد راهي رووووعة و ناجحة من اول تجربة اعتمدي عليها و ربي سبحانه.ربي يوفقك و يسعدك

[miryaham]

أولا ألف مبروك حبيبة و ربي يهنيك و هدي كامل صراتنا كي كنا عرايس أنا فيما يخص الملح ندير شوية برك نقلي به و كي نقرب نطفي ندوق ادا كان صامطة نزيد شوية جومبو ماجيك و تجي هايلة و الباقي عينك هي ميزانك مع الوقت تتعلمي نورمال

[الاريام]

هل زوجكي يعلم بانكي لا تجيدين الطبخ لانه بالنسبة لهم كانكي خدعته لكن لم يفت الاوان لازم فقط دايما تجربين نفس الوصفة و اكتبي المقاديركل مرة حتى تتمكني منها

[الاريام]

اطلبي الوصفات من امكي او اختي او صديقاتكي عبر الهاتف في منطقتكي و هنام الكثير الدي تستطيعين تعلمه لانه بسيط في سرعة فائقة او من الانترنت و عندما تدهبين الى بيت اهلك قومي انتي بالطبخ هناك تحت اشراف امكي و اعيدي تلك الوصفات عند زوجكي

[الاريام]

وكل مرة ركزي على وصفة حتى تتقنيها و هكدا

[صدق العطاء]

اختي ننصحك تبعي وصفات ام وليد اكتبي شهيوات ام وليد وشوفي ابداعاتها وشرحها المميز الله الله

[athena7red]

انا مشكلتي كانت مع الكمية...من 17 الى 2! المهم انك طيبي من قلبك و تنوي خدمة اهلك للحسنات....و كيما قالوا الفحلات كامل ...السر في التقلية و الماء السخون..الملح 1/2 ملعقة قهوة ناقصة شوية تظهر كافية...و المهم اتعلمي مليح و لو في عام باه تكافئي صبر راجلك...انا عندي راجل يولي غول كي يجوع!

[afifa.19]

عجبتني تاع تصدم قوات الامن ربي
روحي غير وحدة وحدة تبعي نصايح لبنات و تفرجي و ربي يوفقك و يهنيك

[الزوجة البارة]

انا العكس لقيت روحي مليحة بصح غير هذم الايامات باش حكمت الكيل كنت نطيب بزاااف كيما في دارنا و نطيش
شوفي عمر بن عمر في الطماطم هو المخير اذا درتي كسكسي احمر و الا تليتلي احمر و الا شخشوخة الضفر ديري مغرف و نص طماطم مصبرة
اذا زدتي درتي طماطم حب نقصي شوية برك على هذا القيس
الملح نص مغرف قهوة كافية و كي تكمل ذوقي و كي تزيدي الملح زيدي شعلي عليها تدي غلية باش يذوب الملح و يدخل في الماكلة
عذس لوبيا حمص القيس ليك و لراجلك غداء برك مغرف سقي و نصف و هوما جافين كي يطيبو يجيك وجبة قدقد
الزيت تقريبا 4 مغارف زيت في التقلية سواءا باللحم و الا الدجاج و الا والو
جمبو انا مدخليش راسي انصبي بالكسبر و الكروية مرحيين ورديلي الخبر
و كيما قالولك البنات نقصي النار تجيك الماكلة بنينة و متجيش جارية و المريق بالماء السخون و قيس ميتغطى اللحم برك
اي سؤال رانا هنا

[تجانية نورة]

استعملي مقادير معينة ومكتوبة في ورقة اذا زدت الملح اكتبي + ملح واذا زدت طماطم اكتبي+ طماطم واذا كانت مالحة اكتبي -ملح وهكذا +زيت -زيت +ماء -ماء وهكذا

[de alger sheryfa]

اولا الف مبروك ربي يهنيك
ما تتقلقيش اختي انا نهار تزوجت كنت كيما انت على خاطر في دارنا كنت نطيب لكازيرنا و كي تزوجت غير انا و راجلي و ارواحي انت و فكيها مرة مالحة مرة سامطة مرة فيها ليدام مرة زغلي و الما يغلي هههه و بالشوية حتى حكمت الميز و درك الحمد لله طيابي يجي مسقم و بنين
المهم انا عن نفسي عيني ميزاني و نطيب غير بالملح و تجي الماكلة مليحة درك راني دبرت شوية التوابل من عند لستي يعجبوني نطيب بيهم كنت في دارنا نطيبو غير بالملح و فلفل كحل و كي تزوجت نحيتو يضرني بالبواسر و الامساك
ثانيا انا الجومبو ما نستعملوش جامي طيبت بيه
انت كي تطيبي اولا لازم البصل يتقلا مليح ديري بصل و حبات ثوم و التوابل و الملح ديري قرصة ملح يعني بصباعيك الثلاثة و ملحي و كي تقرب الماكلة تطيب ذوقيها اذا مليحة ولا ناقصة زيديلها شوية و خليها تزيد تطيب شوية و الزيت على حساب الماكلة كاينة اللي تقبل الزيت كيما شربة فريك و كاينة اللي ما تقبلش الزيت كيما العجائن على خاطر كي تطبيهم و ينشفو خلاص يصفيوالزيت و تزيد تملاح و الكسكس ثاني ما يقبلش بزاف الزيت و مبعد زيدي اللحم ولا الجاج اللي طيبي بيه قليهم قبل و حد 5 دقايق و مبعد زيديلهم قيمة كاس ولا زوج ماء سخون و خليهم كي تنشف حركي مليح حتى يذوب البصل كي تلقاه بدا يلصق فالبرمة ولا المرميطة معناه راه دايب تما مرقي بماء سخون و نركز على سخون شوفي كي تكوني تطيبي ديما حطي الما يسخن على جهة و استعمليه هو و الطماطم المصبرة كاينين اللي يحطوها تتقلى مع البصل و كاين اللي يحطوها في اخر الطياب كي تطيب الحاجة تاعك تحطي الطامام انا نتبع هذي الطريقة ما نحطهاش تتقلى و مبعد كي تمرقي و تخلصي و يغلا الما تاعك لوحي الشي اللي رايحة تطيبيه و خليه يطيب على نار هادية و هذا هو السر لانو كي يكون الغاز قليل الحاجة تطيب براحتها و تطيب مليح اما لوكان يكون الغاز قاوي الما ينشف بالخف و الحاجة تاعك ما طابت تقعدي انت غير تزيدي فالما و مبعد تسماط الماكلة فهمتي علابيها قتلك ديما عندك الما سخون حتى كي تنشفلك الماكلة و تزيديلها الما سخون ما تسمطش و كاين تاني اكلات انا نستعمل فيهم المعدنوس فالتقلية كيما الفريك و الشربة فرميسال و اللوبيا خضرا و العدس
هذا المبدا على العموم و كاش سؤال سقسي راني حاسة بيك ياما خليت راجلي بلا ماكلة مي ديما كانت عندي الكسرة احتياط فالفريجيدار حتى كي تكون الماكلة مش مليحة ياكل الكسرة و اللبن خخخخ بصح درك الحمد لله ماوليتش ندير الكوارث
ya3tik essaha ya khtimeme hna ntaybou bhalek bravooo

[الفتاة الجزائرية2]

سلام اختي مالغري راني روطار ما شفتش موضوعك بحث حبيت نجعلك وانقولك الف مبروك على زواجك او كي اليوم انباركلك انشاء الله على المزيود المهم واحد فينا مازاد معلم المهم انك اتحبي تتعلمي الاخوات يعطيهم الصحة،ما خلاو والو حبيت انقولك الطياب ايحب اتحبيه او تعطيلو وقتو او يكون علي نار مهيييييييلة او ماتمرقيش بزاف شكرا اختي

[همس الحروف]

مبروك عليك وربي يهنيك كامل جازت علينا انا كان طيابي يجي يهبل وكي تزوجت خليت يماها كامل مي درك الحمد لله السر في التقلية قلي مليح ومتكثريش الملح كي تقرب تطيب ذوقي اما جومبو انا نستعملو ويزيد البنة صح لكن استعملي ماجي بنين خير من جومبو وربي كملك ان شاء الله بالنسبة للشوربات فريك فرميسال لسان العصفور متبعة هذي الكيلة وتصلحلي دائما في لتر ونصف نتاع ماء نستعمل 5مغارف نتاع شربة وتبعي المنتدى فقط رايحة تتعلمي بزاف حوايج
عجبتني اختي طريقتك كفاه تقيسي الماء والشربة حبيت نجربها ياريت تكملي تعبك وتكمل باقي المقادير بالقيس سيرتو بلا لحم البارح درت لسان العصفور جات مش بنينة لمزية فدارنا ومسموحلي نغلط هههههه

[أم شروفة]

انا من اتزوجت كنت في دارنا نطيب ...لكن اهل راجلي ياكلو اكلهم مسوس غير شويه ملح ....بالسيف والفت ..ودركا غير نروح لدارنا. يقولولي ماكلتك سامطه مسوس ...