جياحة ولا إمعة ولا ضعف شخصية؟

[مشكلتي]

السلام عليكم
ربي يجازيكم على هذا المتنفس، راني حابة نفضفض برك، لأني حاسة روحي رايحة نطرطق والله المستعان، حاسة روحي إنسانة جايحة ولا إمعة ولا ما نعرف واشنو بالضبط
أنا إنسانة أصلا عندي شوية اضطرابات نفسية، لأن شخصيتي وسواسية شوية ومررت بتجربة وسواس قهري في العقيدة وفي أمور كثيرة وعندي عقدة ذنب مضاعفة وجلد للذات الخ الخ الخ
أنا ظاهري الالتزام ، بصح نحشم من الناس في الأمر بالمعروف والنهي عن المنكر وأنا أصلا عندي ذنوب كثيييرة وهاردتها وحاسة روحي بوجهين
بصح نحس روحي بزاف دايرة قيمة للناس، بمعنى نخاف نجرح الناس ، نخاف الناس ينظروا ليا بنص عين، نخاف الناس يزعفوا مني مع أني مرات أدَّعِي العكس وكاين شوية مواقف نكون حازمة فيها خصوصا مع الأقربين بصح الناس لي شوية شخصيتهم قوية نحس يغلبوني بالهدرة لأني ما نعرفش نردّ الصرف ونحشم ، خدومة وما نعرفش نقول لا إلا أوقات قليلة، بصح إذا كاش إنسان دارلي خدمة نحس روحي استغليته ونحشم بزاف ونقعد غير نعتذر وأتشكره مرات وكرّات ،
مرات نقول راني نخدع روحي أنه هذا من باب حسن الخلق ولا الدفع بالتي هي أحسن يعني ماشي أمر لله خالص، برك لأنه وافق ضعف نفسي وخوفي من الناس وراني نكذب على نفسي
حابة نعرف ماهو في رأيكم التعامل الوسط مع الناس بلا إفراط ولا تفريط، ما نجرحهم بصح ما نخافهمش تان وعلاش نخافهم أصلا ما فهمتش
آسفة لأنه أفكاري مشوشة لكني أحس بتعب نفسي شديد
وشكرا لكم

[mrmilano1984]

اختي نعرف واحد حالتو مشابهة شوية لحالتك هو مضطرب نفسيا عندو خلل في نفسيتو اكيد وهو اعترف لي بدلك يبان فقط امام ناس اقل منو ويواجه مي برك يطيح مع اشخاص شوية عندهم شخصية يولي ضعيف جدا ومبعثر افكارو دائما وليس في قواه العقلية ابدا وابدا مضطرب عقليا ونفسيا ودهنيا تحسيه فاقد لثقتو تماما في نفسو وروحو فمتي يعني تقدري تقولي انسان مخصوص دهنيا وليفكر بطريقة سليمة ويخدع بسهولة وووو نتي ربما هكا عاملة وراثيا ربي يشافيك ان شاء الله

[billel84]

السلام عليكم سبحان الله افكارنا متطابقة تماما لكن عقيدتي والتزامي الحمد لله قد يولد الانسان بتصرفات وصفات معينة لكن يجب اصلاح نفسه وتربيتها على الدين

[beautifulmin85]

اولا حالتك مع غيرك سليمة فحياؤك من الناس وشكرهم على المعروف من صميم ديننا

لا يشكر الله من لا يشكر الناس اما بخصوص حالتك مع نفسك فالجيد في المسألة انك شخصتي حالتك بنفسك

يعني مكامن النقس حسب رؤيتك لنفسك ظاهرة وتتلمسينها فالخطوة الاولى اكتملت وعليك الآن اكمال المسير

والسعي في اصلاح ما ترينه خلل بالتدريب ومساعدة قريبة او صديقة تثقين فيها ستتخطين كل العقبات

لحمد لله يبدو ان لديك عزيمة وارادة فقط اعرفي كيف تستغلينها وتتقدمين للامام وربي يسهلك امورك يا رب

[إنسانة بسيطة]

ماركي مريضة ماوالو ولي يقول عليك هكذا راه غير نسخ الكلمة لي قلتيها على روحك كامل الناس عندهم نقاط ضعف وقوة وياسر ناس كي تواجه معندهاش قوة البديهة باه ترد ثمثم كي يباغتها شخص بكلام غير متوقع بصح كي يرجع للدار يلقى اجابات جاهزة ويتمنى لو يرجع الزمن ويرجع يقولهم فملاكه تحسي بعقدة النقص اتجاه نفسك .

(((((( ومررت بتجربة وسواس قهري في العقيدة وفي أمور كثيرة وعندي عقدة ذنب مضاعفة وجلد للذات الخ الخ الخ )))))

هاذي من مخلفات الوسواس تحسي بضعفك و تفاهتك والشيطان راه يجيك في العمل يقولك رياء وراكي بوجهين وراكي منافقة لو الان تقعدي مع الناس وتبقي تعشي تلقايهم بوجهين بصح لو ربي يعطيك القدرة تطلعي على القلوب تشوفي العكس في حالات كثيرة مثلا في وقت ما كنت تاع زعاقة وضحك وبسط وجاني وقت وين تبدلت الناس قالولي منافقة بصح معلابالهمش بالتغيير لي مس قلبي وغقليتي لذلك منلومهمش ومن حكمة ربي انو خلا القلوب معلومة غير ليه برك باه يعرف الخبيث من الطيب

جاهدي نفسك قبل لا تتعاملي مع اي شخص ومع الوقت تتسقم حالتك قولي نعم كي تقدري وقولي لالا كي تجيك حاجة فوق جهدك كوني متصالحة مع نفسك وبس

ربي يثبتك ان شاء الله

[*أم سجى*]

اختي ماكي مريضة ماوالو انتي برك راكي تكبري فالامور وتتخيليها وحدك حاولي تتناسي هذ الاشياء التافهة لي كل انسان فيه مش غيرانتي عليها نقولك متمرضيش روحك وانتي لاباس عليك ......وفقك الله

[أناييس الربيع]

أختي عيشي حياتك بتفاءل ولا تكترثي للاخرين

فأنت في الاخير تمثلين نفسك ،ولا يهم انتقاد هم ،أو اطراءهم فهم ليسو كاملين

ولا تدعي وساوس الشيطان تتبعك ،

[ابو ارسلان]

يا اختنا انت نفسك هي النفس اللوامة التي اقسم الله تعالى بها : يقول ربنا عز وجل: لا اقسم بيوم القيامة و لا اقسم بالنفس اللوامة..و هي النفس المؤمنة التي تلوم صاحبها على فعل المعاصي و ترك الخيرات.. وعادة هذه الحالة يصاب بها الانسان الذي يطلب الكمال فهو يستصغر خيره تجاه الناس و يستعظم خير الناس تجاهه و ان فعل ذنبا يكاد يقتل نفسه..
هذه يا اختى من صفات المؤمنين الصادقين ربي يوفقك و لا تعتبريه مرضا نفسيا او ما شابه .. بل التفكير الفاسد لمجتمعنا من يشكر الوقح و الجرئء و يعاتب المستحي و يتهمه بالجياحة وهي كلها عقد و مخلفات للتربية الخاطئة.

[نسيم الريح ش]

خليك من الناس ما تجادليهم ما تخافي متهم اصلا غير المهبول يدير راسه براس النلس تهلي في روحك وحافظي على علاقتك مع ربي واخرجي للطبيعة وللبحر نفسيتك تريح

[زهرة الروابي]

اختي الصادق ليصدق مع نفسه و اذا رايت منكرا غيريه بالتي هي احسن و اذا ما قدرتيش ما تقوليش غير الحقيقة لان رضا الناس غاية لا تدرك و مهما درتي مع الناس ماكيش مليحة و يكفيني رضا ربي وش ندير برضا الناس اما بخصوص شكر الناس على اي خدمة يقديموها لك فهذا شئ جميل فيكي و ايقي على هذه الصفة لانها من صفات نبينا الكريم