حقرني المدير وانا معنديش خبرة

[مشكلتي]

السلام عليكم و رحمة الله
انا استادة خريجة المدرسة العليا للاساتدة خدمت عام واحد و ترسمت
مشكلتي تعينت في مكان بعيد على وين نسكن يعني مشوار ربع ساعة بالسيارة و عندي مشكل كبيير في النقل
انا الحمد لله متمكنة جدا بشهادة الجميع و قدرت نحقق نتائج رائعة في ظرف وجيز
مشكلتي مع المدير نحسو يحقرني كي عاد صغيرة 21 سنة و مزال ما نعرفش القانون
يعني امس الثلاثاء من المفروض نخدم ساعة واحدة في اليوم خرجت من الدار بقيت نستنا ساعتين في الشمس ماكانش حتى طاكسي و اصلا فاتني الوقت وليت رجعت للدار
اليوم كي رحت نخدم قالي كون شفتك قبل ما تدخلي للقسم والله ما نخليك تدخلي و نقفل عليك باب المؤسسة
و حلفلي بلي المرة الجاية كون نزيد نغيب رح مايخلينيش ندخل اصلا من باب المؤسسة انا قتلو نحيلي النهار بصح ما تقدرش تمنعني ندخل للمؤسسة انا اصلا عملت شهادة طبية كي غبت قالي متزيديش تعاوديها الكلمة و الله مانخلي العساس يفوتك من الباب
قولولي هل عندو الحق يدير هكا يعني انا كاستادة عندو الحق يبهدلني هكا حسيت روحي متسول ولا مجنون وداخل للمدرسة
و ايضا تصورو الراتب تاعي تاع حصص الدعم تاع عام كامل ما وصلنيش كي رحت للاكاديمية و سالت قالولي بلي غلطولي في رقم ccp و قالولي اصبري نحاولو ادا قدرنا نرجعوه درك عندي 3 اشهر صابرة ماكان والو
يعني الحقرة و زيد الخلاص مكانش؟؟

[Amalya.a]

السلام عليكم

قضية اجر الساعات الإضافية يتم تسديدها بدخول الميزانية لمديرية التربية لولايتك معناه إنتظري السداد مابعد شهر جوان .

مسألة هذا المدير حاولي الإلتزام بالوقت ..و إن لزم الأمر أكتبي طلب تحويل المؤسسة لمؤسسة قريبة من مقر سكناك ..لمدير التربية لولايتك
و إن تجاوز حدوده أكتبي تقرير به لمدير التربية أيضا .حتى يتعلم فقه التعامل

أنتي تاني حرشي لسانك . معاه .......مليحة هاديي يغلق الباب ....حسب روحو ...راه في دارو


ملاحظة : أغلب مدراء المؤسسات التعليمية هم في الأصل أساتذة قدامى لا يفقهون في التسيير الإداراي و آدابه شيئا و ينظرون للأستاذ و الطالب على السواء ...و في أحيان كثيرة تجدين لديهم روح إنتقامية بدون سبب إتجاه الأساتدة خصوصا الجدد ...

[ابو ارسلان]

يعني والله قصتك تثير الاعصاب ليس عليك و لكن على هذا الصنف من المرشحين للفساد و الطغيان
لكن العيب عليك انت و على امثالك ممن يتخرجون من الجامعة و لا يعرفون اي قانون
يا اختي لازم تقراي قانون العمل الواجبات و الحقوق
لازم لك شوي شجاعة المؤسسة ماهيش تاع باباه ورثها هي مؤسسة عمومية
العلاقة بينك و بينه علاقة عمل يعني اوراق وبس و ليس علاقة شخصية
اكتبي شكوى لمديرية التربية و بيني لهم التجاوزات وان اتحتم الحال اطلبي التحويل
لكن لاسف انتم النساء تخافوا بزاف على الخبزة و ما دافعوش على حقكم
يا اختي اذا تحتم الحال ارفعي دعوى قضائية خاصة ان كان هناك تجريح بالكلام او اهانة
لانو هذا الدينصورات هم لي راهم خلاو بلادنا متخلفة ليحكم منصب يصبح فرعون.

[amine2003nes]

21 سنة قريتي و ترسمتي؟ الله يبارك وينت جبت الباك وقتاه قريتي في المدرسة وكم سنة قريتي ؟الله يبارك على هذا يحقرك المدير بنتيلو صغيرة ياو ماعندو مايقضيلك المدير خاصة ترسمتي يمكن تحكي مشكلتك لمفتش التربية إذا كان هذا الأخير وليد فاميليا قادر يساعدك وإن تطلب الأمر لمدير التربية ،في الأول شفهيا فقط و إذا زاد هبلك أكثر كتابيا و إذا كان يقول ألفاض خاطية .....زاد معاك بزاف كاين العدالة

[مناد بوفلجة]

من المفروض أنه عندما قال لك سأغلق عليك الباب ، من المفروض أن يكون ردك عليه "مارانيش نخدم في رزقك" ، و ليس "نحي لي النهار وووو "

هؤلاء الأشخاص إن رضختي لخزعباتهم يتمادون أكثر

و أيضا لدي سؤال :
ألا توجد نقابة في مؤسستكم ؟
إنضمي لنقابة نشطة و أكتبي فيه عن تهديداته
حدثي زملائك الأساتذة عن تهديداته
لا تكوني ضعيفة الشخصية أمامه

و الله مليحة هذي نغلق عليك الباب ...

[صرخة ألم]

انا في بلاصتك طلعلي الدم لراسي واش ما عندكمش نقابة و تاني كنت راح نقلكديري شهادة طبية خلعت كي قلتي درتها المفروض ما عندو معاك حتى هدرة ديري رخصة غياب و استئناف عمل و ارفقي الرخصة بشهادة مرضيةة و ديري عليها نسخة احتياط و اذا هدر معاك قلو ما عندك حتى هدرة معايا طبق القانون اذا عندك حق و الله عجب لوكان شافك واثقة من روحك و فاهمة امورك و الله ما يتجرأ

[amel kamel]

التزمي بالوقت واحد مايقدر يهدر معاك و مسافة مشوار ربع ساعة مش بعيدة بالعكس قريبة و مش عذر كاين اساتذة يخرجوا من الفجر مايرجعوش لعشية

[mounyabiskra]

يا بنتي احترمي الوقت و اخرجي من داركم بكري باش تتفاداي المشاكل معاه وباش تلحقي بالحصص تاوعك، هو متلوميهش راكي تباني تستهزاي....

[faty05]

ما نحبش الحقرة
اصلا ما تسكتيلوش
انا كي كنت ٢٢ سنة ترسمت
و كنت صح صح ندمر و بشهادة الجميع نخدم خدمة متقونة و ما نبخلش و هكذاك واحد ما يعجبو الحال
اختي في الاول نسكت و نبلع بصح لقيتها في صحتي
اذن و الله وليت ما نعمل حساب لاي واحد و وليت كي نكون علا حق و الله ما نخلي حتى واحد يحقرني و ندافع على نفسي بشراسة و كنت نجيب حقي الحمد لله
يا لوكان تسكتيلو يحط عليك الفردة و يولي يحوس على اي هفوة
و ما عندوش الحق يغلق عليك باب المؤسسه
و ما يديرهاش و اذا فعل اشكي بيه ليس شفهيا و لكن كتابيا انتي جبتي تبربر الغياب ما عندوش الحق يكثر الهدرة ينحيلك يوم من شهريتك و السلام
ما تكثريش معاه الهدرة اخدمي خدمتك و السلام
و اذا قدرتي اتصلي بادارة المدرسة كي تشوفي روحك ما تقدريش تروحي في حالة ضروف طارئة
و اذا تخدمي بعيد عودي اخرجي بكري بش توصلي بكري ما تخليلوش الفرصة ينتقدك هذي هي الحل
بصح ما تسكتيش علا حقك ابدا ابدا

[om_nour]

سُبْحَانَ اللَّهِ وَبِحَمْدِهِ، وَلاَ قُوَّةَ إِلاَّ بِاللَّهِ.

مَا شَاءَ اللَّهُ كانَ، وَمَا لَمْ يَشَأْ لَمْ يَكُنْ، أَعْلَمُ أَنَّ اللَّه عَلَى كُلِّ شَيءٍ قَدِيرٌ وَأَنَّ اللَّه قَدْ أَحَاطَ بِكُلِّ شَيءٍ عِلْماً. أَصْبَحْنَا عَلَى فِطْرَةِ الإِسْلاَمِ،


وَ


كَلِمَةِ الإِخْلاَصِ، وَدِينِ نَبِيِّنَا مُحَمَّدٍ صَلَّى الله عَلَيْهِ وَسَلَّمَ، وَعَلَى مِلَّةِ أَبِينَا إِبْرَاهِيمَ حَنِيفاً مُسْلِماً وَمَا كَانَ مِنَ المُشْرِكِينَ.

أَصْبَحْنَا وَأَصْبَحَ المُلْكُ لِلَّهِ وَالحمْدُ لِلَّهِ، لاَ إِلهَ إِلاَّ اللَّهُ وَحْدَهُ لاَ شَرِيكَ لَهُ، لَهُ المُلْكُ وَلَهُ الْحَمْدُ وَهُوَ عَلَى كُلِّ شَيءٍ قَدِيرٌ

[redeye]

حسنا انت تبدين مستهترة كثيرا و اعتقد انك لم تقومي بسرد كافة التفاصيل
يعني ربع ساعة مسافة بين بيتك و مكان العمل لم تستطعي ان تلتزمي بالحضور في الوقت، الكثير من الاساتذة يتنقل اكثر من 100 كيلومتر يوميا للوصول الى مقر العمل
اعتقد ان المدير يثصد انه لن يتكرك تدخلين بعد تأخرك لمدة ساعتين و ليس ان يمنعك من العمل هناك لأن هنا لا يوجد ان قانون أو ظلم لك

[زبدة ذايبة]

الحقرة هاذي خرجت من عندك قبل ماتجي من عند المدير

انت كي صغيرة خليتي لكبار عليك يتصرفوا فيك ومن بينهم المدير اللي طلق هبالو عليك

راكي أستاذة الند للند مسألة السن ماعندو مادخلو فيها

بزاف من الناس يحوسوا على واحد ضعيف يبينوا رواحتيهم قدامو

وراه حاب يستخدمك لهذا الغرض يدير عليك مدير ونص

انت ماتسكتيش

عندك الحق في الغياب وعندك الحق في المرض وعندك الحق تدخلي لمكان وظيفتك

ماتخليهش يزيد يهددك انت أستاذة مثلك مثل وحدة عمرها 50 سنة نفس الدور ونفس الحقوق والواجبات

برقي عينك فيه. وإذا ما تسقمش اطلبي نقل لمدرسة أخرى

بصح انت لازم دافعي على روحك

راكي وين تروحي تصيبي كيما هذ النوع إلا مارحم ربي

رب يوفقك

[sabrina.nia]

اختي نظمي وقتك ما يلقا حتى سبة ما تعطيلوش الفرصة

[just do it]

النسا طيحو علينا البق خوافات وغي يتبعو بذبك تفرعن المديرون والرؤساء على الرجال والنساء وتجاوزو حدودهم
كنت نعرف وحدة تقري كونترا عامها الاول تخدم سيريو وزيد المفتش كل مرو طايح عليها ويعطيها انتقادات وهي غ خايفة وتسقسي
ههههه وهي كونترا وااله منسمع بالمفتش اصلا
احيي المدير تحية حارة لانه وجد على من يتفرعن نت جامعية وهو بلاك عندو سيزيام تخليه يحقرك لانك متعرفش لقانون ؟؟؟؟
ديري نهاربرك تعرفي كل خبايا الادارة وقواننها

[غزلانْ]

السلام عليكم

قبل أن تقولي حقرني

هل معاملته لكِ و باقي الأساتذة هي نفسها

و منه يمكن أن تنظري للأمر على أنه حقرةأو ليست بحقرة


و اذا كانت هناك حقرة من مديركِ لكِ كأستاذة ربما يكون معه

حق ردت فعله كانت بسبب غيابك المستمر( و لو لم يتكرر الغياب لما لفظ كلمة أغلق الباب في وجهك ) و السبب مكان العمل

بعيد فهناك مسؤولية تلاميذ بغيابك المفرط ستكونين حقرتيهم بدورك


و بسببهم هذا يضغط عليك و نفس الشيء مما حدث معك يحدث

مع الأستاذ و التلميذ ان حدث و تكرر غياب أي تلميذ سيتلفظ الأستاذ بدوره بذات الكلمة في حق التلميد و السبب عدم الالتزام بالوقت.

اذا قمتِ بضبط توقيتكِ و تلتزمي بالوقت الرسمي فهنا ستتغير

طريقة معاملته لكِ كباقي الأساتذة و ان التزمتِ بعملكِ من ناحية التوقيت الزمني في الوقت المحدد و تباشري عملكِ كما ينبغي

و لم تتغير معاملته هنا يكون أمر آخر فليست المؤسسة مؤسسته

و عليك أن تعامليه معاملة كما ينبغي فكما هو مدير أنت أستاذة

و لا تجعليه يتمادى في تصرفاته .


بالتوفيق لكِ

[(( هبة الرحمن ))]

وعليكم السلام روحمة الله وبركاته

أهلا زميلتي :
حسب فهمي تدرسين بالابتدائي
بالنسبة لحصص الدعم أنا عمري ولا تقاضيت أجرا مقابلها
هذا ليس بمشكل كبير كل ما هنالك أنك صغيرة في السن ولا تستطيعين معالجة الامور ، أرجو ألا تغضبي من ملاحظاتي أعتبريني أختك الكبرى ،

انتبهي إلى مشوارك الذي سأحلّله لك : من الدراسة إلى المعهد ثم مباشرة ميدان العمل يصنع نوع من الغرور لدى صاحبه دون أن يشعر لأنّ التجربة تنقصه ولم يحتك بغيره ،لكن بمرور الزمن سيزول الغرور وتمرّ الأيام بطريقة روتينية فيحدث نوع من الملل وهذا يجعلك لا تعيرين كلام المدير أدنى اهتمام .
فهو ليس من حقه ان يمنعك من الدخول وكلامه هذا دليل على أنه يعاملك كطفلة وليس أستاذة .
أختي العزيزة أنصحك أهم نصيحة لا تفتحي قلبك لكلّ من يعمل معك فمنهم من ينقل كلامك عن المدير لحظة غضب فيصير يكرهك دون أن تشعري .
أهمّ نصيحة لأختي :
لابدّ أن المدير يكبرك سنا ، لا تردّي عليه الكلام اكتمي غضبك .
احترمي اوقات عملك ، لا تخالطي أحد ، قسمك ، تلاميذك ، داركم .

[somis]

انت صرالك كيما وزيرة الاتصال فرعون كي كان في عمرها 22 سنة كانت عندها دكتورة ... لمهم لازم تكون عندك شخصية قوية باش تتعاملي مع هاد المدير و انا نشوف من حقو المدير يزير والا المؤسسة تدخل في حالة من الاهمال والتسيب يولي واحد مايروح يخدم ولكن ماشي كيما هكا كان لازم يعرف يهدر معاك والمؤسسة ماهيش دار باباه باش مايخليكش تدخلي

[michaella]

ليس لديه الحق في منعك من الدخول للمؤسسة

[نسيم الريح ش]

دخلي في الوقت واخرجي في الوقت ما عندو ما يحكي معاك وادا بقا على هاد العقلية اشكي بيه

[dania12]

السلام عليكم
اختي مدام عملتي مالادي ما عندوش الحق يهدر معاك وماهيش مؤسسة باباه اشكي بيه مفتش التربية ما تسكني عليه ظلم بعينيه والله ما يربح والغيرة قتلت قلبو كيفاه هاد السن مترسمة