زوجي ظلمني

[roose]

ما رانيش عارفة كيفاش نبدا راجلي لعزيز لي كنت نموت عليه و نحيها علي روحي و نمدهالو في دقيقة رماني مع ولادي ما حوس ما سعي للصلح و قالي المشاكل في الدار بداو كي نزوجت نحبس الزواج يخلاصو و رماني في دارنا صافي سمانة ما عيطش يسقسي جتي علي ولادو مع انو المشكل ماش معاه صرا جدال مع اختو المتزوجة و يماه جات مع بنتها او زادت البت وليدها عليا السبب الرئيسي حبوني الة في الدار طيب تغسل و تمسح لازم اختو هي لي جي تقضيلنا و لازم هي تكون المونوبول تاع الدار كي لقاتني في طريقها حطتلي يماها في طريقي لي خرجتني من داري افكاري غير مرتبة او ما عرفتش نحكي و لا نعبر سمحولي

[Southpaw]

ربي يهدي العقول أختي .... إن شاء الله يتحل كل شيء في القريب العاجل
اصبري فقط

[اياد حياتي]

ربي يهديه ان شاء الله تقول والله ما ندير النية مع الراجل مديريش عليا لاخطارش تنارفيت الله يجمع شملكم

[aminaalger]

سلمي أمرك لربي ولي فيه الخير يجيبولك إن شاء الله

[amira19]

خليه ضرك يتنحالو الغش و يعيط حاليا راهو غاضب منك كي يتكالما او يوليلك
زيدي اصبري يامات و لا ما عيطش ديري حيلة قولي لولادو يعيطولو و يقولولو توحشناك بابا
ربي يهدي سركم و نصيحة من عندي ما تحطيش زوجك في خيار بينك و بين اهلو لانو راح يختارهو هوما باه ما ييانش ضعيف توالهم

[إسلام الفاروق]

ولكن اليس هو الة ايضا ؟ يعمل و يتعب و يزيد يشد مسؤلياته في المنزل

اظن زوجك تعب و نفسيته متضرر لم يجد من يفهمه

ربي معاك

سلام

[جومانةج]

السلام عليكم يا اختي انا راه عندي نفس المشكل انا راني حامل بالثاني و انا عندو ولد وضربني و كيما قلتي باغيني بونيشة لاهله و خلاص و المشكل انا مربيتتو مرت عمو و يموت عليها وسامح في والديه و الله ما يروح عندهم و دايما يضربني و نصبر و اللاه ما نقول و ما نخبر اهلي. المشكل لوكان غي يطلب مني السماح لكن اخر مرة ضربني ما نكدبش عليك سبيتو قتلو انت مشؤ راجل و راهم ساحرينك و نزبدك و الله ما يقترب مني لشهور ؤعني حملت غي بالغلطة يعني حتى حقوقي كزوجة مكانش راكي فاهمة انا عيطت لاهلي جاو لقاوني مضروبة و وجهي كامل منفخ قالو اخي راح نديها للطبيب قالو ديها انا بروحي طلقتها نقولك حاجة و الله قريب نهبل و لحد الان مادارو بيناتنا الصلح ما والو على خاطر يماه ما حبتنيش من نهار لول المهم راني في شهر و ايامرسل ميساج الخميس لماما قاللها بعثيلي ccp نتاع بنتك باش ما نطالبهس بالنفقة وما نديرلهش abondant de famille واش نقولك والله راني مهمومة كتر منك لكن الانسان يقول الحمد لله راح نولي للجامعة و نخدم على ولادي و خلاص و انت ربي يجمع سملكم ان شاء الله ادعي ربي صلي بالليل قولي دعاء سيدنا يونس عندما كان في بطن الحوت و صلي صلاة الحاجة و ربي يوفقك سلام عليكم

[أم ريتاج زهرة]

يا اختي اولا ربي يهنيك اختي و نتمانلك ترجع المياه لمجاريها
و هدا الراجل مين يدير راي امة و راي النساء كن ماتزوجش خير و الراجل الرجلة نتاعه في هبته و كلمته حسبي الله و نعم الوكيل

[مواطنة]

اختي الكريمة الله يصبرك اولا نقولك بالاكي تقومي بردة فعل حاليا لانو فكرك مشوش و مع الحمل المراة تضعق ومتكونش عندها نفس القوة وانما تخمم بكثير من الحساسية
الراجل لي يتبع كلام النساء صعيب باش يتبع كلام الحق لازمك تصبري عليه
تعمرو المشاكل في راسو واش يدير باش ينقص الضغط فكر بعدم مسؤولية من جهة وجهة اخرى باش مواليه يشوفوه الراجل لي ميتبعش مرتو و ولادو يعني يقدر يسمح فيهم لانو احنا في الجزائر لي يسعى لارضاء عائلتو و يجلهم ليه وميضيعهمش يسموه جايح بوبو
خليلو فترة يخمم و يرتاح و خلي اختو تخربلو دارو وتبني دارها
معاك حق ديريلها حد لانو مشي من حقها تحكم فيكم لكن امو حاولي قدر الامكان تجني النقاش معاها
وادا قدرتي بشوية اجبدي روحك من حكاياتهم شوفي في الدين واش هو الواجب ديالك فقط
لان ارضاء الناس غاية لا تدرك
ادا شفتيه طول اطلبيه باش تهدرو لكن ما تتسوليش العاطفة ديالو باولادو لانك اهم محور يعني يرجعك مشي على الاولاد وانما باش تكملو حياتكم مع بعض
نقولك يا اختي الوذن كثر من السحر راجل كي يتعمر على مرتو بك يوم فتيتة فتيتة حتى يولي ميطيقهاش و يسنى كاش غلطة باش واحد ما يلومو امال انت متخليش الغلطة جي منك
اعطيه الوقت
اتهلاي في اولادك
متخليش اهلك يغلطو معاه لانو هو راهو معمر ولوكان يغلطو بالكلام يقدر يمد الحق الكلي لمواليه و يتحقق بلي انت و مواليك مشي ملاح مهما كنت ناس طيبين
ادا طول اطلبيه استفسري منو علاه خرجك من دارك
ادا شفتي بلي عصص لازم الصلح
اسعاي للحفاظ عالى عائلتك بكلما اوتيتي من قوة و بكرامة و ادا انت مغلطتيش راسك يبقى مرفوع
وكلي امرك لرب العالمين

[نسيم الريح ش]

بالسياسة ورجعي لدارك احسن ما تيتمي ولادك وبوهم حي وخلي خته تحكم كيما تبغي ما جيري راسك براس حتى وحدة كسبي راجلك وخليك من ابباقي

[طاعة زوجي ..]

ربي يفرج عليك اختي ويلم شملكم من جديد. ماعرفتش واش نقولك المهم أصبري ووسعي خاطرك وساعفي راجلك أكيد يكون مضغوط من كثرة المشاكل والحس. المثل يقولك القاضي يسمع من زوج باه يحكم بالحق. انتي تاني التمسي الأعذار لزوجك وحاولي تتصالحي معاه وما تخليش الأمور تكبر بيناتكم.
تصرفي بالسياسة وإذا اضطريتو دخلو ناس للصلح بيناتكم. حبذا لو يكونوا ناس رزان ويتصرفوا بحكمة وحلم باه ينحل المشكل بأقل الاضرار وترجعي لدارك إن شاء الله




الأخت جمانة ربي يفرج عليك حبيبتي ويعوضك خير

[جومانةج]

شكرا جزاك الله خيرا ووكلت امري لله سبحانه وخليتها عنده و انا للان راني نتمنى نولي لداري و الله ما تخيلت يطلقني و الله راني مريضة و راني نظل ندعي ربي والله ظلمت صح غلطت مين سبيت لكن فاض بيا و الله تحملت بزاف

[مصطفى_س]

الله يجمع شملكم و ربي يهنيكم للاخت جومانةج والاخت roose

حاولو بالحوار و النقاش و لا حرج كي دخلو الحكماء في العائلة باش يحلو المشكل و معليش ساعات الانسان راه مظلوم و يسكت موش لانو ضعيف لا بالعكس باغي الاسرة تاعو تبقى متماسكة و لازم نسمحو شوية و ان شاء الله يكون الا الخير

أسأل الله ان يفرج همكم و كربتكم و يجمع شملكم

[الرميصاءْ]

ربي يفرج عليك

[visa uk]

شوفي الاخت سبحان الله حكايتك حكاية وحدة نعرفها تعمل معانا تمام انا مداصرها مليح هي متزوج وصراحة بنت عائلة ومتخلقة متربية هي توجت راجل صراحة مش تاع مشاكل ابدا يعني راجل يخليها در كما تحب تخرج وفتاه تحب ونرجع وقتاه تحب تروح لاهلها وقت تحب وواش تطلب يلبيه صراحة حسب ماحكاتلي يدها ون تحب بسيارتو واي وقت وجامي رفضلها طلب مهم مهم مشكلتها في خياتو مزوجات ويجو لعندهم هي سامنة معاه في فيلا في طابق علي فوق دارو هو دار والديه ايا يجو خاوتو ويحرشو فيه علاه تخرجها علاه تدها كما تحب وووو كل مايجو صدقوني يعمرولو راسو صدقوني حتي ياثرو عليه وهو مشكلتو ايضا متعلق جدا جدا بعائلتو وخياتو يصرف عليهم رغم انهم مزوحات ويسمعلهم رغم انهم يعلم عالطين ولا حتي مرة قالها ياانا يانتيا من قوة مشاكل لو ساكنين وحدهم لما حدث كل هدا الهم ومنكر هي الان راها في دار والدها ومتشابكة معاه لانو مرة جا متاخر في االيل راح للدار اختو مانعرف واش دالها وروندالها سيرفيس وهامل مرتو وولادو
يعني نفس قصتك كاين رجال هام صح يدو مرتهم ون يحبو بصح غريب عائلتو يماه وحياتو اقصد لبنات تقول هو مسؤول تاعهم ولاصقين فيه ويعمرو فيه وجابلي ربي راح يدوه للهاوية قريبا يعني قضية تعمار راس وهو مش فايق او لاعبها يتمهبل

[جومانةج]

بارك الله فيكم والله دركا محتاجين للدعاء من عندكم برك الله يخليكم ما تنساوشةتدعونا في ظهر الغيب عند قيام الليل او حتى في الصلوات المفروضة جزاكم الله خيرا

[AMINA.Z]

الزواج في بلادنا كارثة
ما فهمتش لاه يحبو يدخلو بين الراجل و مرتو
الحل تاعك هو الاستقلال بسكن .
ربي يفرج عليك

[bip bip]

لا حول و لا قوة إلا بالله
أنا نعرف أن الراجل العاقل لا يتدخل فيما بن النساء...و إن إستلزم الأمر التدخل...يكون ميزانه العدل
لا يستكين لأي طرف على حساب الأخر إلى أن يتحرى الحق من الباطل

[roose]

شكرا لكل من قرا موضوعي و تفاعل معي كي قلت حبوني الة في الدار ماشس قصدي عل شغل الدار يعني دايريني برانية لا راي لي حتئ و لو نكون سعيت للصلح حكمت عمة راجلي و حكيتلها قاتلي فلانة يعني اختو مربية عل الفشوش او لازم تساعفيها مع لعلم انها في عمري بالضبط او زيد هو لي خرجني من الدار بابا قالو كي تتهدن ارواح تدي ولادك او هو مابانش كامل عيطتلو ما حبش يرفد علي او كي رفد هدر معايا شغل وحدة ادا منها واش حب و رماها لي غاضتني باف اني حبيتو بزاف كي جات aadl جبدتهم او مديتهملو قاع واش كان عندي ذك راني نبيع في ذهبي باش نصرف عل ولادي

[جومانةج]

سلام اختي درك الزوج نتاعك تبانلي يقولك كيما داها باباها يرجعها حاولي يدخلو بينكم الكبار مثلا عمك و لا خالك يحكي معاه وتاكدي زوجك راح يقولو واش هي الحاجة الي راها مزعفاتو انا تاني مكانش الي سقسا و لا حوس يرد العلاقة بيناتنا و كلش بسبب اللي مربياتو يدير على كلامها لوكان تقولو موت يموت ربي يجيبلك الخير المهم انتي استغفري كثيرا الا و ربي يديرلك حل

[miral_zina]

ربي يسهل امورك ختي ويفرج عليك انا عندي تقريبا نفس المشكلة بصح بالرزانة والصبر تكسبي زوجك حاولي تجي على نفسك الزوج عمرو ما راح يوقف ضد امو معاااك حطيها مليح في بالك وانت لازمك تقلبي الموازين يعني لي حفر حفرة لخوه يطيح فيها حلي عينيك مليح وفتحي مخك موحال متكونيش تعرفي سلفتك وعجوزتك يعني نقاط الضعف والقوة خلي طيبتك ونيتك تغلبهم فاجئيهم باللي انت بنت ناس ولا قدرتي تروحي وترجعي انت واولادك احسن حتى يلقاوك جيتي والله يا اختي صدقيني صح صعيبة وتوجع بصح كون تصبري والله تنالي وقد ما نحكيلك على لذة الانتصار منوفيش كي تشوفي ربي يديلك في حقك وانت تتفرجي وكلي ربي وديري الخير هادي هيا نصيحتي ليك

[muhibbat rrasoul sws]

السلام عليكم و رحمة الله
اختي هذي قضايا جدا حساسة
نصيحتي
ارميها لمولاك،
صلي بالليل و ابكي و ترضعي و اقسمي على الله بأسمائه الحسنى و وجهه الكريم الا ياتي
استرجاعي
اكثري من الاحتساب و الاستغفار

انا لله و انا اليه راجعون
قلبي معاك

[muhibbat rrasoul sws]

شكرا لكل من قرا موضوعي و تفاعل معي كي قلت حبوني الة في الدار ماشس قصدي عل شغل الدار يعني دايريني برانية لا راي لي حتئ و لو نكون سعيت للصلح حكمت عمة راجلي و حكيتلها قاتلي فلانة يعني اختو مربية عل الفشوش او لازم تساعفيها مع لعلم انها في عمري بالضبط او زيد هو لي خرجني من الدار بابا قالو كي تتهدن ارواح تدي ولادك او هو مابانش كامل عيطتلو ما حبش يرفد علي او كي رفد هدر معايا شغل وحدة ادا منها واش حب و رماها لي غاضتني باف اني حبيتو بزاف كي جات aadl جبدتهم او مديتهملو قاع واش كان عندي ذك راني نبيع في ذهبي باش نصرف عل ولادي

راكي تعلمتي
المرة الجاية دارك تاعك الخروج منها لا و الف لا!!!
يخرجوا ڤع و إنتي تبقاي
راني متأكدة راح ترجعي باْذن الله
بصح كيما قالولك الأخت اصبري تنالي و شوفي نقاط الضعف تاعهم
و ننصحك بسورة البقرة لما فيها من بركة و ديري بحث و تشوفي
الله يفرحك يا رب

[مصطفى_س]

شكرا لكل من قرا موضوعي و تفاعل معي كي قلت حبوني الة في الدار ماشس قصدي عل شغل الدار يعني دايريني برانية لا راي لي حتئ و لو نكون سعيت للصلح حكمت عمة راجلي و حكيتلها قاتلي فلانة يعني اختو مربية عل الفشوش او لازم تساعفيها مع لعلم انها في عمري بالضبط او زيد هو لي خرجني من الدار بابا قالو كي تتهدن ارواح تدي ولادك او هو مابانش كامل عيطتلو ما حبش يرفد علي او كي رفد هدر معايا شغل وحدة ادا منها واش حب و رماها لي غاضتني باف اني حبيتو بزاف كي جات aadl جبدتهم او مديتهملو قاع واش كان عندي ذك راني نبيع في ذهبي باش نصرف عل ولادي



ندعيولك باذن الله ربي يجمع شملكم و يرزقكم المودة و الرحمة

[أم ريتاج زهرة]

ربي يجمع شملكم يا رب

[walido_star]

ننصحك بمزيد من الصبر أياما أخرى وستعود المياه إلى مجاريها بإذن الله
زوجك ينتظر انتهاز الفرصة المناسبة ليرضي أمه وهي من تفتح له الطريق لإرجاعك
ويوما بعد يوم تعود الألفة بينكم جميعا ، أنصحك أن تهدي أخت زوجك هدية وحماتك أيضا

حذار أن تتكلمي بكلام لا يليق مع حماتك حين تعودي إلى بيت زوجك
لأن حماتك ستستفزك ، لا تقومي بأي ردة فعل أصبري وإذا شئت أبكي في حجرتك
بعد يوم أو يومين تنتهي فترة الإستفزازات وتعود الأمور كما كانت وتعود الإبتسامة لكم جميعا

من فظلك لا تتصرفي تصرفات عشوائية كالسب أو الشتيمة وغيرها ، تكوني في حاجة تولي
في حاجة أخرى خلاص

ياما أبي وأمي تشاجرا وتذهب أمي لبيت أهلها ومرات أبي يذهب ليجلبها من عند أهلها
ومرات لا يحب أن يذهب فأمي والله أنا من آتي بها إلى منزلنا وكي تدخل تسلم على أبي
ومرات هو لا يجيبها حينا ، لكن في المساء نتعشى سويا وتنتهي القصة

بلا مانقولك كل مرا تعرف القفالي تع راجلها وكيفاه ترضيه حتى ولوكان راه مازال غضبان

ربي يهنيك أختي وما يكون غير الخير إن شاء الله

[سدرة المنتهى25]

السلام عليك أختي و الله المشكل نتاعك أغلب النساء المتزوجات و يروحو لدار العايلة يعيشوه و يتغبنو في حياتهم الحل راكي انتي اللي تديريه للمشكل نتاعك ما تستناي حتى واحد أنصحك تحملي ولادك حالا وتروحي لدارك راهي هناك حياتك مع راجلك ماشي في دار باباك و مايهمكش في الكلام اللي راح يقولو أي واحد راكي رايحة لدارك و نأكد دارك و كي تدخلي ابتسمي و سلمي عليهم نورمال و ادخلي للكوزينة و طيبي و انت مولات الدار و خلي ولادك يلعبو و صدقيني كي راجلك يشوف بلي ما في قلبك حتى حقد يروحلو الزعاف وأظن ما صرا والو غير راهو الشيطان كي يدخل في النفوس الضعيفة و ربي يجيب الخير و بالتوفيق انشاء الله

[صبرا13]

السلام عليكم و رحمة الله و بركاته
لا تحملي كلام زوج على المحمل الشخصي. فالحقيقة يكون الرجل عزبا فتدلله أمه. و لما يتزوج تبدأ حروب النساء فلهو يلقى الراحة عند أمه و لا زوجته
الحاصل. ولادك ما يلقاوش خير من بابا هم يربيهم و يحن عليهم، الباقي حكايات السلطة و الهيمنة. لا تنظر ي أمام قدميك. الزوج زوجك في الآخر يرجع عندك، عندما تريدين شيئا قولي له. الباقي غمضي عينيك واحسني السمع ولا تكثري الحديث. زوجك لا تنغصين عليه و إلا ستكونين خارج اللعبة و أولادك معك. بينما السيد يتزوج من جديد و كان شيئا لم يكن.
أقفزي، و رجعي ولادك لباباهم.

[roose]

رايحة ندير واش قولتولي و الله المستعان

[صفاء الروح]

ربي يفرج عليك
متيتميش ولادك حاربي على جالهم
انا امي حاربت وكافحت على جالنا 24 سنة
اقسم بالله والله شهيد على ماقول
ومازالت تعاني الي حد اللحظة هاذي
امي ماهيش سعيدة بصح دايمن تضحك في وجوهنا ....امي تبخل روحها وتلبسنا ..........ماتكلش وتوكلنا
ومترقدش حتى نرقدووو
امي ياختي جاعت وبكات وتضربت ووووووو ..............تعرضت لكل شي من اقرب الناس ليها
والله راني نكتب والدمعة طاحتلي .......كبرنا وعرفنا قيمة الام وواش صبرت على جالنا ومزالت صابرة ...........
امي في نظري مثال للمراة الصامدة عندها شخصية فولاذية
كان تبكي نبكي نعشق اميكي كبرتوفهمت كلشي
اختي متضيعيش ولادك على حوايج تافهين كوني مرة ورجعي راجلك
وخلي ولادك يفتخرووو بيك
كولي لقزاز على جالهم

[صبرا13]

رايحة ندير واش قولتولي و الله المستعان
توكلي على الله و احسني نيتك، اما عن هيئة العودة، تعودين على هيئة من ضايفها اهلها: حِّناء ( الحنة) ، و ثوب حسن، ولما لا قصة شعر، و هذا ما تتزين به كافة النساء عندما يضيفوهن اهلهن. و احسني هيئة و لباس ولده وولدك.
وتزيني لزوجك بما تتزين به قلة من النساء: أدب من غير عتاب، و اما أهله فصمت و تغافل و اله الموفق.

[Golden Princess]

الله يهديهم و انتي ربي يفرج عليك ,,,,,,,,,,,,, اكثري من الدعاء

[roose]

السلام عليكم جميعا معلباليش الشي لي درتو صح و الا لا عيطت لراجلي في الاول ما حبش يرفد من بعد سمطت عليه هدر معايا بالتشناف المهم راني فهمت بلي قالولو هي لي راهي دير المشاكل باش تسكن وحدها او قالي راكي في دار باباك اسكني وحدك انا راني عايش حياتي يا خاوتي راجلي راهو داير الحرام بين عينيه ما رانيش حابتلو هذيك الطريق قالي كي تترباي عيطيلي ما جاوبتوش راهي تحرق في قلبي

[صبرا13]

كم مضى من يوم وانت عند بيت اهلك؟

[مصطفى_س]

السلام عليكم
عملتي مليح كي اتصلتي بيه خطوة مهمة و ميهمكش اذا مزال غضبان المهم جاوبك و معليش الشيء لي قالو ممكن كي راه غضبان لذا موش هو كي يكون غضبان انت ثاني تغضبي لازم واحد يكون عاقل وقت الغضب
و على كلامو تاع كي تترباي مديريش عليه انسايها و متفكريش فيها فكري انك تكسبي راجلك
عن داير الحرام بين عينيه و قال راني عايش حياتي موش معناتو انو سيقع في الحرام ان شاء الله راجلك راه غضبان فقط و ان شاء الله يتنحالو الغضب بانسان يحبو ابعثيلو واحد يحبو و لوكان يعرضو للدار تاعو ويقلو العن ابليس راه فرق بيناتكم و مكاش دار بلا مشاكل و مكاش مشكل ميتحلش

و حاولي تقوليلو راني حابة نرجع للدار و ثمة حاولي تتخطاي كامل المشاكل لي عقبتي عليهم
ان شاء الله ربي يفرج عليك

[جومانةج]

شوفي رجعي و كي يلومك ولا يقولك مشي رحتي و داك باباك قوليلو انا بىك رحت ضيفة لدارنا وخلاص و اختي نوصيك حاجة ما تزيديش تحكي مشاكلك لاهلك على خاطر احيانا الاهل تديهم وحد الحمية وعزة النفس ويقولك بنتي و لا اختي تطلق لكن انت الخاسر الوحيد ما ديريش غلطتي الله يرضى عليك انا راني في داىنا مطلقة وحامل بسبب اخبار اهل بكلش ربي يسهلك صلي ركعتين قبل ما تروحي وقري الاذكار و قولي بسم الله كي تجي داخلة دارك