زوجة أخي و الميراث [الأرشيف] - منتديات الجلفة لكل الجزائريين و العرب

مشاهدة النسخة كاملة : زوجة أخي و الميراث

مشكلتي

2016-03-29, 19:28

السلام عليكم
قلبي راهو معمر و مالقيت ليمن نحكي فلابيها جيت ليكم إخواني رواد هذا القسم باش تسمعوني و تنصحوني على خاطر رايحة نعبل من كثرة التفكير في الموضوع .
المهم أنا متزوجة و ربي مازال مارزقني بالأولاد و سبب تأخر الحمل من زوجي مي الحمد لله راني عايشة مع راجلي و راضية بواش كتب ربي و حياتنا راهي مستقرة و و رانا بالعقل هذا وين بدينا نبنيو في سكن خاص و راكم عارفين غلاء تكاليف البناء علابيها راني شايطة مين نلم دورو باش نزيدو في البنيان و باش نوضحلكم مشكلتي أكثر توقي أبي منذ زمن بعيد يعني ملي كنت طفلة و خلاني أنا وأخي و خلالنا مسكن رانا مكريينو دركا و دراهم الكراء راهي تستفاد منهم أمي ربي يحفظها .كبرنا و تزوجنا و الحمد لله أخي أصبح قاضي الله يبارك و راهو ساكن في سكن وظيفي و في نفس الوقت عندو آبارتومو غير كيما كمل خلصها المهم العام لي فات جا عندي أخي و قالي راهو حاب يقوم الدار لي خلاهولنا أبي شحال يسوا و يعطيني حقي الشرعي باش يرجعو على اسمو باش يعاودلو البنيان أنا قلتلو إذا ماراكش مزروب ضركا اصبر على خاطر يما راهي تلم في دراهم الكرا باش تروح بيهم عمرة و الا حج قالي خلاص مارانيش مزروب . مع العلم أمي موافقة على الموضوع . و انا الصراحة عجبتني الفكرة باش نساهم في بنياني و في نفس الوقت حبيت حتى تكمل يما تلم دراهم الحج تاعها .
في الأسبوع الماضي أمي راحت لبيت أخي و كان عندها عامين ماراحتش ليه على خاطر هو يخدم في ولاية جنوبية يعني بعيد شوية اتخيلو خويا واش قاللها .......قاللها تنازليلي على حقك باش نكتب الدار على اسمي قالتلوا و حق اختك قاللها اختي تسمح في حقها أنا ما نعطيش دراهمي لراجل اختي يبني بيهم ! و من بعد أمي زعفت و قالتلو بسيف عليك تعطي حقها لاختك هذا ورث باباها ......و تدخل مرة خويا في الموضوع و قالت : ايه لازم تسمح في حقها لخوها أصلا معروف عندنا الدار للذكر و البنات ما يسالوش ! هنا يما انفجرت في و جه مرة خويا و قالتلها : ندمت لي جبتك لوليدي بسيف عليه و طلعتيلي سوسة .....على خاطر زوجة أخي هي في الأصل بنت خالتي و خويا ماكانش حابها و أمي جابتهالو بسيف .....و ضرك واش نحكيلكم واش نخلي مواقفها السيئة لا تنتهي و أنا عمري ما هدرتلو عليها كلمة لخويا على خاطر نحب نكون امرأة عصرية ما ندخل في حياة خويا و لا في خصوصياتو مي هذي المرة خلاص فاض الكأس .......يعني لحقت حتى تحرش خويا باش نا يعطيليش حقي الشرعي .
أنا راني ناوية نعيط لخويا و نقولو أرواح لداري نهدرو حديث أخوي بحت غير انا و انت لازم مرتك ما تكون حاضرة و زوجي ما يكون حاضر و راني ناوية نفكرو بلي راهو قاضي قبل كلشي و راني عارفة بلي رايحة نجيب نتيجة معاه على خاطر نعرف بلي خويا انسان طيب و مافيهش الشر لكن راهو متاثر بمرتو .
واش رايكم في الموضوع أخوتي يعني نستدعي خويا لداري و نقولوا ما يقوللهاش لمرتو بلي راهو جاي لعندي على خاطر ماراهيش رايحة تخليه يجي وحدو نعرفها . مي المشكلة راني خايفة ما نحكمش روحي و نهدرو على خرايبها لي ماراهوش سامع بيهم مع العلم أنو خويا يدير بزاف ثقة فيا و قالي من قبل بلي أنا خط أحمر في هدرتو مع مرتو و قالي كل ما تجبدك نحبسها عند حدها يعني فهمت من كلامو أنها تجبدني بالسوء مع العلم أني دايما نهدر عليها غير بالخير مع خويا باش ما نكونش شيطان ندخل بين الراجل و مرتو .

عين الصقر

2016-03-30, 01:41

اولا الله يرزقك بالذرية الصالحة إن شاء الله

الميراث من حقك الشرعي يكفله الدين والقانون , فكرتك في محلها استدعي اخوك واحكي معاه منك ليه وحاولو تتوصلو لاتفاق بالتراضي
لا حول ولا قوة الا بالله زعمى بنت خالتك وترفع صوتها على خالتها اه وين وصلنا, زواج الفاميليا ماشي زواج فيه المشاكل
الواحد مين يسمع مشاكل الناس يحمد الله على عيشته والله
ربي يوفقك

faty05

2016-03-30, 08:00

اختي استدعي اخوك و تكلمي معاه صراحة و الميراث من حقك وواحد ما يديهلك و اخوك من اهل الاختصاص
اما تجبدي علا مرته ما تحبديهاش خلاص اختي ما عندها ما دخلها اصلا
الا اذا تكلمت معاك حطيها عند حدها
ما تخافيش اختي اتكلي على الله

AMINA.Z

2016-03-30, 09:57

رايك صواب ..بارك اللهفيك عاى هذه الرزانة
و ان شاء الله تدي حقك و الكل راضي.

soumia bougaa

2016-03-30, 09:59

السلام عليكم ورحمة الله ...

فكرة انك تتصلي بخوك ويجيك نهدري معاه في الدار فكرة مليحة ..

اما مرة خوك فانصحك ان لا تتحدثي عنها بسوء لان اخاك يراك جميلة ومايسمحش لمرتو باش تجبد عليك بالسوء لاننو يشوفك احسن منها كونها في الوقت الي هي تهدر عليك بالسوء نت تهدري عليها بلمليح ...

حاولي برك يكون موضوع النقاش تاعكم هو الدار وليس زوجة الاخ ...

لانو قادرين تدخلو في مشاكل انتم في غنى عنها ...

أم سلوى

2016-03-30, 10:37

حوك خوك لا ايغيرك صاحبك
نعم انا في مكانك اتنازل لاخي من دمي ولحمي. .وراجلك هو يدبر راسوا في البنيان تاعو
اقولك لماذا الدنيا. ميفهمهاش الواحد الا بعد مرور وقت..
يعني الان تشوفي اتجاه زوجك وانت تديرلوا بيت. ..
والله والله. هذه العاقبة سيئة دائما دائما معكل الازمنة..بعد 20 سنة. ستندمين ستجصل ظروف وظروف تجعلك تشعرين ان زوجك يربطك به علاقة حب غير مستدامة..اقول غير دائمة....ككل هشرة سنوات ينخفض مستوى الحب بينكما...وفي الاخير تشعرين انك لو تركتي اخوك يتمتع بالبيت افضل واحسن...على الاقل صلة الرحم تجمعك به ولا تيستهيني بهذه العلاقة....فهي تتوطد في اوقات الضعف يعني الواحد يحس بخا في الكبر والعجز ويحن اليها اما زوجك فالعلاقة عكسية
خذي رائيي ...

غزلانْ

2016-03-30, 10:47

السلام عليكم

فيما يخص زوجة أخيك من الأفضل أن لا تتدخل تبقى أمور عائلية مع التسرع لكليكما لتحقيق مصلحة دون مراعاة

و لها أن تترك الأمر " لكِ" و "أخوكِ" و مهما كان القرار

لابد من " اعطاء اعتبار لوالدتكما " " فهي على قيد الحياة " حيّة ترزق

فأنتِ متزوجة و تريدين من خلال حصتك " تأسيس و بناء بيتك " هو هدف تسعين اليه فهل فكرت في والدتك

و أخوك " قاضي لكنه مادّي " كيف له أن يفكر مثل هذا التفكير

بمجرد طلب من والدته " التنازل عن حقها له " هنا له هدف آخر و الله أعلم

و من خلال تفكيركما تفكران في نفسيكما و لا يهم " ماذا يحل بالوالدة " أنانية " ابن و بنت "

ربما بل أكيد في هذا الوقت و ما نشاهده من مشاكل الميراث

يكون هم الأبناء خصوصا ادا تزوجوا " الارث فقط " و بعد ذلك

الوالدين في ديار العجزة

رأفة بأمكما لكل وقت وقته ماذا بعد أخذكما الحق الشرعي

فلا زوج ابنتها " يرضا حملها'' و " لا زوجة ابنها ترضا أن تعيش معها"

مشكلتك في يد والدتك من خلال " تنازلها أو لا "

ان تنازلت تمنح حقك لأخوك و ان لم تفعل أظن نفس الشيء فالأخ قاضي الله يبارك....

الأخ الطيب لا يرث أمه و هي على قيد الحياة

فلتنصحي والدتك بأن لا تتهور و تتسرع و لتسأل نفسها ماذا يحل بها لو تنازلت و باع الأخ البيت .

قالت زوجة أخي و الميراث....و لكن هل يجوز الميراث و الوالدة على قيد الحياة؟

زوجة أخي و الميراث............أنا و أخي نريد الميراث

الله يبارك في الوالدة و الله يهديكم

أم سلوى

2016-03-30, 11:06

نعم بارك الله فيك
انا واخي والميراث احسن...

nihal159

2016-03-30, 11:28

حلي الموضوع بطريقة ودية أحسن؛لكن لا تتنازلي على حقك؛ لأنك أنت راكي محتاجة وهذا حقك شرعهولك ربي علاه تحرمي نفسك منو.

muhibbat rrasoul sws

2016-03-30, 11:30

السلام عليكم و رحمة الله
انصحك بالاستخارة
اذا كلمتيه قولي الدعاء
"اللهم اكفنيه بما شئت"
و اكثري من الاحتساب
اختي ما تزعفيش بصح خوك تبدل و الله اعلم، الراجل اللي يتكلم مع يماه في هاذ الأمور قدام مرتو يعني راه مدخلها بزااااف في امورو العائلية و راكي تعرفينا حنا النسا ما نسكتوش
و زياد إنّو يلحق و يطلب هاذ الشيئ من يماه التي تجمع بالدورو باش تدير عمرة و هو لابأس عليه ......! هذا شيء خطير ما يجيش من مسلم عاقل، من المفروض هو يخلصوها و هذا شرف لديه و لو انه غير مجبر لكن هذا ديدن الطيبين
ان شاء الله برك مترو ماشي تاع عقاقر الباقي ساهل
اكثري من الاحتساب و الصدقة و الصلاة و الدعاء
ما كان حتى حاجة تكون بغير إذن الله

برك تعقيب اختي ليك و لغيرك، حاولو تنحو الفرنسية من الكلام، و رآنا سمعنا مشروع فرنسة الشعب، شوفي في المنتدى

basyouni

2016-03-30, 12:50

اولا انصحك بالكلام مع اخوك
واعلمي ان اي كلم بينكم ستصل لزوجته رسميا حتى ولو قال لك ما تخخافيش

المهم هذا حقك مدولك ربي يا اختي

تكلمي معه و ان كان ممكن ادخلي شخص كبير في السن من العائلةيحترمه الجميع بينكما

(( هبة الرحمن ))

2016-03-30, 13:20

السلام عليكم
شوفي اختي العزيزة كل البيوت الجزائرية تقريبا تعاني من نفس المشكل .
برأيي تلقاي مع أخيك بصح في بيت الوالدة أفضل اذا قبل واذا رفض يجي لدارك.
بصح لازم تكوني ذكية انت قوليله عندك الحق انا دراهمي مانبنيش بيهم اصلا ماعندي لا اولاد لا والو خلي راجلي يدبر راسو ( كذبي عليه غير قد ما تدي حقك وزيدي شوية هدرة من عندك راكي عارفة احنا النسا نقدرو نألفو أفلام هندية ويأمنونا ).
ماتخشانيش معاه سايسيه بالكلام انت خويا وخليفة بابا وماعنديش غيرك وووووو )
واياك ثم اياك تحكي على زوجته وافعالها القديمة مادخليش الامور في بعضها باش ماتكبرش وزوجته ما تجبديش اسمها خلاص....كاين زوجات اخوة سميات غير تع مشاكل.
وصلي وادعي ربي يبعد زوجته عليكم ويرقق قلبه من جيهتكم....
خدمي راسك مليح وابتعدي قدر المستطاع عن العنف والتعصب باش تقضي امورك ...العنف يولد عنفا واحرصي عزيزتي على ألا يكون المال سببا لفقد اخيك الوحيد وزوجته السمية ربي يهديها.

yoori

2016-03-30, 13:20

برايي ان تبحثي عن شخص يحترمه اخوك ويستحي منه ويكون عاقل في الحديث معه ويخبره بحقك الشرعي لعله يخاف الله
الله يرزقك الذرية الصالحة وتذكري بعد الشدة ياتي الفرج

صبرا13

2016-03-30, 13:57

السلام عليكم و رحمة الله و بركاته
من الأشياء اللتي طبع الإنسان عليها حب المال. و هذا باب شهوة المتساقطون فيه كثير إلا من رحم الله
انا لا أرى زوجة أخيك في الصورة إلا قليلا، فلو كان الميراث سيباع و يقبض اخوك دراهم يقسمها بينكم لقلنا لربما سهل الأمر. أما وان الأمر تقييم و على اخوك أن يبحث في حاله و ماله من أين يأتي لك بالنقود اللتي تعوض حصتك. فهذا أمر قد يصعب. فقد تغلب فيه النفس صاحبها.
وقال الشاعر :
إني بليت بأربع ما سلطت ... إلا لأجل شقاوتي وعنائي
إبليس والدنيا ونفسي والهوى ... كيف الخلاص وكلهم أعدائي؟
إبليس يسلك في طريق مهالكي ... والنفس تأمرني بكل بلائي
وأرى الهوى تدعو إليه خواطري ... في ظلمة الشبهات والآراء
وزخرف الدنيا تقول أما ترى ... حسني وفخر ملابسي وبهائي؟
انا ارى ان تَدَعي النفوس تهدأ،و لا تكلمي أخيك و لا هم يحزنون. آخر قول سمعته أذنيك انه سيعطيك حقك. و الباقي انت لم تكوني حاضرة إذن سلّمنا انك لا تعلمي. و الباقي ترابطين بصبر في باب"" فبجحني فبجحت علي نفسي" ( حديث أم زرع) بما معناه انه قد نمدح انسان حتى يلبس صفة المدح التي اثنينا و الّحينا في الثناء بها عليه
يعني ساعة على ساعة تعرضي اخوك على الأكل و تطبخي له ما يحب و تثني عليه. و تكوني حنونة عليه لكي تساعديه على أن يغلب نفسه. و قد كان لأبي أخت من أبيه. فكانت كلما جاءها لا زالت تثني عليه : مرحبا بكبيرنا مرحبا بسيد عرشنا. مرحبا بأبي و أخي. و كانت تطبخ له ما يحب و تدلله. فكان ابي اذا ذكرت أخته هذه تهلل وجهه. و كان يعزها و أوصانا بها خيرا. فلازلنا نعود كل الاهل و هي بالذات لما نعلم من مكانتها عند أبي.
فدعي امك تردعه. فهو سيقبل أن تسمعه ما لا تحب نفسه. و هو ربما لن يقبله منك على الأقل في الوقت الحالي.

sarl02

2016-03-30, 14:42

لا تسمحي في حقك الشرعي ومدام انك ما درتيش تنازل سيعطيك حقك رغما عنه...ومن المفروض راهو قاضي ويعرف جيدا قيمة الحق قانونا وشرعا ..وفقكم الله

sarl02

2016-03-30, 14:46

صبرا13

2016-03-30, 16:43

السلام عليكم و رحمة الله
نسيت قولك انك لم ترزقي بعد الولد، فعسى الله ان يرزقك بأولاد قرة عين، بارين بك و عسى ان يكونوا من الصالحين، و اعلمي بارك الله فيك ان تناحر الأولاد على الميراث اكثر ما يؤلم الآباء و الأمهات، فامكم تعبت في تربيتكمً، فان كان غاب العقل عن اخيك، فلتكوني عاقلة، و هذا صبر فيه مشقة و ان زادت المشقة زاد الأجر باْذن الله، و لدرهم يبارك الله فيه خير من مائة الف لا بركة فيها، فاصبري و ادفعي بالتي هي احسن
قال تعالى (( و ادفع بالتي هي احسن فإذا اللذي بينك و بينه عداوة كأّنه ولي حميم))

أم سلوى

2016-03-30, 17:40

واش هذا الكلام؟؟هذا زوجها وقرة عينها وليس صاحبها...راكي من قلبك وفي وعيك من هذا الكلام؟؟...من يدوم للمراة زوجها واولادها وبيتها ام اخوها ؟؟الاخوة الان راهم يرفدو اخواتهم البنات؟؟الا من رحم ربك ....والله رايك هذا يظهر مدى تخلفك الفكري .

تخلفك انت
الدم اقرب اليك يالفحلة رابطة الدم وصلة الرحم لا تعوض
تخلفكم انتم فقط
غدا سيرميها حتما بالاولاد فما بلك بدون اولاد

الاتخلف هو ضياع الاخ في ملاحقة وبناء بيت للزوج وكما هو معروف الرجل هو الذي يبني داروا وليس زوجته
تحيا القبائل الذين لا ياخذون من الزوجات اموالا

حتى الاثاث تاخذه الزوجة هههههههههههههههههههههههههههههههههه

blanche rose

2016-03-30, 18:03

السلام عليكم
اقتراحي
خلي خوك يجبدلك الموضوع أولا
ما تستدعيه ما والو
ومن جهة أخرى..علاش ما تبيعيش الارض اللي راكم تبنيوها وتشري دار باباك وتكتبوها على اسمك واسم راجلك..هكذا خوك يطمئن عليك..

اكيد خوك خايف من راجلك لأنو ماكانش بيناتكم أولاد

بخصوص زوجتو..ما تخافيش تماما..رايحة تتعاقب من عند ربنا سبحانو
ما تربحيش ذنوبها وما تهدريش فيها

هذا رأيي عزيزتي
ربي يرزقك الذرية الصالحة ويسعدكم

متعلم انجليزي

2016-03-30, 19:28

ربي يرزقك الذرية الصالحة ويسعدكم

أم أسامة 07

2016-03-30, 20:00

قال تعالى (( و ادفع بالتي هي احسن فإذا اللذي بينك و بينه عداوة كأّنه ولي حميم))
اصبري حبيبتي واحتسبي وحقك لن يضيع باذن الله