زوجتي قهرتني ( ميتة الاحساس)

[مشكلتي]

بلا مقدمات ان شاب حياتي كامل وانا صابر واقاوم في نفسي
لم اشاهد فلم اباحيا في حياتي لم اقم بممارسة العادة السرية في حياتي
كل مرة تاتيني رغبة في التكلم مع اي احدى الفتيات ولم افعل
جامي تحدث في الشات مع فتاة
ليس مدحا لي لكن صبرت لانال الجنس الحلال
لكن لو حتى بعد الزواج لم البي رغبتي ... هنا تكون كارثة بالنسبة لي
زوجتي ميتة الاحساس بكل ماتحمله الكلمة من معنى
ميتة العواطف
احيانا اقول هل هذه انثى ؟؟؟ الانثى خلقها الله تمتلك سحر الكلام زوجتي خلاص جامي قالت كلمة يحن لسماعها القلب ...
لا كلام جميل لا تزين

كان هي ميتة انا عبد صبرت حياتي لانال ماحلله الله لعبده الذي قاوم المغريات المحرمة
تقهرت يا ناس
قلتها ابتسمي شوي ، تزيني ولو قليلا
فالمراة الصالحة اذا نظر اليها زوجها سر وفرح

مع وجود عارضات الازياء في العمل ... اقول لكم بصراح اني غير محصن ابدا ...
بالعكس تارة عل تارة صرت انظر للفتيات في العمل ( عادة لم اكن افعلها قبل الزواج ...., فعلتها بعد الزواج )
وتتحدثون عن خيانة الازواج
مايحس بالجمرة كان لي عافس عليها
تو انت عرست اكيد ستحصن فرجك وتحفظ نفسك بما يرضي الله لكن ان تكون الزوجة ... راهي هنا لااراديا ستبحث عن ماتريده خارجا
سبحان الله انا اعيش معها وادرى..... ولامرة التفت الي او ابتسمت الي
يا لطيف .. هذا مانقول
علاه ناس تتزوج بعد اشهر يطلقو
اتمنى ان اجل ما الحل هنا ؟؟؟؟
والعقلية لي ماشية : الحب راهو عيب .... حتى مع الزوج راهو عيب ....

[nihal159]

السلام عليكم ورحمة الله و بركاته؛ أخي الحل بين يديك؛ أتكلم مع الزوجة تاعك؛ فهمها بلي راهي مقصرة بزاف في حقك؛ وإذا هي ماهيش قادرة أو حابة تقوم بدورها كأنثى و زوجة؛ تزوج مرة أخرى؛ راه عندك حجة قوية باش تعدد.

[سيف الدين الطيار]

تزوج ثانية و اعدل.....

[غزلانْ]

اذا كانت ميّتة الاحساس
فلتجالسها و تنقل لها
ما كتبته له و تطرقت اليه
و حال محاورتها و اعطها فرصة
و فرصة ان لم تتمكن من تغييرها
اصبر اصبر و اصبر
و ان لم يكن هناك تجاوب
فما عليك الا بزوجة ثانية
" حيّة الاحساس "
عكسها تماما و لا تطلقها و لربما بتعددك تتغير

موفق أخي

[مريومة دودي]

السلام عليكم اخي ف الله التمس لزوجتك بعض الاعذار ممكن تربيتها على ذيك العقلية مالزمش داصر راجلها........الخ من المعتقدات الخاطئة المهم حاول تحب زوجتك بسلبياتها و ايجابياتها وماتتبعش خطوات الشيطان و اصبر عليها و هددها بالتعدد بلا ما تنفذ و ان شاء الله تصلح الاحوال بيناتكم و اماتنساش اهم حاجة ماتطالبش بحاجة بلا ماتوفرلها حوايجها الجمال و التحفة تتطلب التمويل الكثيييييييير

[azzam 01]

لا تتعجل عليها صحيح ليس الخبر كالمعاينة.......لكن اقول لك مرة أخرى لاتتعجل لا تتعجل

[إسلام الفاروق]

ربما تحتاج لبعض التثقيف
اولا
الرجل الحقيقي يمسك نفسه و لا يبدي ضعف امام عارضات الازياء فهن اشباه نساء
عكسك انت ابديت ضعف لا تحبه فيك زوجتك وقد تفقد احترامها لك و حتى رفاقك

ثانيا
المراة لها شهوة اضعاف الرجل وترغب في ما ترغب انت اضعاف المرات

حاول مراقبة تصرفاتك اولا فربما هي من تسبب لها (موت الاحساس)

حجة واهية لتعدد

سلام

[لمسة ابداع]

اولا اخي الكريم نحييك عل صبرك كي كنت اعزب قل مانجد ذكر الان لا يدردش مع فتاة
ثانيا حاول انت تكون حنين معاها و رومنسي معاها
انا من كلامك فهمت بلي اك عريس جديد و هي بانتلي مزالت حشمانة برك
حاول انت وحدة وحدة تنحيلها الحشمة هادي و تعلمها
و أك ماشكيتش من حوايج اخرين يعني اك تبان لباس
و الله نعرف وحد كانت كيف مرتك العام الاول اكل هكدا مع راجلها مي نهار تنحات الحشمة ولات حاجة اخرى خلاص
نحي فكرة الطلاق و تعاود الزواج كيما قالولك بعض الاعضاء
الرومانسية اي مكتسبة ماشي فطرية

[chihab13000]

يا أخي شجعها باش تولي تلبسلك واتحفلك.....شريلها قش شباب نتاع دار ......امشطلها شعرها و احكي معاها ....بينلها بلي تكون إيجابي بزاف مين تكون لابسة مليح....ولا تكون متحفة روحها.....احكيلها على واش تحب فيها وكيفاش تحب تشوفها....يا أخي هاذوا صوالح انت تربيها عليهم....احكيلها بلي راك تشوف لي يخدموا معاك كيما قلت عارضات الأزياء راها نفسك تتحرك خليها تغير ....احكيلها حكايات لا بغا كذب على صاحبك ولا وليد عمك ولا خوك قال مرتو تلبسلوا وتحفلوا و..و..و.. وانت تاني البس مليح وتحف روحك وحفزها يا أخي حفزها.......................بالتوفيق

[(( هبة الرحمن ))]

السلام عليكم

أحسست بكلّ كلمة كتبتها أخي ، صعب على الرجل أن يحصن نفسه ابتغاء مرضاة الله وحبا في أن يناله في الحلال ثمّ يصدم بواقع مرير ،، زوجتك عزاطفه ميتة ولا تحسن التعبير وجذب زوجها إليها ، ربّي سبحانه خلق وفرق ، أنت من النوع الذي يسعى غلأى أن يعيش قصة حب مع زوجته لكنها لم تتفهم رغبتك ،،
الأرواح جنود مجندة ما تعارف منها ائتلف وما تناكر منها اختلف ، روحيكما لم تركب على بعض .
أعانك الله على ما أنت فيه أخي .

[محمد جديدي التبسي]

انت في وضع لا تحسد عليه لكن ارى الحل بيدك وحدك
لا ندري كيف تم اختيارك لهذه الفتاة وعلي أي أساس ربما لم تكن ترغب بك وارغمت على الزواج؟! ربما كرهتك لسبب ما او انك تتصرف معها بأسلوب منفر ربما الخلل فيك انت
عموما العام الاول صعب حاول اصلاح ما يمكن اصلاحه وراجع تصرفاتك معها وافتح ابواب الحوار والنقاش بينكما بدل ان تتكلم مع غيرك عن زوجتك والله المستعان ..ربي يفتح عليك

[ميما اللئيمة]

احكي معاها مرة و زوج
اذا اقتنعت اللهم بارك . اذا لم تقتنع خوفها بالزوحة الثانية

اذا تبدلت مليح . اذا ما تبدلت الله سمح لك ان تتزوج باربعة ، عاود الزواج

[النجمة القطبية]

يعني اللي يقرا يفهم من مشكلتك ان زوجتك ليس لها حسنة واحدة !!!!!!!!
ادا كانت اثناء معاملتك لها توصل لها الاحساس اللي وصلنا اكيد ستصبح ميتة الاحساس
يا اخى المراة كتلة من المشاعر فكيف يعقل ان تكون زوجتك دون عن النساء هل من سبب
هل اجبرت مثلا على الزواج منك هل انت من اختارها هل شفتها قبل الزواج
ادا لم يكن من مشكل بواحد من هته الاقتراحات فالحل بيدك
باختصار اجعلها حية !!!!!!
اعرف ففط مفاتيح قلبها وكل انت المبادر
جيبلها هدايا كل النساء يحبو الهدية
جيبلها الملابس اللى تحب تشوفها بيهم او خرجها واختارلها
ارسلها للحلاقة ادا كانت متعرفش تتزين المرة الاولى ثم تتعلم
احسن اليها بالكلمة الحلوة وشجعها كلما تزينت ولو بالقليل ولو لم تكن موفقة في الاختيار
ادا كان عندها مشكلة دوق واختيار ساعدها
هل في حياتك مرة قلتلها كلمة حلوة او مدحلت جمالها == او طبخها == او اخلاقها
هل شجعتها او استنطقت لسانها او مازحتها او عاملتها الند بالند
هل خرجتها مرة فاكونس في اي مكان لثلاثة ايام او حتى ليوم واحد في مكان ما من جزائرنا الطويلة العريضة منها تبدلو جو منها تتقرب منها اكثر
يعنى يا اخى كل تلك الامور تعود عليك بالخير وتجعلها تشعر انها اجمل النساء وتتعامل على هدا الاساس
تجعلها تشعر ان زوجها افضل الرجال وتخاف تخسرك وتفعل المستحيل من اجلك
يا اخي الناس تحفر في الارض باش تحصل على الجواهر وانت زوجتك امامك وتقولي عارضات الازياء !!!!!!!!!!!!
ام لديك البديل !!!!!!
النظرة للاجنبية حرام وكل هدا سيزيد الطين بلة ويعقد حياتك وحتى ربي لن يبارك لك في بيتك
حاول معها يا اخى ثم ان لم تصل لنتيجة بعد التلميح انتقل للتصريح صارحها مباشرة وان لم تستجب
عندها تقدر تنتقل للحلول الاخرى
ولا اظنها مستعدة لتخسر بيتها
ربي يوفقك ويفتح بينكما بالخير ويهديلك زوجتك وتصبح مثل ما تتمنى

[توحيد الجزائرية]

الامر بسيط ،،

علمها ،،،،،
حدثها عن قصص متزوجين ،لكن حياتهم روتينية ،،والزوجة كذا وكذا
حاورها
وتحدث اليها بصراحة ،،انا اريد كذا وكذا ،،،ويستهويني هذا الفعل ،،واكره هذا التصرف ،،
اشتري لها ملابس مغرية
امدحها ،،،،فالانثى تعشق المدح ،،وامطرها بكلمات الحب والحنين ،،فكما تريد منها ،تريد هي ايضا منك

[~أميرة أميري~]

اخي انت حل لهاد المشكل
اولا نقول ربي يكتر من امثالك لانك متنعت عن الحرام فجال باش تعيش لحظة الحلال .. اخي احكي لمرتك فرغلها قلبك ماتحاولش تخلي شيطان يغلبك بعد الزواج دير لي عليك ... انا بانتلي زوجتك انها ارغمت على الزواج والله اعلم لانو المرأة محال تكون جافية لهاد الحد كلها رقة وانوثة زوجتك اكيد عندها مشكل ولا حشامة لدرجة كبيرة
احكي معاها اخي مافيها والو
وان شاء الله راح تتصلح الاحوال وتكون غالط في حكمك عليها

[ManouraHilwa]

يا اخي ارفد مرتك واديها للحفافة واشريلها لباس على مقاسها الستيل اللي تحب انت واشريلها الماكياج وقول للحفافة زينيها ويلا عندك حفافة قريبة ليك جيبهالها للدار وقوللها مادريش العشاء نشريلك من برا وبعد صلاة العشاء عندنا موعد وجيب معاك هدية صغيرة ولو عطر وهكذا تتعلم المشكل انو بنات الفاميلا يجو هكا مع الاول لانهم بصراحة راهم حاسبين الشاطرة شاطرة في الكوزينة ويلا راهي مسؤولة على 20 واحد في البيت اكل وغسيل نظافة ماراهيش رايحة تتبدل خمم فيها تخمم فيك يعني علمها انت

[ManouraHilwa]

كن معها لين لا داعي لان اذكر كل التفاصيييييييييييل الله يعاونك

[جومانةج]

صح واش رايكم الي راجلها يطالبها بالعكس اخي انا و الله زوجي ما علاباله بيا حتى حقوقي كزوجة و الله ما كان و انا نتزين و ندير الي عليا و الله كي شغل تمثال راه حدايا ولدت معاه ولد و الان راني حامل بالثانئ و الله راني نحمل غلطة معاه كنت ندعي الله عزوجل يفرج عليا وبهديه صليت صلاة ايتخارة باش نكمل معاه و لا لا غدوى من داك صرى بيناتنا نقاش ضربني و كان دايما يضربني المهم اتصلت باهلي جاو اهلي باش يصلحو الموقف تامن و الله طلقني ببرودة حسبي الله و نعم الوكيل فيه طلقني و راني حامل المهم الرسول علبه الصلاة و السلام قال ماخاب من استخار نقولك استخر الله عز وجل هو يبغيلك الخير و يديرلك حل ان شاء الله ربي يالف بيناتكم نوصيك اجتهد بالدعاء وصل بالليل ربي يوفقك ان شاء الله

[didiaicha]

رربما المشكل راه فيك راهي مقهورة مقدرتش تمثل عليك حن عليها وقلشها بادر دوك تشوف انا زوجي نلبس نطيب العجب متابعة قناةسميرة باه نرضيه في الاول لعبها غير مبالي قلبتله العقلية حبست المكياج ولبسة وكرهتله حياته اسبوع وانانطيب غير الماكلة لي يكرها من فمى تريقل وستعرف

[مصطفى_س]

السلام عليكم

اخي اظن ان الحل هو في لغة الحوار مع زوجتك لانك لم تقل انك تحدثت معها لا تتسرع حتى في الحكم عليها التمس الاعذار قد تكون مريضة و بالعلاج ستتحسن حالتها
انت ايضا تلعب دورا هاما هنا خذها في نزهة و تكلم معها اكسر الروتين الذي انت فيه
قد تكون مصابة بعين رقها فلا حرج في ذلك
المهم لا تتعجل و حاول التقرب اليها لان المراة الصالحة لا تريد من الرجل ذهبا و لا فضة بل الاهتمام و الحب يجب ان تكون فنانا في الاهتمام

توجد حكمة تقول لا تطرق باب الانثى و انت لا تحمل معك حقائب الاهتمام
اظن ان رسالتي وصلت

وفقك الله و جمع شملكما

[(( هبة الرحمن ))]

استغرب لبعض الردود ( خذها للحلاقة)
المشكل برود العواطف وليس الحلاقة الزوجة اذا احبت زوجها اهتمت بنفسها من تلقاء نفسها وليس بالاكراه والاهتمام لا يكمن في الذهاب الى الحلاقة تصرفات بسيطة تدخل السرور الى قلب الزوج والكلمة الطيبة والابتسامة و الابتعاد عن العبوس.
من شب على شيء شاب عليه.

[قارف]

لازم تراجع روحك وتحلل هذا الامر .......................هل كان هذا الامر في بداية الزواج ام فيما بعد ؟ هل تحبها أم لا ؟ مالذي تغير ؟ قد تجد الخلل هل هو فيك أم فيها
وطبق علاج الشرع 1 -الموعظة الحسنة الترغيب في الجنة والترهيب بالنار 2- الهجر في الفراش 3- الضرب الخفيف بالسواك
واذا مانفعش ابعثها لدارهم تراجع روحها وطول ماتجيبها
وادعي ربي واستخير قبل كل امر

[أمل94]

اخي تحاورمع زوجتك وفهمها وحاول تثقفها بلاك مسكينة مالجيل تع بكري لي ميعرفوش وين ينحشمو وميعرفوش وش معناه التزين للزوج نظن مكاش امراة واعية تخلي راجلها بعيد عليها اتقرب ليها اكثر وحاول تفهم وش بيها