مشوهة صورتي

[مشكلتي]

اليلام عليكم

انا امراة اعمل كاستاذة في مدرسة لتعليم الطبخ والحلويات تقريبا اعمل كل يوم وعندي ولد وولدي قاتلي عجوزتي خليه عندي نحكمهولك بحكم ايضا انها قريبة ليا في السكن

وولدي عمره الان 1 عام قلت في نفسي هي طلبت مني هكا وهي مش كبيرة في العمر هي احسن وندير فيها ثقة لانها جدته فرحت وقلت في نفسي الحمد لله نخدم وانا مطمنة وخممت كيفاش نكافئها على تعبها معايا قلت الشي اللي يديوه الناس اللي تحكم الاولاد عجوزتي اولى به وليت كل شهر نعطيها مبلغ مالي كيما اللي يسلكوه النسا برا في بادىء الامر اعترضت من بعد قبلت وبقى هاد الشي بيني وبينها ض

البارح وانا جابة من العمل وطالعة لشقة عجوزتي نسمع في صوتها في الدرج تتكلم مع جارة وتشتكي قاتلها عروستي استغلالية تحب تربح على ظهري وفيها وفيها ...... وتنعتني باسوا الصفات وحبة قاطو متجيبهاليش ..............................:confused: ومشفنا منها والو وانا معاها ناس ملاح وشادتلها وليدها ومتحملة مسؤوليتها
شخصيا صعقت وتشوكيت تطذب عليا وهي تاحذ مقابل على ولد ولدها
ردة فعلي عاودت هبطت رحت مشيت في السوق باش نكالمي روحي وشريت شوي حوايج تاع حلويات راني لدرك مشةكيا كي وليت لقيتها بوجهها الاول
قررت ندي ولدي ونحطه عند امي احسن لي من هاد الشي وجا في بالي نحكم هاديك الجارة نفضحها نقولها راهي تدي النقود بالمقابل
قولولي واش ندير معاها ياكلوا الغلة ويسبوا الملة وفوقها يبينوا روحهم ملايكة ؟

[أمل94]

الله يهديها عجوزتك ...هذا النوع من الناس يهدر يهدر فيك سواء خدمتي الخيرولا الشر امالا ختي شوفي لي يخرج عليك ويريحك ومديرلهاش حساب بشرط متلحقيها متأذيها وابنك يلا كانت متهلية فيه خليه عندها متديهش ليماك ربي يوفقك

[نور لاتراه]

السلام عليكم
لاتخبري احدا في الاخير مايبقى إلا العيب اذا لا تقولي شيئا وان اردت البوح لاحد من باب الراحة فقولي لامك على شرط الكلام
يموت بيناتكم دون اساءة او تجريح ورغبتك بان يبقى ابنك عند والدتك
يقول المثل الكبير في العمر كبير في القدر
ومن منا لايخطئ
ربما حماتك ترى اشياء لاترينها فحاولي اصلاح ماسمعته
وكما يقول المثل اسمع وفلِّت
واعطاء المال ليس مزية
فان كانت ستتقاضى منك اموالا فرضا وليس واقعا فلن تدفعي ضريبة زواجك من ابنها الذي ربته وكبرته ليكون زوجك وابا لابنك
استهدي بالله وحاولي في كل الاحوال ارضاء جميع الاطراف
صحيح الفعل قد يكون صعبا لكنك خبيرة في هاته الامور
تبقى هاته جدة ابنك واكيد نشات علاقة طيبة بينهما فلا تحرميها منه بشكل تعسفي
اصلح الله احوالكم

[اياد حياتي]

اختي صرالك كيفي انا كان ولدي عند لوستي وحنا في دار وحدة ونخلصها ومبعد هي تحكي للناس وتقولهم حاقرتني ومتخلصنيش كي سمعت الهدرة ديتو للكراش والحمد لله ريحت متهليا فيه معلمة احسن من عمتو شوفي منقلك دير هاكا وهكذا شوفي الي تخرج عليك وتريحك

[azzam 01]

سبحان الله....... لله في خلقه شؤون

[visa uk]

اختي نعطك نصيحة مليحة مليحة بزاف انتي راكي ماشاء الله مراة متزوجة وعاقلة وناضجة في عقلك كاين حلول شوفي تجاهلي واش قالت في وجه ولدك وراجلك اوك وزواجكم لانك لو تبقاي قيل وقال معاا تولو في فتنة كبيرة جدا وربما تتور علاقة بينكم ونتي ماربحي وهي ايضا صح مفروض تكون واعية راها كبيرة وحماتك مفروض تكون واعية وماتحكيش حتي لجارة وقادر تدور عليها مهم دري روحك كلي ماسمعتيش وعرفتها علي حقيقتها الحل كوني دكية جدا كما النساء الدكيات اجبدي ولدك بطلايقة دكية جبلها اي قالب وسبب وعدر والف عدر باش تنحيه منها كما هي استعملت الحيلة نتي ايضا كوني حيلية وكي تحوس تفهم ماتفهميهاش تكون عرفت واش دارت
هدا احسن حل وديه لامك او لي تربيه وبلاكي تروحي او تسمعي لي يقولولك روحي للجارة يااما راح تزد تنفخك وتنشعك او تنكر فهمتي حاجة باينة ماتربحي والو

[visa uk]

دري كما نصحوك العضوات هم مجربات وبلاكي تزيدي تحوسي تفهمي تعيي راسك وتخسريها وتخسرك صح راها غالطة مي اغلبهم هاك اوك كوني رزينة هنا تبان المرا الدكية والطيبة والمتخلقة ووووو بالعكس سكوتك يدل علي قيمتك وايس العكس

[صبرا13]

السلام عليكم و رحمة الله

ليس كل الكلام يرد عليه، لنفرض مثلا انك ذهبت للجارة وأفرغت ماعندك، وقلتي ان جدة ابني تكذب، مع سوق النساء سينتشر الخبر كالنار في الهشيم، خبر جديد تملا به الفارغات أوقاتهن للضحك عليكم، ثم يصل الامر الى ام زوجك، فتبكي، لأنك لو مثلا دفعت مبلغ المراعاة لولدك فإنك لن تدفعي الحب الذي تبذله في ذلك، ثم ماذا عداوة و بغضاء، ثم عندما تجتمع العائلة في المناسبات سيوضع اولادك في الركن لأجل العداوة القديمة، ، فكم من اولاد حرموا دفء العائلة الكبيرة لان الكنّة اساات للام .
اما ان تضعي ابنك عند أمك، فان لم تكن ام زوجك آلفت حفيدها ( و لا أظن ) فلا باس و لكن حتى اذا وضعتيه عند أمك لا اجزم انك لن يأتي اليوم الذين تسمعين فيه ما يسيئك و من أمك ، لماذا ؟
لانه أينما توجد النقود يوجد حظ النفس، كان الله في عون الأماهات العاملات

[ام رضوان]

السلام عليكم
ربي يهدينا
شوفي اختي ماتربحيش معاها العيب وخلي اللي في القلب في القلب
انت باينة بنت حلال ومتربية كون واحدة اخرى سمعت واش سمعتي كون راهي ثورت حرب في هذيك الدقيقة بصح انت زين مافعلت
امالا تمي بخيرك وابقاي عامليها كيما وقت فات واطلبي ربي يهديها وتندم وتعرف قيمتك
اما على ابنك اديه للحضانة الا قدرتي
لانوكون تديه لامك ممكن تسببلك مشاكل ويدخل فيها زوجك ويكبار الحس
والجارة اياك واياك تحكيلها خليها على ربي
وربي يكون في عونك

[AMINA.Z]

خليها تدي ذنوب هاذيك الهدرة و ادي حقك منها يوم الدين.
و حتى سمعتك مهمة ...ادي ابنك عند امك اللي ماش راح تاكل لحمك و انت غايبة
ربي يوفقك

[نور الفجر02]

ماعليه اختي في وجه زوجك ديري روحك ماسمعتيش اكي عارفة عجايز ساعات يخرفوا ماعليه فوتيليها ديريها كي شغل يماك وخلاص

[ManouraHilwa]

كاين مقولة يقولها ناس زمان الله لا تربح السلطان في غيبتو يعني حتى السلطان ماشي غير انت واذا قدامك تحترمك لا داعي للمشاكل فقط ثرثرة نساء

[بشـرى]

أختي نصيحتي لك متكبريش المشكل لوجه زوجك وفقط ، يعني لا تحكي لا لأمك ولا للجارة .... وخلي ابنك عندهاا ، لكن لمحيلها بطريقة ذكية تفهم من خلالها انك سمعتي الكلام بدون قصد وانو معجبكش ، طبعا باحترام ، اختي صدقيني احيانا لازم نقدم تنازلات ولو على حساب انفسنا فقط من اجل تجنب المشاكل وراحة البااااال .....

[صفاء الروح]

لاحول ولاقوة الا باالله
ربي يهدي ماخلق
ادي ولدك لامك احسن
ياخي عباد ياخي

[Saif al-Islam]

نصيحتي لكي خذي إبنك لأمك و أتركي القدر بغطاه ، لا أنصحك أبدًا أن تقصدين الجارة و تخبريها بما حصل بينكي و بين جدّة إبنك ، لانّ النتيجة سوف تكون سلبية بأتم معنى الكلمة و تزيدين للطّين بلّة . و قولي الحمد للّه أنّ اللّه سبحانه و تعالى بيّن لكي حقيقة هذه الجدّة ، و ما يسعنا إلاّ أن نقول " اللّه يهديها "

>> تحياتي الخالصة إليكي أختي :19: <<

[ام العباس]

السلام عليكم ورحمة الله
اختي العزيزة ربما نقدر نفيدك على حساب تجربتي مع الناس
عجوزتك وانت متفاهمين وانت قايمة بها إذا عجوزتك باش تبعد العين تكثر الشكا والبكا وخاصة للجيران لأنهم هم أكثر الناس لي يستغلو بيكم.
كاين أمهات يشتكو بزاف من ولادهم -مانقلوش عرايسهم- ويقلك باش ميعينوهمش وهذا أكبر خطأ
المسلم يتحصن من لعين وغيرها بالاذكار ويحدث بنعم الله عليه
وثانيا نوصيك بالصبر والتغاضي عن الكلام الذي يسيء لك لأن هذا يساعدك في بناء شخصية قوية

[faty05]

اكضمي غيضك و ديري روحك ما سمعتيش
و اذا ما راهيش متعلقة بحفيدها اديه لامك و تتهناي

[سهيلة2013]

خذي ابنك لامك على الاقل تحس بانها غلطت

[kika85]

عجبتيني بتصرفك انك عاودتي هبطتي حتى تكلالميتي باش رجعتي...انا في رايي خلي وليدك عندها كلي ما صرا والو وادا كانت ما شافتكش بلي سمعتيها جيبيهالها بطريقة تع تستات...متلا قوليلها بعد فترة طبعا قوليلها واحدة حبيبتي مسكينة تحط بنتها عند عجوزتها وتخلصها ومرة تلاقات بجارة عجوزتها وقالتلها عجوزتك راهي تقول بلي راكي تستغليها مسكينة وهي تتعب وحاملة مسؤوليتك قوليلها هادي حبيبتي جات حكاتلي واش قالتلها الجارة وقالتلي حابة تدي بنتها عند يماها قوليلها قلت لحبيبتي الحمد لله انا عجوزتي تشدلي وليدي بصح الحق عمرها ولا قالت فيا كلام كيما هادا ربي يشدلي فيها راهي منقصة عليا تعب كبير وووووو وزيديلها شوي كلام معسول رايحة تحشم هي على روحها بينها وبسن نفسها وتقول شوفي عروستي واش تتكلم عليا وانا واش تكلمت عليها...لازم تجنبي المشاكل بطريقة ذكية

[om_nour]

نسمع بهاك لقطات

يقولوا لعجوز دير هاك باه تبعد العين واللله اعلم

رانا نعانوا قد مايدير العبد حصل

[الرحالة المغامر]

أختي هذا مجرد كلام النساء وأنت إنسانة مثقفة وواعية وماذا ستستفدين إذا أخبرت الجارة يعني تفتحين أبواب المشاكل على نفسك وعلى الأقل هي قدمت خطوة جميلة في البداية وطلبت أن تمسك إبنك على الأقل من أجل إبنها أحسني إليها وسمعتك وصورتك لن تتشوه بسبب كلام تافه يعني أنت تحاولين بناء صوة في خارج المنزل على الصورة في داخل المنزل ماذا لو أخبرت الجارة وحسنت صورتك الخارجية وأفسدت علاقتك مع أم زوجك وأكيد زوجك لن يقبل بذلك من أجل سبب تفاه وأنت مثقفة وواعية يكفي أنك أعطيتها حقها وأحسن حل أن تتركي إبنك معها وتبقي علاقتك الحسنة معها لأننا قد نقوم بأشياء ولا يمكن إصلاحها ونندم يوم لا ينفع الندم أتركي إبنك معها وكأن شيء لم يكن ... وهذه أحسن خطوة صدقيني سوف تشعرين بالضيق في البداية ولكن لن يكون بحجم الضيق الذي سيصيبك من المشاكل التي ستطاردك لو قمت بعمل متهور

[visa uk]

اختي صدقيني هدا سبب تافه صح نتوما نساء نتاكد انك ناقصات عقل حاجة صغيرة ترجعوها وتفهموها حاجات بزاف هادي حاجة تديرو عليها مشكل كبري مخك وشخصيتك ودري كما نصحوك النساء المجربات تنجحي

[kika85]

اخي نقص العقل عند المراة مشي معناها انها تفهم الامور بالنقص ...يا اخي نقصان العقل معناه انو المرا تخمم بعاطفته اكتر من العقل ولولا هاد الصفة الي في النسا ما راك انت راجل اليوم...كاين نسا عقلهم كيما يقولو يوزن بلد اكتر من الف راجل...