الخيانة هى سبب سعادتى فلا تتعجبو

[مشكلتي]

السلام عليكم

انا امراة متزوجة مند 20عام و عندى اطفال الستة ربى يخليهم انيقة و جميلة و امتلك من الصفات ما احسد عليه

احب بيتى و عائلتى و اسعى لسعادتهم

زوجى رجل يحب بيته و اولاده و يقوم بمسؤوليته باكمل وجه

فى بداية زواجى كنت اعانى ان زوجى باحساس ان زوجى لا يحبنى كما كنت احلم او كما كنت اريد تزوجت و انا عندى 17 عام
الان فى عمرى 37 عام الحمد لله محافطة على انوثتى و جمالى و و كل ما توقعونه و مالا تتوقعونه

بكل بساطة زوجى يدرس فى الجامعة و و حابة نحافط عله باى طريقة

بعد 10 سنين من زواجى و بينى و بينكم صلحت كثييييير من نفسىى و من شخصيتى و عرفت كيفاش نكسب زوجى و غيرتو اصبح رومنسى مسؤول يحب بيتو يحب اولادو و تقرريبا متعاون معايا على بناء مستقبلنا و يدنا مع بعض


كانت عندو سيئات كنت نغمض عينيا عليها و قلت الكمال لله وحدو

سيئاتو انو ماعندوش مبادى خلاااااااص
يقدر يخون فى اى انسان وثق فيه

نحسو يخاف و اسمحولى و يسمحلى ربى على الكلمة جبان فى يوم من الايام ووجد راجل غارق فى دمو عامل حادث فى طريق و طبعا عندما احكالى اعطانى مبررات انو ما يحبش ييدخل فى س و ج وووو

المهم قلت و شفتها صراحة من باب انانيتى المهم راجل فى دارو
بصح انانيتى عماتلى عينى

دخلت فى يوم من الايام للحساب الفايس الدى يمتلكه لقيت العجب ما يعجز اللسان عن قولو

الغيرة و الخلعة عماولى عينى و صارحتو و تقدرو تتخيلو الموقف عادى يعنى سيناريو

المهم انا ما تخيلتش لقيت راجل اخر قدامى حسيت انى نحيتلو القناع ضربنى اهاننى قالى نجيبهملك لدار ننتزوج اعلى ما فى خيلك اركبيه انتى يتيمة لا اب لا ام و انا نفعس عليك نرميك كى الكلبة


المهم هنا خلاص عرفت مع من اعيش فات الوقت و رجعت المياه لماجاريها و عرفت كيفاش نكمل معاه حياتى

الان راهو يخون فيا و انا فى حضنو تخيلو يد معنقنى و يد يكتب بيها ما يعجز اللسان عن نطقه و انا صابرة و عارفا كلشى

و يقولى و دايما انا خلاص رانى كبير و انسان عندو قيمة فى مجتمعه و ما نحبش منك نضارات الشك لانى ارفع منها يصلى الوقت بوقتو و محافط على صلات الفجر و يحقق فى جميع متطلبات البت و اى كلمة نقولها انا هى تمشى فى الدار حتى لشهرية اعطاهالى و قالى اتصرفى فيها كيما تحبيى البيت بيتك و انتى مولاتو

طبعاكى يكون يخون فيا و عندما ما يلقاش الفرصة باش يخون تلقايه انسان عصبى تحسوو مدمن و يحتاج الى الجررعة

الان ما لقيتش الحل رانى غير نتقرب من ربى اكثر و ندعى او انا الى يصبرنى و يقوينى و يعطينى شاهد العقل


طبعا اعملت واش لا يخطر على البال او العقل وصلت انى حطيتلو المنوم باش انا نقد ر نام ايضا و نريح من احسان النار الخيانة كل ليلة

دخلت للفايس و بديت نبلوكى فى كل واحدا خلاص تجاوزو كل ما يتحملو العقل و كل مرة نبلوكى تخرج احدا جديدة

جاتنى فكرة انى نبعثلو تهديد بميساج خفت يخاف من الفايس و يبدا يخون على الارض الواقع

قلت ندير انا فيس و نحاول نهدر معاه و نعرف واش كاين فى مخو جاتنى صعيبة

المهم ما نىطلب غير ربى يعطينى العقل باش ما نحكلها نعميها باش ننقد بيتتى



قلت لنسى انى نكرهو للاسف معاملتو ليا الرائعة او الخيالية ما خلاتيش نكرهو فشلتتتتت

واش ندير علابالى ما كانش الحل بصح تقدرو تدعولى عسى اانو تتلاقا مع ساعة اجابة تدعلى انو ربى يصبرنى و يبردلى قلبى و يقوينى


خااااايفة صبرى يركبلى مرض لا قدر الله

الل ما لقيت واش قول بصح علابالى انكم حاسين بيا

[kika85]

ربي معاك اختي...راكي فوووور صبرتي كامل هادا الصبر لو كان انا ما نقدرش بصراحة....ربي يهديه

[AMINA.Z]

بسبب هاذ العقلية ..الرجال دايرين رايهم و ما يقيموش المراة في هاذ البلاد.
ربي يهدي ما خلق
و ربي يخليلك صحتك هاذا واش نتمنالك.

[أمل94]

الله يهديه ذالمخلوق...

[على خطى الحبيب]

حسبي الله ونعم الوكيل وربي يهدينا و يثبتنا يا رب العلمين

[faty05]

و الله ما فهمت وعلاه لمرا في محتمعنا لي دايما تضحي و تضحي و تضحي و تضحي بصح وش نقولك يا اختي
وجعني قلبي
حاولي تحبديه ليك اخرجو مع بعض يعني ديرو اشغال مع اولادكم بش ما يزيدش يدخل لهذا العتروس تع الفيسبوك
ا
اللهم اهده

[GOLDENROSE]

صباح الخير
يا اختي النار الي اكواتك راهي تكوي فيا كل دقيقة كل ثانية ليل مع النهار
هو ما علابلوش بلي راني عارفة . ساعات نقول مستحيل يكون نفس الشخص
حيرني معاه و هبلني
حسبيا الله و نعم الوكيل في كل بنت حرام الي دير علاقة مع رجل متزوج

[إسلام الفاروق]

ربي يهديه اصبري اختي و حاولي اصلاحه راح يندم اكيد

سلام

[ريحانة24]

سلام لك اختي فقط اقول لك ان حالتك حالة جميع النساء تقريبا اللي عارفة واللي غافلة فقط اصبري وصابري و سيرده الله لك ردا جميلا

["أحمد المحمدي"]

للأسف زوجك ماشي راجل، وأنا نكره هذا النّوع من الرّجال،

لأنّ هذا النّوع يمكن أن يخون أمّه وأبوه وإخوته وأولاده وزوجته ودينه و وطنه.

زوجك يجب أن يعدم ويموت موتا شنيعا، لكن ماذا أقول لك؟

إسألي النّساء الأكبر منك سنّا والّذين لا يعرفون ما هو الفايسبوك ليحكوا لك قصصهم اللّتي تجعلك

تنسي قصّتك. كانوا رجالهم يدخلون عليهم النّساء في بيوتهم، ويقولون لهم: هذه أفضل منك كثيرا

أنظري إلى جمالها وقوامها أنت لا تساوي أصبع رجلها لكنّهنّ صبرن وصبرن وتوكّلن على الله.

لقد صبروا صبرا كبيرا و(الله لم يخلفهم وعده حين قال لهم: إنّما يوفّون الصّابرون أجرهم بغير حساب.

الآن بعد ما أفاقوا رجالهم من الغيبوبة قالوا في أنفسهم: أنظر إلى هذه المرأة المسكينة اللّتي فعلت لها كذا

وكذا وقلت لها كذا وكذا ولم تمّل منّي وبقيت تحبّني وتخدمني كأنّي لم أفعل لها شيء، وترعاني في مرضي

وتغسل ملابسي وتطعمني مهما فعلت لها من أفعال لا يمكن لشخص أن يتحمّلها لكنّها تحمّلت من أجلي.

والله سوف أعوّضها كلّ ما فاتها وسأسعدها في حياتها وأجعل لها في الدّنيا دنيتين وأحبّها حبّا كثيرا

لأنّها حقّا تستحقّ أن أعطيها قلبي وروحي وعيوني وأعطيها كُلّي.)

أختي في الله ربّما هذا الكلام ألهمني الله إيّاه ليبلّغك رسالة من عنده،

ولكي تتمكّني من تحمّل العذاب في سبيل الله إعقدي نيّتك بأن تصبري في سبيله وضعي أمام عينيك الكلام

الّذي بين قوسين، وأسأل لك الله بحبّه لعباده المؤمنين وبجاه نبيّه الكريم محمّد عليه أفضل الصّلاة وأزكى

التّسليم أن يرزقك فرجا قريبا وسعادة لا مثيل لها في الدّنيا والآخرة.

[khiro07]

ربي يهدينا والله الفيسبوك هذا مضيع اسر
ربي يصبرك اختي

[اياد حياتي]

كان قصتك فيلم والله ما صبت واش نقولك انا الي محيرة قلت معيشي كي الملكة والشهرية ليك ويخون الي يخون مرتو ميحيرش فيها واش نقولك ربي يصبرك علابالي بلي راكي صابرة على جال ولادك اكيد انو الناس برا شايفينك كاميرة وممكن حاسدينك وانتي تعاني بصمت ربي يقويك ويرجع ليك صدق من قال البيوت اسرار

[solinne]

واش نقولك يا ختي انت درتي غلطة كي صارحتيه بالخيانة تاعو حتى بدا يخون قدامك ديراكت
انت كنتي غافلة من البداية لكن على الاقل كنتي مرتاحة وعايشة في سعادة احسن من الي عرفتي وانا ننصحك ما تزيديش تفتشي في الفيس تاع زوجك وخليه على راحتو هكا ما تشوفي بليس ما تسمي منو ورجعي لربي ودعي وابكي وتضرعي خاصة الثلث الاخير من اليل حين ينزل الله من سبع سموات ويقول هل من داع استجيب له وشغلي قران في بيتك كل يوم خاصة سورة البقرة وراح تشوفي باذن الله النتيجة وعيشي حياتك بالطول والعرض واياك والاكتئاب والله يخلي الامراة تكبر بلا وقت اضحكي ولعبي مع ولادك وخلي زوجك اخر همك والله هاذا واش يستهل لبيلو طلباتو اكيد بصح ما تنكسريش قدامو وبيني روحك قوية
واذا قدرتي بلوكيلو الحساب تاعو في الفيس وحطي تلفونو في الماء من بعد نشفيه وما تبيني والو قولي ما شفتيش بلاك الذراري خسروه واذا ما نفعش وزاد شرا تلفون وفتح فيس جديد افتحي انتي تاني فيس ولعبي لعبتك خليه يحبك ويعشقك وفتحيلو قاع البيبان انتي حليلتو وفي الاخر كي يعرف بلي انتي راح تشوفي النتيجة والله المستعان

[asma2021]

ربي يهديه عليك

[لمسة ابداع]

ربي يكون في عونك
و هو ربي يهديه
زدت كرهت جد الفايس بوك هدا خلاص

[زمن الغربة]

أختي الكريمة لا شك أن الشعور بالخيانة أمر مريب، وله تبعاته السيئة في الحياة الزوجية ..لكن بين طيات رسالتك وجدتك أنك لما أردت التغيير وبعد توفيق الله لك استطعت ذلك واستطعت بإذن الله أن تكسبي حب زوجك لك ...فلم لا تحاولي الكرة مرة أخرى فالتغيير أمر قائم، وأنت تستطيعين بعد الاستعانة بالله أن تحافظي على زوجك، وأن ترديه ردًا جميلاً للحق، ثقي أنه لا يوجد شيء مستحيل على الله، وأن القلوب بين أصبعين من أصابع الرحمن، وأن الله على كل شيء قدير، والمؤمن الحق لا ييأس من روح الله، يعيش حياته وهو مدرك أن الله قد يغيره حياته في لحظة واحدة، فلا تيأسي أختنا أبدًا من روح الله...واعلمي أختي الفاضلة أنّ حال زوجك ينصلح إذا ارتفع منسوب التدين عنده، لذلك نريد منك أن تبحثي عن أي حل غير مباشر للوصول إلى ذلك احتالي لإيجاد صحبة صالحة له، واعلمي أن الله سيساعدك ويعينك ما دامت نيتك طيبة وهي الحفاظ على هذه الأسرة من التشتت والإنهيار
حاولي أن تسأليه عن الأشياء التي يحبها أو التي يشعر أنك مقصرة فيها، وكذلك فتشي أنت في أي تقصير منك، وستجدي بعض الأمور فلسنا ملائكة...وأخيرا أنصحك بالتضرع لله جل وعلا بالدعاء خاصة في أوقات الإستجابة والإكثار من الصدقة فلها أثر عجيب في دفع البلاء وانشراح الصدر ولا تيأسي من رحمة الله تعالى ولا تستسلمي فهذه معركتك وعليك ربحها ...موفقة أختي الكريمة أسأل الله ن يرد إليك زوجك ردا جميلا

[♥سهام♥]

ربي يهديه...

[ريهانة]

ربي يهدييه ويبرد نار اللي في قلبك

[نواعم]

والله يا اختي غير عندك صبر ايوب الله يكون معاك ويردولك بالك عنده كاش مرض نفسي ادا كان يحبك ما ياديكش يارب يفرجها عليك

[ام رضوان]

السلام عليكم
اختي انا احس بالنار التي تتاجج بداخلك وادعو الله ان يقويك ويخرجك من هذه المحنة سالمة غانمة
اختي انت على حق وهو على باطل
انت تريدين زوج طاهر تقي واب صالح لاولادك
وهو سلك طريق لحرام
اختي انصحك بالدعااااااء
ادعي ربي وقولي حسبي الله ونعم الوكيل وقولي الله يبعدو عليهم بعدالسماء عن الارض
ربي ينتقم من من كل امراة خربت بيت اخرى
اميييييييين
الله يعطيني قوة صبرك

[أم م.ي]

أختي أنا عندي حل ليك و ما تندميش لكن تنفذيه كيما هوَ .أنا جرّبت هذا الحل في مشاكل صغيرة على هذي و نجح و انبهرت قولي استغفر اللّه و أتوب إليه بدون توقف إلاّ عندما لا تستطيعين (اكلٖ او حديث يعني 1000 او 2000 مرة على الاقل في اليوم )و تشوفي النتيجة ماراحش اطّول عليك و ربي يفرّج عليك ان شاء اللّه