طلب نصيحة لوجه الله

[sousana84]

اخوتي والله تعبت اريد نصيحتكم و بدون تجريح من فضلكم
انا منزوجة عندي 3 سنوات عاملة في مهنة محترمة و براتب جيد الحمد لله, المشكلة انو زوجي لا يعمل حيث انو منذ ان تزوجنا عمل مدة قصيرة و توقف عن العمل ,متحملة عبئ الدار كامل . الكراء , الاكل , اللباس.......
حاليا قلت له انو يلزم يعمل غضب و ما عادش يكلمني , و الله ما فهمت جيتو بالسياسة ماكان, غضبت ماكان
اشيرو عليا اكرمكم الله

[قناعتي سعادتي]

السلام عليكم اختي

انا يبان لي ابعثيلو ناس يحترمهم ويدير بكلامهم هوما ينصحوه وخرجي روحك نتي من هذا المشكل

مثلا خوه كبير ولا عمو قوليلو يقولو بلا مايجبدوك نتيا

باش هكدا مايصراوش بينكم مشاكل

وربي يهديه ويهدينا

[سلطانة5بيتي]

حطي دراهمك في شراء بيت ولو بالاقساط منها تديري حاجة براتبك ومنها ينقص عليك المصروف ومنها سي السيد يفيق مع روحو لما ينقص النبع تاعك
ربي يهدينا

[سلطانة5بيتي]

متعبيش روحك في دفعه للعمل بالكلام خليه في الواقع يحس ويعيش التقشف راح يفيق المواجهة غالبا توليلك بالسلب

[ريـاض]

لا تنفقي عليه من راتبك
وسيضطرّ إلى العمل عندما لا يجد ما يأكل وما يلبس
ولكن بحكمة حتى لا يتأزّم الوضع أكثر
وحتى لا يظن بأنّكِ أعلنتِ ضدّه الحرب
كأن تخبريه مثلا بأنّك تدّخرين راتبك لشراء منزل كما قالت الأخت قبلي أو أي شيء آخر .. المهم لا تشعريه بأنّك تريدين ان تسحبي من تحته البساط حتى لا يثور ضدك ,,
ولا تنسي بأنك تتحملين الجزء الأكبر من المسؤولية عندما "ولّفتيه الماكلة والرقاد" كان ينبغي عليك من الأول أن لا تنفقي عليه حتى لا يعتاد على الكسل

وهذه من المصائب التي ابتلينا بها في هذا الزمان بسبب "عمل المرأة"
فلو أنّ المرأة مكثت في بيتها ولم تنافس الرجل على ذلك المنصب "العزيز" لما ختلّتْ الموازين بهذا الشكل المزري الحاصل اليوم نسأل الله السلامة

[sousana84]

ربي يحفضك يا اختي, لكن ما عندي ما نبعثلو لانو اهلو طرف كبير في المشكل ربي يهديهم, كنا ساكنين عندهم تجيني امه تقولي شفتي فلانة راها دارت طاكسي لزوجها و كل كلمة تقولي اقفزي و ديري الدار ما تعوليش عليه و خاوتو مرة و يجيني واحد و يقولي سلفيلي دراهم و الله حشموني و كرهوني و ما يرجعوليش حتى دراهمي و هو ثاني الكبير انتاع دارهم

[sousana84]

والله يا اخي عندك الحق انا الي ولفته لكن هذه طبيعتي غير متطلبة حتى مع اهلي ما كنتش نحب نكثر عليهم

[RB59711]

احكي مع والديه هوما يحكيو معاه . ربي يهديه .

[sousana84]

شكرا اخي و ادعولي معكم اختكم في الله , والله راني صابرة الى ان يفرج ربي

[~أمة الله~]

لا حول ولا قوّة إلا بالله...
ربّي يفتح عليك أختي، لا أدري كيف أنصحكِ أنتِ أدرى بزوجكِ وما يصلح لهُ، ولكن مُمكن تدّي عُطلة غير مدفوعة لمُدّة ولا تُنفقي مِن مالك، بالاك كاشما يتحرّك

ربي يهديه

[محمد جديدي التبسي]

كبفاه ما يخدمش ؟ يعني كيف يمضي يومه؟!
الله يكون في عونك.

[إسلام الفاروق]

الله يهديه لازم واحد كبير ينصح راح لازم عليه يعيشك ماشي العكس اخر زمان نساء يعملن و رجال بطالون
سلام

[nanoua7]

روحي ديري عطلة مرضية طويلة ولا mise تاع عام هنا راهم يحبسولك الشهرية فترة استغليها وخليه يروح يخدم يعوم بحروا راه ما عندوا علاه يتكل وزيد خاوتوا عيب عليهم ذا الشي كي يعاودوا يجوك حشميهم قوليلهم ومنين نسلفكم راني انا برك نخدم على الدار و مانيش لاحقة راكم عارفين خوكم لا خدمة لا زدمة

[رحمةز]

اختي هذ النوع من الرجال وااااااااعر بزاااااااااااف رب يكون في عونك ويهديه يااااااااارب

[ابو ارسلان]

الاخت ربما كلامي سيكون على غير رأي الجميع..
هذا الرجل هو زوجك و ان كان عندكم اولاد فاعلمي ان اي تصرف للضغط عليه سيزيد المشكلة تعقيدا و الضحية هم الاولاد

فلذلك انوي بينك و بين ربك ان ما تفعلينه لوجه الله و بطيب خاطر منك و دعي امره لرب العالمين ربما سيصلحه
و سوف تنالين باذن اجرين: اجر طاعة زوجك و الاحسان اليه و اجر الانفاق الذي هو ليس واجبا عليك بل تكرما منك
باذن الله سوف ترين البركة تحل في بيتكم بالطبع ان كنت صادقة مع الله و مع نفسك

[sousana84]

الحمد لله و الله ريحت عندما سمعت اجاباتكم , حقيقة انا راني نحمد ربي لانو جاني الابتلاء في العمل وما جاش في شئ أخر, نشوف كثير من النساء تشكي انو الزوج مدمن او عافاكم الله زير نساء و هذه وحدها كارثة, و ربي عوضني من الناحية المادية مانيش محتاجة غير لربي سبحانه, و نحاول دايما نشوف الجزء الممتلئ من الكأس, بارك الله فيكم و شكرا على الاجابات الراقية

[أم سلمى عائشة]

من الأفضل أن تكون النصيحة من أقرب الناس إليه و الذين يقدرهم زوجك من غير أن تكون لك صلة.و بإذن الله تعالى يفيق مع روحو و يعاونك.ربي يصلح إنشاء الله و ربي يهديه.