علاه تختفي رائحة التوابل

[لامْية]

سالي لبنات انشاله كامل تكونو بخير نحكيلكم على مشكبتي انا ضرك كي نطيب ندير نص مغرف فلفل اكحل ونص معرف راس الحانوت وربع مغارف كبارزيت وندير الملح والطماطم ونحمس فالزيت وشويت ماء ومبعد ندير الباقي ونمرق بالما السخون هذي طريقتي فطياب دايمن مشكلتي ان الماكلة مع التالي مجي فيها حتا ريحة وكاني مدرت حتا تابل ندير ولا لاكيف كيف نغس الشي ماجعلني احرج امام زوجي الذي لايحب ان يجرحني وكل مرة يقولي جات بنينة انا علبالي بلي ميحبش يجرحني برك وليت نحشم سورتو حنا فلعايلة نديرو الدالة اي النوبة كل مرة شكون طيب كي تلحق دالتي نخاف بزاف ونحشم عندي لوستي تعرف تطيب ومنحبش نداسرها باسكو شايفة روحها افيدوني ربي يجازيكم والله كرهت ويئست

[قوية بايماني]

اختي متقليش التوابل فالزيت من الاول
شوفي انا كيفاش ندير ندير الزيت والبصل مرابي والا كان عندي جاج ولا لحم نقليهم حتى بذبال البصل ونحط التوابل والباقي نخليهم يتقلاو قلية ونمرق بالماء السخون ومنكترش الماء باه الماكلة تجي بنينة

[لامْية]

شكرا اختي قوية بايماني

[آسيا 27]

نوعية التوابل و طريقة تخزينها تلعب دور لازم تديريها في علب محكمة الإغلاق باه ما تروحش ريحتها و تشري نوعية مليحة و في الطياب ديريها بعد ما تمرقي و اذا شفتي مازال تروح ريحتها ديري مرة ثانية كمية قليلة قبل ما تطفئ النار ان شاء الله نكون أفدتك

[oumhana]

أختي
1- نوعيه التواب مهمة جدا
2-الثقة في النفس .صدقيني الرجل لوكان متعجبوش الحاجة ميخليهاش في قلبو يقولهالك بطريقة أو بأخرى.
3-نقصي( فلفل لكحل 1/2مغرف راهي بزاف )نقصي وزيدي ثقة في نفسك.وفقك الله

[لامْية]

شكرا اختي اسيا وoumhana

[أم اسيل]

اختي قلي البصل مليح نقصيلو النارمع اللحم او الدجاج ان وجدو والملح حتى يذوب البصل مليح وحطي نصف الكمية انتاع التابل برك والنصف الاخر كي تبغي تطفي زيديه وما تكتريش الماء بزاف مرقي قيس ما تحتاجي برك

[لامْية]

شكرا اختي ام اسيل بارك الله فيك

[hawa19]

السلام عليكم شوفي اختي انا نحط اابصل و الثوم و التوابل و اللحم او الدجاج و نقلي مليح على نار ناقصه و من بعد تمرق بشويه ما برك ما تكثريش و نخليها الطيب و الطماطم المركزه نخليها حتان قريب طيب الماكله باه نديرها و لاكان الماكله هاذي لازملها الطماطم حب انا نديرها بعد ما تتقلى البصله و نقليها شويه و نزيد الم بعدها و لاكان على ريحه التوابل راهي ما تبانش لاخاطر تندمج مع بعضاها و تمد بنتها ما نقعدش الريحه نتاعها انا كي نطيب في منطقتنا عندنا الكسبر المرحي عندوريحه مميزه و ننصب بيه بصح كون نلقى ريحتو في الماكله ما تعجبنيش هاذي الماكله

[حبيبة امها]

يا اختي الكريمة انا مع الاخوات شوفي كيفاه نعمل انت لمارتقلي حطي نصف كمية التوابل اللي تحطيها ولما تجي طفي على القدرة ضيفي النصف الاخر هكدا تبقى دائما رائحة التوابل كانها جديدة لانها لما تقيسها النار بزاف تموت وما تعطيكش بنة جربيها وإن شاء الله تنجهي
نزيدك فكرة الاعشاب العطرية مثل المعدنوس والدبشة تعطي كدلك بنة للطبخ دائما حطي شوية في الاول وفي الاخير ديري رزمة او قطعيه ورميه في القدرة بعدما تطفي النار نهائيا إن شاء الله نكون افدتك اختي الكريمة واي استفسار اتفضلي اختي

[لامْية]

شكرا اختي hawa19وحبيبة امها بارك الله فيكما

[mamarine]

أختي ضعي الثقة في نفسك لو لم بكن طعامك لذيذا ما سكتوا
السكوت يدل على الرضى
نصيحة مني اليك احفظي بعينيك عندما يطبخ احد أمامك

[لامْية]

شكرا اختي mamarine

[ام رويدة]

انا في رأيي التوابل مهم تمد بنة ماشي ريحة
انا نقلي كلش في الأول جاي درت توابل في الاخير إلا الكمون في اللوبيا باش يمد ريحة هدا ماكان
نقلي و نمر ق وجي الماكلة ماشاء الله
نستعمل رأس الحانوت أقل من نصف ملعقة
وشوفي نوعية مليحة وأقل من نصف ملعقة ف ابيض تان بنين وصحي على الاسود هو نستعملها في زوج للمرقة البيضة وللمرقة الحمرة نضيف نصف ملعقة فلفل أحمر حار
ونستعمل الحشيش للشربة والدوارة
والمعدنوس للأطباق والطواجن والقراتان
والرند والزعيترةيمدو بنة رهيبة
وأكيد ثقتك بنفسك تلعب دور انا راني 100 بلي طيابك بنين
أن شاء الله تفيدك أفكاري وموفقة غاليتي

[لامْية]

شكرا اختي ام رويدة

[wahibaazel]

شكرا للاخوات الكريمات ،راهم كفاو وفاو بالشرح ،شوفي اختي تبعي نصائح الاخوات ،ولكككككن الاهم انك تثيقي في نففففسك ،يعني لحاجة لي ماتعرفيهاش اليوم ومانجختيش فيها راح تنجحي فيها باذن الله غدا ،وراني نحكيلك من واقع تجربتي ،وكاينة حاجة اخرى كي تكون في العايلة امرأة طيب مليح نتقبل هذا الامر بكل صدر رحب ونحاول نتعلم ونسأل هكذا كنت نعمل وبالشوية نجحت في كثيييير من الاطباق لي كنت خايقة منها ولله الحمد ،انا كانو نسا سلافي ثلاثة ويطيبو روووووعة لكن هذا الامر شجعني وكنت نتعلم من عندهم ومن عند عجوزي ربي يرحمها وحتى خالات زوجي لانهم يطيبو مليح ،وزيد ذك كاينة النت يعني ماتخافييييششش نهااائيا .

[لامْية]

شكرا لك الاخت

[امل ضائع]

السلام عليكم..
شوفي اختي..اول حاجة نصف ملعقة فلفل اسود راهي بزااااااااااااااااااف.. حولي تنقصي منو.. انا عن نفسي ما نطيبش بيه بزاف الا في المرق البيضاء او بعض الكيفيات.. نعطيك معلومة اختي فلفل اسود هو التابل الوحيد الي ما يذوبش و راه يضر الكبد ان كثرتي منو.. هو صح بنين في الماكلة لكن الاكثار منو مضر بالمعدة و المصران و الكبد خاصة..
ثاني حاجة نوعية التوابل عندها دور..
و ثالثا عمرك ولا تقلي التوابل في الزيت.. قلي اللحم تاعك ثم اضيفي البصل و الثوم قلي شويا ثم اضيفي ملعقتين من الماء و معاهم التوابل الي تحبي.. قلي مليح ثم مرقي عادي على حسب الكيفيات تاعك.. و كاينة حاجة تاني نقولهالك.. كاين بعض الكيفيات ما يحبوش تمرقيهم بزاف خاطر النكهة تروح.. و اكيد كل وحدة و طريقتها في الطبخ فقط طيبي بقلبك و كل شيء يجي مليح.. بالتوفيق

[لامْية]

شكرا الاخت امل ضائع

[امل ضائع]

شكرا الاخت امل ضائع
العفو اختي.. تحياتي

[سيرين راجي]

شكرا لكل الاخوات استفدت منكم كثيرا جزاكم الله خيرا

[knovel]

شكرا جزيلا لك