حاب نزوج

[مشكلتي]

السلام عليكم
اردت ان افكر بصوت عال علني اجد بينكم من يساعدني
انا رجل عمري 36 سنة
رسمت مستقبلي كما اردت ووصلت مراتب عليا و الحمد لله
طيلة السنوات اللي فاتت و انا ابحث عن زوجة صالحة تتقبلها نفسي لكنني فشلت تلاقيت بنات ماشاء الله لكن ولا وحدة دخلت قلبي
كنت مخبي مبلغ كبير لزوم العرس و مصاريفه لكن بعدما يئست اني نلقا الزوجة سافرت سنوات للخارج و صرفت كلشي و درت تكوين طبي في عدة مجالات
رجعت للجزائر و شاء الله اني في هدا السن نلقا لي دخلت عقلي و قلبي بعدما كنت قررت نعيش وحيد عمرها 20
خطبتها و طلبو مهرها 30 مليون لكن مشكلتي اني عندي غير 70 مليون هل تكفي من هنا للصيف ندير بيها عرس؟
فرضا 30 مليون مهر و 15 مليون على اقل تقدير مصاريف عرسها هي يعني الكباش و القضية
و غرفة نوم سعرها قليل حتى ب 15 مليون
وخاتم خطبة و فاتحة و عقد يجو حتى ب 10
هكدا رانا في 70 و البيت تحتاج شوية اجهزة؟؟و ال voyage??
هدا بغض النظر عن العشا تاع اهلي

هي راهي قاتلي الشي لي قدام دارنا ديرو و اللي بيناتنا راهي مسامحة فيه
يعني قاتلي قابلة منديرلهاش عرس و منروحوش فواياج و قاتلي قابلة تدخل البيت بدون تاثيث
بل وصلت انها طلبت مني نجيب الدهب من عند الصايغي نفوتو بيه العرس و نسكتو بيه دارهم و مبعد نرجعووهولو حتى يفرج ربي
هي انسانة طيبة لكن من جهة لا اريد ان اضيعها من يدي فاهلها اشترطو ان لا اطيل مدة الخطبة يعني نهز في الصيف
ومن جهة اخرى مالحقتش على المصاريف
انا راتبي ممتاز يعني 70 مليون هادي نلمها من هنا حتى للصيف يعني خمسة اشهر

كون يصبرو عليا شوي نقدر نمشي اموري
و ايضا انا ضد الاستدانة من اي احد كاااااااااااان
كبرت في السن و مرانيش من النوع اللي يتزوج و خلاص في 10 سنوات كاش ما نطيح في اللي تعجبني كيما هادي
مادا افعل ؟؟

[mouslemkhirouni]

يا خويا الصورد تروح و تجي لكن الطفلة اذا راحت من يدك اكيد ماكش راح تلقى فتاة بهذه الطيبة و الاستدانة مافيهاش عيب لكن انصحك تستدين من مقربين ابوك خالك عمك عمتك صديقك المقرب مع تحديد موعد لارجاع الدين وتزوج الوقت راه يمر يا خويا اتزوج وشوف ولادك وعيش حياتك و ربي يسهل ، كما يققول المثل لحمام راه يطير يا راجل

[لامْية]

عادي جدا اخي لاتقلق اطلب من حواليك استدانة كل منهم مبلغ مليون من كل واحد وبعد العرس سدد ديونك هكذا يفعل جميع المقبلين علا الزواج مفيها حتا عيب خويا راك طالب الاستعفاف انشاله رب يوفقك ويسهلك

[abdellah36]

فارق السن بينكما كبير ,,,,,يجب عليك ان تتاكد انك قادر على الدخول الى عالمها الطفولي البريئ و انها قادرة على الدخول الى عالمك الرجولي الجدي

[ميرا97]

الرزق من عند الله اذا ارتحت للبنت فلا تضيعها راك علابلك ماشي ساهل باه تلقى مرا بمعنى الكلمة هاذ الايام وانا تبانلي حسب كلامك انها صبورة معاك اما بالنسبة للدين فانا معك اطمع في خير الله وليس في الناس
ننصحك نصيحة اذا عملت بها اكيد رايحة تفرج عليك وربما حتى يرزقك ربي بمصاريف العرس والشرط والفواياج والذهب وغيرها
النصيحة اكثر من الاستغفار وسترى العجب
عن تجربة والله واذا اردت اقرأ عن قصص الاستغفار
ادعو الله ان يحقق لك ما تتمناه

[mrmilano1984]

مليح الزواج بزاف ينحي امور بزاف للراجل القلقة والنرفزة ويزد ينضجك في عقلك وتلقا مرا تقوك بيك وبدارك ودراري تاوعك الزواج دوا وسترا وتبقي تلتها بداركومرتك وولادك ماتبقاش ضايع وتخلط في النساء وتشوف فيهم مع وقتنا مع فتنة النساء كثيرة

[zoya2]

خويا انا مانيش حابة ندخل في حياتك لكن حسب ما اظن ان البنت عمرها صغير بالنسبة ليك واعتقد انك لن تستطيع فهمها لان تفكيرك وتفكيرها ماشي كيفكيف والقرار يرجع ليك......ومشكلة المصاريف تقدر تتسلف مبلغ من عند صحابك واقاربك وبعد عرسكم ان شاء الله تسدد ديونك وترجع لكل واحد دراهمو.

[نعمة الله15]

استغربت فيك اخي خاصة في هدي الجملة
انا راتبي ممتاز يعني 70 مليون هادي نلمها من هنا حتى للصيف يعني خمسة اشهر
حتى ان شاء الله او ما شاء الله مدكرتهاش وكأنك تملك حياتك في يدك يا سبحان الله وخاصة الوقت الدي نعيشه لا نضمن حتى الغد وانت تفكر في الصيف بدون ذكر الله وما يصيبنا الا ما كتبه الله لنا وأسالك عن دينك كيف انت مع الله قبل المراتب والمال وربي يجيب الخير ان شاء الله وتكون في مكتوبك هدي البنت مع طاعة الله وطاعة الوالدين وبالتوفيق

[oprah]

فرق السن على حسب العقليات يعني البنت تبان عقلها كبير و ادا كانو يفهمو بعضاهم و يحبو بعضاهم مكاش مشكل

[أم عبد الكريم]

انا دوخني فارق السن رهييييييب جدا نتا 36 سنة و هي 20 يا لطييييف زعمة قاري و واعي لوكان زوجت بكري يكون ولادك تقريبا في سنها ...................قو.لولي مولات 28 شكون لي يديها ...مثلا لي عندوا 50 سنة

[طيور الجنان]

اخي من للصيف يرحمها ربي انت مد المهر دوك و من بعد يرحمها ربي اذا من للصيف تقدر تجمع 70 مليون واشنو هو المشكل كاين اللي يخلصو 2الى 3 ملاين وسهللهم ربي و الحمد لله .

[محمد جديدي التبسي]

بما انك مرتاح ماديا الحمد لله ما تخافش على روحك ادفع المهر ودير العقد وما تكلفش روحك غرف النوم توجد باثمان اقل من 10 مقبولة جدا ويمكنك اقتراض القليل من اجل وليمة العرس من أقاربك او اصدقائك وبعد الزواج ترجعها عادي ان شاء الله ..ربي يتمم على خير.

[نصير24]

السلام عليكم

انا نعرف ناس دارو الفاتحة وهم معندهمش حق خاتم الخطوبة ...وعانهم ربي سبحان ولاباس.

ربي يوفقك اخي الزواج اخي ارواح تسكن لبعضها البعض لا فارق السن لا فارق المستوى.

[AMINA.Z]

ربي يسهل ان شاء الله

[غزلانْ]

السلام عليكم

هي راهي قاتلي الشي لي قدام دارنا ديرو و اللي بيناتنا راهي مسامحة فيه


فاهلها اشترطو ان لا اطيل مدة الخطبة يعني نهز في الصيف


كبرت في السن و مرانيش من النوع اللي يتزوج و خلاص في 10 سنوات كاش ما نطيح في اللي تعجبني كيما هادي
مادا افعل ؟؟

و عليكم السلام

من حقك الارتباط و بالتوفيق
لكن من خلال موضوعك حاول الغوص أكثر في التناقض بين
الفتاة لا تشترط
و الأهل يلّحون ربما لو كنت أنت من تلح لكان ضروري مقارنة بين سنك و سن الفتاة
و لا تتهور فيبقى ارتباط عظيم بحاجة الى قرار لا تربط سنك و ضرورة الارتباط

و ابني ارتباطك و ما يتوافق و امكانياتك و تمسك بمبدأ " ضد الاستدانة"
و تبقى أنت الأدرى
و ان شاء الله التوفيق بينكما

[القائدة]

وين هي المشكلة ؟؟؟
حاب تزوج روح أزوج
انا لم اقرا مشكلة باينة في موضوعك
الأمور كلها تمام و انت بدراهمك و بخدمتك و سلاكك مليح و هي قابلة بيك كيما رآك ومسهلتلك الحياة و الدنيا معاك ربيع و الجو بديع ناقص غير شخشوخة الصباحة تع البساكرة ! اذن علاش رآك حاب تَخَلَق مشكلة و هي مكانش المهم باش تشارك في قسم مشكلتي و خلاص !
مبارك الزواج مقدما عيشا طيبا و ذرية صالحة ان شاء الله .

[first first]

توكل على الله وتزوج شيء لي قدرت عليه ديرو لي ماقدرتش عليه خليه.............ماشي على بضعة قراقيب تزيد تقعد تسنى خاصة وانت مقتنع بالفتاة.

قول بسم الله وربي يعينك بفضله.

مبروك مسبقا ولعقوبة لكل المتبقين.

[sadako]

عجيب امرك تقول عندك سبعين مليون ومراكش قادر تتزوج تبانلي راك تتمسخر بينا ولي قتلتني انك تقدر في خمس اشهر تسلك سبعين مليون راك مليوني ايملا عجيب امر الدنيا والله فعلا الزواج لا علاقة له بالمال ايملا انت على حسابك تخدم في البرلمان ولا تخدم وزير
نحسبوها جماعة قال سبعين مليون ندبرها في خمس شهر سبعين قسمة خمسة تعطينا اربعتعشر يعني ونزيدو مصاريف هدوك الاشهر
نفرضو تصرف زوج ملايين في الشهر يعني هدا انك على الاقل تخلص 16مليون في الشهر هههه ولي ضحكتني انو عندك 70 مليون وراك تقول متكفيكش للزواج ناس راهي تتزوج ب30 مليون

[عثمان الجزائري.]

أخي ربي يوفقك، لا تنظر لمن تكلم عن فارق السن فإني أعرف من تزوج من بنت 17 سنة و خير من ألف إمرأة حتى في سن 30، أما قضية المال بما أنه يمكنك تدبير 70 مليون إلى غاية الصيف فهذا يعني أنك من الصيف إلى نهاية السنة يمكنك جمع 40 مليون بحساب 10 ملايين كل شهر يعني من تستدين منه قل له في آخر السنة سأرد الدين يإذن الله و تتهنى صاحبي....وفقك الله

[النجمة القطبية]

حكايتك راهى كاللى غارق في قطرة ماء وداير مشكلة من دون مشكلة والحل بين يديك
اولا نقولولك الحمد لله انك لقيت نصفك الثانى وقبلو بيك وراك مرتاح
ثانيا مسالة الماديات نقولك متحسبش بزاف يا وليد الناس !!!!!!!!
انت راك تملك مبلغ لاباس بيه مناسب جداا للمصاريف كبداية
احسب على المدى القريب والباقي خليه لربي سبحانو
وزيد راك تقول عندى راتب ممتاز ماشاء الله ربي يرزقك كل من بارك مثله
يا اخى بشوي عليك درجة درجة كيما يقولو وهداك المبلغ زيد عليه من مرتبك الشهري راح يزيد
وزيد يا اخى انت عريس راح يدخلوك هدايا من لافامي واحد يجيبلك تلفاز والاخر الكبش :1: علاش لالا يا خويا حنا عندنا هكدا يد واحدة ما تصفق
تكل على ربي وانوي الخير وربي معاك
اما الفواياج ما ضرورته خليه اخر شئ بما ان لديك مهنة جيدة بالاك يديروهولك في الخدمة
والا العام المقبل عوضها
يا اخى طريقتك في الكلام ممكن تهبط المورال لبزاف ناس ناويين يتزوجو بنصف المبلغ الدى معك بلا تافف مالا اتكل على ربي واقدم
وهادى الطفلة ادا تحبك راح تعاونك وتسعد معاها ولو في الحومة ماشي شرط في تركيا
ربي يوفقك

[الرميصاءْ]

ربي يرزقك الزوجة الصالحة

[عبدالنور.ب]

في هذا المقام أذكر كلاما ذكره امام بالعاصمة حفظه الله :

أعلمكم إخواني أني كنتُ أحيانا أعقدُ العقود الشرعية، ودائما أذكر الحاضرين أثناء خطبة الزواج أن الزواج من أسباب الرزق وأسوق الأحاديث والآيات في هذا الباب.
> المهم لمّا قرُب زواجي، وأموري لم تنتهِ بعد، والموعد اقترب، وأنا بحاجة إلى ضروريات بيت الزوجية، قلتُ في نفسي ألستُ أنا كنتُ أذكر الناس بأن الزواج من أسباب الرزق، والشيطان يُحاول إدخال العبد في سوء الظن بالله.
> فما إن بدأتُ بدعوة إخواني للوليمة، وكانت الدعوة قبل أيام قليلة منها، حتى يفتح الله بأمور لم تكن في الحسبان، ولم تكن عن طلب، ومن أناس ربما لا يأتوك في البال.
> فأيقنتُ هناك صدق النبي صلى الله عليه وسلم : ثلاثة حق على الله عونهم: والناكح الذي يريد العفاف.

واقول لك ^^


‫‏يا_مريد_الزواج_هلمّ_إلى_حصن_العفاف‬ (https://www.********.com/hashtag/%D9%8A%D8%A7_%D9%85%D8%B1%D9%8A%D8%AF_%D8%A7%D9%84 %D8%B2%D9%88%D8%A7%D8%AC_%D9%87%D9%84%D9%85%D9%91_ %D8%A5%D9%84%D9%89_%D8%AD%D8%B5%D9%86_%D8%A7%D9%84 %D8%B9%D9%81%D8%A7%D9%81?source=feed_text&story_id=1981839672040261)..
أقبِلْ ولا تخفْ، وسترى العجب، فتحٌ من الله، وعيشٌ هنيء

[ايمن تلمسان]

70 مليون وراها باحرتلك تكل على الله....