ماو كنت حكمت فمي خير

[مشكلتي]

السلام عليكم
انا فتاة مخطوبة '( كنت في الماضي ) المهم خطيبي عجبني بزاف كي نشوفو نشوف راجل باتم معنى الكلمة
ولم اتمنى يجي واحد كيما هو يخطبني
قبل العقد ب 3 ايام ( ثلاث ايام كون صبرت ) هاديك امو هي فرحانة بوليدها
مرة تلاقيت امو في مناسبة صدفة
كون خارجة من حفلة الاعراس هي كانها زلقت في الدروج قاتلي ا بنتي عاونيني هو كان " ينتظرها في السيارة"
انا قلت لها راني مزروبة
في geste هاذا فم بعد افسخ الخطوبة حالا مع تغير نبرة الصوت وكل شيء يا لطيف و عاون امو وراح وقالي ميمتي اغلى ماعندي
يا خي واش بيهم رجال تاع الوقت
+ الان راني مشوكيا صح صح معدش مخطوبة وهذا الرجل مستحيل يتكرر في حياتي
لم اجد ما اقول

[نور لاتراه]

السلام عليكم
"كون" نفس معنى لو وهي من عمل الشيظان
الأصل هو المساعدة دون جدال فهي خير وأجر وواجب إن كان بإستطاعتكِ
وليست مسألة منع نفسك الكلام من عدمه
ويبدو انك تفتقدين للحكمة وعليك ايجادها وتعلمها
عسى ان تزيدك هذه التجربة حنكة
رزقك الله من حيث لاتحتسبين

[MALEK TATARE]

امي ثم امي ثم امي المرا تروح وجي بصح امي ماتتكررش قادر نتزوج ب 20 وحدة بصح اذا راحت الام ما تتعوش انا في مكانو ندير نفس الشي

[سيف القذافي]

سلام
أفهم من كلامك يعني كون صبرت ثلثة أيام خلاص تكون طفرت وراح ديري رايك أم ماذا تنوين بعد العقد ؟؟؟؟ هذا أولا
ثانيا يعني من أدب المسلم ومما أصوانا به الرسول صلى الله عليه وسلم أن يوقر صغيرنا كبيرنا لذا كان عليك أن تساعديها بغض النظر عن كونها أم خطيبك أو غيرها
ثالثا
ويكتا تفهموا يا نساء بلي التعامل مع الرجل سهل وسهل جدا جدا ، يا أختي أتهلايلو في أمو وعندما أقول أتهلايلو في أمو ليس الإذعان لها بل مساعدتها بالشي لي تقدري عليه ومرة تهزيها نت ومرة هي تهزك ، فهدفكما مشترك فالأم مادابيها تشوف وليدها فرحان وسعيد في حياتو وأنت أيضا

مجرد رأي يحتمل الخطأ أو الصواب
سلام

[toulay]

وعليكم السلام ورحمة الله تعالى وبركاته
يا اختي واش فيها اذا عاونتيها مشي geste خلاص هذا تاع راني مزروبة
يا اختي حتى لوكان مشي الوالدة تاعو لقاتلك واي شخص كان مليح الخير وراح تربح حسنة
وتحب الصراحة عندو الحق مليار بالمئة كيفاش هو عاد خاطبك مدرتيش الخير في الوالدة تاعو مالا نهار تتزوج بيه طردها من الدار ولا تضربها
يا اختي انت لدرتيها ولازم تتحمل النتيجة
ربي يهدينا ان شاء الله
بالتوفيق

[sarl02]

لو كنتي في الشارع وسقطت امراة امامك او حتى طفل صغير من واجبك مساعدتها ولن يكلفك الامر سوى دقيقتين فما بالك بعجوز وام خطيبك اونبلوس.....احييه على تصرفه اتجاهك بفسخ الخطوبة لانك لست ناضجة ومؤهلة بعد للزواج .

[النجمة القطبية]

يعنى يا اختى ادا كنت فهمت الموضوع صح
عجوز طاحت قدامك زلقت في الدرج قولتيلها رانى مزروبة :confused::confused::confused::confused::confused: :confused:
وفوق هدا هى ام زوج المستقبل يعنى امك وقولتيلها رانى مزروبة :rolleyes: خليتيها ورحتى
ومستغربة علاش فسخ الخطوبة :mad::mad::mad::mad::mad::mad::mad:
يا مخلوقة ربي واش نقولك دوختيني الصراحة منك بصح حاسة روحك تظلمتى
بغض النظر عن كونها امك من لا يرحم لا يرحم
لا تعليق الله يهدينا ويلطف بينا

[سيف الدين الطيار]

اطلبي السماح من امو و من خطيبك السابق

[النجمة القطبية]

لا اصدق ان القصة حقيقية هدي اكيد مزحة او قصة من الخيال

[thorpe]

لازم عليك
الانكسار والخضوع
تبوسيلو رجلو ويدو ويد يماه ورجلها
اترجايه
وحاوليه
تقربي له بالهدايا
وقدمي له القرابين
وماعرف
هذا سيد الرجال اختي
نتيريلو الشابو
وربي يرزقك من جهة اخرى
مشكلك ليس له حل في قاموسي سمحيلي بزاف
وربي يسهلك نشالله
هذا كان درس في حياتك تعلمتي منو
واحسن شي انك حكيتي هاد الامر هنا باش يتعلمو منو بنات الدزاير
مانيش نتشفى في ختي مي راني نقولك برك
لخطرة الجاية راه عندك الدرس وراكي حفضتيه حتى بعد الزواج ما تخلطيش في اباء ليزوم
سلام عليكم

[اياد حياتي]

انا حرت فيك ام خطيبك وماديتيهاش فيها وانبولوس طاحت قدامك وتلومي في راجل واش راكي حابة منو انتي في ذيك اللحظة طوحتي من عينو اكيد انك طاءشة وغير واعية حسبتي غير خطبك ساي مزالو كاين رجال ديري هذا الموقف مع يماك وجاز عليها خطيبك .....شوفي واش ديري متزعفيش مني لكن راي بصراحة قلت في قلبي وانا نقرى في كلامك واذا ممكن كاين امل اعتذري وشوفي كيفاه ديري بعثيلها كادو واطلبي سماح منها وقوليلها مكانش قصدي الله يهدي النفوس

[fettouha]

هل احسست بالذنب ام لا وانت تكتبين مشكلتك
ضعي نفسك مكانها كبيرة في السن وتطلب مساعدة ويرد عليها (راني مزروبة ) هييه صح راكي مزروبة فاتك عريس الغفلة وزيد الطامة انها امه
لايؤمن احدكم حتى يحب لاخيه ما يحب لنفسه
تقبليها على نفسك او امك
واذا رجعلك لازم تحطيه فوق الراس الي فيه الخير في اهلو راح يتهلى فيك وهذا دليل على المروءة والرجولة
رغم انكي بتصرفكي الاحمق ما تستاهليهش
اسمحيلي بصح حبستيلي راسي اذكر مرة ابني صغير حمل قفة عجوز وكان مزروب وعشا معاقب لانه تاخر وووو في المدرسة
بصح موقف انساني وادى دعاوي الخير
هذا درس دروس الحياة كاين وحدهم يتعلموا وكاين الي لازمهم صفعة مع كل درس باش يتعلمو واضنكي منهم المهم اعتبري وتعلمي

[تاجر حر]

ام زوجك المستقبلي وقبل الزواج و هي تطلب منك المساعدة خليتها و روحتي و زدتي قلتيلها راني مزروبة و باغيه يفرح بيك ؟؟
و الذي اعجبني كي قلتي مالهم رجال هاد الوقت سمحيلي ننصحك تشوفي اخصائي نفساني حالتك متعجبش ضننت و انا اقرا الموضوع انكي ندمانه و لكن فجاة وجدتكي تلومينه
اذا ذهبت الام لا احد يعوضها اما الخطيبة اضن يوجد حوالي 15 مليون فتاة في سن الزواج في الجزائر تعضوها

[فرح 97]

سبحان الله راح الرحمة من قلوب العباد تلقي عجوز طايحة ما تعاونيهاش اسمحيلي اختي لكن انتي باينة بلي متكبرة و هذا جزاءك

[أم عبد الكريم]

ارحموا عقول قراء قسم مشكلتي

[bello angel]

هدا المثل لي يقلك الزلgة بفلgة -------الزلقة بفلقة-----
انا حرت في مشكلتك بغض النظر على انها حماتك لكن عجوز كبيرة كيماه تقلك عاونيني و تقوليلها مزروبة ؟عطاك قلبك تخليها هاكاك مهما كنتي مزروبة نورمالمو تعاونيها حطيها ماماك
وزيد راهي عجوزتك من حق انتي لي تتهلي فيها و تمشي معاها والله عيب و خطيبك باين راجل نستعرف بيه
سامحيني ختي بصح عييت نستوعب الجاست تاعك معندها حتى تفسيير

[كاميلا]

واش ديري بيه هاذي باينة تحكم وتتحكم في وليدها خليه تشبع بيه باينة مخها تاع وليدات صغار دارتهالك بالعاني ههههههههههه مليحة هاذي الطفلة كانت مزروبة معاونتش امه فسخ الخطبة هاذوا درك رجال وتع زواج ويقولك علاش قوا الطلاق الخ

شافلك ربي فيها خير هاذي كون دخلتي عايلتهم كون تشوفك الطلي من النافذة تخرج فيك العجب وتتهمك في شرفك

على فرض انك مزلتي شوي متعرفيش صلاحك ؟ وغلطتي متفوتهالكش ؟ هاذي راهي غير سبة دارتهالك ميمته وهو ايضا
مليحة هاذي مالا درك انا متزوجة ديك النهار في رحنا لعجوزتي وعجوزتي صغيرة وانا بالحمل في الاشهر الاولى وبالمثبتات تاع الحمل حبتني نرفد الثقيل مرفدتش جا راجلي رفده كي شافته هزه نحات السني من يده وداته عادت تجري بيه كون راني تطلقت يا حفيظ احفظنا من شر الناس هاذوا
انت طيشي عليك بصح المرة الجاية مطيحيش في الافخاخ النسيوية ميخافوش ربي كون جات تخاف ربي كون تقوله ماش سبة تفسخ عليها
بصح قولنا ما راي والديك؟

[ادريس عين صالح]

الهدف من سردكي لنا هذه القصة مثلا انا نلوم الخاطب على فسخه للخطبة ؟ او نلوم الام على سقوطها وطلبها مساعدة منك ؟ حسنا ما فعل واكثر الله امثاله امك ثم امك ثم امك

[إسلام الفاروق]

الغريب في موضوعك عدم الشعور بالذنب عادي
انصحك تروحي طبيب نفسي
اسال الله لكي الشفاء العاجل من اغرب ما سمعت اخر زمان
سلام