هم يبكي و هم يضحك

[مشكلتي]

السلام عليكم و رحمة الله
اولا انا اعمل عمل مستقر و خطيبي كدلك عند الدولة
مشكلتي مع خطيبي كان قبل خدام في مكان كانت امورو المادية مستقرة كان داير la ligne و كنا نحكو بزاف مند عدة اشهر بدلولو مكان العمل و شهريتو وقفوهالو لعدة اشهر المشكلة انو عرسنا مابقالوش بزااااف
المهم هو وقع في ضائقة مالية باع هاديك لابيس و شرا وحدة نورمال ولا ميعيطليش بزاف ولا يقللي اكتيفي انت و عيطيلي وانا نكتيفي ديما و نعيطلو لكن صدقا تجيني ثقيلة بزااااف لاني نحس دايما بللي كون منعيطش انا هو ما يسقسيش عليا
اليوم معيطلوش نهار كامل و في الليل عيطلي هو و مع بدينا نحكو انا قتلو راك مهملني و متسالش عليا هو قلق و قالي انتي كون جيتي تفهمي علابالك بيا مرانيش نخلص كنتي على الاقل تعاونيني من مرتبك قالي الناس اغراب عليا و قالولي كشما تحتاج و انتي تعرفي غير تلومي
قالي كي كان عندي كنت مدايرلك la ligne و كي طاحت بيا ما صبرتيش
انا تشوكيت مالقيت ما نقللو علما اني حتى الشرط تاعي سمحت فيه غير باه يكمل الدار و امور العرس تفاهمنا ما يجيبلي والو من غير خاتم الخطبة
هو يخلص 8 ملاين السيد و انا نخلص 3 و نوجد في شورتي
و عندي 4 سنين صابرة عليه و غير الهدايا لي ندير فيهم ليه و لعايلتو اكثر من مرتبي ما خليت ما ندير على جالو كون نحكيلكم تحيييييييييييييييييييييييرووووووووووووو
قولولي نورمالمو صح نعرض عليه نساعدو ماديا و نقسم معاه مرتبي لمدة غير معلومة؟
ولا نعفس على قلبي و نخليه يلقا لي تفهم و تقدرو كيما انا
راني نكتب و نضحك هم يبكي و هم يضحك

[sarl02]

8 ملاين فالشهر وراه يشتكي وما الحقش؟؟هذا لعب الذراري صراحة ...هذا لا يستحق من يساعده بل هو من وجب عليه مساعدة الناس....لا تكوني ساذجة وشوفي المخلوق هذا وين راه يصرف دراهمو ولكل حادث حديث.

[محمد جديدي التبسي]

وعليكم السلام ورحمة الله وبركاته..
يا ترى انتم خاطبين ام عاقدين؟ اربع سنوات كثيرة ربي يكون في العون
ادا كان يجهز في بيت خاص معذور صح لكن على الاقل تنقصو من الكلام في الهاتف الذي يسبب مشاكل ويذهب الحياء وتصبح حياتكم كالمتزوجين لذلك بعد الزواج سرعان ما تبدأ المشاكل وتدخل العلاقة في الروتين؟؟ وربما يحدث الطلاق لا سمح الله! وما اكثره هذه الأيام للاسف
أما عن مساعدتك له بمرتبك فلا أنصحك راك سمحتيلو في المهر واش بقى؟!!
نصيحتي لك خلي مسافة بينكم وضعوا النقاط على الحروف وربي يتمم على خير

[adam1990]

معليش اختي اصبري عليه شوية هذي البلاد الحجر تشققهم بلاد صعيبة وناس صعاب مين يشوفو الواحد تكل على ربي و بغى يبني حياتو يديرو كلش باه يحبسوه واذا مانيش خايف نكذب انت كاين لي راهي تقلك بلي راه سامح فيك اختي ماتسمعي لحتى واحد قوليلو يديك لدارو وتهناو من هدرة التليفون

[~أميرة أميري~]

السلام عليكم اختي ،،، انتي علاه راكي تقلقي في روحك السيد راه الضغط عليه قلتي العرس راه قريب والشهرية ماكانش وانتي تضغطي عليه يا اختي لازم تحسي بيه شوية ادا مالقاش راحتو مع زوجتو وين راح يلقاها لازم تفوتو كلشي مع بعض وتوقفي معاه معليش عيطيلو ايه وين راه لمشكل ماكانش كرامة مابين الزوجين عادي هو ولا انتي كيف كيف
اعتدري منو واوقفي معاه راه محتاجك اكتر من اي وقت فات وانتي دبري راسك

[blanche rose]

كل ما يقرب العرس كل ما يزيدو المشاكل التافهة بين المخطوبين والاكثرية تنتهي الحكاية بالفراق..فحذاري

موبيليس تخيري awel mobilis تفليكسي 500 يزيدولك 2000دج من موبيليس لموبيليس وتبقالك 500دج لكل الخطوط الاخرى
او تختاري awel tous وتفليكسي 2000دج ج يزيدولك 5000 دج للشهر ويولي المجموع 7000دج صالح مع كل الخطوط
لكن
نقصي الهدرة خصوصا كي يقرب العرس
لانو انت مضغوطة وهو مضغوط وهذا يعني ان عندكم حساسية زااايدة..فحذاريييي

اما بخصوص انك تعاونيه وكاين اللي اقترح عليه المساعدة
هاذ الخدمة يديروها الزميلات بزاااااف باش يبانو حنيناااات..ولعلمك يديروها حتى مع زملاءهم المتزوجين.
هي دراهمها كامل لبسة ومكياج واكل فالمطاعم وتصدق عليه ميات الف او ميتين الف..وتزيد تقولو نورمالمن خطيبك او مرتك تحس بيك وتعاونك..!!!

انا نسميهم المنبوذات..
ونهار يتزوجو واحد ما يشوف دراهمهم..وينسااااو كلامهم..


فيا عروستنا الحلوة
ما تكثريش الهدرة وقوليلو مانيش نضغط عليك لكن رغم كل انشغالاتي بالتحضير إلا أني لم أنساك وتمنيت أن تكون مثلي..

وأفهميه أنك أيضا بحاجة للمال بسبب التحضيرات..

ولعلمك دائما يحصل خلاف بين الزوج وزوجته بسبب مالها..سواء كانت عاملة او ماكثة بالبيت ووالدها ترك لها مالا..
لأن الناس حوله يسألونه كيف لا تساعدك ووو..أصبح الفتانون ينوبون الشيطان في افعاله ووسوسته..

فتعاملي بحكمة ولا تعتبري كلامه طمعا بل تأثرا بالفتانين والفتانات.. اهل جهنم..
والمفروض ان لا تتنازلي عن شرطك بل ان تجعليه قليلا..
التنازل كثيرا يجعلك بلا قيمة..
تنازلي لكن ليس على أمور ستندمين عليها..
تنازلي لكن دون أن ترغمي نفسك على التنازل عن أمور تؤذي مشاعرك..
ولا تنسي حصني نفسك
ربي يسعدك

[RAHETBAL45]

حاولى تفادى المشاكل حاليا معه بانقاص المكالمات الهاتفية لانها تسبب صداع و حاولى ان تكونى حذرة فى هذه الفترة لان اى رجل عندما يفقد مصدر رزقه تصبح الامور صعبة امامه لذلك تجاوزى عنخ و اتركى الامور تسير

[hydroch]

السلام عليكم و رحمة الله
اولا انا اعمل عمل مستقر و خطيبي كدلك عند الدولة
مشكلتي مع خطيبي كان قبل خدام في مكان كانت امورو المادية مستقرة كان داير la ligne و كنا نحكو بزاف مند عدة اشهر بدلولو مكان العمل و شهريتو وقفوهالو لعدة اشهر المشكلة انو عرسنا مابقالوش بزااااف
المهم هو وقع في ضائقة مالية باع هاديك لابيس و شرا وحدة نورمال ولا ميعيطليش بزاف ولا يقللي اكتيفي انت و عيطيلي وانا نكتيفي ديما و نعيطلو لكن صدقا تجيني ثقيلة بزااااف لاني نحس دايما بللي كون منعيطش انا هو ما يسقسيش عليا
اليوم معيطلوش نهار كامل و في الليل عيطلي هو و مع بدينا نحكو انا قتلو راك مهملني و متسالش عليا هو قلق و قالي انتي كون جيتي تفهمي علابالك بيا مرانيش نخلص كنتي على الاقل تعاونيني من مرتبك قالي الناس اغراب عليا و قالولي كشما تحتاج و انتي تعرفي غير تلومي
قالي كي كان عندي كنت مدايرلك la ligne و كي طاحت بيا ما صبرتيش
انا تشوكيت مالقيت ما نقللو علما اني حتى الشرط تاعي سمحت فيه غير باه يكمل الدار و امور العرس تفاهمنا ما يجيبلي والو من غير خاتم الخطبة
هو يخلص 8 ملاين السيد و انا نخلص 3 و نوجد في شورتي
و عندي 4 سنين صابرة عليه و غير الهدايا لي ندير فيهم ليه و لعايلتو اكثر من مرتبي ما خليت ما ندير على جالو كون نحكيلكم تحيييييييييييييييييييييييرووووووووووووو
قولولي نورمالمو صح نعرض عليه نساعدو ماديا و نقسم معاه مرتبي لمدة غير معلومة؟
ولا نعفس على قلبي و نخليه يلقا لي تفهم و تقدرو كيما انا
راني نكتب و نضحك هم يبكي و هم يضحك
شوفي اختي سقسي مجرب و ما تسقسيش طبيب اديها من اختك متزوجة عندها 6 سنين و كيما عيات تبدل لراجلها الطبيعة لي علمتهالو ما قدرتش، أنا تاني كي كنت مخطوبة لراجلي نساعفو و نسمح في حقوقي باه يدير الدار و في لخر ما سكنتش فيها حتى شهر، و درك والفني ديما قاسمة معاه الشهرية، و ما يعجبوش لحال لوكان نضرب النح، و ديما لازم أنا لي نصبر و نسمح في لبسة العيد و الحفافة خاطر عندو ديون و كي يحتاج دراهم يجي ليا و كي يفرج عليه ربي أنا آخر من يشوف

[نعمة الله15]

Lسلام عليكم يا اختاه ادا مراكيش عاقدة عقد شرعي معه أعيدي التفكير في هدا الزواج واعيدي صلاة الاستخارة وادا مكنتيش خدامة هل كان سيرتبط بيك حاولي تجربيه وقوليله فكرت وغادي نحبس خدمتي بعد العرس نهائي ونفظ لزوجي وداري
لا حولة ولا قوة الا بالله الوقت لي وصلناه الرجل يتكل على مرتب الزوجة ويقولها نورمالموا تعاونيني يا رجال اين هي الرجولة هنا
الله يرحم الرجال لي ماتوا والله المستعان

[melissa lola]

انا نشوف فيها عادي المراة تعاون راجلها التمسيلو الاعذار السيد راهو قرب عرسو وشهريتو مبلوكية احسني عونو اختي وماديري كادوات لعاءلتو ماتقولي درت الا حبيتي تديري ديري لراجلك على الاقل فليكسيلو ولا عاونيه ب 2000ولا 3000 فترة وتجوز العيب ماشي مليح يشدهالك طول حياتو حطي روحك في بلاصتو لوكان راهم حبسولك لاباي زعمة مايديرلكش مصروفك اختي اديها من وحدة مجربة ماتتعامليش مع راجلك بانانية قد ماتقيميه يقيمك و مانعممش الرجال ماشي كيف كيف انتي ادرى بهاذ الراجل اللي راكي معاه وربي يوفقك

[AMINA.Z]

هي صح تحسي بالاهمال بويسك والفتي ريتم و كي حبس بانتلك تبدل عليك
كي تحبي تعيطي عيطي سقسي عليه و اوقفي معاه ..مي ما تلوميش ...و ما تكتريش العياط بواف ..خليه يحس بيك و يتفكرك وحدو.
راكي تقولي حبسولو الشهرية هاذا وحدو هم كبير.
و حكاية تقسمي معاه الشهرية ما ننصحكش ....هو الراجل و هو لي يدبر راسو ...و زيد عاونتبه بزاااف
ما تمديلو ما والو ...و الا راح يوالف فيك ...خليه يحس بمسؤوليتو و بلي هو الراجل و المراة توقف معاه كي ما تزيدش عليه ماش تولي تصرف عليه ..مليحة هاذي.
و يقولك النسا اللي يكفرو العشير و انا راني نشوف الرجال اللي ما يستعرفوش و ما يقدروش.
ما بقاش لعرسك ...اصبري و ان شاء الله تكون حياتكم هانية

[blanche rose]

انا نشوف فيها عادي المراة تعاون راجلها التمسيلو الاعذار السيد راهو قرب عرسو وشهريتو مبلوكية احسني عونو اختي وماديري كادوات لعاءلتو ماتقولي درت الا حبيتي تديري ديري لراجلك على الاقل فليكسيلو ولا عاونيه ب 2000ولا 3000 فترة وتجوز العيب ماشي مليح يشدهالك طول حياتو حطي روحك في بلاصتو لوكان راهم حبسولك لاباي زعمة مايديرلكش مصروفك اختي اديها من وحدة مجربة ماتتعامليش مع راجلك بانانية قد ماتقيميه يقيمك و مانعممش الرجال ماشي كيف كيف انتي ادرى بهاذ الراجل اللي راكي معاه وربي يوفقك

أختي ..راجلها حاجة وخطيبها حاجة أخرى..
و2000دج او 3000دج علاش؟
لفليكسي ماشي خبز رايح ياكلو والا يموت..

وهو راجل..والراجل كي يحب يدبر الدراهم يدبرهم من تحت الارض..

بخصوص الكادوا.ت..هي تهدر على الكادوات من بعد العرس..
عاداتنا البالية..
هدايا الزوج
هدايا والديه
هدايا اخواته
هدايا اخوته
هدايا زوجات اخوته
هدايا اعمامه واخواله
هدايا زوجات اعمامه واخواله
هدايا عماته وخالاته
هدايا احتياطية

هذو يفوتو عشرة او عشرين مليون..خصوصا كي تكون العائلة كبيرة..

ما تصلحش ما تديرهمش
بعد العرس كي يقعدو اهلو يستناو الكادوات..واش تقوللهم؟؟
تقوللهم درتهم لوليدكم فليكسي؟!!

وزيد راهي تقول تنازلتلو على شحال من حاجة..ومن فوق تزيد تعطيلو الدراهم؟؟
حتى الشرط قاتلك تنازلت عليه..معناها هي تنازلت على الشرط وهو تدفعهولو بالتقسيط والا كيفاش؟!!

اذا هكذا تولي هي الراجل ماشي هو..
وما تنسايش راهو خطيبها ماشي راجلها..

[aroua]

سهلتيلوا كلش حتى تمادى هو ...
الشرط ماحقكش تتنازلي عليه ,بصريح العبارة قلتيلو نسا بزاف والرجال قلال مالا ارواح اديني باطل ,الله غالب في وقتنا هذا الانسان الطييب يعتبروه ضعيف ,
مالا نقولك ,ماتعاونيهش كثرش ماعونتيه ,ماتعيطلوش ديما ,مرات فقط افقديه وقليلوا اني حاصلة خليه افك احوالو وحدو مزال مادخلتيش باه تعاونيه

[كلنا راحلون]

السلام عليكم و رحمة الله
كان داير la ligne و كنا نحكو بزاف مند عدة اشهر بدلولو مكان العمل و شهريتو وقفوهالو لعدة اشهر المشكلة انو

راني نكتب و نضحك

هاتف وفيسيوك بين متحابين ومخطوبين ضيع بزاف علاقات تعرفيه اكثر يعرفك اكثر سلبيات اكثر من ايجابيات وبعدها فشل.

اتمنى من اعضاء يفيدوك في مشكلتك

الله يدومها ولا اتمن لك البكاء .

الله يسهل........
.

[naimori]

شوفي اصلا عيوب لالين تخليك مدمنة عل الحكايات العاطفية تبان الي تعودي عل الكلام القليل وديجا علبالك الفليكساج يستقام كثر من لالين احيانا اذا تقدري نتي ديري لالاين تاع جيزي 2000 دج تحكو كل يوم من 8-8 توالمك ولا الخضرا موبليس ديري من 1000 دج وطلع عل حسابك ودون اشتراك المهم صبري

[غزلانْ]

باع هذيك لابيس و شرا وحدة نورمال ولا ميعيطليش بزاف
لماذا غيّر لابيس اسأليه؟
شهريتو وقفوهالو لعدة اشهر
ما السبب اسأليه؟

ولا يقللي اكتيفي انت و عيطيلي وانا نكتيفي ديما و نعيطلو لكن صدقا تجيني ثقيلة بزااااف
" ثقيلة أكثر من بزاف"
قالي انتي كون جيتي تفهمي علابالك بيا مرانيش نخلص كنتي على الاقل تعاونيني من مرتبك قالي الناس اغراب عليا و قالولي كشما تحتاج و
!!!
لا بأس من أن تساعديه لكن " أنتِ لستِ بزوجته " انسان استغلالي
قومي بامتحانه قولي له " عند الارتباط سأتوقف عن العمل فيكفي عملك " و حينها سيظهر ان كان " يريدكِ لشخصكِ أو همه عملكِ " و بين الاثنين و ردت فعله قرري و بامكانك معرفته على اكمل وجه
4 سنوات و راتبه 8 ملايين و يشحد من "خطيبة" اين ذهب مرتبه يكفي تنازلك عن شرطك لو كان "رجل" لقدرك ربما أنت متساهلة معه أكثر لماذا 4 سنوات خطبة
و لم يتم الارتباط
قولولي نورمالمو صح نعرض عليه نساعدو ماديا و نقسم معاه مرتبي لمدة غير معلومة؟
ليس بالطبيعي و لا تساعديه و كيف تقسمين مرتبك و لستِ تدرين المدة ايّاك يبقى
خطيب و لربما لا تكوني من نصيبه و يسترزق منك فقط و بعدها تندمين
'' هي ردت فعل طبيعية الرجل الاستغلالي يحظى بامرأة تضيف لرصيده و مع علم بطريقة تفكيره و تخطيطه و ان كان غير دلك انسان كريم و يستحق مساعدة لما حظى
و السبب '' رجل بمعنى الكلمة يقدر المرأة ' و لا يمد نفسه حتى و لو هو بأمس الحاجة "
لا تكوني مغفلة زيادة عن اللزوم لكِ













بالتوفيق

[muhibbat rrasoul sws]

الله يرحم الرجال
هدا و ما راكيش عندو
الله الله

[alhor72]

يا أختي أنا في رأيي الرجل الشهم عمرو ولا يطلب المساعدة من خطيبتو ويبدو لي أن في الأمر شيء والله أعلم أنا راني خايف يصيرك مثل قصة جحا قال لواحد احكم الحيط هاني جاي على هذيك كوني حذرة من جيل هذا الزمان

[faty05]

شوفي يا اختي الكريمة
نقصو الهدرة في الهاتف راها تجيب غير لبلا خاصة قبل العرس وين تكونو في زوج مقلقين
ثانيا ما تقسمي الشهرية ما تكسري راسك الرجل اذا داق صواردك يعود ديما يقرب ليهم و اذا ما مديتيلوش تولي مش مليحة
يكفي انك سمحتي في شرطك
ثالثا وعلاه الهدايا لاهلو و الله كاين عادات في بلادنا لازم يتغيرو
ربي يصلح لحوال ما تزيديش تعاتبيه بزاف

[malikdz01]

4 سنين خطبة و8 ملاين سلاك ما يكفوش ... ومشكلتكم التافهة بسبب الهاتف .....روحي يا بلادي بالسلامة

[لمسة ابداع]

و عندي 4 سنين صابرة عليه و غير الهدايا لي ندير فيهم ليه و لعايلتو اكثر من مرتبي ما خليت ما ندير على جالو كون نحكيلكم تحيييييييييييييييييييييييرووووووووووووو

علاه محتمة عليك دير هدايا فووق طاقتك
و الله العظيم حرت في رجاال زمننا هدااااا
4 سنين علاقة
8 ملاين في الشهر
الشرط تنازلتي عليه
و يجيبلك خاتم و بس
و زيد من الفوق طامع في شهريتك :cool::cool:
و الادهى و الامر من هدا انكم مازلتو ماتزوجتوووووش :confused::confused:
قولي تعيشي غدوة كي تروحي واش مسنية منو
اختي الكريمة نصييحة لوجه الله ماتجكوش في التيليفوون بزاااف او يجيب غير الدخاصة و السيد هدا مازال مرحتيش عندو ماش قادر يتحمل مسؤؤلية غدوة كي ترووحي واش مستنية منو نظن بلي هو عرف نقطة ضعفك
عاودي راجعي حساااباتك مليييح
و ربي يوفقك