استشارة من أهل الخبرة

[مشكلتي]

السلام عليكم

أعجبتنى فتاة تدرس الطب سنة رابعة , لكن المشكلة انها تريد إكمال دراستها يعنى على الأقل 3سنوات هذا بدون الاختصاص ,عندى استفسارين أرجو من أصحاب الخبرة ‘إرشادنا

1-هل يمكن إقناع هذه الفتاة بالتوقف عن الدراسة
2- ان تزوجتها وسمحت لها بإكمال دراستها فهل تستطيع التوفيق بين شؤون المنزل ودراستها وهل من تجاربكم ينجح مثل هكذا زواج

وبارك الله فيكم

[sarl02]

سنة رابعة طب وحاب تقنعها اتحبس القراية؟؟ واش هذا اللعب يرحم باباك ...اتقبل الوضع كما هو ان رضيت بك زوجا واصبر ...او شوف من جهة اخرى فالماكثات في البيوت الخيرات وما شاء الله عليهم.

[melissa lola]

انا مافهمتش حاجة تخلو اللي مكملة قرايتها وتروحو للي تقرا و لا تخدم وتحبو تحبسوها ?????

[محمد جديدي التبسي]

يمكن اقناعها لكن من النادر ان تقبل بالتوقف
اما ان تتزوج وتكمل دراستها فيحدث ذلك وان كان قليلا ومحدودا لكن هذا يعتمد على مدى تقبلك للأمر وما يحيط به ..ربي يفتح عليك

[toulay]

وعليكم السلام ورحمة الله تعالى وبركاته
نسبة كبيرة متحبسش الدراسة تاعها وعندها كامل الحق تكمل وتقرا التخصص لانو راهي الله يبارك سنة رابعة وفي ميزك راح تقضي على الحلم تاعها على جال الزواج
وعلاش يا اخي متصبرش عليها حتى تكمل قرايتها اذا صح عاجبتك اصبر وانت اطرح عليها الفكرة تاع الزواج والدراسة في نفس الوقت قبلت اللهم بارك مقبلتش خيرها في غيرها
بالتوفيق

[بشـرى]

نعم يمكنهاا الزواج وإكمال الدراسة .... السنة الرابعة والخامسة فيهم شوية ضغط ، لكن إذا خطبتها وتزوجتو وهي سنة سادسة فعادي ، عام سهل وخفيف والعام السابع تربص فقط .... والتخصص مش اي وحدة تحب تكملو ...

أما انهاا تحبس الدراسة فلا أظن أنهاا ستوافق ...

[محارب الحمق]

باش تبطلك لقراية غير انسى, درك الحاجة هاذي ترجع ليك, لاكان قابل مرتك تروح تقرا مع الطلبة والدير المناوبة الليلية في السنوات الاخيرة, ودزيد تخليها الدير التخصص وتزيد تخرج تخدم في السبيطار, لاكان راك قابل بهاذ الشيء كامل, نقلك مبروك عليك وربي يهنيك بهاذ المعيشة (هاذا اذا قبلت الطبيبة بيك)

[إسلام الفاروق]

ابحث عن فتاة اخرى ستجد انشاء الله افضل منها وهن كثيرات
لازم تكون صاحب مبدا وكلمة ماشي تتزوج ومنبعد تباصي مع مشاكل
سلام

[خولة سكيكدة]

السلام عليكم أخي أنا طالبة طب ونقدر نقلك وجهة نظري لطريقة تفكير معظم البنات أخي الفاضل أولا مادامك رحت لوحدة تدرس طب لازم تخمم ألف مرة قبل ماتقدم على هاذ الخطوة لأنك ينبغي أن تكون سند لها وليس ضغطا فوق الضغط الي رانا عايشيين بيه من كثرة الدراسة ثانيا وعلاه تحبسها قرايتها دير في بالك موش رايح تحطم حلمها وفقط رايح تحرقلها تعبها وسهرها وطموحها وسنوات التفوق والإمتياز في الدراسة وفرحة والديها يوم تخرجها لماذا يا أخي ؟؟؟ دير في بالك بلي حتى الي يحكيو على عمل المرأة رانا ولينا تقريبا غير نساء في هاذ المجال يعني مرايحاش تكون وحدها بننت في نص رجال. ثالثا أخي إدا حبست قرايتها راهي فعلا مجنوووووووووووووووووونة وسنة رابعة يعني راهي قطعت أكثر من نصف المسافة أنا تخطبت سنة خامسة وراني نقرا وعادي والي تقدم ليا هو الي لازم يتفهم لأنو الطب مجال الجاهل والدارس يعرف حيثياتو يعني فيها دراسة طويلة ومناوبة ليلية وتضحيات لكن بنت الأصل تبقا بنت أصل والي خارجة عن الطريق حتى ولو قعدت بين ربع حيطان راهي دير الي في بالها .رابعا أخي بالنسبة للتوفيق بين العمل والواجبات نقلك بلي نعرف طبيبات بزاف ماشاء الله عندهم أبناء متربيين متفوقين فالدراسة حافظين لكتاب الله وبيوتهم مستقرة وكاين ماكثات في البيت مسلسلات تركية من الصباح لليل غيبة نميمة خرجات ودخلات معندها حتى معنا يعني الموضوع شائك ولا توجد قاعدة .
نصيحتي لك أخي الكريم إذا كنت صح ناويها للحلال ومتشبث بيها تقبلها كما هي وادعمها وثق بها وستكون لك هي بالمثل ولا داعي للتوتر مند البداية ووضع العراقيل ربي يوفق بيناتكم ان شاء الله ويسهلكم

[عثمان الجزائري.]

أخطيك صديقي و خصوصا من طالبات الطب إن كنت تريدها في البيت مع أني لم أفهم مشكلتك هل تريدها في البيت أم تريدها عاملة لأن سياق كلامك يدل على أنك تقبل الزواج من إمرأة تدرس أو تعمل بشرط أن تقوم بواجباتها المنزلية على أتم وجه و هنا القضية تختلف... المهم أنصحك بالبحث عن أخرى بحكم التخصص فهو يتطلب تركيز و قوة حفظ و هذا يؤدي حتما إلى عدم مقدرتها على تأدية مهامها المنزلية....

[بربرية و أفتخر]

الســـــــــــلام عليـــــــــــــكم
أخـــي الموضوع لا يحتاج لأهل خبــــرة
لماذا تحطم آمالها و تحبسلها قرايتها
عادي تقدملها و إذا وافقت عليك ساعدها في قرايتها و تفهم الضغط اللي عليها مابقاش بزاف و تتخرج و تقدر تفتح عيادة خاصة بيها و تستقبل غير النساء
و الناس اللي تقولك مناوبات ليلية و ماعرف وشيه ليهم رأيهم الخاص
الطفلة مدام عجباتك واضح أنها متخلقة و متربية
و حتى و كانت تقرا مع شباب عادي يا أخي الطفلة كون ماجاتش لاتية غير بقرايتها راهي ماوصلتش لهذا المستوى
بالنسبة لأمور الدار لازم تصبر عليها شوية و تتحمل إذا لقيت حوايج ناقصين حتان تتخرج و تتفرغ ليـــك
تقدم و توكل على ربي

[كلنا راحلون]

-هل يمكن إقناع هذه الفتاة بالتوقف عن الدراسة.........اخي خدم عقلك ...فتاة تدرس يعن حلمها تخرج وتوظيف ...تأتي اليها وتقنعها اوكي هل يقتنع ابوها امها ............
- ان تزوجتها وسمحت لها بإكمال دراستها فهل تستطيع التوفيق بين شؤون المنزل ودراستها ................المرأة آن خدامة ولا عاقدة حتى لو كانت سلفية بمجرد ضمان ولد او بنت لا تنتظر منها الا مفاجئات ونحن في زمن الفتن ودراما

الله يسهل ............

[كلنا راحلون]

اللي جاوبوني جاوبو السيد اللي طرح المشكلة انتاعو قبل
:dj_17:
انا مافهمتش حاجة تخلو اللي مكملة قرايتها وتروحو للي تقرا و لا تخدم وتحبو تحبسوها ?????
مع اني لست ضد عاملة ونازع زواج مراسي:mh31: ولا تقة فنساء وحتى اكل وتبالي على زواج نديها خدامة وماندفع دينار بصح نصيحة اخ من فتيات تعظ اصابعها من ندم عندما كانت تدرس او بداية عملها تقدم لها شاب 1 و 2 و 3 وهي مازلت نقرا مازلت صعيرة وعندما يدق ناقوس خطر المهم راجل وادا مشاكل يطلق اني خدامة

نعم المكتوب ما منو مهروب ولكن ادا تقدم شاب لفتاة وكان راجل ترفضه فلا تقلد الرجال من لا يريدون ارتباط مجرد نصيحة:)

الله يسهل على كل انسان

[أمل94]

اخي اذا كان مستواك الدراسي مثل مستواها او مايضاهيه وشفت نفسك متعلقة بها اتقبل منها ضروفها وكمل معاها اما اذا كان مستواك الدراسي اقل منها بكثير فهنا ننصحك بالابتعادعنها ومنتنساش المراة اي مراة من صفاتها الزوخ والتكبر انا منيش نفرق بيناتكم لكن ران نبهتك لهذ الشي وانت خمم مليح وصلي الاستخارة وربي يوفقك

[nan719]

ههه ضحكتني حتى تقبل بيك بالاول ! سبحان الله

[الطيب الجزائري34]

مستبعد كثيرا ان تتوقف عن الدراسة زيادة انت ستظلمها ان اوقفتها عن الدراسة , ان اعجبتك فعليك ان تضحي من اجلها مدة 3 سنوات ... و عليك ان تعلم خصوصية عمل الطبيبة .. اما ان تكون سند لها و تتعاونا على الدنيا و الاخرة ... و يجب ان تضعا النقاط على الحروف و تبين وجهتك في الحياة لكي تتفادى المشاكل في المستقبل. بالتوفيق.

[أمل94]

السلام عليكم اخي
:
:
من الاخير أخي انصحك ان تذهب و تعرف الاجابة من عندهاو تكلمها و اهلها في الأمر ..و لا تكترت للردود السلبية التي قيلت ..كل واحد و مكتوبه
:
و لي قال محال ما تقبلش و كامل ...أخي أنا أدرس طب و كذلك سنة رابعة و عندي الكثير من الصديقات منهن المتزوجات باولادهن و موفقات ما شاء الله و منهن المخطوبات و منهن من تنتظر الانتهاء من الدراسة للزواج ..هيي حقا سنة رابعة صعبة لكن ما تجيو تزوجو و تجيبو اول طفل تكون هي في السابعة و بالنسبة للاختلاط و هاد الشكيل راه كاين في كل جهة ما جاتش غير في الطب...و الحراسة الليلية ( تقدر تعطي حصصها لزملائها :rolleyes: )
:
و لي يقول الطبيبة ما تقبلش بالأدنى مستوى منهااا راه غالط ..عندي صديقتي ذات جمال و تقدم لها من قبل اطباء و لكن في الاخير انخطبت لواحد دون الباكالوريا و بسيط ( غير لي ما عندهش ثقة في نفسه او ماو صلش للهاذ المستوى تلقاه يتكلم عن الطبيبات بهذ الشكل). ..يعني كل شيء ممكن,,,, نحن الطبيبات ماناش هابطين من المريخ :mad:
::
و كاين لي يروح يخطب وحدة عادية يظن أنه هو من سيرفض تولي هي لي ترفضو ما شي هو :rolleyes:

و هذا مكتوب ...اخي اعيد اذهب تكلم معها على الاقل لن تندم على عدم المحاولة و ربي يقدرلك لي فيه الخير و نصيحة اخي اتركها على الاقل تنهي درستها و العمل شيء آخر ,,فدراستها ليس طموحها هي فقط و انما والديها و اسرتها ,,,و ستندمان مستقبلا على ذلك كليكما
السلام عليكم

اختي ماذا تعنين بقولك لي معندهش الثقة في نفسه (او موصلش لهذ المستوى )اليس هذا التكبربعينه

[zalatan]

علمتني الحياة أن خيرة الله للعبد خير من خيرته لنفسه فكم دعوت الله وسألته أمورا وألححت في ذلك فلم يقدرها الله وقدرغيرها ، فأدركت بعد عهد أن ما اختاره سبحانه - كان خيرا لي .

فأدرك ذلك ولا تستعجل ، أو تيأس أو تتضجر ، وفوض أمرك بيقين إلى الله، فخيرة الله خير، ولكن نحن كما قال -سبحانه- { وكان الإنسان عجولا } .

[سجل أنا جزائري]

هذا يتوقف على وش حاب نتا اسكو تحبها تخدم و لا لا

اذا كنت جاهز باش تتزوج و قادر تتحمل مسؤولية عائلة من ناحية المادية لماذا تشوف وحدة لازم تستناها على أقل 3 سنين ؟ بدون ما نتكلم على الشروط لي ممكن تفرضها بحكم عملها بعد ما تكمل

أنا في رأيي شوف أخرى تكون جاهزة و من أول ما تفرضش شروط عليك راحت تتهنى بإذن الله

[ايمان4]

شوف اذا قبلت ممبعد عاد ارجع اطرح الاسئلة احتمال كبير ترفض شروطك
اخي ايلا باغي لي تقوم بيك و غير عاملة من الاول روح ليهم راه كاين بزاف لي حبسو عند الباك ما شا الله عليهم نسا نتاع الديار