استطيع الزواج لكن

[مشكلتي]

السلام عليكم
انا شاب ابلغ من العمر 26 سنة يسر لي الله وحققت نجاح باهر في عملي
من ناحية المادية انا مرتاح جداا والحمد لله
اول شيء عملته اني استطعت تحقيق حلم والدتي ووالدي عمرة وحجة
والله فرحوا وانا فرحت معاهم
وغيرت المنزل الى منزل كانت والدي تصفه لي في صغري والله كي شفت فرحة والدتي مت بالفرحة
وديما تدعي علي بالخير حتى خاوتي وساهمت في بناءاحد المساجد

هنا تاتي المشكلة خممت نعرس مع اني امتلك المؤهلات مبدئيا كالعمل ومسكن وسيارة ... الخ والحمد لله
بصح اصدقائي المتزوجون حتى اخي المتزوج قالولي رد بالك وديرها راك تندم
الكل قال لي في وضعك اجوب كل بلدان العالم ونتمتع بالدنيا
خاصة واني انا اعشق السفر والتعرف على الطبيعة والحضارات
وانا كي كنت نسافر كون ندير معايا والديا وكي نخمم نولي ندي زوجتي معايا ( مع التفكير في كلامهم ) لاادري جيتني غريبة صراحة
زد على ذاك كون نخطب طفلة وترضى بيا على جال المال وليس لاجلي ( ؟؟؟ )
وهل فعلا" ستتقيد حريتي ويهبط هم على راسي ونكره حياتي " ؟
مع مشكلة الحماة والزوجة
لان والدتي خط احمر في حياتي والله هي لي قرتني وتعبت على جالي

[AMINA.Z]

اول حاجة .....اعرف واش هو الزواج ...اعرف حقوق زوجتك و واجباتها و حقوقك و واجباتك
امك خط احمر ...صحيح ...لكن زوجتك ايضا خط احمر ...راك جايب بنت الناس من دار باباها و راح تولي انت مسؤول عليها في كلش و راح تتحاسب عليها كيما تتحاسب على والديك.
اذا رزقك ربي بنت فاميليا ....راح اكيد تستمتع معاها بالرزق اللي عطاهولك ربي و تسافرو و تزهاو ...مرة وحدكم مرة مع الوالدين و اذا كتب ربي مع الاولاد ....
و اهم حاجة ...اذا راك حاب زواج بلا مشاكل ....فانت تحلم.
اسال الله ان يرزقم الزوجة الصالحة ...هذا هو الاساس

[اياد حياتي]

هذه سنة الله ورسوله واجب عليك تكمل نصف الدين تاعك مدام عندك مؤهلاتك وما تسمعش لكلام الناس كاين الي شارفو على ثلاثين وما عندهم والو وحبين يكونو عايلة وانت ربي رزقك رغم صغر سنك اتكل على الله وان شاء الله تصيب بنت الفاميلا مزالو كاينين............اما بخصوص انو لوالدة خط احمر في هذا شيء صحيح اياك ان تتغير على امك كي تتزوج وهنا يجي دورك انت كرجل وتحكم عقلك مليح في هذه الامور الوالدة في مكانها والزوجه في مكانها يعني ما تظلمش بنت الناس وتوقف مع امك لانها هذه كانت في دار باباها معززة مكرمة وعاشروهن بالمعروف ومتخليش امك تنظلم انت حكم الامور وانت قلت انو لديك سكن الخاص يعني تقل المشاكل وصدامات وما فيش بيت يخلو من المشاكل وربي يوفقك وتلقى الزوجه الصالحة وتكون انت الزوج الصالح

[عثمان الجزائري.]

أخي حلك هو الزواج بالمتدينة التي تجمل لك الدنيا، الدين أخي الدين هو الحل، فالمال نعمة و نقمة سخره في طاعة الله و سيظهر الله لك خيرات الدنيا كلها...تزوج فمع إحترامي لمن قال لك لا تتزوج فهو إحدى الرجلين رجل لم ينجح في زواجه لسبب أو لآخر و رجل إستهوته شهوات الدنيا....وفقك الله.

[إسلام الفاروق]

صعب تجد فتاة تريدك لأخلاقك اولا
يا خويا سافر و تمتع بصغرك روح ماليزيا و اندونيسيا بلدان روعة
الزواج مسؤلية كبير لرجل مقارنة بالمراة و رغبة في الاستكشاف و السفر تاثر مع استقرار و زواج

[abdelka22]

خويا لكاش صح 26 سنة و عملت كل ما فلته و راك فهاد المستوى ..راه باقيلك الزواج عيش مع مرتك شبابك أحسن ما تعيش معاها كهولتك

[blanche rose]

اول حاجة .....اعرف واش هو الزواج ...اعرف حقوق زوجتك و واجباتها و حقوقك و واجباتك
امك خط احمر ...صحيح ...لكن زوجتك ايضا خط احمر ...راك جايب بنت الناس من دار باباها و راح تولي انت مسؤول عليها في كلش و راح تتحاسب عليها كيما تتحاسب على والديك.
اذا رزقك ربي بنت فاميليا ....راح اكيد تستمتع معاها بالرزق اللي عطاهولك ربي و تسافرو و تزهاو ...مرة وحدكم مرة مع الوالدين و اذا كتب ربي مع الاولاد ....
و اهم حاجة ...اذا راك حاب زواج بلا مشاكل ....فانت تحلم.
اسال الله ان يرزقم الزوجة الصالحة ...هذا هو الاساس

الله يبارك
يعجبني الشباب الذين يعتمدون على أنفسهم ويكسبون المال الحلال

عودة للموضوع
أشاطر أختي أمينة في كلامها
بخصوص الأم
اسكن ببيت مستقل وأنت من يجعلهما تتحابان او العكس..
وممنوع تدخل أمك في حياتك كزوج..لكن مسموح لها كابن
يعني مسموح لها ان تعطيك آراءها مثلا في ملبسك او عدم صلاتك او او او
لكن غير مسموح لها ان تتدخل في امورك الشخصية بينك وبين زوجتك..افعل هذا مع زوجتك او ربي ابنك هكذا اجباريا وأمه تريد طريقة أخرى او ضع كذا في بيتك.. او او او
ونفس الامر بالنسبة للزوجة .. فلكل منهما حدود
وكلاهما امراة ..فلا تترك الامور تتداخل
باختصار ضع خطا أحمر بينهما
امك ربتك وووو وبزوجتك تكمل نصف دينك

المهم لا تظلم.. فدعوة المظلوم مستجابة..
هذا من جهة
أما بخصوص اخوتك و من نصحوك بتأخير الزواج حتى تعيش حياتك والزواج قيد وكذا..
وواش معناها عيش حياتك؟!
كل واحد يحكي عن نفسه
فالسعيد يقولك الزواج نعمة ..والاكيد انو قريب من الله عز وجل
والتعيس يقولك نكد والاكيد انو بعيد عن الله عز وجل

وكلامهم _عيش حياتك العبارة المنتشرة في بلادنا بكثرة.. _ معناه يقولولك الخمر حلال والزنا حلال !!!!!! أعزكم الله.
يعني نصيحة هدامة تضمن جهنم..
لان التحواس بلا قيد او شرط يؤدي للخطأ حتى من طرف المتزوج فما بالك الأعزب..

طيب
هل تعلم كم ستعيش ومتى ستموت؟؟
وعلى أي حال ستموت؟
لكي يقولو لك عش حياتك وبعدها تزوج!!!


الزواج مسؤولية لذلك به يكتمل نصف الدين..
فمن جعل زواجه لوجه الله عز وجل وسعى من خلاله لكسب الاجر وكان رب بيت صالح وعادل ورحيم وكريم وربى أبناءه تربية صالحة ووو غرس الله عز وجل السعادة بقلبه..
أما من تزوج لاجل الزواج وقلبه معلق بالمحرمات وبالحرية الزائفة فسيعيش تعيسا

بخصوص ان تحبك الزوجة لمالك او ماشابه
دعك من هذا التفكير
فكلنا نحب المال ..لكن العبرة في كيفية انفاقه..
كلنا نحب الفسح ووو فيما يرضي الله طبعا
وهو أمر طبيعي في الرجل والمرأة..
لكن هل حبنا للمال موجه للمال ام لكونه وسيلة فقط

ونتمنى هذه الفكرة تنحيها من راسك أنت وكل الرجال والنساء اللي عندهم المال..
لأنها تعمي البصيرة كثيرا
شحال من راجل تزوج امرأة صالحة وغبنها لانو توقع انها حابة المال..
وشحال من امرأة غنية تزوجت برجل مدخوله ضعيف واعتبرت انه طماع.. رغم انه ليس بكسول..

ما تخليش الفكرة تدور في راسك..امحيها
وتوكل على ربي سبحانو باش يرزقك الزوجة الصالحة وتعيشو في سعادة وهناء

وهذي نصيحة أنصح بها نفسي والجميع وهي:

حصن نفسك يوميا أخي
لا تنسى
اذكار الصباح والمساء
او على الاقل
قراءة الفاتحة مرة
الاخلاص والمعوذتين ثلاث مرات
آية الكرسي مرة
الصلاة
أكثر من قول
حسبي الله ونعم الوكيل
لا حول ولا قوة الا بالله العلي العظيم
الحمد لله
الاستغفار
التسبيح
والذكر عموما
التقرب لله عز وجل والابتعاد عن السيئات والذنوب
فعل الخير ولو لحيواان
الدعاء
الصدقة ولو بلل خبز في الماء وحطوه للعصافير..

او وكل قطط ..
وبما أنك مقتدر ماديا تصدق بالهدايا على الاطفال الصغار في بيوت الأيتام.. او المستشفيات او ساعد في دفع مصاريف اجراء عملية لمحتاج.. اشتري قطعة أرض فلاحية و ضع فيها عاملا واسرته..اعطه جزءا من القطعة ليخدمها لمنفعته الخاصة والباقي اجعل غلتها كصدقة جارية..احفر بئر...الخ

وهناك رقية شرعية في الانترنت..اختار. منها ما ترتاح له.
..واشحنها في فلاش ديسك..واسمعها متى شئت..

ويمكنك رقية نفسك بنفسك أيضا

ثق أخي أن كل شيء بيد الله عز وجل.


جرب وثق أن الله لن يخيبك

ربي يعينك ويرزقك الزوجة الصاااالحة
لا تنس بشرنا بالاخبار السارة

[sunshine2013]

أخي قم بالاستخارة و اتكل على الله فهو خير وكيل

[صمت الرجوله]

و الله يا اخي هاذوا امرهم عجيب لي راهم يڨولولك ماتزوجش و انك راح تندم اذا تزوجت ,ربما ستزيد عليك بعض المسؤوليات لكنها مسؤولية ممتعة .و الحل كيما ڨالك الاخ عثمان تزوج بمتدينة و ان شاء الله لن تندم و خير متاع الدنيا امراة صالحة
يا اخي انت في مثل عمري و صدقني لو لم تثقل اسرتي كاهلي و لو كانت عندي الدار فقط لتزوجت من الغد و لن انتظر ابدا

[ام ضياء01]

يعني تقعد بلا زواج خير هذا هو راي خوك و صواردك طيشهم في الرحلات ربي يهديهم

[زبدة ذايبة]

يا أخي الزواج نصف الدين

يعني الزواج من الدين

والله يبارك عليك ماشاء الله صغير وحققت نجاحات كبيرة

ماتنساش نفسك

حياتنا قصيرة جدا

انت الآن 26 ثم 27 ثم .......37

رب يكبرك في طاعتو

نعطيك نصيحة تاع أخت لأخوها تحبلو الخير

عرفت ناس قريبين تأخرو في الزواج والآن راهم ناديمن

سنهم يقارب للخمسين سنة وعندهم أولاد عمرهم بين 4 وخمس سنوات

يعني هو قريب يولي شيخ وأولادو صغار!!!!!!!!!!!!!

ماتقدرش تعرف في هذ الدنيا وش يكون

واحد مايضمن صحتو ولاشبابو

كلما مر بينا الوقت كلما زدنا كبرنا ورحنا للضعف أكثر من القوة

المسؤولية في الزواج عادية جدا

حتى الخدمة اللي تخدمها فيها مسؤولية وفيها تكليف

يعني ماكاين حتى حاجة جديدة عليك

بالعكس تكون عندك زوجة صالحة خير.

تهدر معاها وتوانسك ويكون عندك إن شاء الله أولاد

تربيهم على طاعة الله وكي تكبر يكونو في اكتافك

ماتخليش يفوتك وقت الزواج

كي تكبر حتى الدافع للزواج يروح ومايكونش عندك الرغبة فيه

وزيد على هذا تحصن نفسك من الشهوات والمحرمات

والفكرة اللي عطاوهالك البعض تاع روح تحوس ماعندها حتى معنى

تقدر تتزوج وتحوس وترجع لبيتك وأولادك

صدقني رايح تنسى هم الدنيا يوم يقولك إبنك بابا

أما هذا الطيش تاع الملهيات والشهوات اللي أكثرها يكون حرام

ماهي إلا إضاعة للمال وللصحة والوقت والعرض

ماتخليش نجاحك المادي يكون على حساب نجاحك النفسي والاجتماعي

نتمنالك التوفيق وربي يهديك للخير

[mrmilano1984]

اسمع للاخت لي قاتلك اتزوج عندها الف حق صراحة

[ibrahim hano]

توكل على الله مادامك ناوي الحلال ربي يبارك في زواجك و سترزق بخيره فهو نصف الدين
إن شاء الله تلقى بنت الحلال و ربي يهنيك

[عاشق القلم]

حل المتدينة تترب يداك .

[ام البنوتة]

ربما يخافون ان يخسروا البقرة الحلوب التي تعودوا على حليبها

[قدور بن عاشور]

باين عينهم على الرابحة، خايفين تتزوج و تغلق عليهم الروبيني.


http://2.bp.blogspot.com/-wFrz7gDxhec/UWRA9B9KOuI/AAAAAAAACcU/oy3swm4Terc/s1600/money.jpg

[ملاك الامل]

تفكيرك خاطئ جدا زوج كمل نصف دينك

[ام احمد و ميسم]

اضفر بذات الدين تربت يداك

[محمد جديدي التبسي]

انت كبير ولابد أن تتزوج أمثالك عندهم أبناء ولا يغرك تأخر سن الزواح في وقتنا فهذا انتكاس للفطرة والا فإن من بلغ الخامسة والعشرين لابد ان يكون متزوج فأي متعة في تأخير الزواج الا اذا كانت في الحرام والعياذ بالله وهي لا تقارن ابدا بلذة الحلال والذرية الصالحة وولادك يكبروا معاك ويعيشوا احسن حياة مثل ما عشت انت ..أحسن الاختيار والأفضل تشوف من ولاية أخرى تكون بعيدة عليك محافظة مثل جيجل او مسيلة .. ربي يفتح عليك

[عائشة قدوتي]

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( يَا مَعْشَرَ الشَّبَابِ مَنْ اسْتَطَاعَ منكُم الْبَاءَةَ فَلْيَتَزَوَّجْ ، فَإِنَّهُ أَغَضُّ لِلْبَصَرِ ، وَأَحْصَنُ لِلْفَرْجِ ، وَمَنْ لَمْ يَسْتَطِعْ فَعَلَيْهِ بِالصَّوْمِ فَإِنَّهُ لَهُ وِجَاءٌ )
رواه البخاري و مسلم..

[zalamite]

انا درك نواجبك ...انت كيما لي قالولو ماتركبش فالبابور على خاطر البحر مهول و الموجة صعيبة او كاين اسماك القرش و و و و هما ركبوا او راحو و انت قعدت في الشط تعوم مع دراري صغار .افهمها كيما حبيت