امي

[مشكلتي]

السلام عليكم ورحمة الله
راني ضايعة وحائرة مع انو مقتنعة بشي لي راني ندير فيه مي يمى ديما تخربلي في راسي حبيتكم ديروني اختكم وانصحوني
انا فتاة مخطوبة خطبني شاب متخلق ولكنقدو قد روحو وانا قبلت بهاد الشي وماعارضتش ويمى نفس الشي ولكن المشكل انو بعد ماتخطبو لبنات قدي يعني بنات خوالي وعمومي وكل وحدة دات مهندس ومقاول وطبيب و و و يمى بدات تقلي كامل داو مرفهين غير انتي طحتي على راسك وانا نقلها يا يمى لي خلق ماضيع وماتعرفيش كامل هاد الدنيا واش راهي مخبية وانا راني قابلة بيه ونديه مايخلعوني لا دراهم ولا حاجة تانية
وشي لي قلق يمى انو بنات خوالي كانو دايرين رايهم مع لي جان يعني فهمتو قصدي وفي الاخير كي يحبو يتزوجو يلسقو فكاس واحد مرفه ويخرطو عليه بلي هوما متربيات وخاطيهم كلشي وهو يطيح على رايو ويأمن ويجي يخطبها عادي وترجع فرحانة وتتكبر علينا بلي انا ديت فلان وانتي ديتي فلان
انا وربي شاهد عليا اني نحب خطيبي وديما يقلي الشهرية راح ديرنا مشكل لانو الحالة راهي غالية وراني خايف مانتهلاش فيك وتكرهي وتغيشي معايا مغبونة وانا نقلو عادي راح نكون معاك ونجوزها بالماء وعادي لانك راجلي ومسؤوليتي وراح نديرك تاج راسي وانت بالنسبة ليا خير من ألف واحد مرفه وغاوياتو الدنيا
يمى راح تهبلني وحتى خالاتي ايماجينيو يحكو معايا يضحكو عليا ويقولولي كامل داو مرفهين انتي راكي التالية فيهم الناس تحب تعيش وانتي ادفني روحك مت هداك المخلوق وانا تغيدني عمري ويغيضتي هو ونقول وعلاش لي ربي ماعطالوش ديما فعين الناس حاجة طايحة
وزيد بنات خوالي ملي خطبوهم مرفهين وهوما يتقلشو عليا كل يوم وحدة تعيطلي تقلي شوفي خطيبي واش جابلي ولا راني رايخة معاه يشريلي وانا نقلهم ايه بصحتكم ونسكت وعلاش راهم يديرولي هكدا ،، خطيبي يخلص 3 ملاين و600 في الشهر راني عارفة بلي المعيشة راهي غالية مي نحبو ياناس نحبووووووو مانقدرش نخليه فجال الدراهم لانو ربي هو الرزاق
يمى لي غايدتها كيفاش يظيرو رايهم ومع التاي يدو رجال مسقمين من كلش
قولولي بجاه ربي كيفاش نقنع يمى ولا انا راني غالطة ؟؟؟؟؟ والله من قوة لي كل يوم تقلي لازم تدي مرفه وتعيشي حياتك حتى قلبي راح يخرج كل يوم نبكي
حطوني اختكم وانصحوني

[ضآحكة مستبشرة]

السلام عليكم ورحمة الله تعالى و بركاته اختي

يويويويويووووووووووووووويـــــــــــــــــــــــــ ــــــا بالبركة اختي بزيان السعد
ان شاء الله ربي يهنيك و يسعدك مع زوجك

حبيبة وشراكي تحكي وعليمن راكي تحكي على : الدراهم ؟؟؟؟؟؟؟
لا و الله يا اختي بالعكس كي راكي راضية بمكتوبك و قانعة بيه
الحمد لله لي رزقك ربي بانسان و كتبلك مكتوب
اختي المال و المادة و الماتريال عمرهم مبناو ديار
ياك يقولك الصح ماشي في المادة الزين _ الصح فالعقلية و الدين
كي عجباتك عقليتو و اخلاقو هداك هو الصح مهما كان الانسان مرفه متعيشيش معاه مهنية قد ما يكون زوالي و متربي
اختي و نتي قلتيها لي خلق ميضيع
وديجا راجلك راه سيد الرجال يجيب 3 ملاين و600 في الشهر
وخايفة من واش خايفة
ناس راهي بلا خدمة و كي مهنين و الله ميحسو بالفقر ونتي راجلك خدام ودايرة اهمية
متعمري راسك لا بكلام يماك لا بكلام غاشيكم افهمي بلي ترضاي بمكتوبك


يا اختي لي تزيد تعيطلك قوليلها انا انسانة قانعة بواش عطاني ربي و ميهمونيش الدراهم
الصح فالهنا
وربي يهنيك و يرزقك الذرية الصالحة يا لالات العرايس
و تشوفي يماك كيفاش تدعيلك كي تسمع بيك مهنية شحال تفرح
لانك مشيتي بنيك
ماشي كي لوخرين بالخدعة

[ايمان4]

الاخت ايلا عندك شهادة اعملي و ساعديه الحالة راها غالية و ايلا كاش حرفة تاني عاونيه بيها باش تخممو ف الدار و السيارة لاولادكم مستقبلا و القناعة كنز لا يفنى ...

[oumhana]

قولي"اللهم فوضتك أمري "

[mon mari]

الهنا خير من الغنا

[اياد حياتي]

وعلاه جاكوهل حقا هاذوك الي راهم خالعين يماك رايحيين يعيشو مليح مبعد يزوجو ويشوفو زواج كيفاه داير ماينفعك لا مال وزوخ غير صحتك وتكوني هانية مع راجلك

[blanche rose]

انا توقعت رايحة تقولي خطيبك يخدم عقود ما قبل التشغيل
او يسلك زوج ملاين
نتي قلتيلي يسلك 36000 دج!!!!!

حبيبتي راجلك يسلك كثر من راجلي ..
هو خدام وانا خدامة والحمد لله
صح لمعيشة غالية ومرات الواحد يحصل
لكن هذا ما يعنيش انك ترمي المعدن الصافي مقابل القزدير...

بخصوص أمك ربي يهديها
انا ننصحك بحاجة ..ما تسكنيش فالدار لكبيرة برك
واذا سكنتي..اسكني على الاقل في طابق خاص وبمطبخك الخاص ليبقى الاحترام بينك وبين أهلو..
وباش ما يصراوش مشاكل كبار وتقولك أمك ياخي قتلك وأنت اللي قبلتي يزيدوا عليك

وأنت تعلمي حرفة واخدمي وتعاونو

بخصوص التدخلات والكلام وووو
لا تفتحي المجال للتحدث أصلا
حتى وان كانت امك .اذا أرادت فتح الموضوع غيري الكلام او قولي لها..شكون قالك بلي كي نفسخ الخطوبة يجيني طبيب او مهندس او مقاول او او؟؟
اعرفي كيفاش تخوفيها من العنوسة
وقوليلها ولوكان نفسخ واحد ما يجي
المهم امك وتعرفي كيفاش تفوتيلها

اما خالاتك وغيرهم..خلي شخصيتك قوية وما تعطيهمش فرصة يفتحو الموضوع تماما

حبيبتي اجد صعوبة في التركيز والكتابة
واتمنى ان تصلك الفكرة وتفهميها..رغم هذه الكلمات المبعثرة

ربي يسعدك

[conductrice]

السلام عليكم ورحمة الله وبركاته
أختي أول حاجة مبروك عليك وربي يكملك بالخير
الحجة ثانية متعمريش راسك بالدارهم وعنده ولا معندهش وبنات خالي داوهم مرفهين هذ الشئ قاع فاني كما قلتي ربي هو لي يرزق
نحكيلك على وحدة تقدم لها واحد مرفح وكلاص كي سمعنا قلنا الله الله لوكان غير حتى حنا سعدنا كيفها بلوطوته ودارها وحدها درلها واحد العرس ما نحكيلكش
بعد 4 أشهر من الزواج روحي شوفي لعيشة لي عايشتها عيشت الذل تقولي لقاها في الزنقة وجابها وكي تحل فمها يقولها ما خاصك والوا كولي واش تبغي ولبسي واش تبغي وما تكسرليش راسي واذا ما عجبكش الحال روحي لداركم . اه يا ختي السيد ما يدخلش بكرى وتلفون ما يسكتش وزيد وزيد. ها دراهم واش يديرو .
قولي الحمد لله ودعي ربي يكمل لك بالخير

[طيور الجنان]

اختي الفايدة ماشي في الدراهم الفايدة في الهنا و مايخلعوكش اللي داوهم مرفهين ماتدري حياتهم كيفاش راح تكون اتمسكي بخطيبك و مايغرك حتى واحد واللي راها تضحك عليك اليوم يجي النهار وتبكي الدم فالله يمهل ولاةيهمل.
ونحكيلك قصة وحدة نعرفها كانت تقرا الطب خطبها واحد ماشي مرفه برك المال عندو كيما التراب و قالها تحبسي القراية و اكيد ماتخدمش و قالها نمدلك شهرية خير من اللي قادر تديها المهم قبلت و تزوجت وعاشت المر معاه و زادت جابت ولد وظهر هاذ الراجل زير نساء مايخليهاش تخرج و غابنها و في الاخير تطلقت ماربحت قرايتها ماربحت راجل يهنيها . احمدي ربي لي لقيتي راجل متخلق ويحبك كاين بزااااف بنات يتمناو راجل متخلق و ماصابوش

[Ghost happiness]

الف مبروك
ربي يهنيك ويبارك لخطيبك فيك
ان شاء الله تكوني فهمتيني

[ام رضوان]

السلام عليكم
اختي ما تهتميش بكلام الناس
ديري واش يخرج عليك
امك مسكينة راهي تاثرت بكلامهم لهذا دارت عليك وما تلوميهاش اي ام تحب تكون بنتها في خير وخمير
وزيد اختي الله يبارك الشهرية تاع خطيبك لاباس بيها راهي تكفيكم باذن الله وتقدري حتى تفضلي منها اذا عرفتو كيفاش تقسموها.
المهم اخلاق الخطيب وحبو ليك يكفيك .
الهناء اختي ما يتشرى بالمال
انت قلتي حطوني اختكم وانصحوني
انا نقولك اختي تمسكي بخطيبك وادعي ربي يجمعكم مع بعض عاجلا غير اجل
وعلى حساب واش حكيتي على قريباتك نقولك راه يجي نهار اللي يحسدوك فيه على زوجك راهم ماهمش عارفين الدنيا مليح
اختي ربي يتمملك بالخير ويرزقكم الذرية الصالحة ويبعد عنكم الشر واهلو.
امين

[toulay]

سلام عليكم
يا اختي كل واحد واش كاتبلو ربي في هاذ الدنيا
ياك انت تحبو وهو يحبك وان شاء الله ربي يجمعكم فالحلال عن قريب
متخليش الهدرة تاثر فيك
يا اختي بما انك مقتنعة بخطيبك هذاك هو الصح ياك هو خدام وراهو عايش بالحلال هاذيك الشهرية تعيشكم مليح اعرفو برك كيفاش تتصرفو
ربي يفرج عليك ويهنيك ان شاء الله
بالتوفيق

[fella111]

3 ملاين و 600 و تقظيها بالماء هههههه ظحكتيني ........ يا مفترية و ميش عاجبينها قداه تحبوهم يسلكو 30 مليون مالا من الان نقولو للرجل الشهار و في الشك ليتزوج نعلم ان المعيشة غالية لكن عيشي في الطبيعي برك تكفي ان شاء الله و ربي يوفقك.

[شمس.]

ربي يكملك اختي واعلمي انك على حق و رضا امك بإقناعها وربي يعينك

[إسلام الفاروق]

هادي يماك قتلك ادي واحد غني بمعنى اذا خانتك عقليتو ما يخونكش المال
وانت شكون يضمن انو بنات خالتك راح يعيشو هانيين اصلا انا راجل و نعرف العقلية لي يصرف غير المال على البنت باه يسعدها انسان خايف ما عندو ما يقدملها عاطفة في المسقبل كارهة حياتها نادمة لي داتو على جال دراهمو اصلا هو علابلو بهاذ شيء ماش خلقه لعجبها في المقام الاول بعد مدة راح يكرها
ركزي على خطيبك اذا راجل مليح و لالا انت شوفي لي يريحك انت تتزوجي ماشي يماك
سلام

[sad_man]

أكبر تحية ليك أختي
أنت مرا و نص و 75
ربي يكملك بالخير و ان شاء الله حياتك تكون أسعد منهم كامل لأنو اللي يجرى ورا المادة ما يفرحش بزاف
ربي راه كاتبلكم رزقكم و جامي يضيعكم ما تفرطوش في دينكم برك

[alfatron31]

و أنا أقرأ مشكلتك، تفكرت مثل شعبي يقول:
"ياواخد القرد على مالو يروح المال ويبقى القرد على حالو"
الأهم هو المعدن الصافي و بما أنك مرتاحة له توكلي على الله والله لن يخيبك.
والله الإنسان يُسَر لما يشوف بنات كيفك بهذه العقلية في الزمان المادي، الله يحفظك.

[AMINA.Z]

و الله يا الاخت كبرتي الحكاية برك
كلام الناس و حتى كلام امك ما راح ينفعك بحتى شيء
انتي راضية بيه و الحمد لله ...خلاص ما يهمك لا راي امك لا راي الناس
خليهم يهدرو و يهدرو و يهدرو و انتي عيشي هانية ان شاء الله
نصيحة كل ما تجبدلك امك الموضوع بدليه و الا تجنبي النقاش معاها ..لانو نفس الاسطوانة راح تبقى تمشي ...ما تحاولي لا تقنعيها لا والو ....خلي الزمان هو اللي يقنعها.

[khiro07]

تحياتي ليك
وبارك الله فيك اختي
المال ماراهوش كلش
والمال ماراهوش هنا
والبنات لي يتمسخر من بعد يصيدو راجل مرفه
ابحوش اديها من عندي
الله يمهل ولا يهمل
شدي في خطيبك
وربي يرزقكم من حيث لا تحتسبي
امك ساعفيها وما تديريش عليها
هي صح تحبلك الخير بصح المال والطمع هو لي خلاها تقول هكذا
ربي يهنيك ان شا الله

[غربة أهل السنّة]

السّلام عليكم ورحمة الله وبركاته
حيّاكِ الله أختي الفاضلة وأسأل الله تعالى أن يبارك لكما وأن يجمع بينكما في خير..
يؤسفني إخباركِ أنّ ما تفكّر به والدتكِ خطأ x خطأ... قد تكون أمّكِ إنسانة طيّبة لكن من حولها أثّروا فيها بكلامهم عن المادّيات..
والإنسان بطبعه يميل لحبّ الدّنيا وزخرفها،،، ما أنصحكِ به هو أن تحسني معاملة والدتكِ حتّى لو أخطأت في حقّكِ
وحاولي أن تبيّني لها أنّكِ مقتنعة بخطيبك وأكثري دعاء الله بأن يبعدَ عن والدتكِ الوساوس هذه
لعلمكِ يا أختي أنّ راتب زوجكِ لا أراه جيّدا بل أراه ممتازا! مقارنة مع الشّباب المتخرّجين الذين يجوبون الشوارع يوميا بحثا عن عمل
وتأكّدي أن الله تعالى سيبارك لكِ في ما هو حلال و ستتأكّدين من ذلك بنفسكِ حينما يسلّم لك خطيبك المهر وتبدئين بتجهيز نفسكِ
ستجدين أن المال مبارك فيه لدجة لا تصدّق !!!! لذلك أقول لكِ لا تلتفتي لكلام النّاس (لي يزوخو عليك بواش شراولهم رجالهم)
لأنّ ذلك بعد سنوات سيصبح كالسّراب -لأنّ الله يمهل ولا يهمل-
بعض النّساء يحسبن أنّ إقامة العلاقات قبل الزّواج بغرض البحث عن زوج سيوصلهن لبرّ الأمان!!! خاصّة إذا خُطبت إحداهنّ لرجل غنيّ،، لكن المال لم يكن يوما يمثّل السّعادة، فالحياة الزّوجية أساسها الصّراحة والوفاء بين الزّوجين والزّواج عشرة عمر قد تطول وتطول وخلال هذه العشرة تظهر مواقف و مشاكل وأفراح وأحزان وهذا كلّه يبيّن أنّ النّاس معادن ومعدن الشّريك هو ما تغفله عنه الفتيات أحيانا
---------
قد يضيق صدرك بتصرّف والدتكِ وخالاتكِ وبنات خالاتكِ،،، لكن !!
أنصحكِ بالصّبر لأنّ ما فيه أنتِ يسمّى بلاء، وهذا البلاء هو اختبار من الله تعالى لكِ حتّى يخرج ما في نفسكِ
إذ كنتِ طمّاعة أو إذا كنتِ قنوعة...
لذلك لا تأبهي لغرور النّاس،،، ستتزوّجن جميعا وإذا كان في العمر بقيّة سترين من تعيش حياتها هادئة مع زوجها
وسترين أيضا من يخونها زوجها في أوّل يوم زواج،، لذلك لا تحزني
قولي لوالدتكِ أنّ من تعصي الله بحجّة البحث عن زوج فهي إنسانة أرخص من التّراب الذّي ندوس عليه! وستعيش حياتها رخيصة طيلة حياتها
أعرف الكثيرات من البنات اللواتي لهثن وراء المادّة وسخرنَ من المتواضعات أمثالك، ولكنّني لا أستطيع أن أسرد عليكِ مآسي هؤلاء المتعجرفات اللواتي أعرفهن شخصيّا كيف كنّ وكيف أصبحن..(فلا يحقّ لي نشر حياتهنّ الخاصّة)
كوني على يقين أنّ كل إنسان يدّي لي يخرج عليه و كما يقال : (عيش تشوف وعيش تسمع)
نسأل الله تعالى العفو و العافية في الدّين و الدّنيا
وصلّى الله على محمّد وعلى آله وصحبه أجمعين والحمد لله ربّ العالمين
أرجو عدم اقتباس ردّي وجزاكم الله خيرآ...