تابع انصحوني جزاكم الله

[مشكلتي]

السلام عليكم جميعا

اريد نصائحكم

انا فتاة عاملة ,وجاء زميل صديقتى رآني في مكان عملي لدة 10 دقائق او اقل , وقال لي انه ناوي لحلال ,وهو مقتنع بيا بنسبة 40بالمئة بقي الا ان يتعرف عليا مباشرة دون اللجوء الى السؤال عني عن طريق اطراف اخرى ومن بعد ان شاء الله يكون الخير كما قال لصديقتي بانها احسنت الاختيار له .
اما انا فقد اخبرته اني لا اريد ان ابدأ في بناء اسرتي بغير رضا الرحمان ,يعني لااحبذ العلاقات ,وبدا لي من خلال 10 دقائق انه عصبي نوع ما.
والآن هو بدا يكلمني في الهاتف للتعرف على شخصيتي وانا كذلك ,ونقولكم الحق انا من جهة عجبتني اني نتعرف عليه ونميز مليح قبل ماندير حاجة رسمية ,ومن جهة اخرى ضميري يلومني كثييييرا ,وليست لديا القدرة ان اقول له لا اكلمك من اليوم وباب الدار مفتوح ,خفت نكون تسرعت ونندم من بعد ,علما اني استخرت العديد من المرات.
كلمته لمرة واحدة وها أنا اطلب نصائحكم اخواتي اخواني في الله لاتخذ قرار لا اندم عليه
وكما قالي هو الطريقة التقليدية مليحة ومهيش مليحة في وقت واحد وزيد والله حبيت نعرف تفكيرك انت مباشرة .
قولولي من فضلكم كيفاش راح نصرف راني كبيرة ونعرف صلاحي بصح باش تتخذ قرار في امر كيما هدا فضلت لو اني نتكلم معاه في الهاتف فقط لمدة معينة واش رايكم ؟؟
اجيبوني بكل صراحة خاصة اللتي لها تجربة في ذلك جزاكن الله خيراااا كثيرا وجعلها في ميزان اعمالكم .

[سومية88]

زعمة رايحة تعرفي غقلية راجل جزائري قبل مايديك تحسيه رومانسي وحنين ومكاش راجل كيف بصح غير تتزوج تحسي راك مع راجل اخر الا كان مكتوبك تديه سواء اهدرت معاه ولا لالا استخيري ولي فيها غير ربي يكتبهالك

[شاطئ الأوركيد]

المشكل ان الكثير يُخدع قبل الزواج لان الحقيقة تظهر وراء الزواج و كل شيء يصبح شفاف بالمعاشرة
إذا اراد التعرف عليك على الاقل ياتي لخطبتك أما هكذا يظهر جليا ان هناك خطب ما والله اعلم
لا يمكنك التحايل على شيء مقدر بالباطل

[om mouadh]

السلام عليكم.
يا أختي نصيحة لوجه الله ما تكلميهش في الهاتف وتأكدي أنه من ترك شيئا لله عوضه الله خيرا منه...
وما تندميش باذن الله
أسأل الله لك التوفيق ويا رب يجمع بينكما في الحلال إذا كان فيه خير لك.

[بشـرى]

يا أختي مستحيل تعرفي عقلية شخص من خلاال مكالمات ، حتى تعرفي انساان جيداا لازم تكونلك معااه عشرة وطويييلة ... في فترة الخطوبة او التعارف المزعوم قبل الخطبة كل شخص يحاول أن يظهر بصورة الملااك لكن العشرة هي التي تبين معدن الشخص ..

وأنت بذاتك لديك تأنيب ضمير من الأمر ، يا أختي لنفرض مكانش مكتوب بينكم ، هل لي يجي تحكي معه ؟؟

انا لو كنت مكانك لن أكلمه أبدا لا في الهاتف ولا في غيره حتى يتقدم إلى أبي رسميا وأمام إخوتي وعائلتي ...

وحقيقة تعجبت من النسبة التي وضعها ( ٤٠٪) سبحاان الله ، هل سيتحدث معك لشهر أو شهرين حتى ترتفع النسبة إلى ٨٠ مثلا حينهاا يتقدم ؟ وماا أدرااك أنت اصلا إن كاان ينوي الحلال صح او يجوز فالوقت ...

نصيحتي لك كأخت إعط له خيارا واحدا لا ثاني له ، إما أن يتقدم رسميا وإلا فلاداعي للف والدوران تحت غطاء ( راني ناوي لحلال ) ... لا تعصي ربك وتخوني ثقة رجل اشتعل رأسه شيبا من أجل رجل ....

[اياد حياتي]

اخطيك من الهاتف والله مكان منها انك تعرفيه حاجة باينة بلي ميدو مثاليات واش راكي تسناي قوليلو باب الدار راهو قدامك وربي يجيب الي فيه الخير

[first first]

كانت صديقة لي تقول الحاج موسى كموسى الحاج
استخيري.................حتى لاتكون فيها ندامة..............واستعيني بالله.
ونضيفلك نصيحة....................هذا الاقتناع بالبورسونتاج ..............ماكان له ان يقوله ..............يخليه بينو بين روحو .خاصة والنسبة تحت ال50..وزعمة النسبة هادي بالتعارف تطلع شوية .وكي تعود في حدود ربما ال60 او كثر يجي يخطب؟؟؟.....................والله اعلم.(مجرد تعقيب فقط.......ارجو ان لايلخبط افكارك)

مع هذا يااختي...................استخيري وربي يرزقك كل خير بالطريقة التي تحفظ لك دينك واخلاقك......اللهم امين.
فالكل يبحث عن الحلال..................لكن بطرق تختلط بالمشبوه وبغير الحلال احيانا............ربي يسهل ان شاء الله.

[first first]

يا أختي مستحيل تعرفي عقلية شخص من خلاال مكالمات ، حتى تعرفي انساان جيداا لازم تكونلك معااه عشرة وطويييلة ... في فترة الخطوبة او التعارف المزعوم قبل الخطبة كل شخص يحاول أن يظهر بصورة الملااك لكن العشرة هي من تبين معدن الشخص ..

وأنت بذاتك لديك تأنيب ضمير من الأمر ، يا أختي لنفرض مكانش مكتوب بينكم ، هل لي يجي تحكي معه ؟؟

انا لو كنت مكانك لن أكلمه أبدا لا في الهاتف ولا في غيره حتى يتقدم إلى أبي رسميا وأمام إخوتي وعائلتي ...

وحقيقة تعجبت من النسبة التي وضعها ( ٤٠٪) سبحاان الله ، هل سيتحدث معك لشهر أو شهرين حتى ترتفع النسبة إلى ٨٠ مثلا حينهاا يتقدم ؟ وماا أدرااك أنت اصلا إن كاان ينوي الحلال صح او يجوز فالوقت ...

نصيحتي لك كأخت إعط له خيارا واحدا لا ثاني له ، إما أن يتقدم رسميا وإلا فلاداعي للف والدوران تحت غطاء ( راني ناوي لحلال ) ... لا تعصي ربك وتخوني ثقة رجل اشتعل رأسه شيبا من أجل رجل ....

نفس الملاحظة.سبحان الله.

[على المنهج]

تعرفي المثل الي يقول واش كدبو ليلة خطبو المهم هو لن يظهر شخصيته الحقيقيه لان هذا شيء عادي فكل شخص له معامله خاصه ولكل مقام مقال
عليك بالاستخاره والتمسك بشرع الله

[ضآحكة مستبشرة]

اختـــــــــي وشفي وآش قلتي :

لا اريد ان ابدأ في بناء اسرتي بغير رضا الرحمان

و مبعد شوفي وآش قلتي :

والآن هو بدا يكلمني في الهاتف للتعرف على شخصيتي وانا كذلك



سبحان الله و بحمد استغفر الله و اتوب اليه
انتي اصلا راكي متناقضة في ذاتك مع الاول لا تحبين بناء اسرة بغير رضا الرحمان و مبعد انتي تتكلمين معه بغير اي رابط شرعي بينكما
ما هذا اختي صفي نيتك يا بنت الناس
علاش تحبوا تعيشوا زعما و نتوما متدينين و انتوما دارين العجب
و زيد على هذا بلاك بتخبية على والديك
انتي اصلا راكي بديتي حياتك بلا رضا الله كيفاش تحبي ربي يسهلك في حاجة بديتيها بالحرام
ربي يهديك اختي
قبل متخمي في اي حاجة شوفي ابعادها قبل
ربي يسملحنا يا لحبيبة

تاخذي رايك ابتعدي عنه و اتركيه بعيدا لانه لو كانت فيه ذرة خير لما كان كلكمك في الهاتف بحجة التعرف
لانك كما تحدثتي معه ستتحدثين مع غيره
و هذا بداية لعدم الثقة بين الطرفين


اكثر مكن هذا منقدر نقول والوا صح قلقتيني

ان شاء الله ربي يسهلك يا اختي
و ربي يجيبلك الي فيه الخير
ربي يوفقك لما يحبه و يرضاه و الشورى امر مليح يصحح من اغلاط الانسان
ان شاء الله تعاودي تفكري مليح
و ايلا فيه الخير ربي يجعلوا من مكتوبكـ

[yacino dz]

السلام عليكم

انصحك اختي بان لا تفعلي هذا

مهما تكلمتهم و مهما عرفتي عنه تبقى أمور خفية عليك او ربما يخفيها عليك

و استعيني بالخبير و بالعليم لانه وحده يعلم ما تخفيه الصدور و الايام

لذلك عليك بقطع العلاقة و الاستخارة

الاسلام اعز المراة

اما ان تتقدم للزواج او ان تعرض عن ذلك (نصيحة للرجال)

لا يوجد لدينا نساء للتجارب

لا للمساومة

و لا تقلقي على رزق و على زواجك فهو بيد الله وحده

اما بهذا الشخص او شخص آخر فكل شيء مسطر

استقيمي و لا تهني و لا تحزني

و اختم كلامي بخير الكلام

قال الله تعالى : ما يفعل الله بعذابكم إن شكرتم وآمنتم

الله يسعدك و يوفقك ان شاء الله

[MAHA26]

أختي هنا بإدن الله لازم لازم عليك تبعيني شوفي مدام ضميرك إنبك معناه راكي بنت حلال والله و ربي حبلك الخير صدقيني و الله ننصح فيك بخوف كبير أنك تغلطي يا أختي اللي ناوي الحلال عمرو ما يقلك نتعرف عليك ورا أهلك و زاد راح لصحبتك و يgولها راكي عرفتي تخيري و هده هدرة كيفاه يقولك ربعين بلميه هده نسبه قليلة خلاص باه واحد يتزوج بوحدة و صدقيني والله هدي تاع ناوي لحلال راهي دخلة للطفلة لي يعرفوها مشها حتقبل كي يgولها أخرجي معايا يولي يقولها زواج و أرواحي نولهك لحاجة راكي مكيش شايفتها خلاص صحبتك هده راهي ناويتلك الشر نسقسيك هي من النوع لي يخرج مع الرجال!!!! نضن هكا راهي غايرة منك حابتك تغلطي خاطر يا أختي أنا صحبتي نخاف علاها منgولهاش أخرجي متقوليش أي مشها خرجة سي راهي هكدا و هو كفاه يتعامل مع لبنات لدرجة أنو يفكتولو باه يتزوج وينهم عايلتو ولا يخاف تولي رسمي كي تكون فاها العايلة
شوفي في أول محاولة منو يكلمك سقسيه علي الصلاة لكان لgيتيه محافض علاها قوليلو يجيك لدار و برك عندك تزيدي تهدري معاه الشيطان راهو يخدع فيك بلكلام يgولك تعرفي عليه بالك يدهر مايستهلكش بصح هده راي خدعة منو باه يستدرجك
أخر حاجة نقولهالك تاكدي من صحبتك لكان تحبلك الخير
و ربي يسترك

[عثمان الجزائري.]

أسفي على أخواتنا و ما فعل بهم الشيطان، أختي و الله الذي لا إله إلا هو ما كتب لك لن يذهب لغيرك و السعيد من أسعده الله، كلنا نمر بلحظات ضعف، فيزين لنا الشيطان الحلول في المنهيات، لكنك إستشرت و ها نحن نصحناك بالتقى و العفاف و سيغنك الله من فضله...أسأل الله العظيم أن يرزق بنات المسلمين شبابا طاهرا نقيا يكرمهن.

[fatima tappila]

اما انا فقد اخبرته اني لا اريد ان ابدأ في بناء اسرتي بغير رضا الرحمان
والآن هو بدا يكلمني في الهاتف للتعرف على شخصيتي وانا كذلك

والله أنتن أقصد النساء لا تتوقفن عن اثارة حيرتي ودهشتي فأنتن مخلوقات متشابهة ضعيفة عاطفية كثيرة الاحلام الوردية و سريعة الخداع والتحكم والسيطرة (على الاقل قبل الزواج لانكن تشتقن لشيء فطري لا تملكنه بعد وتردنه بشدة أقصد انشاء اسرة وانجاب الاطفال). أنت تعلمين الحق والباطل فلا داعي لخداع نفسك, ماتفعلينه حرام شرعا... انتهى.

ونقولكم الحق انا من جهة عجبتني اني نتعرف عليه ونميز مليح قبل ماندير حاجة رسمية


كما يقول المثل الجزائري: أحكيها لبــيـــبــــيط . لا انت ولا هو سيعرف حقيقة الاخر فكل ما يسبق الزواج أوهام وأكاذيب في الغالب, العشرة وحدها هي من تعرفك به. لا تملكين الا الاستخارة والسؤال عنه من طرف أهلك وانتظار قدرك


راقت لي جدا

[om mouadh]

أختي يجب عليك التتوقف فورًا عن الحرام، فإن ما حصل لا يمنع التوبة والتصحيح، ومن المهم العودة إلى الطريق الصحيح
وننصحك بمراقبة الله، ونخوفك من التمادي؛ لأن العظيم يمهل لكنه لا يهمل، وهو سبحانه يستر على الإنسان ويستر،
لكن إذا لبس العصاة للمعاصي لبوسها؛ فإنه سبحانه يهتك ويفضح ويخذل، فانتبهي لنفسك، وابتعدي؛ حتى تتصحح الأوضاع،
ولا تتأثري بتهديداتها(الندم والتأخر عن الزواج. وتضييع الفرصة....) فإن الحرام يظل حرامًا...
وهذه وصية للجميع بتقوى الله، ثم بكثرة اللجوء إليه، فتوقفي عن الحديث معه وتوبي إلى الله، فإنه لا يأمن مكر الله إلا القوم الخاسرون...
وأرجو أن يتذكر هذا الشاب أن صيانتنا لأعراضنا تبدأ من صيانتنا لأعراض الآخرين،
ونهنئك بما حصل لك من الانتباه واليقظة، ونسأل الله لنا ولكم السداد والتوفيق.
نقلا عن إسلام ويب.

[غربة أهل السنّة]

السلام عليكم ورحمة الله وبركاتة
أسفي عليكِ يا أختي ... لقد نصحناكِ في الجزء الأوّل من مشكلتك
لكنّكِ اصررت على أن تستقبليه في مكان عملك
وفي الأخير تلقّيتِ إهانة بأن قال لكِ أنّهمقتنع بك بنسبة أربعين بالمئة
هل يظن نفسه في السّوق؟؟؟ يختار سلعة ما؟؟؟
للأسف نحن البنات لي نقبلوا كل شيء على أنفسنا
قلتها وأعيدها،، من لا يطرق باب البيت فهو إنسان مشبوه
ثمّ ما الذّي يربط صديقتك بهِ،، هذا راجل عنده زميلات أو صديقات
ما الذّي يضمن لك أنّه لن يخونكِ في المستقبل؟؟؟
يا أختي أنصحكِ لوجه الله، دعي عنكِ حكايات الهاتف و الخرجات و الإرتباط برجل له علاقات نسائية
فسنّك يسمح لكِ بالتّمييز بين الحق و الخطأ
وما دُمتِ طرحتِ مشكلتكِ هنا فأظنّ أنّك بعيدة عن العلاقات مع الرّجال
إذن فأنت مختلفة عن صديقتك هذه ومختلفة عن هذا الرّجل
واجعلي شرطكِ الوحيد هو الدّين و الخلق، لا تتنازلي عنهما
واتركي عنكِ هذا الرّجل قبل أن تتطوّر العلاقة بينكما وتنتهي بالسّب و الشّتم
(من ترك شيئا لله عوّضه الله خيرا منه)
أسأل الله أن يوفّقكِ وأن يرزقك زوجا صالحا

[زبدة ذايبة]

هذا ماهو مشروع زواج ؟؟؟؟

هذا إنسان جا يسوم

يعني يحط السومة

يعني انت شحال تساوي بالنسبة ليه في سوق النساء

اللي راه فاتحو هو في راسو وداير لبنات الناس pourcentage

وعلى مايبدو لي أن القائمة عندو مفتوحة وطويلة

كل مرة يشطب على وحدة من القائمة.

وانت حطك في آخر القائمة (يعني قريب للنص)

وبكل وقاحة اعطاك 40 على 100 غريب والله !!!!!!!!!!!!

كيفاش ترضاي لنفسك هذا الأمر؟؟؟؟؟

وزيدي راكي طامعة تعرفي عقليتو ؟؟؟؟؟

باش تقرري!!!!!!!!!!!!

سبحان الله

ماكاين حتى حق في هذا الذي تفعلينه

يكفي أنه احتقرك من خلال النسبة التي أخذتها

يعني 40% حق الشوفة

ويزيد ينقصلها حق العقلية

واش يبقى ؟؟؟؟؟

مايبقى والو

النتيجة = صفر مقابل لاشيء

هذا بالنسبة للرجل

بالنسبة إليك

أنت شحال عطيتيلو النسبة ؟

أكيد 100%

الدليل حابة تعرفي عقليتو وتستخيري

وتهدري معاه ويجرك هو بالطريقة اللي يحبها هو حتى يهبط النسبة أكثر فأكثر

راكي غالطة 100%

الإخوة اللي قبلي كفاو ووفاو ومالقيتش صراحة وش نزيد نقول

ماتكونيش برك نعجة ودخلت لفم الذيب

هذا واش رانا خايفين

نخافو من الندامة اللي يبقى فيها الإنسان مكتف يديه

حافظي على دينك لأنه هو الأهم

وكي تتخلطلك سقسي ناس الشريعة اللي يعرفوا حدود الله

لأنك إذا حافظتي على حدود الله يحفظك الله

وحافظي على كرامتك وكبريائك لأن هذا مهم جدا في المرأة

وماتخليش روحك اللي يجي يتفرج فيك (بنية الزواج) ويعطيك النسبة الدونية

ويستخسر فيك حتى باش يجي لداركم قدام باباك ويجيب باطة حلوة في يدو ويقول جيت نخطب إذا كتب المكتوب

هو عاطي لنفسو قيمة مايتحركش غير بالدليل وبالنسبة العالية اللي يحطها هو في بنت الناس !!!!!!!!!!!!!!!!!!

ومايدخلش دار الناس إلا إذا كان متأكد 100%

باش حاجة مايخسرها. مايخسر دراهم / مايخسر كرامة ......

وانت خليتي روحك جا شافك في الشارع

وسهلتيلو المهمة باش يتعرف على واش كاين في مخك من أفكار

ويتعرف على شخصيتك.....

وانت لا تحركين ساكنا

قاعدة تشوفي في روحك بلي زعمة رايحة تعرفي عقليتو !!!!!!!!!!!!!

راكي غالطة. أو راكي تغلطي في روحك


اسمحيلي على كلامي القاسي

لكنني ماشي حابة تغلطي وماشي حابة نهار مايعجبوش الحال ( وهذا واضح جدا لايحتاج إلى دليل) يدور ظهرو ويقولك :النسبة تاعك ضعيفة وماتصلحيش تكوني زوجتي "

هذا إذا تكرم عليك وقالهالك. هذا النوع من الرجال ماتعرفيهش وقتاش يختفي ( فص ملح وذاب)

إذن ديري قيمة لنفسك.

ماراكيش قطعة تجارية جا يمد فيك السومة على حساب واش تشوف عينو.

حافظي على كرامتك. لأنك حتى ولو تزوجتي بيه مارهوش رايح يحترمك

وأنا أستبعد نهائيا أنه سيواصل في مشروعه هذا معك.

ماقدرتش نزيد نكتب. خلاص موضوعك واضح

رب يرزقك الزوج الصالح

[blanche rose]

مليحة هذي عجبتيه 40%
رفعتيلي ضغطي
علاش راكي سلعة؟؟

والمفروض ما يقولهالكش لأنها اهانة كبيرة
وتعني انو ما عجبتيهش..
المفروض تعجبيه 100% ويحوس يتأكد من العقلية بعد الخطبة
يقبل هو لوكان تقوليلو عجبتني 20%
وأنت واش رايك فيه وشحال نسبة قبولك على قولتو؟؟


المهم أختي
اللي ردوا قبلي كفاو ووفاو

اذا ناوي الحلال يتقدم من الباب ..وهذا مستبعد جداجدا

وبعد الخطبة وقبل الفاتحة حطوا الخطوط العريضة تحدثو عن ما يريد وما لا يريد..
ما تقبلينه وما لا تقبلينه
واذا تم الاتفاق ربي يكمللكم

بعد الخطبة ماشي تهدرو علاجال الهدرة والرومنسية
بل علاجال باش تتفاهمووو

لأنو كاين أمور مهمة ممكن ما تقدريش تتنازلي عليها وهو نفس الشيء..

والقرار لك أختي
ربي يرزقك الزوج الصالح

[ahlem 05]

اختي نفرضو موافقتيش عليه ومعجباكش عقليتو تزيدي تحكي مع واحادووخر !! واصلا انتي الان يعدما حكيتي مهاه اكيد نظرتو ليك تغيرت يبدا يقول قادر حكات مع غيري دام تجاوبت هكا ويا اختي في رايك ما دور الخطبة !!! للخطبة لتعارف على الشخصيات مبدئيا ولو كان غرضه حقا الحلال لما بدأ بالحرام ربي يوفقك اختي

[النجمة القطبية]

يا اختى حبيت نسالك سؤال فكري فيه من فضلك
عﻻش ربي لما يختارلنا طريق ويقولنا ها هو منرضاوش بيه وميقنعناش!!!!!
ونبداو زعما نبدلو في المسميات ونهونو في الخطا
ما ذا تسميها انتى في نظرك خطبة نصف شرعية او ربع شرعية او صفر شرعية!!!
عﻻش مترضايش لنفسك واحد يجيك من الباب قدام اهلك ويعطيك الف والف قيمة ويبذل كل جهدو باش توافقوعليه اليس احسن من ان يعطيك نسبة قبوله وشحال 40 %
عﻻه يا حبيبتى تعملي في نفسك هكا ؟ هانت عليك نفسك ؟ متحبيهاش ؟ متعززيهاش ؟
يا صديقتى فكرى مليح متعطي فرصة لحتى انسان يهينك ويجوز بيك الوقت وصدقينى راح تاكلى الحجر ندما على كونك ضيعتى كﻻم الله
ما تسميه انتى خطبة تقليدية تحفظ كرامة المراة وتعززها قدام اهلها وتحفظ بيتها وتخرج من بيت اهلها ملكة
ماش يجي يتفرج ويقول لزميلتك احسنتى الاختيار ثم يعطيك نسبة !!!!! هذا وقح وماش متربي صراحة
وافرضي في هذا الفترة جاك خاطب ولد ناس من الباب واش تعملي ؟ تقوليلو عملت عﻻقة مع رجل في الخفاء؟ يا سيدى نزينوها وقوليلو خطبنى رجل في الخفاء وشوفي ادا تقدرى
يا حبيبتى هدا اختبار من الله باش يرزقك ولد الناس المحترم ويشوف ادا تستاهليه ارجوك انجحى فيك متقوليش عجزت نقولو خﻻص
اختارى كﻻمه او كﻻم الله !
موفقة