ادخلو نحكيلكم ومدولي نصيحة

[قطرة ندى حنونة]

السلام عليكم ورحمة الله تعالى وبركاته (صباح الخير)

نتمنى متنقلوش موضوعي لاني حابة يردولي من الجنسين رجال ونسا تعيشو متنقلوهليش حبيتو هنا يا مشرفين ربي يحفظكم
خاوتي انا ضربت راجل فلكار بكف وطبعتو طاح ايه انا امنو ولا متامنوش
دوكا انا ركبت في الظهر فلكار واقفة لانو مكانوش بلايص والكار هديك لي تجي صغيرة ومترفدش المهم وقف مورايا هاد الجاهل وبدا يحتك بيا بحجة البلايص والزحام المهم قلت بلاك صح مي سي خونا رما يدو على كتفي وانا هادا لي متحملتوش درت ليه عطيتو بصقلة شفتو تتنخلع وجهو ولا حمر وطبعتو طاح ناس ناضو بداو يسبو فيه وختي ريحي وقالو لمول الكار حبسو هنا سينون نضربوه ولا نعيطو لابوليس وانا اومبعد وليت نبكي معرفتش وش ندير نزلت من الكار نزل هو مورايا بقا يتبع فيا المهم حتى قالي ختي سمحيلي الله غالب مش قصدي انا كملت مشيت مدرتش عليه
كي عشية روحت للدار حكيت لماما وبدات تسوغ وتعيط هاهي عايشة راجل وبهدلتينا كنتي تنزلي وتخيلي كاش ماواسالك ودوك يشوفوك ناس ولي كان حاب يخطب يقول هادي راجل مؤنث:1:
ماعليش فهاد النقطة (ماما حبت تزوجني)
المشكل فلامر هاد الشاب يسكن بلقرب من محطة الحافلات وديما نشوفو مرة على مرة جوغ داير مهنة الباركينغ وكل ما يشوفني يحبط راسو ....وانا حسيت بذنب معلاباليش اسكو غالطة ماعليش حشموني والله نقبل منزعفش ضميري راهو يانب فيا وماما ظل تعصر فيا
ملاحظة: لباسي محتشم ولست متبرجة لالفت الانتباه حمد الله
تعيــــــــشو
ختي ادا كنتي في بلاصتي وش ديري؟
خويا ادا كنت في مكان هاد الرجل ماهو موقفك؟
تعيشو المشرفات متنقلوش موضوعي وعلاه ربي يعطيكم وش تتمنو متحذفوهش حسو بناس ضميري راه يانبني وخفت كاش واحد شافني كيما قالت ماما ونعشي كي الطاكسي في كلام الناس محبيتش نكتب في مشكلتي معندي علاش نخبي روحي سلام

[rose de sable s]

سلام عليكم
دائما مجتمع يظلم مراة
انت درت صواب و دافعت علي روحك حسب وجهتك لا نعرف نيه الرجل
لانه كاين لي يقصد ذلك و السكوت علي الحق هو ظلم ادا سكتي سيعجبه الحال
كاين لي ميعجبوش تصرفك وكاين لي يقول انها دافعت علي نفسها مهم انت واش تشوفي

[نور لاتراه]

السلام عليكم
قد يرا البعض ان اللذي حدث طريف لكنه الواقع المزري للاسف
اتباع امة محمد؟(عليه الصلاة والسلام)
اختي مافعلته هو عين العقل
صنتي نفسك,واعترف ذلك الشاب بذنبه وقد يكون هذا الموقف سبب توبته
ان كنتي تخافين من فكرة الزواج فالبعكس هذه نقطة ايجابية لك لانك دافعت عن اهم شيئ لك
حفظك الله

[محمد جديدي التبسي]

نقصي من الخرجات وان كان ولابد تجنبي الحافلات المكتظة اذا لقيتي مقاعد اجلسي والا لا داعي للركوب استني شوية واش راح يصرا
ما فعلته يعبر عن جرأة غير عادية ومليح ما فعلته وربي يهدي هؤلاء المتحرشين.
لباس محتشم لا يعني حجاب شرعي فحسني من حجابك والبسي جلباب وتجنبي الروب مونطو والحجابات العصرية فهي ليست حجابات أساسا لأنها زينة في ذاتها وتلفت الانتباه
تعلمي مما حدث لك ولا تحاولي ان تلومي نفسك فما فعلته عادي في مثل حالتك واياك ان يجرك الشيطان للحديث مع هذا الشخص بغرض الاعتذار او ما شابه فقد يفهمها شيء آخر ويستغل الفرصة للتقرب منك وبهذا تفتحين بابا للشر صعب اغلاقه
ربي يصلح الأحوال

[bello angel]

الصح الصح اختي و بلا زعااااااااف
بهدلتي بروحك واحد ما رح يصفقلك و يقلك شجاااعة اولا كان ممكن يعطيك طريحة و هدا التصرف الطبيعي ادا ظلمتيه اولا لا من المفروض كان يجيبك من شعرك مش يزيد يطلب السماح؟؟؟؟
فات كلشي و تبقي اسمك هاااااااااااديك الطفلة تاع الكار لي تعاركت مع راجل و الله اعلم واش بيناتهم الناس مش رح تتفهم الموقف
ثالثا من صفات المراة الحيااااااااء يعني كون زدتيلو بقلبة و دماغ خيييييييييير انتي ضربتي ضربتي

انا صراحة لو كنت مكانك لن اسكت لكن كنت نقول للسائق حبسني هنا او كنت نحكي مع الروسوفار او رجل قاعد يشوفلي مكان
واللي حيرني انو المسرحية لي درتيها كامل و ماكش متاكدة و حاكمك تانيب الضمير؟؟؟

[sandybelle1]

اللي عملتيه هو الصواب

[فتيحة الإسلام]

تصرفت تصرف صحيح لأنك لو تغاظيت عن الأمر لظن أن عاجبك الحال...وهاد الأشكال انا يوم نتلاقاوهم وصديقتي صرالها موقف مشابه ةالله غي الضرب مضراتوش ويستاهل الأنو كاين لي ميحشمش أما من ناحية الزواج بالعكس الرجال يحبو البنت لي تعمل أي حاجة لتحافظ على شرفها باش يكون عبرة ولي يعودها يفكر قبل ...هذا رأيي واقتناعي

[مياسم الصمت]

السلام عليكم ورحمة الله وبركاته

الاخت الكريمة انت تقولي ما حبيت نكتب في قسم مشكلتي ما عندك علاه تخبي روحك
وانا نقولك المنتدى فيه اقسام تم تخصييصها لتنظيمه
وهناك قسم مشكلتي مخصص للمشاكل الاجتماعية
عذرا منك يغلق الموضوع