مشكلتي مع عجوزتي [الأرشيف] - منتديات الجلفة لكل الجزائريين و العرب

مشكلتي

2015-12-28, 18:46

مساء الخير
حكايتي ومافيها انني متزوجة ولي اولاد من زوجي وعايشة والحمدلله
مشكلتي في عجوزتي يعني أم زوجي التي تعمل على كل مازارتني تواجهني بأسئلتها الكثيرة والمحرجة
وتسال عن الصغيرة والكبيرة مع انها لم تربي زوجي فهي مطلقة من ابيه وهي متزوجة في جهة اخرى
صراحة تعبت من اسئلتها وماعرفتش واش ندير معاها وانا لست مقصرة معاها بالعكس افرح بها واضيفها وتعمل على فتح خزانتي والتجس على كل شئ فيها
وتذهب الى كل الغرف لاتهنى حتى ان تعرف كل شئ ة تسأل عنه والله استحيت وأتفجأ من كل شئ تعمله ماعندي مانقول ........
خايفة نقلها تزعف مني وتقول راهي ميشحابتني نجيها.
برايكم ماذا افعل مانيش حابة نخسرها في نفس الوقت ااكره واشمئز من الاسئلة المواجهة والصريحة والكثيرة والتجسس في البيت.
افيدونــــــــي

oum Haroun

2015-12-28, 20:04

هذو هما العجايز اصبري اوكان جي تصارحيها بلي راكي تنزعجي من التصرفات تاعها تقول حوزتني تحوس تفرق بيني وبين وليدي الحل هو كي تعود جايا لكم خبي لحوايج لي ماكيش حابة تشفهم و ماتهدريش على كلش قدمها و ساعات بينلها بلي ماتحبيش كي تسقسيك بينلها برك و ربي اكون في العون

رجل من هذا الزمان

2015-12-28, 20:09

تعرفي واش يقولك اصدقائنا الاجانب يقولك ام الزوج او الزوجة بالانجليزي تسمى mother in law وكان تحاول تكون كلمة اخرى من نفس هذه الحروف المشكلة للكلمة تولي وسمها "WOMAN HITLER " ارجو ان الرسالة وصلت

blanche rose

2015-12-28, 20:54

السلام عليكم
يا أختي كاين صنفين من النساء
اللي تخاف ربي وتلقايها طيبة واللي ما تخافش ربي وتلقايها شريرة
وهاذ النساء يولدو ويكبارو
ويوليو صنفين ثاني
عجوز تخاف ربي وعجوز ما تخافش ربي
الأولى تقولك المهم وليدي يكون هاني ..ما تحوس تفهم ماوالو
الثانية تخربش تخربش وإذا انزعجتي تزعف!!!!!!!!..يعني حتى الانزعاج ممنوع..!!!!!!!!
بمعنى نعفس فيك وتسكتي وتزيدي تضحكي وإلا ماكيش مليحة!!!!!!!
ظلم عيني عينك
وكاين اللي يقولك لعجايز هكذا!!!!
وكأن هذه العبارة مذكورة في القرآن!!!

أنا من وجهة نظري غرفة نومك تتسكر بالمفتاح
الملابس المتسخة أغسليها ولو يوميا..لأنو هاذ النوع من العجائز لوكان يلقى يفتش في كلش حتى في لا pوبال حاشاك ..
ويحبو يسقسيو ومن بعد يوصلو الهدرة لابنهم

بخصوص التفتيش سكري غرفة نومك والغرف اللي فيها اغراض خاصة...
بخصوص كثرة الأسئلة كل ما تسقسيك قوليلها علاه..واذا سقساتك على حاجة تخص ابنها قوليلها ماعلاباليش سقسيه يا الحاجة..

أما بخصوص أنها تقول بلي راكي حابة تحاوزيها وووو
كاين فرق بين انك حابة تحاوزيها وبين استنكارك لتصرفاتها

ما نقولكش اشنفي عليها
لكن حاجة ما عجباتكش ما عجباتكش .. بيني بأدب عن عدم تقبل الأمر..

أنا أكره عملية التجسس والتفتيش
اذا الواحد ما لقاش السرية في دارو وين يلقاها؟
الدار امان وراحة وسرية

وبعض لعجايز يدخلو دارك كلجنة تفتيش ويخرجو كمذيعات ..وحكاياتك كامل عند الناس..

عجوزتك على العين والراس..بصح تعرف قدرها واللي ليها واللي عليها..

واللي مع فكرة ان لعجايز هكذا نقول لالا
كاين وكاين

وحنا كامل عايشين في عائلات فيها انواع مختلفة من النساء وبالتالي انواع مختلفة من العجائز

عبري باسلوب لبق عن تضايقك وإلا ستتطور الأمور للأسوأ ومهما سكتت سيأت يوم تنفجرين فيه..
وأنا نفضل أنك تعبري بلباقة أفضل ما تنفجري وممكن وقتها ما تعرفيش تعبري

ربي يعينك أختي ويهدي عجوزتك

ايمان4

2015-12-28, 21:10

ربي يجيب السلاك

abdellah36

2015-12-28, 23:36

لي ما في كرشوا التبن ما يخاف من النار

سهيلة2013

2015-12-28, 23:42

ماتعنديهاش سكتي و خليها

الطيب الجزائري34

2015-12-28, 23:45

يبدوا ان قلبك كبير ، لان الحقيقة هذه التصرفات غي مقبولة و لكل شئ حدود .... لكن انت صاحبة القلب الكبير اصبري عليها .

النجمة القطبية

2015-12-29, 00:16

بنت سكيكدة

2015-12-29, 07:32

ربي يكون معاك راني حاسة بيك ربي يهديها و يهدي اللي كيفها صعيبة العيشة تحت الضغط هذا امر اكيد ننصحك تجيبيهالها بسياسة و اذا تطلب الامر خلي وليدها يهدر معاها انت ربما كلامك معاها يكون فيه حساسية و ربي يهنيك ان شاء الله

rose de sable s

2015-12-29, 08:49

حاولي انت ايضا تساليها تفس اسئلة

blanche rose

2015-12-29, 09:35

يا اختى متكبريش الموضوع وهو صغير
عجوزتك هدى راهى تزورك يوميا باش تعرف كل اسرارك ؟
يعنى هي كيما قلتي راهي تجيك مرة على مرة
رحبي بيها وكوني مليحة معاها لوجه الله
اذا سقسات جاوبي وماشي شرط تقوليلها امور شخصية ﻻنو حرام لكن انتى بذكاءك تقدري تجاوبي
اذا سقسات على اﻻمور المادية قوليلها اسالى فﻻن
اما انها تتجول في الغرف فعيب تقفلى ابوابك مجاياش نظفي مليح وخليها على راحتها
او استغلى تلك اﻻوقات وعيطيلها تشرب قهوة مثﻻ وشديها بالهدرة
او اساليها انت عن امور حياتها
وربي يسهلك

نجمتي

الزواج للقيام بمهام..لان الهدف منه تكوين أسرة وهو
كتكوين دولة
والقيام بالمهام على أكمل وجه لا يعني عدم البحث عن السعادة والهناء..

هدفنا جميعا تكوين اسرة سعيدة وناجحة

المهم
دور الزوجة مهم ومهم جدا
عليها ان تقوم بعدة مهام
منها ان تصبر مع زوجها ضد مصاعب الحياة وتصبر عليه في حالة غضبه
تربي ابناءها وتصبر عليهم
طباخة
منظفة
خياطة
صديقة
.....الخ

لكي تقوم بكل هذا هي بحاجة للدعم ولطاقة كبيرة
وليس لمن يمتص صبرها وطاقتها

من واجبها احترام اهل الزوج وليس الخضوع لهم

واجباتنا كثيرة نجمتي
واي ضغط وارهاق ذهني يهلك صحتنا مما ينقص في عمر صحتنا..

وتأكدي أن كل من تصبر على أذى أهل زوجها وتصمت تمرض بعدة أمراض وعلاقتها بزوجها فاشلة.. لأنها مكتئبة دائما من كثرة الألم..

ابحثي حولك
كل من يقال عنها صبورة محطمة.. وزوجها مل منها لأن التعاسة بادية على وجهها..

نعود للموضوع
بخصوص ان ام زوجها لا تأت يوميا هناك الكثير مثلها
وعندما تأت تفعل الأفاعيل ولو لنصف ساعة
ما يرفع ضغط الزوجة وينعكس على تعاملها مع زوجها وابنائها ويؤثر على صحتها

بخصوص ان تنظف بيتها لتراه الحماة نظيف
لا.. من تنظف بيتها تنظفه لاجلها ولاجل اسرتها وليس لاجل غيرهم وما يقولون..
فلا دخل لأحد بها ما عدا أسرتها..

وحتى وان كان البيت نظيفا ووو لا يحق لها بالتفتيش ولا التجسس
أنا شخصيا لا أتقبل فكرة تفتيش اغراضي فلسنا في العصور الوسطى ..
والحق حق والباطل باطل..
والرجال والنساء الموظفين اللي مجربين فترة حضور لجان التفتيش حتى وان كان عملهم صحيح يعرفون ذلك الشعور

فما بالك ان يتم تفتيش بيتك
بيتك..مكانك الخاص..مملكتك..علبة اسرارك..
المفروض ابناءنا الصغار ما نفتشوهمش إلا باذنهم
فمابالك بتفتيش شخص كبير

بخصوص غلق الباب عيب
لا اجد اين العيب

ما تقوم به الحماة تجاوز العيب بكثير..لا يرضاه لا العبد ولا رب العباد..
وديننا لم يسمح بالتجسس والتفتيش
كي كان صغير رماتو وكي كبار جاية تفتش دارو وتفسد حياتو؟؟
لان ازعاج الزوجة ستنعكس نتائجه على الزوج؟؟
فيجف تعاملها معه بسبب الكآبة

لعجايز اللي يخافو ربي.. لوكان تسقسيهم واش رايكم وانا سألت بعضهم.. يقولولك عيب او حرام.. كيفاش انا ندخل غرفة نوم ابني..

بخصوص الكلام..حذار ثم حذار ثم حذار
انسحبي بذكاء
فمن لسانك تعلقين اختي صاحبة المشكلة

نجمتي لكل منا مشاكله ولن يحس بمشكلتك إلا من مر بمثلها..أو تجرع من الآلام ما يجعله يحس بآلام من حوله..

أنا شخصيا حماتي دارت تصرفات ضايقتني منذ فترة ليست بالطويلة مما تسبب لي بآلام وأوجاع برأسي والرقبة ولم أستطع النوم.. ودام الأمر لأيام..
ولم أنبس بكلمة..
وقد مررت الأمر أكثر من مرة من قبل لكن يومها تعبت نفسيا لدرجة كبيرة..

لن أخوض كثيرا

هناك أمور يمكن تمريرها وتحملها وأمور أخرى لا

الحموات كالأطفال ان اعطيتهم الضوء الأخضر تمادو وان بينت لهم ما تتقبلين ولا تتقبلين توقفو
والضوء الأخضر عموما يكون من الزوج.

والأخت صاحبة المشكلة لو لم تكن مررت الأمر كثيرا وتحملت كثيرا والآن فاض الكأس لما كتبت الموضوع

قطرة فوق قطرة فوق قطرة تفتت الحجرة فما بالك القلب..
ربي يهدي هذا النوع من الحموات
يلقاو عرايس خاطيينهم ويحوسو على راحتهم بصح هوما يحبو يخربشو ويفسدو على ابناءهم وزوجاتهم

المرأة تتزوج باش تكون أسرة وتستقر ماشي باش تحارب!!!

الناس يحوسو على عروس تخاف ربي وما تتبلاش وهوما يلقاوها واجدة ويكرهولها معيشتها ومعيشة ابنهم ومن فوق يقولو هي اللي ما بغاتناش!!!

ربي يهدينا كامل

roikadi

2015-12-29, 11:42

اختبار الصبر

sam2016

2015-12-29, 12:08

و ما راي زوجك

مشكلتي

2015-12-29, 19:01

blanche rose

2015-12-29, 19:40

شكرا على المرور ومتابعة موضوعي
مشكلتي مع عجوزتي http://www.djelfa.info/vb/showthread.php?t=1905973
اضع بعض التوضيحات
والله احترمها ودايرتها كامي لكن تصرفاتها فقط
زوجي يلاحظ كل شئ وقال لااستطيع ان افعل كل شئ وانا متفهمة
تاتي لزيارتنا فقط في المناسبات يعني مرات
وزوجي يصرف ونطيبلها ونعطيها ونفرح بيها حاجة اخرى تتدخل لما نكون نطيبلها ديري هاك ماتدريش هاك
والتفتيش كل الغرف حتى البسة الاولاد تشوفهم وتسال
منين شريتو؟وبكم؟ومتى؟واشكون ليشرى؟
اشكون ليجيكم؟يعني مدة 3 أشهر تحكيهالها في يوم.
زوجي لاحظ تفتيشها وماقال والوووو بل استغرب.
ولما تروح نقعدو مرضى ايامات هاذي ليست طيرة كما يقال بل الواقع.
يا انا يا اولادي.والله استغرب ونقعدو حايرين ايامات
تحياتي

يا أختي اللي تخاف ربي تمشي بنيتها مع عجوزتها
انا فاهمة انك منزعجة من تصرفاتها وليس من مجيئها

والتفتيش خطأ خطأ خطأ
لا ربي ولا العبد يقبلو

أنا بصراحة ما نحبش اللي يفتش
وراكي قلتي ابنها استغرب

نعم لماذا التفتيش؟؟
ما الهدف منه؟؟

لن أعطيك أي تفسير أو تخمين فالله أعلم بها..

لكن من يترك أغراضه ليتم تفتيشها ثم يشك أن الشخص فعل او ..او ..او.. مخطئ..حتى وان كنت أنا ..
نعم اللي يخلي أغراضو للتفتيش يتحمل النتيجة .

اذا قادرة تتحملي تحملي

اضافة
****
اختي الانسان يعول على ربي سبحانو بصح ما يطلقش روحو..
كيما اللي يحط اغراض ثمينة بلا حماية ويلوم اللي داها!!!!
الله وحده من يعلم معادن الناس ونواياهم

انت خذي احتياطاتك واعرفي تتصرفي
ومادام قلتي نمرض ويمرضو الاولاد معناها راح بالك لحاجة معينة..
أنا ما نقدر نأكد ما نقدر ننكر
الله أعلم
وأنت الوقائع قدامك تقدري تعرفي
المهم
أرى أنه علينا جميعا عدم اهمال تحصين النفس

حصني نفسك أختي
لا تنسي
اذكار الصباح والمساء
او على الاقل
قراءة الفاتحة مرة
الاخلاص والمعوذتين ثلاث مرات
آية الكرسي مرة
الصلاة
أكثري من قول
حسبي الله ونعم الوكيل
الحمد لله
الاستغفار
والذكر عموما
التقرب لله عز وجل والابتعاد عن السيئات والذنوب
فعل الخير ولو لحيواان
الدعاء
الصدقة ولو بللي خبز في الماء وحطيه للعصافير..
او وكلي قطط ..الخ

وهناك رقية شرعية في الانترنت..اختاري منها ما ترتاحين له. ..واشحنيها في فلاش ديسك..واسمعيها متى شئت..

ويمكنك رقية نفسك بنفسك أيضا
عزيزتي ثقي أن كل شيء بيد الله عز وجل
فمهما بلغ الشر..يظل الله عز وجل هو الأقوى

جربي وثقي ان الله لن يخيبك
ربي يعينك

اكرم akram

2016-01-01, 12:35

اصي حتى تاكلي البربوشة تاعها

AMINA.Z

2016-01-01, 15:12

قلناااالكم ...
العقالة راهي جياحة مع الناس اللي ما تحشمش
انا نعرف وحدة شخصيتها قوية كي ما قدروش يدخلو في حياتها و يديرو رايهم شيعو عليها بلي قبيحة و ماش متربية ....مي كي عاشرتها فهمت العقلية
انساي حكاية الصبر و ما نعرف واش ....من الاول حدود الحمرا كاينة ..واحد ما يتجاوزها
منا و الفوق ..تلقايها تفتش قوليلها غير الخير !!! اذا حتجتي حاجة قوليلي نجيبهالك
و كي تجي اقفلي الخزاين و خبي المفتاح ...و كي تسقسيك ديري النية في الهبال و قوليلها كاش ما حتجتي قوليلي نجيبلك
غرفتك الخاصة اقفلييييها و اذا كانت تحشم اي ماتجيش تسقسيك لاه قافلتها سينو انشعيها بلاما تكتري الهدرة.
و راجلك ما دخليهش في الحكاية ...هوما اصلا ما علابالهم بوالو ...و كون تقوليلو او ما يفهمش ...و راح يكسرلك راسك برك ....المشكل بين زوج نسا حليه انتي.
ربي يفرج عليك

أم الأمورتين

2016-01-01, 20:38

وتأكدي أن كل من تصبر على أذى أهل زوجها وتصمت تمرض بعدة أمراض وعلاقتها بزوجها فاشلة.. لأنها مكتئبة دائما من كثرة الألم..

أختي blanche rose تعجبني ردودك كثييييرا و راكي قستيني بهاد الكلمة
و الله ما نغص علي حياتي مع زوجي و أطفالي غير هاد السبة الصبر و الصمت
ندمت لأني ما رديتش و لو بنص كلمة و الآن و الله لو ذهبت لمختص نفساني يجد في الكثير من الأمراض
و من واقعي زوجة الابن القوية و اللي ما علابالها بواحد هي اللي تحظى باحترام الجميع أما اللي تصبر و تسكت و تحشم راح تخلصها غالية و يحسبوها جايحة و الصغير قبل الكبير يعفص فيها و هذا اللي صار معي
صاحبة الموضوع اعتذر لأني خرجت عن موضوعك و لبنات ما قصروش معاك
ربي يهدي الجميع