راح نهبلللللللللللل من كريمة الزبدة

[zoubidaas]

سلاام عليكم صح مولدكم
خياتي عاونوني في كريمة الزبدة راني هبلت منها جااامي تصلحلي الوصفة والطريقة اللي نديرها ماتصلحليش
غير نبدا نضيف الزبدة تخسرلي كاااامل

صورتها وحبيت نوريلكم الصورة مي ماحبتش تطلع

تعيشو عاونوني راني حابة نديرها مي خسرت بزاف الزبدة وراني حالفة اذا مانجحتليش هذي المرة مانزيدش نديرها :(

اعطوني نصائح ان امكن وشكرا لكمم مسبقا واللي تعرف ماتبخلنيش دايما ندير مواضيع و وحدة ماتقيمني :\

[ام سهام 02]

كاين عدة وصفات لكريمة الزبدة

قولي لي واش وصفة جربتي او الوصفة الدرتها ومانجحتلكش باه نقدر نساعدك باذن الله

[zoubidaas]

شكرا على ردك اختي الكريمة

تقريب جربت كل الوصفات والبارح درت وحدة ب 3 بيض + 300 غرام سكر + 300 غرام زبدة

ضربت البيض وكي طلع زدتلو الشاربات اللي خدمتها خلطتو حتى ولا دافي شوي زدتلو الزبدة بالقطعة
كانت ناجحة غير بديت نزيد الزبدة خسرت وماافهمتش السبب دايما هكا الوصفة اللي نديرها غير نوصل للزبدة تخسرلي

[ام سهام 02]

كاين احتمالين ما نجحتلكش
الاول بلاك اليسرو ماوصلش لدرجة 117 درجة

و الثاني لازم تقعدي تضربي يالباتور حتى تبرد تمام باه تضيفي الزبدة قطع ماتضيفيش مرة وحدو كبشوي حتي تشوفي تجانس باه تضيفي

[ام سهام 02]

نمد لك وصفة شوفي اذا عجبتك

بالباتور صربي 2 بيضات مع 200غ سكر عادي امنبعد حطيهم فوق حمام مائي باه يتعقم البيض و اقعدي تصربي حتى يطلع شوي و يتغير اللون اتاعو الخليط يصبح فاتح ويذوب السكر نحيه من فوق الحمام المائي اقعدي اتضربي حتى يبرد خليط البيض و السكر ابدا اتضيفي قي قطع الزبدة حتى تشوفي تجانست القطع الاولى باه تضيفي حتى تكملي وانت تضربي بالباتور و هي تطلع ضيفي لها 3 مغارف عسل بالوحدة امنبعد عطرها حسب الرغبة فانيلا و كاكاو او قهوة و او عطر الفراز كما اتحبي

[*سيرين نور عيني *]

اختي ديري المارغرين ف الروبو و زيديلها كاس عسل و لافاني

[zoubidaas]

كاين احتمالين ما نجحتلكش
الاول بلاك اليسرو ماوصلش لدرجة 117 درجة

و الثاني لازم تقعدي تضربي يالباتور حتى تبرد تمام باه تضيفي الزبدة قطع ماتضيفيش مرة وحدو كبشوي حتي تشوفي تجانس باه تضيفي

نمد لك وصفة شوفي اذا عجبتك

بالباتور صربي 2 بيضات مع 200غ سكر عادي امنبعد حطيهم فوق حمام مائي باه يتعقم البيض و اقعدي تصربي حتى يطلع شوي و يتغير اللون اتاعو الخليط يصبح فاتح ويذوب السكر نحيه من فوق الحمام المائي اقعدي اتضربي حتى يبرد خليط البيض و السكر ابدا اتضيفي قي قطع الزبدة حتى تشوفي تجانست القطع الاولى باه تضيفي حتى تكملي وانت تضربي بالباتور و هي تطلع ضيفي لها 3 مغارف عسل بالوحدة امنبعد عطرها حسب الرغبة فانيلا و كاكاو او قهوة و او عطر الفراز كما اتحبي

انا كي ندير الزبدة نضربها شوي برك باش نزيد القطعة الاخرى
وان شاء الله نجرب الوصفة تاعك بارك الله فيك

اختي ديري المارغرين ف الروبو و زيديلها كاس عسل و لافاني

شكرا جزيلا اختي بصح هذي تجي في الجينواز يعني نديرها بين الطبقات ؟

[ikram08]

كاين لي بالسكر قلاصي ساهلة نفس الوزن تع الزبدة والسكر ضربيهم مليح وفي الاخير زيدي شوية زيت وزيدي ضربهم

[sahima]

بالاك السيرو مازال سخون هو اللي ذوبلك الزبدة
جربي لغوسات تاع فلة راهي تجي روعة
والبنات كامل جربوها وعجبتهم
نتمنى تنجحي فيها
بالتوفيق

[zoubidaas]

بالاك السيرو مازال سخون هو اللي ذوبلك الزبدة
جربي لغوسات تاع فلة راهي تجي روعة
والبنات كامل جربوها وعجبتهم
نتمنى تنجحي فيها
بالتوفيق


البارح صح خليتو سخون ودرتو
والزبدة نخلط شوي ونزيد نضيف

شكرا خياتي غدوا نعاود نسييها ويااارب تنجحلي راني تعقدت منها

[مريومة الاطرش]

نقولك على حاجة لما تضيفي الزبدة وتخلطي تبانلك الكريمة خسرت كامل مفتتة ابدا متوقفيش الخلط في هديك المرحلة بالعكس زيدي ضضربي ملييييييييييييييييييح بالباتور حتى تشد روحها وتولي كريمة والله انا تاني ضنيت خسرت جربي ورديي لخبر

[zoubidaas]

نقولك على حاجة لما تضيفي الزبدة وتخلطي تبانلك الكريمة خسرت كامل مفتتة ابدا متوقفيش الخلط في هديك المرحلة بالعكس زيدي ضضربي ملييييييييييييييييييح بالباتور حتى تشد روحها وتولي كريمة والله انا تاني ضنيت خسرت جربي ورديي لخبر


اوو انا حسبتلي خسرت
عندي تاع البارح كي تفتتلي حبست وخليتها نقدر نعاود نضربها دوكا ؟

[jojo dj]

ام سهام وصفتها هايلة مي وشحال كمية الزبدة

[jojo dj]

انا شفت من قبل وصفة لام كوثر او ام رامي نستها وشكون المهم وصفة هايلة حوسي عليها ديري كرام حليب ومايزينة فوق النار تعقد مليح خليها تبرد مليح وزيديها الزبدة وضربي تشبها لكرام موسلين

[آية هبة الله]

يا حبيبتي ديري هاد الوصفة تخرجلك روعة ديري 2بيض و 2 صفار ضربيهم غايا ومن جهة ديري السيرو تاعك 150 سكر مع ربع كاس ماء و ممبعد مين يطلع البيض غآيآ ضيفيله السيرو تاعك ليق السيرو يكون على درجة 120 أنتي ديري يدك فالماء البارد و غطسي يدك فالسيرو تمتم عاودي ديريها فالماء البارد يولي السيرو في يدك كي الكتلة و مين يبرد الخليط تاعك غايا ضيفيله 250غ دهان وديري لفاني ولا النكهة اللي حبيتي ......جربيهها و رديلي الخبر والله تخرجلك روععة ....وإن شاء الله تكوني فهمتيني

[همس الذكريات]

واش اختي نجحت معاك انا تاني عمري ماخرجت ليا

[zoubidaas]

راح نجيب تاع البارح اللي خليتها نعاود نضربها ونشوف
اذا مانجحتش نعاود اخرى

شكرا وربي يحفظكم اخواتي جزاكم الله خيرا

[*سيرين نور عيني *]

ايه اختي تجي هايلة
الله اعلم تاع ام اماني هادي الوصفة

[kahlouch]

اختي انا مانديرلهاش البيض.في جيهة ندير شوي عسل ونديرلو نشاء ونحطو على النار يغلي حتان يثقال طوووول مبعدا هذاك نخليه يبرد مبعدا نزيدلو قطع الزبدة ونطرب بالباتور ونزيد بشوية العسل حتان تجيني كيما راني حابة .هادي مجربتها مرارا.ايلا تحبي تنكهيها
هاداك العسل الي بالنشا هو الي يخليها تتماسك

[zoubidaas]

نجحت نجحت نجحتتتت يويويوي ندير عرس خخخخ شكرا وبارك الله فيكم خياااتي ربي يعطيكم واش تتمناو شكرااا

[ام سهام 02]

94879685]نجحت نجحت نجحتتتت يويويوي ندير عرس خخخخ شكرا وبارك الله فيكم خياااتي ربي يعطيكم واش تتمناو شكرااا


الف مبروك :mh31::mh31::mh31::mh31:
[/SIZE]

[ام سهام 02]

ام سهام وصفتها هايلة مي وشحال كمية الزبدة


الله يسلمك

انسيت ا كتبتش كمية الزبدة شكرااا النبهتني

مقدار الزبدة 250غ

[مريومة الاطرش]

وااااااااش حنونة درتي واش قلتلك ضربتيها ملييييييييييح مبرووووووووووووووووووك

[رزيقة16]

انا نديرها و الله تخرجلي روعة خبرة 3 سنين او اكتر شوفي حنونة سيها ا متندميش ديري الزبدة لازم تكون من النوع لي مليح انا نستعمل بطوش هايلة ديريلها شوية سكر مسحوق علي حساب وش درتي الزبدة تكوني طيبتي شوية شيربات لي هيا الما و السكر و قطعة ليمون من بعد ديري الزبدة مع السكر ا تخبطي با الباتور في نفس الوقت تفرغي الشربات بشوية يعني متحتاجيش بزاف قيس فنجان اتاي يكفي حتي تشوفيها ولات كريمة من بعد شوفي الدوق لي راكي حابة و لا حبيتي دوق شكولاطة تنكهيها با الكاكاو الاسواد مديروش هداك البني مشي مليح و لا حبيتي دوق فايليا ديريلها الفانيليا ملعقة او 2 كبار حسب الكمية و با التوفيق انا نخدم بيها كامل الطورطات و عطيتها لبزاف ناس و الحمد لله نجحتلهم

[zoubidaas]

شكرا شكراااااا

هديك عاودت ضربتهاا بصح ماخرجتليش مليحة
السر نتاعها السيرو كي يطيب نخليه يبرد شوي وكي نحطو مع الزبدة نديرو بلمغرف
نطلع يدي في السماء ونرمي عليه السيرو من فوق باش قيس مايوصل يكون زاد برد ونخلط بسرعة باش البيض مايطيبش

شكرا بارك الله فيكم درت بيها تورتة المساء خرجتلي كيما تاع البرا والحمد لله

[جوهرة الغرب.]

كاين وحدة ساهلة
ديري قد الزبدة قد الفوندون وضربيهم مليح ومن بعد زيدي كاس زيت نتاع الشاي وخلاص