درت خبز الدار وخرجلي معجن واااااااااااااع [الأرشيف] - منتديات الجلفة لكل الجزائريين و العرب

مشاهدة النسخة كاملة : درت خبز الدار وخرجلي معجن واااااااااااااع

ام ايمان16

2015-11-26, 10:27

السلام عليكم

جيت نقوللكم سخفت لبارح على خبز الدار ((وكوغار منيش نتوحم) خخخخخخخخ
نضت جربت وحد الوصفة والنتيجة ماعجبتنيش والخبز خرجلي معجن ععععععععع
لكن مافهمتش علاش
جيت نقوللكم واش درت بالضبط وقولولي وراه الخلل

الوصفة درت فيها الاتي
http://www.arabsharing.com/uploads/1448531439461.jpg (http://www.arabsharing.com/)
كاس سميد رطب
كاس موش معمر زيت
كاس لبن
كاس حليب دافي
ملعقة كبيرة خميرة خبز
باكي خميرة كيميائية
ملح
فرينة
2بيض
ملعقة مرغرين

طريقة التحضير
http://www.arabsharing.com/uploads/144853143952.jpg
كاس لحليب الدافي درت فيه خميرة الخبز والسكر وخليتها تطلع
درت في جفنة االزيت ولبن وكي طلعت لخميرة درتها مع الزيت واللبن ودرت كاس سميد وحركتو وخليتو ربع ساعة
http://www.arabsharing.com/uploads/1448531439553.jpg
ومن بعد جبت الفرينة وبديت ندير بالشوية ونلايم ونعجن بدي حتى تحصلت على عجينة طرية ومتلايمة
http://www.arabsharing.com/uploads/1448531439825.jpg
درت فيها بيضة وبياض البيض وعجنتها وزدتلهاشوية فرينة ونعجن ونلايم يبدي
http://www.arabsharing.com/uploads/144853160981.jpg (http://www.arabsharing.com/)
ومن بعد زدت درتلها مغرفة مرغرين وزدت عجنتها مليح مع رشات فرينة باش تتلايم لعجينة مليح
http://www.arabsharing.com/uploads/1448531609852.jpg (http://www.arabsharing.com/)
حتى تلايمت وكانت خفيفة هايلة في يدي
http://www.arabsharing.com/uploads/1448531609873.jpg (http://www.arabsharing.com/)
درتها في بلاطو وحليتها قرصات ودهنتها بالبيض ولسينوج وخليتهاتخمر قريب ساعة
http://www.arabsharing.com/uploads/1448531609924.jpg
وكي درتها فالفور سخون وخرجتها شوكاتني كي خرجت ثقيلة ومطزنة مافهمت فيها والو؟؟؟؟؟؟؟؟
http://www.arabsharing.com/uploads/1448531609935.jpg
هل ممكن تقولو على الاخطاء لي درتهم ومانتبهتش ليهم في هاذي الطريقة
ضرك نحطلكم الصور نتاعو
http://www.arabsharing.com/uploads/1448531309521.jpg (http://www.arabsharing.com/)

مع انو في الصورة يبان مليح خخخخخخخخخخخخ

nadjet boumaraf

2015-11-26, 10:51

بلاك درتي لعجينة قاسية وهي تجي تتلصق في اليدين
بلاك مخليتيهش يخمر مليح ولا درتي حليب سخون بزاف وهيطلك الخميرة

هدوء الصمت

2015-11-26, 10:53

على ما اظن مقاديرو غير مظبوطة ...فيه كاس سميد والباقي كامل سوائل!!لوكان زدتيلو كاس فرينة متاكدة يخرجلك شباب

ام ايمان16

2015-11-26, 10:58

بلاك درتي لعجينة قاسية وهي تجي تتلصق في اليدين
بلاك مخليتيهش يخمر مليح ولا درتي حليب سخون بزاف وهيطلك الخميرة

لالا حليب كان دافي موش سخون
موالفة دايما ندير لخميرة في ماء دافي او ماء سخون كي ندير بيتزا وتخرج مليحة
ولعجينة ماشي يابسة كنت نلايم فيها وهي طرية ورخوة وخفيفة
على ما اظن مقاديرو غير مظبوطة ...فيه كاس سميد والباقي كامل سوائل!!لوكان زدتيلو كاس فرينة متاكدة يخرجلك شباب

باين ماقريتيش المقادير والطريقة
راني درت الفرينة ولميت بيها لعجينة

ibtihal18

2015-11-26, 10:59

أم ياسين الزهراء

2015-11-26, 11:05

انا جاني الزيت بزاف للكمة اللي حطيتيها

ام ايمان16

2015-11-26, 11:10

انا تاني يا اختي ما عنديش مشكلة حتى في حاجة و اي حاجة نديرها الا الا الا خبز الدار و جربت وصفات من المنتدى و درت اللي موالفين نديرو فالدار ولا حياة لمن تنادي بصح اليوم كي فكرتيني نديرو و بلا جدو يجي مليح ههه اليوم تع غنان و ندير تع الدقيق برك مش مخلك بالفرينة

حتى كاين حوايج برك ماحبوش يصلحولي كيما عجينة لمحاجب وخبز الدار خخخخخخخخخ
مهما بدلت وصفتهم

انا جاني الزيت بزاف للكمة اللي حطيتيها

حتى خممت كيفك وقلت بالاك الزيت بزااف خخخخخخخخخخخخخخ

راني نحاول نشوف الاخطاء لي درتها باش كي نعاودو السمانة الجاية يجي مليح بلاجدو خخخخخخخخخخ

أم ياسين الزهراء

2015-11-26, 11:11

ادا عندك بيترا نمدلك وصفتي اللي موالفة نديرها وتجي هايلة

ام ايمان16

2015-11-26, 11:21

لالامعنديش بيترا

فايزة1207

2015-11-26, 13:05

فيه مقادير بزاف
نحي اختي اللبن ولا الحليب
وخليه يخمر مليح

ام ايمان16

2015-11-26, 14:14

فيه مقادير بزاف
نحي اختي اللبن ولا الحليب
وخليه يخمر مليح

بالصح نورمالمو لحليب واللبن مليح للعجين؟

أم محمد علي

2015-11-26, 14:31

أختي أنا جربت خبز باللبن ولكن بالفرينة فقط
عادي عاودي جربي تع أم ساجد هايل :http://cdn.top4top.co/i_e69fda0c531.jpghttp://cdn.top4top.co/i_e69fda0c531.jpg

ام ايمان16

2015-11-26, 14:35

أختي أنا جربت خبز باللبن ولكن بالفرينة فقط
عادي عاودي جربي تع أم ساجد هايل :http://cdn.top4top.co/i_e69fda0c531.jpghttp://cdn.top4top.co/i_e69fda0c531.jpg

واشمن فرينة استعملتي

لاني شكيت ايضا في نوعية الفرينة تكون ماشي مليحة

raboha

2015-11-26, 17:49

ختي متقلقيش روحك ديري بوصفة أم محمد علي اللي بالحليب الخاسر
بصح زيدي 3 حبات بيض فالوصفة و الحليب الخاسر تكوني مصفياتو مليح من الماء و عبري بيه كاس و نحي خمارة القاطو دري غير خمارة الخبز
و خمريه و كسريلو الخمور 3 مرات و الله يخرج روعة
ديري هذي الوصفة و راح تشوفي خبز الدار و الله تولي مدمنة عليه
هذا رابطها
http://www.djelfa.info/vb/showthread.php?t=1892710

ام ايمان16

2015-11-26, 17:56

raboha

2015-11-26, 19:57

شكرا اختي
يعني نستنى حتان يخسرلي لحليب باش نجربها هههههههههه
بارك الله فيك

وعلاه حتى تسنايه دريلو القارص و لا الخل و خسريه
أنا كل منحب نديرو بريوش نخسر 3 شكاير فالليل و نخليهم يقطرو

استحسان

2015-11-26, 20:17

السلام عليكم أختي الخبز يخمر زوج مرات الاولى بعد ما تلميه تخليه يخمر مليح ثم تقرصيه وتخليه يزيد يطلع مليح باش تطيبيه.

ماروكو الكبيرة

2015-11-26, 21:48

انا اعتقد شيحتى العجينة عليها جاءت معجنة
او مخليتيهاش تخمر مليح
انا نخليها تخمر ونكسرلها تخمار ونعاود هذه العملية اربع مرات
نحصل على خبز ولا اروع

ام رضوان

2015-11-26, 23:14

شوفي اختي مقاديرك صحيحة لكن الطريقة خاطئة
اي خبز او بريوش اومطلوع او اي شيء فيه الخميرة لازم على الاقل يختمر 2مرات
عاودي جربيه وكي تلمي العجينة غطيها بقطعة نيلو ودفيها وخليه يختمر مدة ساعة وبعدها فشيلو التخمار ماتعجنيهش فشيه فقط وبعدها ادهني البلاطو وقرصي الخبز وادهنيه وخليه يخمر مرة اخرى حتى تشوفيه طلع مليح ولوحيه يطيب في فرن مسخن مسبقا .
رايح يخرجلك خبز روعة باذن الله..

ام ايمان16

2015-11-27, 09:05

يعطيكم الصحة
دايما نسخف ندير الخبز ونوع فيه لكن انا وياه اعداء دايما مايصدقليش ومايخرجليش مليح هو والبريوش ولعجين نتاع لمحاجب وااااااااااااع
منيش عارفة دايما نطيح في السميد موش مليح او لخميرة فاسدة او انا لي ماعنديش زهر مع الخبز ؟هههههههه

وعلاه حتى تسنايه دريلو القارص و لا الخل و خسريه
أنا كل منحب نديرو بريوش نخسر 3 شكاير فالليل و نخليهم يقطرو

يعني مافهمتش كي تخسري لحليب ديري الماء نتاعو ولاهاذاك الجبن لي تصفيه ؟
ولاه ديري 3شكاير ؟هل لازم كمية كبيرة ام انتي ديري بزااف برك؟

السلام عليكم أختي الخبز يخمر زوج مرات الاولى بعد ما تلميه تخليه يخمر مليح ثم تقرصيه وتخليه يزيد يطلع مليح باش تطيبيه.

وعليكم السلام
ممكن كنت غاصبة شوية ماخليتوش يخمر وهو عجين او البرد ايضا كان بزااف في الدار بردلي لعجينة ؟
ان شاء الله يصلحلي المرة الجاية

انا اعتقد شيحتى العجينة عليها جاءت معجنة
او مخليتيهاش تخمر مليح
انا نخليها تخمر ونكسرلها تخمار ونعاود هذه العملية اربع مرات
نحصل على خبز ولا اروع

لالااختي ناكدلك لعجينة ماكانش يابسة في يدي كنت ندري الفرينة بالشوية ونلايم ونحسها خفيفة في يدي يعني مايبستهاش
ممكن المشكلة كيما قلتو ماخليتوش يخمر وكسرتلو الخمور نتاعو:mh31:
المرة الجاية نعطيه وقتو في الخمور

شوفي اختي مقاديرك صحيحة لكن الطريقة خاطئة
اي خبز او بريوش اومطلوع او اي شيء فيه الخميرة لازم على الاقل يختمر 2مرات
عاودي جربيه وكي تلمي العجينة غطيها بقطعة نيلو ودفيها وخليه يختمر مدة ساعة وبعدها فشيلو التخمار ماتعجنيهش فشيه فقط وبعدها ادهني البلاطو وقرصي الخبز وادهنيه وخليه يخمر مرة اخرى حتى تشوفيه طلع مليح ولوحيه يطيب في فرن مسخن مسبقا .
رايح يخرجلك خبز روعة باذن الله..

شكرا اختي ان شاء الله المرة الجاية نعاودو ويجي مليه كي نخمرو بزااف
ولكن شكيت ايضا اني كي دهنت البلاطو بالزيت ورشيت فيه الفرينة وقرصت فيه لعجينة ؟هل الزيت لي كان في لبلاطو ماكانش سبب في عدم اختمار العجينة في الفرن مثلا :sdf:
مع اني دهنتو برك ماشي بزااف؟

fati21

2015-11-27, 10:10

raboha

2015-11-27, 10:13

جمعة مباركة و نهارك سعيد
كي تخسري الحليب ديري غير ذاك الجبن اللي تحكميه الماء ترميه
و كي نخسر 3 شكاير باش يخرجلي ياسر لخطرش نعبر بالشوب تاع القهوة كبير

ام رضوان

2015-11-27, 18:13

اختي البلاطو المدهون بالزيت والفرينة مش هو السبب
السبب ناكدلك وعن تجربة سببه التخمار
عاوديه وخمريه بالطريقة اللي نصحتك بيها وادعيلي دعوة الخير.

ام ايمان16

2015-11-27, 19:40

ممكن لخميرة ميش مليحة
او ماخليتيهش يخمر مليح زيد الحال بارد حطيح حدا الشوفاج
جربي طريقة ان اماني انا والله عمري مادرت خبز الدار ومين جربت وصفتها ديما تصلحلي راني معتمدا الوصفة و مانبدلهاش 3سنين

لخميرة لي عندي عندها بزااف قلت بالاك كي طولت ولات ماتتفاعلش مليح مع لعجين ايضا
ان شاء الله كي نعاودو يخرج مليح

جمعة مباركة و نهارك سعيد
كي تخسري الحليب ديري غير ذاك الجبن اللي تحكميه الماء ترميه
و كي نخسر 3 شكاير باش يخرجلي ياسر لخطرش نعبر بالشوب تاع القهوة كبير

ايه فهمت ضرك لاني كنت فاهمة تعجني الخبز بالماء نتاع لحليب الخاسر:1:
شكرا لك

اختي البلاطو المدهون بالزيت والفرينة مش هو السبب
السبب ناكدلك وعن تجربة سببه التخمار
عاوديه وخمريه بالطريقة اللي نصحتك بيها وادعيلي دعوة الخير.
شكرا اختي
ان شاء الله كينعاودو نخمرو مليح وتكون لخميرة مليحة وتتفاعل مع لعجين باش يخمر:)

وفاء حنونة

2015-12-03, 17:37

انا ثاني حابة نسييه وخايفة .........

/زهرة عصفور الجنة/

2015-12-03, 17:42

لا تستعملي فرينة لابال
استعملي سيم ولازم العجينة جي تتلاصق دوك
نحوسلك الوصفة تاعي

/زهرة عصفور الجنة/

2015-12-03, 18:03

ام ايمان شوفي طريقتي يجيني خفيف وهايل وميتعبش كامل
http://www.djelfa.info/vb/showthread.php?t=1628089

omjoujou

2015-12-03, 18:22

شوفي اختي نعطيك طريقتي ناجحة مئة بالمئة والله ليوم برك زدت درتو راني حطيت الصورة تاعو في الكوزينة وذرك نزيد نحطلك صورتو هنا والله جاني خفيف ريشة وما يتشبعش والشيئ لي يعجبني ماتعجنيش خلاص والنتيجة تجي اكثر من روووووووعة
تقريبا مكوناتك نفس المكونات لي نديرها
2بيضات 2مغارف سكر مغرفة كبيرة خميرة الخبز كاس كبير حليب دافئ كاس سميد نص كاس زيت ملح سينوج وفرينة تشيحي بيها
في صحن كبير خلطي البيضات مع السكر بالفرشيطة ضيفي الزيت خلطي زيدي السميد وخلطي وفي الاخير ضيفي الحليب الدافئ والخميرة خلطي وخليهم يتفاعلو دقيقة برك ضيفي الفرينة والملح والسبنوج بصح ماتيبسيش العجينة خليها تلصق في يديك ضربي العجينة بيدك مدة دقيقتين برك غطيها وحطيها في مكان دافئ وخليها تخمر وهنا السر يعني كلما تخمر كسريلها لخمور وعاودي خليها تخمر وزيدي كسرليلها لخمور ل 4 حتى 5 مرات وامبعد شعلي لفور خليه يسخن مليح وفي هذاك الوقت ادهني السبنية تاعك بالزبدة وبلاتي العجينة تاعك ديري شوي زيت في يديك اذا شفتيها تلصق بزاف وامبعد ادهنيها بصفار بيضة مخلط مع قطرات من الخل الاحمر دردري عليها سينوج وجلجلانية وخليها تخمر 5 دقايق ودخليه يطيب وزيدي شعليلو من الفوق باه يحمار والله راح تتحصلي على خبز دار من اروع مايكون
اليوم كي عاودتو سرقت فكرة من ام ياسين تاع اللبن تبعت نفس خطواتي الا في لحليب بدلتو بكاس لبن وضفتلو ماء زهر باه ماتكونش فيه ريحة اللبن واكيد دفيتو فوق النار باه تخمر لخميرة وتبعت نفس الخطوات
جاء خبز الدار هشوش وخفيف نتمنى تجربي طريقتي وتدعيلي بالخير ذرك نجيبلك الصورة
تفضلي اختي الصورة راهي طازة ههههه درتو ليوم بالبن
http://www.m5zn.com/newuploads/2015/12/03/jpg//1bc8520e8f61002.jpg
وذرك. نروح نحوسلك على صورة اخرى درتو بالحليب
هذي صورة درتو بالحليب تاني جا روووووووعة
http://www.m5zn.com/newuploads/2015/12/03/jpg//5e353861822ac64.jpg
جربيه ومتندميش ولوكان جيتي قريبة نديرهولك ونجيبهولك سورتو كي قلتي تتوحمي الله غالب