الدوبارة البسكرية حيرتني

[lina23]

سلام لكل الاخوات طلبي واضح من العنوان راني حابة نطيب دوبارة شفتها في التلفاز عجبتني ياسر بصح ما عرفتش كيفاه نبداها .حابة تحطلي وحدة مجربتها وتعرف الطريقة .الله يسعدها دنيا واخرة .زيد عندي فول يابس واش نعمللو

[منى 92]

احكمي الفول شمخيه في الماء ليلة كاملة ومبعد في الصباح بدليلو الماء وطيبيه وزديلو ورق رند وفلفل احمر وكمون وخليه يطيب مليح
ومن جهة اخرى حضري لصوص
طماطم وفلفل وتوم وكروية ديرهم في المهراس ومبعد زديلو الطماطم المصبرة والزيت وكي يطيب الفول زديلو هادي لصوص وخلطي والملح تاني وفي الاخير دير زيت زيتون
وبصحة وعافية

[منى 92]

وش مافهمتيش رانا هنا

[missfr]

يعطيك الصحة

[lina23]

احكمي الفول شمخيه في الماء ليلة كاملة ومبعد في الصباح بدليلو الماء وطيبيه وزديلو ورق رند وفلفل احمر وكمون وخليه يطيب مليح
ومن جهة اخرى حضري لصوص
طماطم وفلفل وتوم وكروية ديرهم في المهراس ومبعد زديلو الطماطم المصبرة والزيت وكي يطيب الفول زديلو هادي لصوص وخلطي والملح تاني وفي الاخير دير زيت زيتون
وبصحة وعافية
الله يسترك اختي ويعطيك ماتتمناي.انشاء الله نجربها

[أمة المحيي المميت]

يعطيكم الصحة

[الزوجة البارة]

راني هنا جيت نعتلك الطريقة
كاين تاع الفول و تاع الحمص او المخلطة بيناتهم
ادا كنتي راح ديري الدوبارة الي فيها الفول اليابس
الفول اختي يتشمخ مدة ليلتين مع تغيير الماء كل ليلة
و حطيهم يطيبي يعني الفول و الحمص كل حاجة وحدها مع شوية قارص للحفاظ على اللون
نرجعو للمرقة
احكمي 3 حبات طماطم قصيهم رقيييقة مش ترابيهم و لا ترحيهم تحطيهم في برمة و تزيدي عليهم شوية ثوم مرابية و فلفل احمر حار بودرة "عكري يعني" و ملح فلفل اسود و راس الحانوت و تقليهم مع شوية زيت مليح كي يتقلاو زيدي طماطم باطة حوالي 3 ملاعق اكل ايه هي تحب الطماطم المصبرة ثم ضيفي شوية برك ماء تقريبا فنجان باش متلصقش برك كي يتقلاو مليح طفي الغاز تاعك و لوحي نص قارصة شرائح و شوية دبشة و كمون و خليهم
كي تحبي تسربي تلوحي الحمص و الفول بالماء تاعهم مع مراعاة متكثريش ماهم باه متوليش مايهة المرقة تاعك و تحركي بلا متشعلي النار 'اكيد الفول و الحمص يكونو سخونين ' باش يكون الخليط النهائي سخون و سربي حبيبتي و زيدي شوية طرشي ادا تحبي هدا اختياري من الاول و ربي يوفقك جربيها و رديلي الخبر تجي تهببببببل
ديما نديرها لاهلي و زوجي و يحبو تاعي

[om3imad]

انا ثاني كنتباغية الطريقة انتاعها كليتها في بسكرة و شريت منها بصح كاين الي يقلك لاصوصانتاعها متطيبش ما فهمتش

[غربة أهل السنّة]

السّلام عليكم ورحمة الله وبركاته
أختي هذا الرّابط اطّلعتُ عليه أمس وأعجبني كثيرا، هو للأخت أمّ إيمان جزاها الله خيرا
http://www.omimene.com/2015/11/blog-post_19.html
في هذه الوصفة الأخت مستعملة الحمص،، وربّما تستطيعين إضافة الفول
والله أعلم

[ام ايمان16]

كنت راه نفيدك بالوصفة نتاعي لقيت الاخت غربة أهل السّنةسبقتني جزاها الله خير
ان شاء الله تطيبها وتقولينا رايك

للعلم فقط راني زدت طيبتها بالفول اليابس والحمص بنفس الطريقة وخرجت هايلة ايضا
الحمص يطيب وحدو
والفول يطيب وحدو
والفول شمختو ليلة فقط وغدوا لقيتو تنفخ وطيبتو مع شوية خميرة فطاب ثمثم
والحمد لله عجبتني و عجبت زوجي واهله

بالتوفيق

[lina23]

ربي يجازي كل وحدة خير انشاء الله

[mamia11]

الله عليكم يا حراير بسكرة ووادى سوف ربي يحفظكم

[الشاوية*]

اختي لاصوص نتاع الدوبارة مايطيبو ما يتقلاو اصلا كل شىء بارد هاذا هو اصل الدوبارة البسكرية

[maryia]

روعة .. يعطيك الصحة

[lina23]

جزيل الشكر لكل من افادتني في كيفية طبخ الدوبارة.جربتها والحمدلله عجبت زوجي وهادي هي الفايدة

[rose de sable s]

الحمص او فول هو لي يطيب و ماء لي طاب فية هو لصوص و لصوص تاع طماطم و توابل مطيبش
ربي يهنيك