هل ظلمته

[مشكلتي]

السلام عليكم

انا فتاة عاملة 25 سنة جامعية موظفة تقدم لخطبتي شاب مستواه اولى ثانوي يعمل حر بمعنى يوم كاين يوم ماكانش المشكل اني رفضته بسبب اني احسسته انه خطبني فقط لاني موظفة اذ لانى اتمنى ان من بدق بابي يشترط علي ايقاف العمل قد اكون مخطئة في ظني به لكن الخاطب اول ما قاله لولي امري ''انا موافق على عملها كل الموافقة حتى دون ان يراني هل من المعقول ان تتكلم عن العمل من تلقاء نفسك و توافق على عمل خطيبتك حتى دون ان بكون التكلم من طرفها انا لا مشكلة لدي ان اساعد زوجي براتبي لكن على الاقل بكون راجل بمعنى الكلمة يبذل مجهود و ما يلحقش لكن ليس ان اشعر انه يتم استغلالي:mad:

وقت بين نارين اني متعلمة و هو لا مع الوقت تظهر الفجوة لهذا الاختلاف الدراسى بالاظافة لاني عاملة بينما هو شبه لا خفت ان يكون ردي لهذا الخاطب للأسباب التي قلتها لا يرضي الله بالتالي قد اعاقب طول عمري بعدم الزواج خاصة ان عمري 25. ندمت لاني لم اصلي صلاة استخارة قبل ان ارفض لا ادري لما احس اني ظلمته اللهم اعوذ بك كي لا اظلم عبادك كي لا نظلم

[اسعى لرضى الله]

معليش اختي دك هدا تسرعتي ورفضتيه باين كون كان من مكتوبك راكي قبلتي , يعني متخليش الشيطان يسيطر عليك تعوذي من الشيطان وزيد لمرة الجاية كي يجيك واحد صلي صلاة الاستخارة وشوفي وزيد لا راكي خايفة متزوجيش متخافيش ان شاء الله تزوجي ادعي ربي في الليل في قيام الليل يرزقك بزوج صالح ويرضيك بيه هدا مجرد وسواس

[القائدة]

و من قال انك ظلمتيه !
لا تعيشي نفسك في مواقف خيالية

هو مجرد خاطب تقدم و تم رفضه و انتهى ، وين المشكلة ؟

اعجبني قرارك و رفضك له
هو لا يناسبك ، و ستتعبين لو تزوجتيه
كما انه بهذه المواصفات التي ذكرتيها لا نعتبره فرصة ذهبية للبنت تندم عليها !

حاولي المرة الجايه تعتمدي الاستخارة ، و عليك بصاحب الدين و الخلق ، و نصيحة اخوية اياكي تتزوجي احد اقل منك مستوى تعليمي و مادي ، رح تتعبي يا اختي تتعبي
الله يسهلك امرك

[أم ريتاج زهرة]

يا أختي ما ظلمتيه ما والو و هذا قرارك و إذا ما راكيش مقتانعة بيه يجي النهار اللي تندمي على زواجك منه و ناس بكري قالو الطفلة يخطبوها 100 و يديها واحد و كل حاجة بالمكتوب نتاع ربي و 25 سنة مازال الدنيا قدامك و قبلي باللي يريحلو قلبك و عليك بصلاة الإستخارة لأنو الزواج عشرة مش نهار و يفوت بالتوفيق أختي

[طيور الجنان]

ماظلمتيهش هذا مكتوب وراكي صغيرة عندك الحق تخيري ماترميش روحك وخلاص.

[خالد عنابي2]

لم تظلميه بل هو قرار صائب

ثم ان الموافقة على زواج ليست واجبا حتى يكون الرفض ظلما

[عبد الله 22]

ماظلمتيش أغلبهم الشباب يطمع في المراة العاملة إلا ما رحم ربي ، انت ربما مجرد راتب مضمون لا أكثر والرجل الذي يفكر في عدم تحمل المسؤولية أو يجد حلول لمشاكله المادية والبطالة عن طريق الزواج من عاملة إنسان تافه ولا يستحق ان تضحي المراة من أجله من جهة أخرى لا يجب إحتقار االانسان بسبب ظروفه او لمستواه يكفى الرفض بطريقة محترمة بالتوفيق

[اشارة مرور]

من كلامك واضح انه مخطط لحياته جيدا ،على كل حال الحب هو الوحيد القادر على اذابة جبل الفوارق الاجتماعية، وبما انه منعدم في حالتك فستظلين دوما تشعرين انك افضل منه. انصحك بالتريث فالزواج بداية لحياتك يجب ان تدرسي كل الاحتمالات فيه

[RB59711]

لا أرى أي ظلم تفكيرك سليم و منطقي .

[ساندريلا]

عدم حيازة شهادة جامعية لا يعني الجهل فكم من جامعي احمق و كم من بطال مثقف
المستوى الدراسي ليس مقياسا للسعادة ......
لكن الوظيفة المستقرة بالنسبة للزوج شيء مهم جدا في هذا الوقت لا تندمي على شيء اختي و عسى ان تكرهي شيئا وهو خير لك
و عمر 25 ليس بالكثير ربي يرزقك ان شاء الله

[AMINA.Z]

لم ترتاحي له و لم تشعري بانه سيكون سندا لك في الدنيا و لم يجعلك تشعرين بانه سيكون مسؤولا عنك و ليس بنفس مستواك
هو غير مناسب ببساطة

[mounia 85]

عندك حق باين طامع فالشهرية

[rose de sable s]

ربي يرزقك اذا كان مكتوبك رايح يرجع وادا لا هدا سبب فقط

[أم معاذ أم معاذ]

ربي يرزقك الزوج الصالح المناسب لك
لا أظن أنك ظلمتيه
سبحان الله نفس حالة أختي ونفس سنها و حتي هي رفضت

استفدت من اجايتكم ربي يجازيكم خير

[رحمةز]

ما اصابك ما كان ليخطئك وما اخطاك ما كان ليصيبك .....لوكان جا مكتوبك راك قبلتي بيه حتى ولو فيه العيوب السبعة.
اظن انه ليش شرط ان يكون المستوى العلمي متساوي لانك ربمى تدي واحد متعلم اكثر منك ومايتفهمكش والعكس المهم التربية والاخلاق.....وما تقوليش خلاني نخدم يعني طمعان فيا ماشي شرط يمكن يكون ماهوش حاب يخسرك اذا شرط عليبك ماتخدميش\المهم في المرات المقبلة ان شاء الله استخري رب العالمين واسالي عن الاخلاق ولا غير سواها

[سجل أنا جزائري]

هي الاحسن انو لو واحد قبل ما يجي يخطب يسقسيو عليه اهل البنت خاصة من ناحية الأخلاق و دين و مبعد كي يجي و دير روية الشرعية تناقشو على الشروط و منها خدمة


بلاك هو في حسابو انو شرط تعك انو تكملي الخدمة لانو كاين بنات بزاف اول حاجة تشرطها هي الخدمة خاصة اذا كانت جامعية و راجلها أقل منها مستوى او الوالد تعك شرط عليه الخدمة على لول و قال موافق

من رأيي تسرعتي باتخاذ القرار لكن هذا ما كاش مكتوبك لكن مرة القادمة قبل كل شيء صلي الاستخارة و مبعد لما يتقدم و تريه و يراك و تتكلمو و من حقك تقوليلو حابة نحبس الخدمة و مبعد أحكمي على الشخص لما تري بعينك و تسمعي بأذنك حتى لا تسوئي الظن بأي أحد

[raghado]

الي كاتبو لك ربي راح تشوفيه وانت لك حق الرفض والقبول هدي حياتك لكن لازم الواحد مايستعجلش في القرار المهم في الراجل التربية الاخلاق

[biologie2001]

و انت علاش راكي تعبي في روحك ..100 يخطبو و واحد يدي .... انت رفضتي قولولو ربي يجيبلك من بلاصة اخرى..ماتقوليلو لا سبب لا زوج

[*الحواس*]

جاري طاكسيور و متزوج طبيبة , و لحد الأن عايشين في الهناء و عندهم 2 أطفال , رغم الإختلاف الكبيرفي المستوى التعليمي .

المستوى الجامعي ليس بالمقياس الهام أو المعتمد للقياس عليه , و إنما مقياس التربية و الأخلاق .

أتمنى أن يكون المثال الواقعي أن يفيدك .

[mino 13]

فارق دراسي هناك من يقول انه غير مهم لكن فى اعتقادي هو جد جد مهم
وهدا الامر يظهر بعد زواج وبالتجار ب وليس كلام وفقط

[samy algerien]

عدم حيازة شهادة جامعية لا يعني الجهل فكم من جامعي احمق و كم من بطال مثقف
المستوى الدراسي ليس مقياسا للسعادة ......
لكن الوظيفة المستقرة بالنسبة للزوج شيء مهم جدا في هذا الوقت لا تندمي على شيء اختي و عسى ان تكرهي شيئا وهو خير لك
و عمر 25 ليس بالكثير ربي يرزقك ان شاء الله

بارك الله فيك. دائما اتعجب عن الحديث عن مستوى تعليمي بين اثنين متعلمين . الغير متعلم هو الأمي الذي لا يعرف القراءة والكتابة. والباقي يبقى على الشخص وعقله. ممكن سبب رفضك هو عدم وجود وظيفة له واظن انه ايضا يريد فتاة موظفة مادام اول موضوع ناقشه هو العمل

[أم شهد*]

نوصيك يا طفلة اوياك تغرك الدنيا ولا قرايتك ولا خدمتك و توكسي روحك و لي يجيك ترفضيه انا نعرفة استاذة في الجامعة الله يبارك عليه مكانة و نسب ومال ومنصب كي يجيها اي واحد متصدوش تقبل مبدايا بالخطبة لانها مقتنعا بلي الخير مهيش عارفة وين و تزيد تصلي صلاة الاستخارة
المهم اذا جاك واحد مدين ومتخلق اعطي فرصة اروحك و متصديش الخطابا ليجيك نهار تندمي يوم لا ينفع الندم