لي تقول انا مرى ونص تدخل

[فراشات العمر]

السلام عليكم
اتتني رسالة على الخاص فيها
اختي ممكن تساعديني راني حاصلة مع الدار
شوفي انا عندي غرفتين وهول ومطبخ وحمام مختلط يعني فيسي ودوش مع بعضاهم الخدام فسدلنا الدار يعني ندوشو في المرحاض
اففففففففففففف كي نتفكر نهبل
المهم وصالون في الطابق الارضي
الغرفة الاولى فيها خزانة تاع حطب ست بيبان معمرة قش فيها لي تاع لبسة وفيها قش قديم زعمة ناوية نخيط بساطات تاع قش هذي اكثر من ثلات سنسن وانا نلم فيهم المهم فيها ايتاجار تاع بلاستيك فيه قش تاع وليدي صغيري وفيها كانابي نحط فيه القش لي نتفرشوه خطاراكش نرقدو في الارض
الغرفة الثانية فيها خزانة تاع التلفاز مخدومة من ليمابل بدات تتنصل وليت درت فيها الميكرو وعندي خزانة ايضا تع ليمابل الاصفر مديتها للذراري يخبو فيها قشهم وعندي زوج ماشن خياطة واحدة تاع بيدال والاخرى الصناعية والجهة الاخرى ركبنا المدفاة وقدامها اتاجير تاع بلاستيك لميت في خردوات الخياطة يعني تقريب معمرة نروحو للهول فيه زوج بيبان واحد للحوش صغير والاخر للدروج دايرة فيه صبابط والتليفيزيون على فكرى ماكانتش عندي تسريحة خدملي وحدة من ليمابل سال على خالك ههههفسدو لقجورة كي شفتها نهار الاول كرهتها كرها شديدا ما عجبتنيش خلاص نحيت المرءاة وحطيتها فوق الخزانة تاع غرفة الاولاد وضعت عليها التلفاز
ندخلو للمطبخ ونهربو يخوف كرهتو كرهتو نكرهو زعما خدملي البوتاجي بصح ماكملوليش خلاه خربة كيما ندير ما يتفرز دايرة ثلاجة وفرن وغسالة وايتاجير بلاستيكي لامة فيه المؤونة عندي سلة كبيرة واخرى صعيرة واخرى عبارة عن ايتاجير واخرى للكؤوس غرافة حليب ون فوق طباسة باه يقطرو
من تحت البوتاجي بدون السميد وبدون فيه حوايج القاطو وكاين الفايونص قيد الاستعمال هذي جهة والجها الاخرى لامة فيها ماعن اضافيو مع سياير مع بدون الاشغال العامة كلاب و مطرقة وووو بعض المخلفات
والجهة لي تحت الحوض ديرة الخضر بطاطا وبصل وبدون الزبالة حشاك وطابونى كلش عل المكشوف
نهبطو الدروج مكشوفين لازم تلبسي خمار والا يشوفوك سلافي اولواسي اخوة زوجي هههههه
ماتخلعيش نفتح باب الصالون هو طويل ومظلم تشعل الضو يحبس قلبك فيه كونجيلاتور وقدامو كنابيحاطة غبه بسبطات البونجو قدامو السرير لكبير دو بلاس فوقو ماتلا لقديمة قسمتها على زوجو من فوقا الدراجة تاع البني مخبيينها عليه ومن فوقها الكارتون تاع الكونجلاتور لي شريناه جديد والماتلا الجددة تاع الهوى وقفتها مع الحيطبا ماتفسدش ولاصقة خزانة الكتب وقدامها مكتب صغير شريناه ندمنا والارض طارحة زوج زرابة ديرة زوج ماتلات عاليين ومغطيتهم
هه شكون الفحلة تفرزلها الدار وباه تنصحها اليكم الخط:sdf::sdf::sdf:

[فراشات العمر]

128
مشاهدة ولا وحدة فيهم مرا ونص ههههههههههه
تاحسن شيء كلمة طيبة

[رقة زمان]

سمحيلي اختي على الفضول هاد الدار ليك ولا لوحدخرى
الدار ديالك ولا ديال الكرى؟
المهم حالتك كيما حالتي والله صعيبه بزاف طلبيلي ربي يعطونا السكنه

علاش راجلك ميديرش أثاث جديد بالكريدي مدام معندكمش ولاد بزاف
البساطات علاش متخيطيهمش دركا باش تتهني من القش القديم بويسك درك يدخل الشتا وتعكزي عليهم ...ولا صدقيهم خير ايلا مقدرتيش تخيطيهم
الكرتون نتاع الكونجيلاتور علاه ماترميهش
لوكان صورتي خير لاني شويه مفهمتش الكتابه من الاخير
ونتمنى يدخلو البنات يفيدوك
اي سؤال أنا في الخدمه

[بسمة امل الجزائر]

اختي خلينا وقت نشوفو كيفاه نقدرو نساعدو لاني قريت بالصح رايحا نتخيل ومن بعد نشوف كاشما ننصحك ربي يعينكم خواتاتي

[بسمة امل الجزائر]

نبادا بالحمام والمرحاض اكرمكم الله
شوفي قادرة تشري ريدو تاع بلاستيك الي يتباعو خصوصي بالدوش وتتقبلو عادي بالشنيور وترككبو وهكا رايحا تفصل المرحاض عن الحمام حتى ربي يفرج عليها تبني حيط وتقسم

القش القديم لازم تعمل ارادة قوووووووووووووية وتبدا تعمل في البساطات وهكا رايحا تتهنى منو والا كيما قالت الاخت تتصدق بلي يصلح والباقي ترميه

بالنسبة ليتاجار تاع البلاستيك انت الابن
انا تبانلي الخزانة تاع ست بيبان تكفبها هي وزوجها وتخصص رف للابن الصغير وتتخلص من الاكتظاظ مؤقتا
هنا رايحة نطرح سؤال هل ما بين الخزانة والحيط هل فيه مكان
باه نقدرو نتخلصو من الكنابي

ادا فيه مكان خرجي الكنابي من الغرفة واعملي بحالة حاجة ترفدي فوقها الكوفيرطات والبخاد وووووو
وتبقا غير المطارح والتابي فرشي فراش بحال شورة تاع الدار في الصباح عدلي وفي الليل فرشيهم ونامو
اذا عملتي الفراش كيما قتلك رايحين ننقلو طابلة الميكرو للغرفة الاولى باه نتخلصو كدلك من اكتظاظ الاشياء
او كدلك ممكن ننقل التلفاز في مكان جهاز الكمبيوتر

التسريحة ما عليهش يا اختي ادت ماكانش في مقدورك تشري اخرى حافظي عليها فارنيها بالفارني واتهلي نقيها وديكوريها ببساطة ورايحة تصير احلى

الهول ادا كبييييييييييير انقلي ليه كونجيلاتور احسن من كل وقت تطلعي وتهبطي
صحا نروحو للمطبخ
اول حاجة خاصة قماش اعمليه ريدو باه تغطكي كل المخلفات الوجودة
وتاني ادا ماكانش عندك البناي اتخلي من الفايونص ادا عندكم قراج ديريه فيه او شوفي بلاصة ما تبانش حطيه فيها هو وبيدون تاع معدات المطرقة وماشبه ذلك

على ما راني نشوف الصالون الكبير هل يجوك فيه الضياف ولالا
ادا لالا ديريه هو بيت الخزين ادا نعم لازم ترتيب

شوفي الكونجيلاتور طلعيه للهول الكنابي تاع البيب هبطيها مع الاخرى ودير قعدة شابة بطارحك
هذا ما قدرت نصلح شوفي ادا عجبك ورايحا نزيد نفكر اكثر

[أم شروفة]

نقلك .اول حاجة انا شفت2 نساء من اقارب زوجي سكنو في غرفة واحدة وعندهم 5 اولاد.وما زالهم عند عجوزتهم .وصدقيني كل ما تدخلي الى الغرفة وكانها غرفة عروس جديدة.......الحقيقة دارولي القلب باش نكون منظمة.. في البداية اصبغي الحيطان بلون فاتح .والابواب ..رايحة تتغير نفسيتك .ثم حاولي ابني بلاكار كبير.يكون حيط كامل ...وديرو باب نتاع الالمنيوم راه باب قدر الحيط يستقام حوالي 3 ملاين.متوفر بكل الالوان لكن الابيض هو الرخيص .وطريقة فتحو عملية جدا والتاجات تديريهم انتي ........ديري فيه كل شيئ ...حتى الماشينة لما تحتاجيها اجبديها بطابلتها.....روعة راح ينفعك .وتعلمي انك ترمي اي شيئ لا تحتاجينه .......الخزانة روحي فرغيها من القش باش ما تزيدش تكمل هههه وحطيه في البلاكار خلي غير قشك وقش زوجك .وابنك بمانه صغير قشو ما يطبقش اجمعيه في سلة بغطائها ...وروحي فرني الخزانة وحوليها الى غرفة نومك .مع السرير .ومش ضروري تكون كاين تسريحة ارمي المكسورة ومكياجك حطيه في مانيت وخبيه في الخزانة ...وغرفة نومك ولا احد تسمحيلو يدخلها دايما نظيفة ومبخرة ومغلوقة لما يجي زوجك خليه يدخلها يرتاح .اما غرفة الاطفال اللي فيها البلاكار اللي حكيتلك عليه ..ديري فيها كنابليات وكل طفل يرقد في كنابلي .والتلفاز ......الهول ديري فيه صالون كنابليات .ودايما نظيف لضيوف الغفلة .والمطبحخ من بعد ندخل نقلك على افكار

[sraya]

هذي دار يعني ارض مهيش بطيمة
تعاود تجيب ماصو و يريقللها الدار و من بعد نعاونوها بالش تتفرز
هكا راها عبارة عن مرمة (دار طور الانجاز )مهما نظمنا متتنظمش

[imanaz]

الله يحسن العون

[om zayd]

bon courage

[جيجلية]

لم استطع تخيلها

اهل مكة ادرى بشعابها

انت وحدك اللي قادرة ترتبيها شوفي اللي ما يصلحش طيشيه واللي يتخدم اخدميه

ربي يكون فالعون