مشكلة الماضي

[مشكلتي]

السلام عليكم
رح نحكيلكم حكيتي خاوتي و نتوما انصحوني ولا اهدروا معايا اي حاجة والله وح نهبل ( رجال ولا نسا محتاجة للطرفين ) ماتحكموش عليا برك ربي يجازيكم.
كان عندي 16 سنة طلعت لليسي و شفت عالم جديد حوايج ماكنتش شايفتهم ولا عارفتهم خاصة مواضيع البنات كنت لاعلاقة ماكنتش فاهمة اصلا العلاقة بينن الطفل و الطفلة نعرف جاري و زميلي و قريبي و خلاص .. المهم مع الوقت جاتني طفلة و كي شافتني نية لصقت فيا و حبت تديني لهاداك الطريق بشوي كانت ديما تحكيلي علا مغامراتها و حكاياتها كانوا البنات كامل يشوفوا فيها بلي بطلة ولا حاجة وانا حبيت نعاندها و نشوف وش راهي تحكي ..
حتان تعرفت بواحد زعما عجبتوا و هاكو عارفين كنت نحكي معاه في اليسي برك كنت نخاف يشوفني بابا البرا ولا .. وحد المرة قاتلي رايحين نتغداو مع بعض كل واحدة مع حنونها انا قلت لالا علا خاطر كنت نخاف بزاف بقاو يحاولوا فيا كامل كيعاد بقيت غير انا لي ماقبلتش مع اللخر قبلت و ياريتني ماقبلت ..
رحنا ربع بنات قعدنا في مجموعة الحكايات و الضحك .. مع اللخر الطفل هذا استغل الفرصة و قدملي وقبلني ..
روحت بكيت حتان راسي تفلق و ندمت ندمت بزاااااف علاه رحت و تبعتهم
فات شوي وقت الطفل هاذا حبست معاه و زعما هو قالي غلطت معاك سمحيلي بصح رح نصلح غلطتي و نجي نخطبك و زعما حلف و عاهدني و دار كلش بلي مش راح يآذيني ..
المهم انا كرهت كلش داك الوقت و ندمت علاه فت في هاد الطريق اصلا و عاهدت روحي مانعاودهاش طول ،،
اليوم 3 سنين عل الحكاية الحمد لله مازلت في الطريق الصحيح لتيت بقرايتي و ديني و درت تخصص طب و الحمد لله .. لكن والله رح نهبل من التخمام و الخوف و التوسويس خفت لا ترجعلي الحكاية في المستقبل خاصة مجتمعنا عاداتو و تقاليدوا كيفاه خفت لا الطفلة تفضحني و تمكر فيا ولا تحكي لكاش عبد خفت ميات نحاجة .. الطفل ساعات نشوفوا بصح لدوك ماشفت منو حتا سوء بالعكس يقادرني بصح والله ماعدت مدايرة لامان و خايفة من الزمان و غدوة
والله انا بعدت علا هاد الحوايج بش يسترني ربي و الحمد لله انا بطبيعتي ماكنت من هادوك البنات صح غلطت بصح والله راني متربية و بنت فاميليا كامل يشهدولي ..
نتوما قولولي رايكم بكل صراحة ماتجرحونيش برك والله اني نعاني ديرو رواحكم في بلاصتي و حاولوا تفهموني .. ادعولي برك ربي يسترني ربي يفرّج عليكم والله

[الحياة فرصة]

السلام عليكم اختي المهم تبتي لربي وهو الستير وات اجتمع الانس والجت على ات يضروك ما ضروك الا باذن خير اتوابين الخطاؤون الحمظ لله كي هداك لصواب وهو الي يرزقك حتى ووقف الف واحد ضدك الله يفتح عليك ويتملك بعقلك

[AMINA.Z]

مادامك تبتي لربي
ديري فيه ثقة بانو راح يسترك
ربي يفرج عليك تانيب الضمير صعب

[rose de sable s]

انسي موضوع لان حتي طفلة تخاف انك تكشفيها

[anissa90]

حكايتك راهي عبرة لكل شاب ليقول ندها 17 او 18سنة تكون جديدة بدون ماضي المهم الحمد لله لرجعتي لطريق صواب و توبتي هذه راهي تعتبرتجربة باش ثاني مرة متبعيش بنات مش ملاح

[yassmina93]

معليش اختي كنتي صغيرة و مراهقة و الحمد لله مكملتيش في الغلطة تاعك ماكانش واحد كامل ولا ما يغلطش المهم الانسان كي يعرف الخطا تاعو يتوقف و يتوب متقلقيش روحك ما يكون غير الخير

[غزة غزة]

ما تحكي قصتي حتى لواحد ونسايها ربي سترك ما تفضحيش روحك و صاحبتك لي خايفة منها كون كاش ماتهدر انفي كلش و عيشي حياتك

[بربرية و أفتخر]

و عليكم السلام و رحمة الله تعالی و بركاته
الحمد لله علی انك رجعتي للطريق
و اصلا هاذيك الفترة تاع اولی ثانوي كامل تعجبنا في هذا العالم الجديد
و من هذيك الفترة كل منا كون شخصيتو اللي راح تدوم معاه
اصلا نتي ما درتي والو
غلطة و ربي سترك و الحمد لله
كملي حياتك كلي ماصراتش
لانو ربي سترك و الحمد لله
ماكلاه تحكيها للناس راكي غير تزيدي عدد الناس اللي تخافي منهم
نتي تقدمتي في حياتك خليك من تخمام
هذا الشيطان يوسوسلك باه يقسدلك حياتك
الطفلة كان مازلتي علی علاقة بيها غير اجبدي روحك بالتي هي احسن
تحججي بالدراسة و عدم وجود وقت و اجبدي روحك بالشوية
و حتی كان تهدر مكانش اللي يصدقها لانك فتاة عاقلة و خاطيك و اهلك عارفينك الحمد لله
خليك من الماضي هذا
لان ربي سبحانو راهو يغفرلك اذا داومتي علی الاستغفار
ثبتك الله

[houssem zizou]

الحمد لله أنك تبتي و أرجوا أن تبتعدي عن رفقاء السوء نهائيا فالصاحب ساحب إما إلى الجنة و إما إلى النار
إعتزلي هؤلاء الناس و لا تخافي
(و اعلم أن الأمة لو اجتمعوا على أن ينفعوك بشيء لم ينفعوك إلا بشيء قد كتبه الله لك و لو اجتمعوا على أن يضروك بشيء لم يضروك إلا بشيء قد كتبه الله عليك)
فالناس لا يضرون و لا ينفعون إلا إذا قدر الله علينا شيء
و أنت الآن ما دام أنك تبت و ندمتي و عزمتي ألا ترجعي لذاك الذنب
إسألي الله أن يسترك و لا تخافي من أي أحد إلا من الله

أسأل الله أن يسترك فوق الأرض و تحت الأرض و يوم العرض
و أن يهديك و يثبتك على الإستقامة

[" أمة الله فاطمة "]

السلام عليكم

حبيبتي بما ان الله سترك وانتِ في تلك الحالة
فأكيد سيسترك وانتِ تائبة نادمة،
فلا تقلقي يا طيبة، واهتمي بدينك ودراستك، وتقربي الى الله وابتعدي ن رفيقات السوء

وفقكِ الله

[naamane3]

3 سنوات على الحادثة يعني قديمة جدا
وراكي اليوم في الجامعة
سترين اعجب مما رأيتي
لذا يجب عليك الحذر من ما هو قادم
اما ما مضي قاستغفري الله كلما تذكرته
واعلمي ان الله سترك في معصيتك
فكيف يفضحك وانت تائبة

[Zahra 30]

ربي يستر عليك اختي و أن شاء الله هذا السر يموت معاك و ربي يرزقك بالزوج الصالح لكن دروك تهلاي في قرايتك هي الصح و انسي الماضي و ضحكي

[yacino dz]

السلام عليكم


الحل هو في التوبة و الاعتصام بالله و هو سبحانه متكفل بحفظك و رعايتك و سترك

يجب ان تتيقني ان الله سترك عاصية فما بالك و انت تائبة

ما دمت في الطريق الصحيح فلا خوف على ما فات

و هذه من رحمة الله علينا

و الله اعلم

[القط الفضولي]

لا تدعي الناس يحكموا عليك من افعالك الماضية المهم ما انت عليه في الحاضر...اجعلي من ذاك الخوف دافعا نحو التعبد اكثر لله و طلب منه الغفران وحده الله من يفهمك و يسترك عزيزتي....لا تنسي عمر بن الخطاب رضي الله عنه كان عدوا ثم اسلم و اصبح خيرا و مبشرا بالجنة.

[أنامـل العفاف]

ربي يترك ختي .. والله كاين بنات مدايرين العجب نتي الحمد لله تبتي و فقتي و كون ماجيتيش بنت فاميليا اكي ما بعدتيش على هاد الطريق .. ربي يثبتك :mh31:

[blanche rose]

السلام عليكم
عزيزتي
لا أرى أي سبب لخوفك
أخطأت
و
تبت
لا تخافي من العباد بل من رب العباد
ذلك الشخص يحترمك
وسيظل يحترمك
أتعلمين لما؟؟
لأنك لم تتقبلي ذلك التصرف
لو كنت غير محترمة لواصلت خصوصا أنك كنت في سن خطيرة جدا..
لا تخافي
بل قوي ايمانك بالله عز وجل
ولا تظهري خوفك لصديقتك او لأي أحد..
فهم يرون أنك تلومينهم على خطئهم..
وبالتالي
الشاب يراك محترمة
والفتاة ترى أنها فشلت في الايقاع بك في الوحل

كوني فخورة بنفسك لأنك انقذت نفسك وانسحبت
وصدقيني قلبك الطيب الصادق هو من جعل الله عز وجل يعطيك البصيرة والحكمة لتتراجعي..

تقربي لله عز وجل فقط
ربي يسعدك

[رجل من هذا الزمان]

ماض و انتهى ....فلا داعي للنبش فيه ولتكن لك عبرة مرة اخرى

[ahlem 05]

اختي المهم انتي تبتي وابتعدتي عن هذا الطرييق وتاكدي بلي ربي يسترك دام تبتي وعرفتي خطأك انساي الموضووووع وكلمي واستمتعي بحياتك

[نورالهدى بيولوجيست]

و انت الان في مرحلة صعبة و هي الجامعة انا متأكدة انك لن تخطئي من جديد

و ذلك اعتمادا على لهجتك و صحوة ضميرك

احيانا مناخطأ احسن ممن لم يخطئ بعد لانه سيكون اقوى و اقرب الى مولاه

ربي يستر عليك حنونتي خليك من الوسواس اتكلي على ربي سبحانو و هو يقويك و يسترك دائما

برك تهلاي في روحك

[.kiki]

السلام عليكم و رحمة الله
الماضي راح فالماضي، عليك بالتوبة النصوح أختي و الابتعاد عن طريق مثل هؤلاء..
و أبشرك بأن الله تواب رحيم، يقبل توبة عباده
ادعيه بيقين ان يتمّ عليك ستره.. و هو تعالى المجيب الكريم

ربي يسترك و يحفظك و يوفقك لكل خير

[kokiimed]

الشي لسرالك راهو حاجة مليحة لأن من هده الحكاية رك تعلمت حوايج بزاف ربما كن سراتلك الأن كنت تكملي و تفسد و لكن الحمد لله سراتلك و نت صغيرة كنت مازالت فيك النية الصافية و ديريش على الناس نت علابالك ب قيمتك و علبالك ب تربيتة
صدفة أنا أيصا طالب طب و مررت بتجرية مماثلة