هل على الزوجة قبول ذلك ؟

[مشكلتي]

السلام عليكم و رحمة الله :

إخوتي الأفاضل أود طرح سؤال ، لماذا يفرض الزوج و عائلته إسكان إحدى أخوات الزوج مع الزوجة في مسكنهم المنفصل ( شقة) ، رغم ان لأخوات الزوج أب و أم حيين و بيت يأويهن و إخوة ذكور آخرين متزوجين ، و لكن لما إجبار مشاركة إحدى أخوات الزوج السكن مع الأخ صاحب الراتب الجيد و زوجته ، و هل عليها قبول ذلك ؟...

[خولة سكيكدة]

هو حسب السبب لو لم يكن للأخت أب وأم رح يكون أخوها مسؤول عليها والزوجة رح تكون مرغمة تقبل لأنو مستحيل يرمي أختو للشارع لكن مدام والديها حيين وعندهم اسرة من حق الزوجة تكوين عائلتها الخاصة أيضا وإدا كانو غير مقتدرين ماليا لا ضرر من أنو يعاون والديه ويصرف على اخوته هكذا يقعدو مع والديهم والله أعلم لأنو تفاصيل كثيرة مفقودة

[أنيس خير جليس]

لا ليس عليها قبول ذلك من حقها الرفض

[الصديق قروف]

على حسب اضروف و ربما هناك حلول اخرا

[ibtihal18]

انا عمري ما سمعت هذي .................ماهو فرض ..ما هم سنة ..................ما فهمتش الناس علاه يحبو يلصقو كي اللصقة

[سفير الأيام]

في حال الزوجة تكون جديدة وبيت منفصل من الطبيعي ما تبقاش لوحدها بينما الزوج يعمل قد يحدث شيء لسمح الله فمن سيتصرف

ثاني شيء

قد تلفق اقاويل في الزوجة وفي حالة وجود اخته معها فهي خير شاهد على نظافتها وبرائتها

[habibamarthamid]

نفس الشيء حصل مع أختي عند زواجها سكنت أخت زوجها الكبرى معها بحجة ان أختي صغيرة و طبعا لديها عائلة و تعمل و عندها الدراهم ربي يبارك والديها أيضا مقتدرين ماليا بزاف المهم أختي شافت الويل معاها بصراحة هوما واعرين ما بغاوش أختي لأنها ليست شاوية بعد مدة زوج أختي هو لي حاوزها لأنو مابغاش يتحمل المسؤولية على خاطر تزغد بزاف رجعت لدار باباها بصح ما عتقوش أختي إلى يومنا هذا حتى الذهب كي يجيو للدار سيرقوهولها المهم أختي تعاني صح لوكان نحكي واش صرالها ما نكملش ربي يجيب الخير

[Kawthar77]

اختي اجد انه عادي تعيش معك اخت زوجك وخاصة ان كان زوجك مغترب او يعمل في الصحراء وادا كانت صغيرة او كبيرة مصيرها الزواج وابتعاد عنك وخلي قلبك كبير لان نحن في زمان صعب وصاحبيها وعامليها كيما اختك والله المستعان

[ManouraHilwa]

معليش اتحمليها وعامليها احسن معاملة وان شاء الله تتزوج وتروح اخت زوجها تعيش معاها

[FATIHA131]

ما فيها والو يا اختي كبري قلبك و وسعي خاطرك و عامليها كاخت لك
الله يفرحك ان شاء الله

[ahmed 31]

اختي اجد انه عادي تعيش معك اخت زوجك وخاصة ان كان زوجك مغترب او يعمل في الصحراء وادا كانت صغيرة او كبيرة مصيرها الزواج وابتعاد عنك وخلي قلبك كبير لان نحن في زمان صعب وصاحبيها وعامليها كيما اختك والله المستعان

جزاك الله كل خير،
الله يرحم من رباك.
سلام.

[ahmed 31]

و لو أختك جاءت لتعيش معك فهل كنت ستضعين نفس الموضوع في مشكلتي ؟؟؟؟؟؟
يا أختي ماكانش لي تهون عليه أخته أو بنته و يرميها لعند إمرأة أخرى حتى وهذا بيت أخوهاأو إبنها، ولكن على الأغلب يوجد هناك سبب باش تجي تعيش معك،
صفوا نياتكم تعيشوا هانيين.
سلام.

[الوردالجوري]

ان لم يكن هناگ سببا وجيها فليس عليها لزاما ان تقبل من ناحية الڜرع فذاك تخلف من ناحية اهل الزوج .والزوجة لا اظن انها تقبل متل هذا ولو كانت اختها.ولكن ان لزم عليك الامر فحاولي التعايش معها ولا تجعلي من ذلك نكدا في حياتك وتفسدي لا سمح الله استقرارك مع زوجك وضعي نصب عينيك وجه الله (والكاظمين الغيظ والعافين عن الناس والله يحب المحسنين):19::19:

[couscousa]

نقولك حاجة منلفو مندورو تسكن معاك ومهما تتفاهمو رايحين تختلفو أخك و تختلف معاها وين عاد أخت راجلك بصح أنتو أختك متتفاوتوش تولو لك و تولي ليها بصح أخت راجلك لالا نصيحة نمدهالك خطيك من المداصره الزيادة أسكني وحدك تربحي ناسك يجو عندك رحبي بيهم أضحكي معاهم بصح تسكني معاهم لا رايحة تراقبك وتخرج أسرار دارك مانيش نقلك عاديهم لا لكن تسكن معاك وعندها والديها قادرين لا تجي يمات صح لكن تقعد لا

[KARIO]

بدون مثاليات و من الاخير اسكني وحدك، 100% تجيك المشاكل لوكان تسكن معاك، مفهمتش علاش الناس تحب تفرض روحها بالسيف

[halouma tita]

شيء غرييب جدا علاه مستكثرين عليهم زوجين يعيشو مع بعضاهم يجيب اختو تعيش معاه باغيين مشاكل وهو علاش دار دا وحدو (بش يعيش حياتو مع زوجتو بدون مشاكل ) ...........
و مش مفروض على الزوجة انها تقبل تسكن أخت زوجها معاها وخاصة انو والديها حييين
والله أنه شيء غريب الولدين هنا علاش ما يدخلوش كفاه بنتهم يخلوها تعيش مع مرت ابنهم وين رايحين بهد الأفكار ؟؟؟؟؟؟؟؟ الله يهديكم

[محمد جديدي التبسي]

القرار للزوج ولا قرار للزوجة في الموضوع خاصة اذا كانت الأسباب موضوعية وكانت هذه الأخت مقربة من أخيها ولديها مشاكل مع العائلة او ما شابه ومادام أخوها لاباس بيه ماديا فأظن هذا السبب كافي لعدم سكنها مع غيره. ماديريش مشكل من والو وتقبلي الأمر ظروف وتفوت.

[شيماء32]

سلام
ياختي ممكن زوجك مش حاب يخليك وحدك يقولك نجيب اختي على الاقل توالفي شوي ومن بعد تروح ممكن راكي نتي بعيدة على المنطقة وجات ختو باه تنعتلك كيفاه تتعاملي مع الجيراان هوما ادرى بيهم وكيما قالك الاخ كان جات اختك كان عجبك الحال المهم نتي عامليها معاملة حسنة ومتبينيلهاش بلي راكي مش حابتها تجي توالكم والمشاكل فيها فيها المهم متخرجيش العيب من فمك كون تقوليلهم منقبلش تجي توالي يعودو يكرهوك وحتى ومن بعد ياولوكان تفرشيلهم الذهب ميحبوكش وترجعو في مشاكل كبار (لانو الناس تحكم عليك من الاول )

[ouardah]

لوكان جات اختك انت راكي ما طرحتيش هذا السؤال راكي فرحانة بها وغير وش تطلب

[أم أماني أريج]

شوفي أختي انت ما حكيتيش بزاف تفاصيل في طرحك يعني هل هاذي لوستك ماهيش متفاهمة مع والديها و الا كاش واحد من اخوتها باش جات تسكن معاكم ؟ و إلى متى رايحة تبقى تسكن معاكم ؟ هل هو ظرف مؤقت أم حالة دائمة ؟...........إذا كان الجواب أنها متفاهمة مع دارهم وأبوها قايم على شؤونها و الحمد لله هنا نقولك أختي بدون مثاليات زائدة عندك كل الحق أنك ترفضي هذا الوضع و عندك حق أنك تاخذي استقلاليتك في بيتك .....يعني الدين أمر الزوجة بالتزين للزوج و التفنن في طرق استقباله و معاملته فكيف يكون ذلك أمام مرأى أخت الزوج و ديننا وضع حدود للبس المرأة أمام المرأة ؟ .........لا ننكر أنه إذا تعذر ايجاد سكن خاص للزوجين و اضطرا إلى السكن مع أهل الزوج عليهما التعايش مع الوضع لكن إذا الله أنعم عليهما بسكن خاص فلما التضييق على النفس؟........
و لي راهم يقولوا لوكان جات أختك لوكان راكي تفرحي نقوللهم ما نظنش كاين امرأة ذكية تقبل أن تعيش أختها معها على الدوام في بيتها مع زوجها ..........
أنت حاولي تقنعي زوجك بأن سكن أخته معكما رايح يقلل من حريتكم لكن بطريقة سلسة و ذكية بدون التجريح في أخته ......
و ربي يوفقك ......