مصدومة

[مشكلتي]

السلام عليكم انا شابة عمري 26سنة متخلقة ومتربية على قدر من جمال المهم مشكلتي اسبوع جايا رايحين

يجونا خطاب رايحين شوفوني راني مصدومة من مفروض طفلة كي تخطب تكون فرحانة انا حسيت ضاقت بيا دنيا كي

شوفت زهري مسوس انا صدمت كل هذي سنوات وانا نتمنى يجين واحد مليح خدام عند دولة وعندوا سكنة حلمت كيما

تحلم بنات حسيت روحي في داخل في الحيط علاش زهري مش كيما بنات عمي رغم لا جمال لا محزنزن الله يبارك مزوجين

بخيار رجال فوق هذي كامل شرطوا كي ملكات انا مانيش حسدتهم ولكن غضتني عمري كي جاني واحد من القرية لا

مستوى دراسي ولا حاجة يخدم خماس عايلتهم كبيرة بزاف يعني رايحة نعجن ونطيب 20 خبزة في نهار ،راها قلبي

معمر قريب نموت من القهر والذل والله ما نستاهل واحد كيما هذا الله غالب هذا زهري قولولي واش ندير نبطل خايفة كي

نبطل ما يجيش حتى واحد يخطبني راني مانيش صغيرة ادعولي ربي يرزقني ربي بالزوج صالح

[مياسم الصمت]

السلام عليكم ورحمة الله وبركاته

شوفي اختي ما ترغمي روحك على حاجة حاسة روحك انك مرغمة عليها

وكأنك مكرهة
ذاك الشعور سيتحول مع الوقت الى ندم ان غابت عنه القناعة والرضى
تبطلي اليوم احسن ما ترجعي غدوة

وانت ما اطلعت على الغيب حتى تحكمي على ما قدره الله لك
لا تكوني تشاؤمية لهذه الدرجة
ربي يجيب الخير

[الوجہ البَشوش]

يآآ أخت ربي يهديك 26 سنه و تريدين ارغام نفسك على الزواج لما ؟؟؟ لازلت في العشرينات يا اختي ..
من الاحسن ان تفكري جيدا مرارا و تكرارا الآن وقبل فوات الأوان
فالشعور بالندم و الحسرة فيا بعد و طوال حياتك أصعب بكثير من خوفك انه آخر فراصه للزواج (فما أدراك أنت بالمستقبل !! )

أنصحك بالإستخارة و الدعاء
المهم لا تتسرعـــــي

[hodayena]

بصح يا اختي بلعقل عليك لاه راكي طالعة عقبة انتي ادا راكي تشوفي بلي مش مناسب ليك متقبليش وارفضي بلباقة بلا متجرحي الشخص
مفهمتش واش معنتها خماس
وانتي 26 علاه راكي طالعة عقبة بنات هنا في المنتدى تزوجو 31 و32وحتى كاين لي وصلو للربعين هادي مكاتيب اختي
انا اختي في عمرها 27 ورفضت بزاف خطابا قالت منتزوجش باه نرضي الناس والصابر ينال وقادر هاد الخماس يبني روحو بروحو ادا كان قوي الشخصية
صلي وتوكي على الله

[عفاف المنتدى]

يا اختي الا قارنتي نفسك بالناس عمرك ما تنجحي في حيانك هذا قرار زواج من حقك القبول أو الرفض فلا داعي للحسد اسفة على هذه الكلمة ...،،، استخيري الله واذا كنت شايفة نفسك متفدريش تعيشي في وضع معين فلا داعي للقبول مو الأساس والزواج مكاتيب راكي تقولي 26 سنة يسمى لي كبيرة ترمي روحها وخلاص ناس بكري يقولو قعاد بيت لبي ولا زواج لفضايح ونزيد نقلك بلي نعرف بنات تزوجو من فقراء وفتح ربي عليهم وليوم الحمد لله

انا 27 سنة و تفدم لخطبي شخص صليت الاستخارة رفضه لأني رأيت منام لم ارتح له ونتي راكي مصدومة ههههه بشويا برك

[seridz]

و علاه راكي تمرضي في روحك الزواج ماشي بالسيف معجبكش نورمال قولي معجبنيش لكن اذا كان سيد متربي و متخلق انتي الخاسرة لانو امور الدنيا تروح و تجي و لكن الاخلاق الناس راها دبر عليه للدوا و مصابتهاش احتي ارفضي الا معجبكش و انتهى الامر

[بشـرى]

اختي انا اولا معجبتنيش الطريقة اللي حكيتي بيها على الرجل ، هو معندو حتى ذنب باه تتذمري كي تقدملك، عجبك اللهم بارك معجبكش ارفضي بكل بساطة ،لكن باه تعيبي فيه مجاياش،
ثانيا اذا بقيتي تقارني روحك بالناس رح تعيشي ديما بعقدة النقص، لازمك تكوني قنوعة باه تعيشي، والشي لي اعطاك ربي احمديه .
هذي ماش حاجة تمرضي روحك على جالها ، و ٢٦ سنة مكيش كبيرة باه تخممي التخمام هذا كاين بنات رح يقفلو ٣٠ وقانعات وعايشين لاباس بيهم .

[طيور الجنان]

ياختي الزواج عمرو ماكان بالسيف راكي مازلت صغيرة ٢٦ سنة،خمي مليح قبل ماتقبلي لانك رايحة تعيشي معاه ماشي رايحة ضيفة و تبطلي درك خير من جي مطلقة الله لايقدر اعذريني اختي بصح انا نهدرلك الصح و استخيري ربي يكون الخير وهذا ماشي اول و لا اخر خاطب راح يجيك.

[ibtihal18]

قلبك دليلك اختي ..........اذا ماراكيش مرتاحة و خايفة من الافضل ان تتوقفي هنا ولا تتعبي الناس في المجيء الى بيتكم
الزواج مكاتيب .......كثير من اقاربي فوق 35 مش متزوجين حامدين ربي و راضيين و قانعين و الحمد لله ................اللي مكتبهولك ربي تديه

[hiso4a]

الحل باين مكش حابة تتزوجي منو متتزوجيش بصح اذا فاتك القطار متندميش

[زهرة الحديقة]

اختي انا لاانصحكي به اد ا كنتي لا تريدين
وصلي صلاة استخارة ..ً.ً....موفقة

[om rym]

السلام عليكم
استخيري اختي مكاش احسن من الاستخارة في الزواج بالاك يلقي خدمة ويدير الدار وتعيشي هانية وبالاك تديه عندو كلش ويكرهلك حياتك.
ويلا على المستوى الدراسى ما هوش مقياس المهم كيفاش يفكر ياما متعلمين واصحاب ديبلومات وهما متقدريش تحكي معاهم ولا تحاوريهم.
ربي يقدرلك ليى فيه الخير.

[ahmed 31]

عليك بالإستخارة أختي، و لا تقارني نفسك بالأخريات، و إلا ماكانش لي رايح يعمرلك عينيك، كاين حتى قائد الطائرة و رائد الفضاء و و و ، يعني تدي غي مكتوبك،
و هذا كذلك رجل،
إذا كنت غير راضية فهذا من حقك أن ترفضي و لكن إن أردت العيش في سعادة و هناء لا تقارني نفسك بغيرك،
اللي يوفقك و ينور دربك.

[AMINA.Z]

لست راضية عنه و لست سعيدة
ارفضي هذا الزواج
نقطة انتهى

[اسعى لرضى الله]

السلام عليكم

اختي بغيت نقولك حاجة نتمنى توصلك وتفهميها مليح ومن واجبي ننصحك لانك اختي في الاسلام

اول حاجة متقارنيش نفسك بالعباد الرسول صل الله عليه وسلم قال "انظروا إلى من هو أسفل منكم. ولا تنظروا إلى من هو فوقكم؛ فهو أجدر أن لا تَزْدروا نعمة الله عليكم

كل واحد وش عطاه ربي هدي من جيهة

انتي قلتي بلي هدا اللي خطبك يعني معندوش مستوى دراسي ووو مي بالاك متربي وليد فاميليا بالاك عقليتو خير من اللي قرا ويخدم معلاباليش متحكميش على المظهر اختي ولا على اساس الخدمة ولا المستوى الدراسي راهم كاين اشخاص قراو ويخدمو خدمات ماشاء الله مي تحكي معاهم يبانو لا علاقة وكاين ناس مقراتش ومشافاتش مي عقلو يوزن بلاد

والزواج يا اختي مش مظاهر الزواج راهو عشرة عمر يعني لازم تخيري الانسان اللي تضمني راح ييكون معاك سند ليك في السراء والضراء لانو الراجل نهار يتزوج او مش راح يعاملك على اساس شهادتو او مستواه الاجتماعي كي تعيشي معاه في فرد دار راح يروحو هدو كامل يبقا الجوهر تاعو

يمالا حوسي سع على الجوهر اختي ومتغتريش بنت فلان ولا فلتان

راهم داوهم مساكن زوالية مي فرج ربي عليهم ورجعو خير من الف واحد وواحد

والقرار في الاخير يريح ليك + مازالكي صغيرة قلتي راني كبيرة , لالا اختي اكي في 26 سنة وش كبرك الناس اي وصلت 30 باش تزوجت

والله يرزقنا كامل بولاد الحلال والسلام

[rose de sable s]

لا تعريفنه و دير في حسابات اخري
انت تريدين ماديات لا استقرار
ممكن هو انسان محترم و طيب استخيري الله

[baalache]

اتقي الله اختي الله هو من يرزق هاكي تزوجتيه مرفه وفقر تروحي وتخليه؟ عسى ان تكرهو شيئ ويجعل الله فيه خيرا كثيرا

[CHEERS]

الله يجعلك لي فيه الخيير

صلي صلاة الاستخارة

وادا ما كنتيش راضية ارفضي عادي مزالك صغيرة الله يبارك

[أنيس خير جليس]

قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره.



من المفروض هذا هو المقياس الحقيقي للقبول والرفض لا العمل عند الدولة وقلة أفراد الأسرة .

[ام سارة18]

سلام اختي انا نقولك رايي الا راكي غير مقتنعة به او بحالته المادية فلا داعي للقبول بداعي السن وكلام الناس فمهما فعلتي كلام الناس ديما فيها اقول لك عن تجربة لصديقة لي تزوجت وهي غير مقتنعة لا بشكله ولا بحالته المادية وحتى الان لم تستقر نفسيا وهاذا ينجم عن مشاكل بالطبع
اختي نحن نقدم لك مجرد اراء وانت تعرفين الجواب بداخلك وكيما يقولوا كلشي بالمكتوب وعليك ان تتقبلي اي اختيار اخترته

[yassmina93]

اولا اختي العزيزة عمرك ولا تقارني روحك بالاخرين في اي حاجة لانو كل واحد و ربي واش يعطيه و كي تبقاي تقارني بلا ما تحسي تولي حسد و عدم رضا بما اعطاك الله بالعكس دايما تفائلي و بالنسبة لهدا الزواج مكانش اللي راه مسيف عليك خمي مليح و خودي وقتك هادي حياتك و انتي تعرفي بصح تخمامك يكون بطريقة عقلانية بلا ما تقارني روحك ببالاخرين واش عندهم و بلا ما تتكبري على الناس و ربي يوفقك