شكرا يا قضاة قسم مشكلتي

[مشكلتي]

شكرا جزيلا انا صاحبة موضوع اصدقاء زوجي

اصدقاء زوجي اللي دافعتو عليهم وبهدلتوني

هل يعقل انه الزوج زوجته حامل على وشك ولادة يخليها وحدها في الدار ويروح يسهر معا شلة .. اللي دايرين بيه ؟
وكي تقولولي هكدا الرجل الزواج مسؤولية وانا في رقبته متزوجتش وخليت اهلي ومعارفي وكل شيء باش يحطني بين ربع حيطان اللي حاب يبقى مع اصحابه يبقى عازب الزواج ماهوش تاع لهو مع الاصدقاء اللي يقوله الراجل هكدا

اصحابه ضحكتوني عن اي صدقاء تتحدثون نهار طاحت قريب حدثله افلاس شكون اللي لقا لقا والديه ولقاني انا اللي بعت ذهبي اصحابه شلة الرخاس كل واحد دارله سبة وهوما عازبين معندهم حتى مسؤولية محبوش يعاونون حتى بالسلف

اصحابه اللي عاون زوج منهم يخدموا معاه عادوا يلعبوله بخبزته خاطر لقاوه نية وراجلي صح نية دار فيهم ثقة يخدمولوا في الحانوت في الويك اند عادوا يروحوا ويغلقوه

وشمن صحاب غيارين الغيرة ماهيش بين النسا برك هادوا غيارين حاسدين حابين يفسدوه ويخربوله داره
مقلتش ميخرج ما يتنفس الشيء اذا زاد واحد ميقبله

امه سخفت تروح للحمام ميديهاش ويدي صحابه يحوسوا ؟ خلينا من انا وامه ؟

لجميع اللي هدر معايا بكلام عاطل الله حسبي الله ونعم الوكيل

[مياسم الصمت]

السلام عليكم ورحمة الله وبركاته

الأخت الكريمة هداك الله وإيانا
انا لن أبرر للاعضاء اساءتهم
لكن فقط اقول لك قارئ مشلكتك السابقة لم يكن على المام بتفاصيل الاحداث
لذلك كل يحكم حسب قناعته
بالمقابل ان كانت الردود مسئية فوجب عليك التبليغ ونحن نتدخل ان شاء الله

يسّر الله احوالك ونسأله سبحانه ان يؤلف بين قلبيكما ان شاء الله

[- بصمة خير -]

مش عارفة واش متوقعة يقولولك
ماقريتش الردود لكن من ردك في هذا الموضوع
فهمت نوع الردود في الموضوع السابق
تحوسي يقولولك اطلقي
اه مش راجل مش قايم بك و بيماه؟
اه راكي مظلومة باش تحسي روحك مسكينة
ما يعرفش المسؤولية
ما يستهلكش
اطلقي منو خير
هكذا تحوسي يجاوبوك؟؟؟
باش ترتاحي؟؟؟
راجلك يدير هكذا ممكن خايف يقولوا عليه مرتو متحكمة فيك من بعد يمسخروا به و هذه الراجل ما يحملهاش
و نعرف بزاااااااااااااااااااااااااااااااااااااااااااااف بعد الزواج يديروا كما راجل خايفين يقولوا عليهم متحكمة فيهم مرتهم
الغلطة وين راهي
ان راجلك يبدل صحابو او مايبقاش ما صحابو القدم الوقت كامل
يدير صحاب متزوجين
الغلطة الثانية
اذا جربتي تبعدي راجلك على صحابوا راكي رايحة تخسريه للابد صدقيني
الراجل و المرا مش كيفكيف في طريقة التفكير
عندو صحابو ديري صحاباتك جدد و عيشي حياتك
كما يشوفك مع حياتك الجديدة ثم يفطن لروحوا
ما تلصقيش غير في راجلك

بصح اذا واحد يحط موضوع و الناس تجاوب باش تعاون و من بعد واحد يقول
حسبي الله و نعم الوكيل
من الاحسن يتسكر القسم
ماكنش الرأي و الرأي الاخر
يا معايا يا ماكنش
حتى انا حطيت مواضيع هنا و كانت كاينة ردود غير بكيت صح
لكن هما مش عارفين القصة كامل و مش عايشين في بلاصتي باش يفهموني
لكن اعتقد اللي يجاوب هنا نيتوا سليمة 100 في 100
ربي يفرج عليك و يسهل زيادتك
و ادعيلنا
و ماتزعفيش راكي في فترة الحمل و اعتقد فكرة على الزواج مانقيتهاش في الواقع
و هذا هو الزواج
ربي يسخرلك زوجك

[~رآقية بأخلآقي~]

لا حول ولا قوة الا بالله

هناك فعلا بعض الأعضاء لا يقدرون المشكلة ويتعاملون معها بسطحية كبيرة

وهم لا يدركون بأن من وضع مشكلته في القسم حتما هي "مشكلة" بالنسبة لهم..

لا عليكِ أختي..

اصبري وربي يفرج عليك يارب..

[نسمات البحر]

يا اختي العزيزة مرات الواحد يدير مشكلتو هنا تعود ردود الاعضاء هي المشكلة في حد ذاتها زيدي حتى انهم مايقراوش المشكلة مليح طووول يدخلوا عليها قوش دوروات

[kika85]

ربي يهدي سركم انتي وزوجك ...ويثبت حملك وانشا الله هاد البيبي يكون سبب باش تتقربو من بعض وتتبدل حياتكم للاحسن...

[سمير78]

المشاكل لا تنتهي

[الصديق قروف]

ربما لم تحكي قصتك جيدا
وحالتك واحد لايحس بيها كيم انتي
‏ اعرفي كيفاش تكسبيه وراجل ميشتيش تفرضي عليه بسيف
حذاري ليعود يتعاطى المخضيراة

[محمد جديدي التبسي]

أظن أن للزوجة طرقها الخاصه لجذب زوجها ولابد أن هناك تقصير منك وهذا لا يعفي زوجك من المسؤولية والتقصير لكن هذه طبيعة الكثير من الرجال الذي يتمتعون بحس فكاهي ويحبون اللمات والدردشات واذا طغت هذه العقلية وما يرافقها من اهمال لبيت الزوجية فهذا يدل على زوج مراهق تافه في التفكير الريح اللي تجي تديه أتمنى أن لا يكون زوجك من هذا النوع
انت ابحثي عن أشياء تشغلين بها وقتك تعلمي حرفة اقرئي كتب كوني صدقات احفظي قرآن واكثري من الدعاء بالهداية لزوجك واستغلي اوقات هدوئه في نصحه وتوجيهه بطريقة محببة لا بطريقة املاءات أو اشعاره بانه جاهل وانت متعلمة او انك اكثر منه خبره في الحياه والله المستعان
ربي يهدي زوجك ويحفظه لك

[قدوتي رسولي]

سلام]~~
لاداعي لازعاج نفسك اختي العزيزة خاصة وانك على ابواب الزيادة ربي يسلك وحلك على خير
المفروض اسلوب الاعضاء في الرد يتحسن احيانا صح نلاحظ انهم يقحمو رواحهم في المشكلة من غير مايحلوها فيردون بطريقة فظة ولكن ليس الجميع اختي
قدمي قليلا من الاعذار
خاصة وانك لم تحكي قصتك بالتفصيل اغلب الاحداث لم تذكريها
موفقة

[samy algerien]

يا اخت فاقد الشيئ لا يعطيه. يوجد أعضاء صالحين وأعضاء طالحين .
أما على مشكلتك فحاولي مصارحته والظغط عليه.