فهموني في تقاليد الزواج لبنات الشرق الجزائري ؟؟؟

[السي محمد]

السلام عليكم و رحمة الله و بركاته

سمعت ان البنت لما تتزوج تشري الالات الالكترومنزلية ثلاجة و تلفاز و طباخة وووو و تجيبها معاها في الجهاز

كاينة منها؟؟؟؟

و المقياس و الخواتم و الثلاثين مليون؟؟؟؟

والمقياس قالولي فيه على الاقل ستين مليون ذهب؟؟؟؟

و إذا كاين امووور اخرى اخبروني

فهموني يرحم والديكم

واللي يسكن في الطارف يتصل بيا على الخاص من فضلكم

[سجل أنا جزائري]

كل عائلة و كيفاش

لكن الغالبية مرأة تشري فقط الفراشات و مطارح و ممكن صالو اذا كانت قادرة هذا ما كان

[mariana1]

بنات الشرق يشريو الادوات الكهرومنزلية ؟ ومقياس ب60 مليون ؟ بزاف هذا
طبعا كل منطقة تختلف عن الاخرى حتى في الشرق لكن العروس تدي معاها الغطاء وزربية وإذا كانت قادرة تزيد صالون لكن الادوات الكهرومنزلية فلا
و المقياس و الخواتم و الثلاثين مليون؟؟؟؟ ما كانش منها
فهمنا مديتو بنتكم للشرق ؟ ولا رايحين تجيبو طفلة من الشرق؟

[ام مصعب111]

نحن لدينا نفس ما ذكرت المهور عندنا غالية بزااااف والله المستعان لازم المقياس و3 خواتم وحدة للشوفة والاخرى للحنة والاخرى يوم العقد
والعروس صح مهرها غالي لكن تخرج ضعف المهركاين الي تديثلاجة وفرن والات بزاف للمطبخ واثاث مختلف بحيث الزوج يجهز الا غرفة النوم
وهي تخرج الصالون ومابل ومائدة و6 مطارح صوف و 12 مخدة واكثرو يساطات الصوف واغطية مثى 5 كوفرطات و 4 كوات و وفراشات بزاف واواني المهم حسب قدرتها تختلف من عائلة لعائلة طبعا كل هذه الامور ليست من الشرع في شيئ لكن عادات مفروضة علينا والله المسيتعان
وليس في كل الشرق حتى في المدينة الواحدة تختلف مثلا شروط اهلي ليس مثل شروط جيراننا او نفس سكان الحي

وحتى لو تقدم للبنت واحد من غيرالمدينة يعني من مدينة خلاف البنت ما عندهاش حق تتكلم في امور المهر الرجال هم الي يشرطو وفعلا فيه الي شاف بلي غلاء بزاف مثلا في مدينته المهر مليون وعلى الاكثر 3 ملاين
ولما يجي عندنا يكون المهر وابايح 10 ملاين والكسوة والملاك 10 ملاين يعني 20 مليون مع مقياساقل سوم 30 مليون مع 3. خواتم راح يشوف بلي بزااف لكن يوم العرس يشوف واش طلع لعروسة يعني تعمر ليه الدار من كل شيئ المطبخ والصالون تخرج كل شيئ و ضعف المهر اللي مده لها وملاحظة عندنا الي تشرط مقياس
لازم تخرج محزمة ذهب ومشبكة ( اتكلم على عادات اهلي فقط ) لما الاب يقول مقياس راح عارف روحه بلي يقدر يخرج لها محزمة او لا واذا ماشي قادر على المشبكة يعني يدير ليها غير الفم فقط هنا يشرطو 4 مسايس

وحتى لو البنت ترفض ذاك ىالغلاء في المهر ومثلا تشرط حفظ قران .... الاهل لا يوافقون مازالو بعادات بكري

[sabrine82]

كل منطقة و كيفاه او بالاحرى كل عائلة و كيفاه كاين لتدي لفراش و ممكن صالون و الان ولت ظاهرة المواعين تلقاهم يدو كل مستلزمات المطبخ خاصة اذا كانت راح تسكن وحدها بالنسبة للالات الكهرومنزلية كل وحدة وظروفها و مقدورها الان حتى الهدايا التي تقدم لها تكون من هذا النوع كالغسالة و الميكروند و غيره

[انغام المنى]

يا اخي خطبت من الطارف يعني تشري 3 قناطر صوف وتغسلهم وتدهملها وتجبلها مقياس ابسط واحد 30 مليون و3 خواتم واحد تاع الشوفة وتاع الخطبة وتاع العقد والشرط 17 مليون
بصح التلاجة والتلفاز والغسالة ماشي شرط الا اذا قجدرت انا ولد خالتي خطبب من الطارف وهذي كانت شروطهم

[أثيلة]

ماكانش منها نو اربع مطارح تاع الصوف و زوج كانابي فوطاي و الذهب على الاكثر خمسة وعشريت مليون تشري بيه كلشي و خلاص
والاثاث تاع المطبخ كاين حالات خاصة لما يكونو عايلتها عندهم دراهم يجيبهملها كادو

[سائلة عفو ربها]

نحن لدينا نفس ما ذكرت المهور عندنا غالية بزااااف والله المستعان لازم المقياس أو مسايس و3 خواتم وحدة للشوفة والاخرى للحنة والاخرى يوم العقد
والعروس صح مهرها غالي لكن تخرج ضعف المهركاين الي تدي ثلاجة وفرن والات بزاف للمطبخ واثاث مختلف بحيث الزوج يجهز الا غرفة النوم
وهي تخرج الصالون ومابل ومائدة ومطارح صوف وبونج و بساطات الصوف واغطية وفراشات بزاف واواني المهم حسب قدرتها تختلف من عائلة لعائلة طبعا كل هذه الامور ليست من الشرع في شيئ لكن عادات مفروضة علينا والله المستعان


هذا مشترك في ولايات الشرق كلها ومن قال أنها تختلف فلربما في بعض القرى النائية فقط ...أما الأغلب هذا هو ....خاصة من كان على قد حالوا يطلع فالمهر باه يشور بيه الطفلة يقول منخليش بنتي تخرج بأقل من نتاجاتها....ربي يهدي الجميع ويرزق عبادو الهناء...ويكمل بالصلاح لكل من أراد بناء بيت في الحلال..

[أم أماني أريج]

و يقولوا وعلاش العنوسة راهي في تزايد مستمر .......أكيد قليل لي يقدر على هذي المهور ........
الحمد لله حنا عندنا مازال شوية كاينة الرحمة في المهور يعني كاين لي يشرطو 20 مليون فيهم كلش......
عندنا في منطقتنا بلدية حدوا ناسها المهر عندهم ب 3 ملاين فقط بالمقابل ما يحاسبوش العروسة واش تدي معاها و النتيجة أعراس هذا الصيف تقريبا كامل العرايس من هذي البلدية رجعوا شباب البلديات المجاورة كامل يحوسوا يخطبوا من عندهم .

[AMINA.Z]

شكون هذا اللي قالك الهدرة هادي
انا من الشرق
و هاذ الهدرة ماكاتش منها خلاص
الطفلة تدي الفراش لغرفة النوم و غرفة الاستقبال
تدي قنادر صيف و شتاء و صولح الزينة و غيرها
الذهب كل وحدة و مقدورها و واحد ما عندو الحق يطلع الحساب و يشوف شحال جايبة معاها و الله تبهديلة الراجل اللي يديرها
كي تقدر الطفلة تجيب صالون
لا اجهزة كهرومنزلية لا هم يحزنون هادو مسؤولية الراجل

[ام مصعب111]

هذا مشترك في ولايات الشرق كلها ومن قال أنها تختلف فلربما في بعض القرى النائية فقط ...أما الأغلب هذا هو ....خاصة من كان على قد حالوا يطلع فالمهر باه يشور بيه الطفلة يقول منخليش بنتي تخرج بأقل من نتاجاتها....ربي يهدي الجميع ويرزق عبادو الهناء...ويكمل بالصلاح لكل من أراد بناء بيت في الحلال..
صحيح اختي الغلاء في المهور لدرجة كبيرة خاصة عند عرشنا الي يجي يخطب لازم يكون قادر على شقاه لكن الاب يخرج ليها ضعف المهر بكثير عن نفسي نحن اربع اخوات منا اثنتان تزوجتا في مدينتين خارج مدينتنا لكن للاربع المهر نفسه ونفس الشيئ الي خرجناه كامل محازم واظن محزمة وحدها راهي ب تكون ضعف المهر بحد ذاته يعني في عاداتنا بغلو لكن يخرجوا العروسة باضعاف اضعاف مهرها
واذا كان الاب على قد حاله هنا ما يشرطوش مقياس يشرطو مسايس والصوف ينزل في مكان 6 مطارح يولو 4 او 2 والخواتم تاني ينزلو يولو غير اثنين ومع هذا تخرج ضعف المهر كل لوازم الصالة والمطبخ وذهب بزاف من عند اهلها وليس من عند زوجها يعني اختي في كل الحالات المهر غالي
فقط حاجة مليحة انه في عرشنا بغلو المهور بصح يخرجوا بنتهم مقيومة من كل شيئ ذهب وفراشات واثاث واذا دارها وحدها الثلاجة والغسالة ووكل لوازم المطبخ شيئ ضروري يعني ليس مثل البعض يشرط بالغالي وينته تخرج بفاليز وخلاص

واعيد ملاحظة حتى لو البنت رفضت غلاء المهر ابوها واعمامها يجبروها على السكوت وانهم هم الي يتصرفوا يعني نحن المهر لا يدخل فيه لا الام ولا بتناها المعنية بالامر يعني غير الرجال ومستحيل النساء يدخلو


وربي يسر زواج كل العزاب لانه صار غلاء المهور من اهم اسباب عزوف الشباب عن الزواج الله المستعان

[سائلة عفو ربها]

صحيح اختي الغلاء في المهور لدرجة كبيرة خاصة عند عرشنا الي يجي يخطب لازم يكون قادر على شقاه لكن الاب يخرج ليها ضعف المهر بكثير
واذا كان الاب على قد حاله هنا ما يشرطوش مقياس يشرطو مسايس والصوف ينزل في مكان 6 مطارح يولو 4 او 2 والخواتم تاني ينزلو يولو غير اثنين ومع هذا تخرج ضعف المهر كل لوازم الصالة والمطبخ وذهب بزاف من عند اهلها وليس من عند زوجها يعني اختي في كل الحالات المهر غالي
فقط حاجة مليحة انه في عرشنا بغلو المهور بصح يخرجوا بنتهم مقيومة من كل شيئ ذهب وفراشات واثاث واذا دارها وحدها الثلاجة والغسالة ووكل لوازم المطبخ شيئ ضروري يعني ليس مثل البعض يشرط بالغالي وينته تخرج بفاليز وخلاص
وربي يسر زواج كل العزاب لانه صار غلاء المهور من اهم اسباب عزوف الشباب عن الزواج الله المستعان


رغم ان المهور عندنا غالية وأقلها للي معندوش 20مليون وعلى المراة أن تأخذ من الاثاث والافرشة مايكفي لفتح بيتين جديدين ولكن المحزمة عندنا لا ليست لازمة على الجميع بل فقط على من عنده المال اما باقي الأشياء من الحلي فلازمة ولو أحضر لها زوجها لازم تزيد عليها شيئا أما ما تذكرينه عن منطقتكم فأكيد العنوسة والعزوف عن الزواج كثير بسبب هاته الشروط التعجيزية .....يعني سبحاان الله عادات معقدة وعقدت معها الشباب والاولياء الذين لا يستطيعون تحمل كل هاته التكاليف...وأيضا تكلفة العشاء ليلة حنة العروس عندنا على العريس ...مسكين مايحل بيت حتى تخرج روحوا مع مصروف عرسوا...الله ييسر للشباب ويهدي الأولياء ......وأعرف من الناس مخطوبين لهم 3 و4سنوات خطبة لأجل هاته العادات....ومنهم متزوجون لهم 3سنوات وهم مع تسديد ديون العرس....وتبقى كل منطقة وعاداتها فكلنا في الشرق لكن العادات تختلف كثيرا...

[لحن الحياة.]

يا اخي و الله نحير كي نشوف بعض المواضيع يقولك تكاليف الزواج

الاسبوع الفارط كانت خطبة ابنة خالي
قالولهم واش تشرطو قالهم خالي والو
مالا كلمتها عزوجتها و قالتلها احنا نديرو تقاليدنا ما تقولوناش لالا

الوغ
جابولها الذهب و القندورة فرقاني ب 5 ملاين او اكثر 2 بوشيتات تع 400 الف و 2 صبابط بنفس السعر
والفوطات 6 و لابياس مونتي ب 500 و وحد السلة كبيرة تع حنة محسوب مانعرف بشحال و خاتم دوبلي يدير 4 ملاين ووووووووووووووووووووووو !!!!!!!!!!!!!!!!!!!!!!!!!!
احنا جدا استغربنا +جابولها دراهم الشرط و رجعلهم خالي نصف المبلغ

ما فهمناش علاه هاذ التكاليف كاااااامل ؟؟؟؟؟؟؟؟؟؟؟؟؟؟

والله قعدنا مخلوعين و اعتذرو لانهم ماجابوش مقياس (!!!!!!!!!!!!!!!!!!!!! للعلم المقياس وحدو يدير 20 مليون كأدنى سعر )) !!!!!!!!!!!!!!!!!!!!!!!!!!

بصراحة أول مرة تصرا عندنا لان البنات لي قبلها تزوجو كلهم ببلاش يعني الشرط يدخل فيه كلش لا ذهب لاوالو ...تمد 10 فيها كلش

[الأزرق الملكيّ]

السلام عليكم

العادات و التقاليد ليست منزلة من السماء

[جزائرية بافتخار]

انا نقدر نعاونك

ابعثلي على الخاص اسئلتك وساجيبك عنها

كيما ذكروا الاخوة واالاخوات قبلي الشرط انك تديلها من 2.5 - 3 قناطر صوف لازم مغسولة الا اذا تفاهمت مع دارها لا اكثر وهذا حسب طلب العائلة + حاجة ذهب في الصوف اللي تقدر عليه يعني تقريبا تطلع في حدود 8-10 lملايين

خاتم تع الخطبة او الشوفة + خاتم في العقد + خاتم في الحنة يطلعو في حدود 12- 15 مليون كاقصى حد

المهر او الشرط كما يسمى عندنا وهذا حسب طلب العائلة لكن اغلب العائلات من 3 -5 ملايين كحال مدينتنا -وكاين اللي يزيدوا اكثر

العشاء تع العرس فيه الخروف+ المقياس لكن بعض العائلات تكتفي بالمسايس او البقاط- اقل سعرا ( يعني انت والعائلة )

الفاليزة تع العرس ودرك عادو يمدو دراهم تشري العروس واش تحب يعني تقريبا 7 ملايين

كي نحسبوها بالدراهم
3 تع الصوف+7تع الحاجة ذهب+ 15 تع الخواتم+4 تع المهر مثلا +30 ملوين تع المقياس او اقل بالنسبة للمسايس+5 تع العشاء+7 تع الفاليزة=تخرجلك في المتوسط 71 مليون يا اخي
غير روح اشري بيها طاكسي خير ههههههههه راني نضحك معاك برك

لكن سؤالك عن الادوات الكهرومنزلية اذا حبت البنت تشري لكن ماشي شرط عليها
تدي المطارح تع الصوف+ الفراش ولوازمه + الصالون ولوازمه + اموراخرى مثل ملابسها
اي سؤال راني هنا

[ام مصعب111]

رغم ان المهور عندنا غالية وأقلها للي معندوش 20مليون وعلى المراة أن تأخذ من الاثاث والافرشة مايكفي لفتح بيتين جديدين ولكن المحزمة عندنا لا ليست لازمة على الجميع بل فقط على من عنده المال اما باقي الأشياء من الحلي فلازمة ولو أحضر لها زوجها لازم تزيد عليها شيئا أما ما تذكرينه عن منطقتكم فأكيد العنوسة والعزوف عن الزواج كثير بسبب هاته الشروط التعجيزية .....يعني سبحاان الله عادات معقدة وعقدت معها الشباب والاولياء الذين لا يستطيعون تحمل كل هاته التكاليف...وأيضا تكلفة العشاء ليلة حنة العروس عندنا على العريس ...مسكين مايحل بيت حتى تخرج روحوا مع مصروف عرسوا...الله ييسر للشباب ويهدي الأولياء ......وأعرف من الناس مخطوبين لهم 3 و4سنوات خطبة لأجل هاته العادات....ومنهم متزوجون لهم 3سنوات وهم مع تسديد ديون العرس....وتبقى كل منطقة وعاداتها فكلنا في الشرق لكن العادات تختلف كثيرا...


اختي الغالية كلامي عن عاداتنا لا يعني اني موافقة عليها
فقطتعليق على قولك انه تكثرالعنوسة
صدقيني اختي انه من عادتنا ايضا البنت تتزوج في سن صغير انا واخواتي الثلاث ندرس بالجامعة وعندنا ابنائنا
يعني 18 راك متزوجة سنة ولا عندك ولد او بنت وحتى الشباب اخوتي الذكور يتزوجو في سن 24 على الاكثر وكل الاهل هكذا يعني مهرصار شيئ عادي وعندنا مثل ما يشرط على بنته يدي لكنته يعني ابن عمي متزوج وحدة من الوسط اهلها شرطو مليون فقط وخاتم
لكن عمي دار ليها مثل ما شرط لبناته مقياس و 3 خواتم والصوف ومد ليهم دراهم الشرط والذبايح والملاك لدرجة اهلها تعجبوا
هذه العادات عند اغلب سكان مدينتنا وخاصة عرشنا الذي ننتمي اليه والحمد لله البنت في سن16 تلقاها مخطوبة والولد في 20 سنة يبدوا يحوسولو على زوجة او هو يختار فالمهر لا يعتبر غالي عندنا لانه الكل بنفس الطريقة وهذه العادة
اما من يسمع من المدن الاخرى يراه غالي جدا جدا جدا

اذا الزوج من نفسالعرش راهو يعلم بالعادات واذا من برا يعني من مدينة خلاف ولا براني علينا من الاول يكون عنده علم بالمهر الغالي عندنا

وكلامك الاخير اختاه صح يوجد الي يستنى حتى 8 سنوات وهو يستنى بسبب جمع تكاليف المهر والعرس وفتح بيت وفي الكثير من الاحيان ينتهي ذاك الانتظاربالانفصال

وشخصيا وقفت عن حالة من الاقارب زوجها استدان حتى قدر يجيب المهر وتم العرسلكن الزوجة كانت اصيلة باعت هذاك المقياس والكثير من ذهبها لتساعد زوجها رغم انه هو رفض لكن هي اصرت واهلها لما علموا قالو لها هذا هو تصرف الزوجة الصالحة وكان بارادتها ولما عووضه ربي ورزقه اول شيئ اشترى لها مقياس احسن بكثير من الاول

وفيه حالات اخرى ما يهمها زوجها وديونه ولا تساعده حتى لو كانت عاملة ولها راتب اكبر من راتب زوجها


ربي يسر امور كل من ينوي الزواج

[hanatendresse]

سلام
مجرد قراءة هده الاحصاءات تحير تقول راك في بورصة وول ستريت
المهر عندنا بقدر ب 7 ملايين و خاتم واحد هو خاتم الخطبة و الشوفة و العرس 3في1
و 7 ملايين فيهم العشاء و الخروف و الفاليزة لا وجود لمصطلح الذهب و الصوف و البقاط والصالون ......الخ و كامل هاد الشيء شبابنا ممتنعين عن الزواج بحكم الغلاء.

[tatadamizour]

سبحان الله واش هذه العادات
اخواني الرجال اذا حبيتو تتزوجو ارواحو عندنا لبجاية
انا تزوجت في 2007 ماشرطنا والو ما شرطو هما والو اهلي كانو يحوسو على راجل فحل لبنتهم و اهل زوجي يحوسو على بنت فاميليا لوليدهم و الاشياء الاخرى زيادة
نهار الشرط او الفاتحة عمي هز 400دج شرط جابولي خاتم و جهاز بمقدار 3 ملاين
وانا كي تزوجت ماديت والو من غير كوفرلي و حوايجي و دهبي الخاص
و اليوم راني الحمد لله ام لطفلين ماخليت راجلي يدير كريدي باش يجهزلي لا بابا باش يديرلي حوايج مايقدرش عليهم
يسرو اموركم ما تعسروهمش

[رندة نهاد]

في سطيف معندناش هاد العادات بزااااااف سيرتو نتع المقياس هادي Lahد↖↖↖↖↖ الصوف حنا العروسة التي تديها موش اهل العريس اللي جيبوها عندها مهرها وزوج خواتم والعشاء نتع الدخول من كل شئ عل اهل العريس ونتع الفاتحة كاينين الي يمدهم دراهم وتشريهم حوايج وكاينالي يديرلها باباها وحدو الا عاد حاب مشطة العرس والروبة على راجلها هادا وش عندنا في سطيف
ربي يهنيكم ويهنينا

[أم عيشوش]

نعم اخي كاين منها تشري ماشينة لافي وفور وذهب وتدير فراشات وقنادر ومطارح و صالون المهم لا يقل عن اربع طوموبيلات او اكثر
الله المستعان ....

[الأزرق الملكيّ]

سبحان الله واش هذه العادات
اخواني الرجال اذا حبيتو تتزوجو ارواحو عندنا لبجاية
انا تزوجت في 2007 ماشرطنا والو ما شرطو هما والو اهلي كانو يحوسو على راجل فحل لبنتهم و اهل زوجي يحوسو على بنت فاميليا لوليدهم و الاشياء الاخرى زيادة
نهار الشرط او الفاتحة عمي هز 400دج شرط جابولي خاتم و جهاز بمقدار 3 ملاين
وانا كي تزوجت ماديت والو من غير كوفرلي و حوايجي و دهبي الخاص
و اليوم راني الحمد لله ام لطفلين ماخليت راجلي يدير كريدي باش يجهزلي لا بابا باش يديرلي حوايج مايقدرش عليهم
يسرو اموركم ما تعسروهمش

صحيح اختي الكريمة الزواج من بجاية فيه البركة الهنا يغلب الغنى

غلاء المراة الأمازيغية الأصيلة وتخفيض المهر قيمته رمزية وتكاليف الزواج بسيطة

لدي صديق تزوج من هناك والحمد لله زوجته فحلة وعايشين قناعة وفرحانين

شيء جميل يفتخر به ناس القبايل فهو ينقص من العنوسة و يشجع الشباب على الزواج

[كنزة88]

صراحة لازم تحدد البلاصة باش تحكم لانو حتا البلديات في كل ولاية زي مثلا حنا في منطقتنا في باتنة -ماش كل باتنة جيهتنا - الشرط 10 ملاين و 4 ويزات 2 خواتم وادا حاب يزيد تاع الشوفة والعروس متديش الادوات الكهرومنزلية تدي الفراشات والمطارح والصالو ...الخ وتبقى كل منطقة بعاداتها و تقاليدها
وتقبلو مروري

[محمد جديدي التبسي]

وجعني قلبي كي قريت الصفحة الاولى واش هذا محزمة ومقياس؟؟!!!
وتجيبلو ضعف المهر الله لا جابت ياخي حالة والله كرهتونا في الزواج؟!!!!
شوف خويا مكانش منها تجيب المراه اجهزة كهرومنزلية الا اذا كانت من عائلة ثرية ربما تجيب كاش حاجة تلفاز ولا ثلاجه
واذا طلبوا مقياس ننصحك خليهم وروح يبخرو بابنتهم
لازم نرفضوا هذه العادات التافهة المخالفة للشرع والتي هي سنة سيئة حتى ولو كان الشاب مقتدر فلازم نتبعوا حديث النبي صلى الله عليه وسلم اقلهن مهرا اكثرهن بركة
واللي عندو يعاون صحابو الفقراء مش يشري مقياس !!!
بالبركة عليك خويا ربي يتمم على خير

[ندى الصبح]

السلام عليكم

في نهاية الامر ما هذه الا اشياء مثقله للكاهل وزااااااائده والصح في الهنا

[lalib40]

الصوف كان يستعمل في الماضي اما الان ؟؟؟؟؟؟؟؟؟؟؟خليونا من التقاليد .

[lalib40]

مطرح انتاع الصوف كي الحجرة ؟؟؟؟؟؟؟؟؟؟خليونا

[لحن الحياة.]

وجعني قلبي كي قريت الصفحة الاولى واش هذا محزمة ومقياس؟؟!!!
وتجيبلو ضعف المهر الله لا جابت ياخي حالة والله كرهتونا في الزواج؟!!!!
شوف خويا مكانش منها تجيب المراه اجهزة كهرومنزلية الا اذا كانت من عائلة ثرية ربما تجيب كاش حاجة تلفاز ولا ثلاجه
واذا طلبوا مقياس ننصحك خليهم وروح يبخرو بابنتهم
لازم نرفضوا هذه العادات التافهة المخالفة للشرع والتي هي سنة سيئة حتى ولو كان الشاب مقتدر فلازم نتبعوا حديث النبي صلى الله عليه وسلم اقلهن مهرا اكثرهن بركة
واللي عندو يعاون صحابو الفقراء مش يشري مقياس !!!
بالبركة عليك خويا ربي يتمم على خير


والله يا اخ محمد عندك الحق


في هاذ الوقت ماكاااانش لي يجيبولهاش دراهم كاااامل الدزاير ولات هاك و افضل دليل قسم العرائس و المنتديات يخوفو
و ضرك ولاو العروسة تقولك ندي الفراش و ندي الذهب و ندير تصديرة و ما كانش لي ما تديرهمش في وقتنا و نتحداكم اي وحدة تروح عروسة في فستان ب 200 الف برك و تستغنا عن كل هذه الامور .ياو الله ما تصرا .. و نجيبلكم الادلة


و رانا كل انقولو الهنا و الخزعبلات هذي بصح
فاقو ..ذيك بكري
شبعنا مقروط
انا وحدة من الناس نحب ندير كيما البنات و لو ما يجيبوليش الشرط لوكان نتسلف الدراهم وكل راهم يخممو كيما انا .... لانها الفرحة مرة في العمر ..الا اذا كانت من النوع اللي تخمم لوكان يموت الراجل و الا يطلقها هذيك يكثرولها الفرحات
اصلا العروس فرحتها الكبيرة في التجهيز كي تروح تشري في ملابس جديدة ....(ولا تروح في فستان واحد و تقعد بيه...ولا يصبح يشريلها نهار العرس؟؟!!)
و الضياف منين يتعشاو ؟؟ الحم راه غالي و + الطعام و الخضرة ....ولا نقولولهم ما تجيبوش الناس .اهل الراجل ؟ ولا نروحوهم بالشر و ما يتعشاوش ؟؟(اللمة تاع العشا راها فيها البركة )
صحا هانا استغنينا على هاذو و ربحنا العيب و الفضايح ...و الراجل ما يتكسا ما يشري شومبرة ما يوكل اهلو و ناسو ولا واش ؟؟؟؟
والعروس اللي تروح بلا ذهب واش تلبس حلي ؟ نيلون ؟؟ ولا حديد ؟؟ ما تقولوليش فضة لانها غااااااااااالية ...ما قلناش شرط مقياس و سلاسل و اشياء كثيرة بصح على الاقل تدي خاتم ذهب و يجيبلها هو خاتم
والله اعلم

[**د لا ل**]

السلام عليكم

صراحة استغربت من الامر ايضا انا من الشرق وما عندناش هاذي العادات اطلاقا

المهر عندنا يكون على حسب مقدور الرجل لكنه لا يتجاوز 5 ملاين على ما اظن

الصوف العروسة تدي مطارح حسب قدرتها طبعا وملابسها وشوية افرشة واغطية واللهم بارك

[مصرية من الجزائر]

في مصر
العروسة هي اللي بتجيب أدوات الكهربا والسجاد والمطبخ بأدواته وكل صغيرة وكبيرة فيه
ولكن الدهب الرجل من يأتي به وحاجات تانية طبعا
فتزوج مصرية :d

[عيدة2]

عجيب أمرنا ندّعي أننا مسلمين ونحب رسولنا عليه السلام،لكننا نتحدث بل نشجع أمور لا معنى لها في الزواج ، أين نحن من حديث رسولنا وحبيبنا صلى الله عليه وسلم : "أعظم النساء بركة أيسرهن مؤنة " والحديث الآخر الذي يقول فيه : " أعظم النساء بركة أيسرهن صداقا"

[عبد الله 22]

بصراحة مبالغة وجهل على جهل عادات وتقاليد تافهة تقتل أحلام الفقراء

[هالة قليفط]

لهذا مُحقت البركة في الزواج نسأل الله السلامة و العافية ،،,

[nourane23]

قال صلى الله عليه و سلم التمسوا و لو خاتكا من حديد هذه العادات و الشروط هي في طريق الزوال الناس تبحث عن ابن الاصل و الزواج باب من ابواب البركة و جلب الرزق لذا اخواني لا تبالغوا في التباهي بهذه العادات التي ادت الى انتشار العنوسة و ارتفاعها لدا من اتاكم من ترضون دينه و خلقه فزوجوه كما قال المصطفى عليه السلام

[bounar]

كل واحد كيفاه هنا الشرط 25 مليون داخل فيه كل الكبش و الختام و الذهب

[soumay12]

العائلات الكبيرة في الشرق تعمل بالمثل الي يقلك انا نقلك انت سيدي وانت اعرف قدرك اوكي

مثلا في عائلتنا لا وجود للشرط المالي ولا الذهب ولا الصوف ونقول شرطنا بنت حسنة هكذا يقال لكن بالمقابل

لو ان اخي رايح يتزوج دون ما يطلبوا اهل العروس رايحين ندو الصوف والمقياس والخواتم والسلسلة تاع الحنة حاليا معظم العائلات اصبحت تحني على محزمة ذهب

لا تقل سعرها عن 50 مليون اضافة نهار العقد كلشي يدوه دار العريس يعني يعقدوا في دار العروس ويوكلوا في ماكلة دار العريس

بصراحة الزواج في الشرق ارهاق لا يوصف للرجل والمراة ماديا ومعنويا

رجل بسيط يحبلوا 40 مليون ورجل لا باس بيه يحبلوا على الاقل 80 مليون 60 ذهب و30 مصاريف العرس والكسوة


الله المستعان

[mimily]

انا من الطارف المفروشات تجيبها العروس المطارح و لي بونكات و المخاد الزرابي ادوات كهرومنزلية و ملابس شتاء و صيف و الرجل يديرلها حاجة ذهب و خواتم الخطبة و العقد و يزيدلها الشرط و كل عايلة وش تشرط

[(( هبة الرحمن ))]

السلام عليكم

ذُهلت وأنا أقرأ بالمنتدى تكاليف الزواج بالشرق الجزائري ، أعتقد أنه آن الأوان لتغيير هذه العادات السيئة .......
مقياس بستين مليون وخواتم وثلاجة وآلة غسيل وووووو، لا أصدق أننا في الجزائر ...
برأيي السبب يعود إلى الخاطب الذي يقبل بكل الشروط ، حبذا لو طلبتم من أئمة الشرق الجزائري أن يخطبوا في المساجد عن غلاء المهور وعزوف الشباب عن الزواج بسبب ذلك ....
والله زميلتي بالعمل لاباس عليها ولا تُعاب تزوجت من ممرض بــــ 25 مليون فيها ( مهر وصيغة ) ، لو حسبناها بالمنطق يقيم عرس بسيط ويشتري غرفة نوم تصل تكاليف زواجه 45 مليون ( يعني أقل من مقياس بــــ 60 مليون ).

[هدى ام ريماس]

makanche menha hadi

[moug med]

السلام عليكم

ذُهلت وأنا أقرأ بالمنتدى تكاليف الزواج بالشرق الجزائري ، أعتقد أنه آن الأوان لتغيير هذه العادات السيئة .......
مقياس بستين مليون وخواتم وثلاجة وآلة غسيل وووووو، لا أصدق أننا في الجزائر ...
برأيي السبب يعود إلى الخاطب الذي يقبل بكل الشروط ، حبذا لو طلبتم من أئمة الشرق الجزائري أن يخطبوا في المساجد عن غلاء المهور وعزوف الشباب عن الزواج بسبب ذلك ....
والله زميلتي بالعمل لاباس عليها ولا تُعاب تزوجت من ممرض بــــ 25 مليون فيها ( مهر وصيغة ) ، لو حسبناها بالمنطق يقيم عرس بسيط ويشتري غرفة نوم تصل تكاليف زواجه 45 مليون ( يعني أقل من مقياس بــــ 60 مليون ).

راني شوكيت مانيش متزوج