بين خيارين

[مشكلتي]

السلام عليكم اخوتي الاعزاء
انا عندي مشكلة جد شائكة
كان واحد ناوي يخطب ويتقدم لكنه في كل مرة يتوخر ويجيب حجة من لون
ظغطت عليه وبعدت حتى بدا يحلل فيا ويقلي مش مني من امو لي رفضتني بدون ان تراني ودالك طمعا في شهرية بنها لانها خايفا تخسرو كيتزوج يولي زوجتو منافس لها فالمصروف
عرفت بلي يماه ربي مهداهاش ورفضها ليا جرحني بزاف
انا انفصلت عن هدا الشخص وبعدت عليه ونسيتو
حتى وين دخلت لقيتو كاتب مساجات وقلي كون تروحي نسويسيدي
غاظني بزاف ولكني منقدرش نقبل بيه لانو الوقت يجري وراني نكبر ومؤخرا حابة وحدة تخطبني للفاميلتها علما انو الخاطب الجديد الله يبارك لاباس بيه
انا منقدرش نكمل مع الخاطب الاول لاني مستحيل نعيش مع ناس مش قابليني ومش مقيميني
بصح لي راهي تحرق فقلبي كيفاش ندير مع وليدهم لي راه يحلل فيا باش منقبلش بالثاني
وراه متمسك بيا
وانا قلبي خلاص هرب منو بسبب امو لي جرحتني واهانتني
وخواتاتو سمعوني كلام ميتسمعش لانهم كلهم رافضيني
هو فلبداية جا في صف امو وقلي منعصيهاش على جال مرا ونتي كاين منك ميا
وكي جاني هدا الخاطب ولى يحلل ويبكي ورجع كلمهبول وبطل من هدرتو لي كان يهدر فيها
بصح يماه ماهيش قابلا
انا عفست على قلبي وراح نقبل بالثاني بصح لول
ربي عالم
مالقيتش حل
علامة استفهام

[كلمة مني]

السلام عليكم

أمه أصلا ممكن متسمحلوش كون يجيبك ورايحة تصرى مشاكل بينك وبينهم لازم الواحد يفكر للأمام وفي مستقبلو ماشي الأحاسيس لي راح تفيدك
أنا في مكانك والله مانقدر نزيد نفكر فيه نهائيا ، جاك باب مشرق من الخاطب الثاني لعله خير ليه وان شاء الله تتهناي وربي يحفظك من كل شر
والسلام عليكم.

[رهف هبة الرحمان]

هداهو الراي المليح نتي اكيد مش رايحة تعيش مع ناس ميحبوكش ومش قابلينك اكيد رايحيين يمرولك عيشتك اقبلي بالثاني وربي يجيب الخير ومتنسايش صلاة الاستخارة

[KARIO]

استخيري للخاطب تاني و اذا ارتحتي اقبلي، اما الاول راكي خاسرة قبل ما توصلي عنده، و نصيحة الراجل اللي يتحكمو اهله في دخله غير اخطيك عن تجربة

[om taki bacha]

يا ااختي اذا كان لاول راح يخطبك صح ماشي يقول فيها برك ويتزوج بك ويديرلك دارك وحدك كاين امل باه تتهناي معاه ولو بنسبه 50% اما اذا راك رايحة لدارهم غير انساي و عن تجربة يا اختي واستخيري في امر الثاني وان رايت فيها خير فوافقي ولا تترددي

[cezar algerien]

أمر الخطوبة ليس مزاحا أو لعبا، يجب أن تحسم فيه الأمور ، فإن أراد أي شخص خطبتك فليتقدم ويحضر أهله بكل بساطة وسيكون هناك لقاءات بينك وبين هذا الشخص وأمه وتتفقون على كل الأمور مسبقا قبل الزواج أما الكلام الفارغ عن الإنتحار وغيرها فهو يدل على أن هذا الإنسان شخصيته مهزوزة ولا يستحق أدنى الإهتمام

حاولي نسيان هذا الإنسان والتفكير جيدا في الشخص الثاني طبعا بعد استخارة الله عز وجل واستشارة من تثقين بهم من أهلك أو أخواتك أو صديقاتك والمضي نحو نحو هذا الزواج.....بالتوفيق

[AMINA.Z]

ما يغركش يا اختي التحلال تاعو

كون كان يحبك صح كون اي كلمتو اللي تجوز و هو اللي يخير مرتو

الراجل اللي يقولك كاين نسا ماش غير نتي

اخطيك منو

ربي يسهلك يا اختي

[Boubahabouba]

نقولك حاجة الحمد لله لي من الاول بانو اهله ماشي قابلينك
اتخيلي زوجتيه ومن بعد اكتشفتي الامر حياتك تولي جحيم
ومادام هو مايعصيه امه يعني ماراحش يديك هناك ربي
شوفي الخاطب الثاني استخيري ربي وتوكلي عليه

["المثوكلة علي ربها"]

ya okhti fakri b 3a9lek rah yetmaskher bik bark w ya ma sma3na des histoires men had naw3
ya3ni lazem koul wahda t3ich had l9issa wahedha fi9ou ya lbnet w khalou 9loubkoum à part w khadmou chwiya l3akl
twakli 3la rabi w 9ebli bel khatib teni

[daciismail]

خليكم من الاول روحي زوجي قبل ما يفوتك القطار وتبقاي معلقة ديري في حسابك لو كان تبطلي من الاول وثاني يواعد وبعدين يخلف وعد ما جوابك .................................................. .. واصلا علاقة بيناتكم حرام كيفاش ولي زواج ديالكم ....................... سبحان الله اللله يهديكم

[الصديق قروف]

كثرت هاذ القصص
ههههه وكل واحد يدي صحبة صاحبو
‏ لا تعليق لمشكلك
لاكن لاتنسو انصيحة انصحو اناس الذين يمرون بموقفكم

هناك اناس اهل لثيقة (ههه كيما انا ) عندهم كلمة و يحسبو لوعودهم لكي لاتخلف

[mino 19]

نفضل2 لان مع 1 هناك مشاكل كثيرة وحب وحده لا يكفي فى هده حالات
صلى صلاة استخارة
الله يوفق

[bennou28]

توكلي على ربي واقبلي بالخاطب الثاني.. حتى واحد ما يستاهل تخسري حياتك على جالو.. ماراح يدير والو في عمرو وإذا انتحر بينو وبين مولاه أنتي نا عندك حتى علاقة وما عندك ما تديري براجل كيما هو وعايلة كيما عايلتو,, ربي معاك اختي

[rafik73]

هدا المشكل سوف يرافقك الي ما بعد الزواج ولن تعيشي سعيدة واضن الاول يريد عرقة زواجك فقط ل

[houda_jijel]

انا برايي تقطعي علاقتك بالاول لانو راح تكون غير المشاكل و التمرميد و استخيري الله في التاني و توكلي على ربي
ربي يسهلك و يبعد عليك كل سوء اختي

[ايمان4]

اخطيك منه و ارواحي نقلك اختي دركا لكان عينه كان يجي تم تم و لي ليها ليها و لو صح يبغيك يدير التير ف الدار باش يجيلك و لو يرفضو يقول انا بغيتها و علاش ؟ و لو على الراتب يقلها يعني انا عمري و نتزوج نبقى غير هاك حتى هي دات باه على امه و هادي سنة الحياة معليش وليدها و منيش نقول يعق امه لا اشا لله بالصح بالتي هي احسن و يفهمها بلي من غيرك مستحيل يتزوج و ان لم تقبل بحتى وحدة ؟ كيفاش الزواج نصف الدين و لا معصية لمخلوق في معصية الخالق ... و في الاخير انا علابالي السيد غير يهدر برك باغس يجيب بيك وقيتة و يخليك صفر اليدين في الاخير لكان هو صاب لكان تزوج و يقلك كولي روحك و يزيد يسمعك من الفوق انت و انت .ماشي بنت فاملية مرتي لازم و ما لازمش و انت بريئة مما يقول و يزيد يخسر السمعة نتاعك من الفوق... بالصح حنا لبنات بزاف حنان... باغيك توقفي معاه حتى يصيب بنت لحلال باين ما عينهش ربي جابلك بلا مزيته قطعي الاتصال معاه و فهميه قبل ... و الله يسخر نشجعك على الزواج بالثاني

[houssem zizou]

إستخيري الله و افعلي ما يطمئن له قلبك
و نصيحة: إختاري منهما من هو أفضل دينا و خلقا

[samira135]

يا حنانة المشكل مش في الاختيار الاول ولا الثاني لانو اصلاااااااا الاول سمح فيك المشكل في لي جاي تخافي كي تتزوجي يديرلك مشاكل مع راجلك وكان قطعتي علاقتك كامل بيه من بعد خممتي في الزواج مش تقوليلو انك تخطبتي باش تخليه يغير و يحلل و يبكي على قولتك

[صفاء الروح]

استخيري الله واخطيك منو

[نرجس37]

اختي في مسائل كيما هاذو ما كاش كلمت غاضني لانو يغيضك اليوم و تخرج فيك يماه غدوة راه ربي بعثلك وليد الحلال اتكلي على ربي .لان لي رافضك في الاول عمرو ما يبدل رايو فيك و ديري واش ديري وعن تجربة شفتها بعيني جارتي صرالها كيما انتي يماه ماقباتهاش في الاول وباصرار الرجل قبلت او قبل الزواج صرا مشكل صغير اول الي ناضت هي امو النها في الاول كانت رافضة.و الراجل كان كان يحلل فيها باش ما تفسخش الخطبة ولكنها فسختها قالت درك خير من بعد الزواج وعلى فكرة رفض الام هو خوفهاعلى مرتب وليدها يروح عليها يعني على شيئ مادي ماشي على اخلاقها.واليوم راهي متزوجة بانسان اخر يقدرها و الحمد لله