مشكلة فضلا لا امرا ساعدوني

[فـــرح]

السلام عليكم
عندي مشكله في عمل البقلاوة جاتني قاسحة شويا ماهو المشكل
ساعدوني ارجوكم اريد اعادتها مع تجنب الأخطاء

[ام لوجين وهديل]

هاهي وصفتي المتميزة جربيها وادا عجبتك وانا متاكدة بلي تعجبك ادعيلي بزاف بشفاء راني في حالة من ضهري موالفة نخدم 10 انواع وهادي المرة خدمت فقط البقلاوة وبسيف ايا نروحو للمقادير
5كيسان نتاع الاينوكس فرينة و1 كاس نصفه سمن ونصف الاخر زبدة التوريق و 2ملاعق كبار حليب لحظة و1بيضة و2 ملاعق كبار خل ابيض و2 ملاعق كبار سكر غلاسي قرسة ملح
بسي الفرينة مع السمن والزبدة مليح مليح ثم ضفي الحليب السكر الملح ودربي البيضة مع الخل وزيدىها ولمي بلماء والمزهر لازم تكون عجينة طرية وخليها ترتاح ليلة كاملة باش تساعدك
في الخدمة وادا كنتي مزروبة ساعتين او 3 تكفي دير 7 طبقات من تحت وبينهم خليط زبدة التوريق وسمن بكميات متساوية ادهني الطبقات بسخاء ما تشحيش في الدهن ثم طبقة الوز او الكوكاو تكون مطحون رقيق وهي 3كيلات لوز بكيلة غير ربع سكر عادي وكل 100 غ من اللوز تقابلها ملعقة زبدة يعني اوزني الحشو وكل 100غ من الحشو ديريلها ملعقة من الزبدة ورشة قرفة ورشة لفاني وقطرة لاغوم نتاع الوز ادا كنتي خدمتي بلكوكاو ورشي ب المزهر مثل الطعام ما تكثريش المزهر لازم يكون الحشو متناثر ماشي معجن سوي الحشو مليح بلاما تضغطي عليه وزيدى 7 طبقات اخرة وقطعيها وديريها طيب على اقل درجة عندك في الفرن وادا كان الفرن نتاعك يشعل من فوق ومن تحت في نفس الوقت احسن مدة الطهي ساعة كاملة

ملاحضة الطبقة الاخير الي يجي فوقها الحشو ما تدهنيهاش باش ما يهربلاكش الحشو كي تقطعيها

لازم العجينة تكون رقيقة بزاف فوتيها في الرقم الاخير في المشينة نتاع البقلاوةيعنى تبداي بلكبير وتروحي الى ارقق رقم وكل وحدة ومشينتها

لازم تحطي البوندا بحدا البوندا تكون فوقها بحوالى 1 ملم حتان تخلصي الطبقة الاولة ثم تعكسي الاتجاه يعني ما تحطيش البوندات فوق بعض يعني كيما نقولو تخالفيهم


لازم تعسليها فور خروجها من الفرن ويكون العسل بارد وهي سخونة باش تشرب مليح
لازم العسل ما تزيديلوش المزهر باش ما تجيش لاويا
ننصحك بعسل المرجان او نونورس

خليها طول في البلا كي تعسليها حوالي 3 ايام تقدري تنحي منها وهي في البلا ادا كنتي مزروبة بصح الباقي خليه يشرب العسل ويطرى 3 ايام

نورمالمو راني قتلك كامل الاسرار نتاع نجاح البقلاوة وادا خصتك اي حاجة اخرة انا في الخدمة

بتوفيق حبيبتي وعيد سعيد وكل عام وحنا بخير وما تنسايش كل حبة تاكليها بدعوة من القلب ليا ولكل مريض شفا الله كل من هوا مريض في هاده الايام المباركة

تحياتي الى الجميع

[مياسم الصمت]

السلام عليكم

شوفي اختي انا الباقلاة لما نديرها دائما نضيف للحشو كمية من الزبدة الذايبة
ماشي بزاف قيس ثلاث مغارف كبار لكل كيلو مكسرات
الزبدة الذايبة تخلي الحشو تاعك طري وهو السبب انه باقلاوتك جات يابسة شوية

[فـــرح]

شكرا لكم على النصائح

[فـــرح]

ربي يشفيك سيدتي ام لجين ويقومك بالصحة

[ام ساجد]

اختي ديري بقلاوة ام انس او ام اماني في زوج روعة ومضمونين

[فـــرح]

من فضلك اختي ممكن تضعي الرابط