نضحك ولا نبكي

[مشكلتي]

السلام عليكم
رمضان كريم تقبل الله منا و منكم صالح الاعمال
منيش عارفة منين نبدا ولكن نتمنى تتحملوني لاني صراحة خلاص منيش بش نقدر نستحمل اكثرانا اقل ما يقال عليا اني بائسة و مانصلح لوالو صدقوني اذا قلتلكم اني مافلحت في والو غير شغل الدار اما حاجة وحدوخرا ابدا ماحكمتها في يدي لا صنعة لا ديبلوم لا قيمة عند الناس ملي قعدت في الدار وانا ضو الشمس منشوفوش غير من الطاقة و الناس قاعدين يعايرو فيا كيفاش بنات الجيران وبنات العايلة اكل تزوجو وانت اقعديلنا هم على قلوبنا واش ندير انا بش نتزوج كيفاه يشوفوني الناس و يرضاو بيا و انا منبانش اصلا والله كاين بعض ناس ميعرفوش اصلا باني بنت عايلة فلان لانهم وبكل بساطة وذل معندهم وين شافوني يحيرو كي يعرفو بلي كاين فرد وحدوخر الادهى والامر كي يولو اقرب المقربين دايريني تعلاق و تمسخير اقعدي بوري وحتى واحد مايقيمك الناس اكل تحوس على الي تدير الالوان في وجهها و تلبس الفيزو اما المعقدة الي متخرجش الحشامة الي كلمتين حدا بعضاهم متقدرش تقولهم حتا واحد ميشوف وجهها حسبي الله و نعم الوكيل والله راني مقهورة و قلبي يظل ينزف تعبت و كرهت وراني نتمنى الموت لعل نرتاح واش دخلني انا كيفاش ندير منشفاش على اي نهار في حياتي فوتو فرحانة من الصباح للعشية ولا مناسبة و لا اي يوم لوكان نعيا نكتب والله منكفي وش في قلبي علاه هكذا علاه واش ندير بش ميولوش يعايروني انا واش دخلني الا كان حتا واحد ماغلطش نهار وجا خطبني بش اوموا اهلي يقيموني شوي مش ديما يحتقروني و يستصغروني والله منيش نوزن في كلامي علابالي راني غير نخلط على وجه ربي العالي سامحوني بصح خلاص راني قنطت ومقدرتش نتحمل ادعولي ربي يفرج عليا او نموت ونرتاح مبقاليش سبب يخليني نعيش على جالو و الله تعبت حتى رمضان ومنيش ذايقة بنتو من القهر و الذل الي راني فيه الناس اكل لباس عليهم وانا طول العام وانا نندب و ننوح حتى في صحتي مرضت وواحد ماهو حاس بيا حسبي الله وحده ونعم الوكيل
اسمحولي اسمحولي اسمحولي والله منيش قادرة نكمل

[mrmilano1984]

اختي الله يهديك نورمال كاينين لي ماتزوجوش وراهم ماعلابالهم بوالو راني حاس بيك مليح مليح صح اخمي ميانساي الناس ونحي من راسك الناس والتخمام السلبي راه ياثر كل حاجة مكتوب انا عندي خوالاتي قريب 60 سنة ومش مزوجات وعايشين بعضاهم نورماللللللللللللل وهوما ماحبوش يتزوجو وعاد

[abdelka22]

أحمدي ربك يا أختي ..أنا نعرف بزااف شيرات كيما راكي تقولي تع ألوان و فيزوا راااهم يعانيو أضعاف ماراكي تعاني أنتي ..المهم الزواج مكتوب و الصبري ربي علابالوا واش كاين و واش يدير المهم شدي فيه

[كلنا لله]

ربي يكون في عونك و يفرج عليك ياربي
صح الكلام تاع العايلة يجرح اكثر
اصبري و دعي ربي خاصة رانا في رمضان

[رهف هبة الرحمان]

ادعي ربي ومتيأسيش ربي راه معاك واكيد راه شايفلك الخير ربي يفرج عليك ويرزقك بولد الحلال ان شاء الله وردي بلاك تتمناي الموت كل يوم قولي الحمد لله عل واش راني فيه وتفكري دايما الي راهم في اسوا حال منك ربي يفرج عليييييييييييييييييييييييييييييييييييييييييييك

[~رآقية بأخلآقي~]

شوفي الفيديو هذا رااااااائع وسيفرج الله عنك,,, (دعوة أقسم النبي صلى الله عليه وسلم أن من قالها فرج الله عنه) بالإضافة إلى الإكثار من الإستغفار وربي يفرج عليك يا أختي

https://www.y o u t u b e.com/watch?v=lIctBfw4TeE

إحذفي الفراغات بين أحرف كلمة يوتيـوب...

[first first]

والله يااختى لو شكروك كل افراد عائلتك ...............كل صباح وكل مساء .......................وسلمو على راسك كل 5دقائق
لو وضعتي 5.5كلغ مكياج ......................ولبستي فيزو من الجلد الرفيع
لو خرجتي للشاررع اليوم كله ودخلت للبيت بعد المغرب لتنامي فقط بعد ان يسلمو كل افراد عائلتك على راسك ويمدحوك حتى تنامي.
لو ذهبت كل خميس الى عرس من اعراس حيكم حتى دون ان يبعثو لك دعوة

لو.............................
ولو................................
ولو......................................

حطي في بالك بلي لو لم يسهل لك ربي الزواج ............ويرزقك زوج ويسببلك اسباب ذلك .......فلن تتزوجي ...................وكل الاسباب السابقة لن تفيدك بشيء.
يارب ما يكون في كلامي مايجرحك ..............لاني الصراحة احسست ان كل كلمة كتبتها كانت وراءها دموع كثيرك وصبر عضيم ..................والله ما كتبته لربما قليل مقارنة بما تشعرين به وتشعر به كثيرات مثلك ..................ولكن يجب ان نرجع دوما لصوت الحق وكلام العقل وان ضغط المجتمع علينا لانكون له عونا في ذلك
ربي يفرج عليك ويرزقك من حيث لاتحتسبين .................الله يمهل ولايهمل .
ابتسمي ......................وخليها على ربي...................احن عليك من اهلك ..................وحتى من نفسك.

[imadzd]

بارك الله فيكم

[أم شروفة]

تاكدي انك معززة ومكرمة عند والديك .........ما زلتي ما شفتيش الذل .وما زال ما عيشتيش الهم ...تتزوجي ومن تعرفي قداش كنتي مدللة .واللي كاتبو ربي يصير ومكتوبك راح يجيك

[مجرّد إنسان]

أكثري من الدعاء والذكر والصلاة واتقي الله فإنّ الزوج رزقٌ من الله
وقد يُحرم العبد الرزق من الله بسبب ذنوبه
قال رسول الله صلى الله عليه وسلم:"لا يزيد في العمر إلّا البرّ، ولا يردّ القدر إلّا الدعاء، وإن الرجل ليُحرم الرزق بالذنب يصيبه."
فراجعي أعمالك وأخلصي في الدعاء
واصبري واحتسبي أجر صبرك عند الله عسى أن يجعلك الله ممن قال فيهم " إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ "
ولا تقنطي من رحمة الله فإنّ رحمة الله وسعت كلّ شيء
واعلمي أنّ كلام الناس لن يضرّك في شيء ولن ينفعك في شيء فلا تلتفتي إليه

[ريحانتي]

صبر جميل و الله المستعان

[KARIO]

نديرك اختي و ننصحك بلا زعاف، مشكلتك انت السبب فيها، اولا الزواج بايد ربي، اذا ربي كاتبلك يخطبوك يالوكان راكي مدفونة تحت الارض، مذكرتيش سنك ولكن يتهيألي مزالك صغيرة، كي راهم يعايروك الناس عندهم شوية من الصح، كامل الوقت و انت فالدار، شغل الدار ميهرب ميكمل، و لكن صغرك و حياتك راهي تجري، مزال مافات الحال، روحي عملي اي حاجة فحياتك ديبلوم مشروع خياطة...، اي حاجة تكون ليك نتي، ، نفتحي على العالم الخارجي ميصرالك والو لوكان تفرضي احترامك، و اذا تزوجتي تنفعك حرفتك اذا طاحت بيكم.تخيلي نفسك بعد عشرة او عشرين عام، كيفاش تكوني ، و فرضي متزوجتيش لا قدر الله و الوالدين مهما طالت العمار مايدومولكش، وما عندك لا دخل لا مستوى، راح تكوني عالة على اخوتك و ازواجهم، فكري في مستقبلك و متبقيش منغلقة، و الفيزو و المكياج ليس لهم علاقة، و بغيت نزيدلك الزواج مراهش الحل كيما راكي تحلمي، المعاني اللي راكي تسمعيهم في داركم ميجوش نقطة في بحر الذل الي تعيشيه فالزواج

[زهير12]

أكثري من الدعاء والذكر والصلاة واتقي الله فإنّ الزوج رزقٌ من الله
وقد يُحرم العبد الرزق من الله بسبب ذنوبه
قال رسول الله صلى الله عليه وسلم:"لا يزيد في العمر إلّا البرّ، ولا يردّ القدر إلّا الدعاء، وإن الرجل ليُحرم الرزق بالذنب يصيبه."
فراجعي أعمالك وأخلصي في الدعاء
واصبري واحتسبي أجر صبرك عند الله عسى أن يجعلك الله ممن قال فيهم " إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ "
ولا تقنطي من رحمة الله فإنّ رحمة الله وسعت كلّ شيء
واعلمي أنّ كلام الناس لن يضرّك في شيء ولن ينفعك في شيء فلا تلتفتي إليه

[amira1989]

عليك بالرقية و الذكر و القران

[orchid violet]

السلام عليكم ربي يفرج عليك اختي اولا الزواج راهو مكتوب ربي و مكتوبك مازال ماجاش برك و كاين كتيرات متلك مازال لم يتزوجو و على حالتك في البيت هاذي لازم نتي لي تبدليها اختي روحي ديري ميتي في يدك قراي تعلمي ما تخلبش روجك هكاك و الله هاذ المجتمع راهو ما يرحمش ..و ان شاء الله ربي يفرج عليك و علينا كامل

[بوزيدة 86]

rabi yefaraje 3elik 3elabali bali el haja ma tekisakeche ki tkone male berani teghidak mane mowaline edare mais diri haja fi balak iwetaki bi lahe we howa eli yefetaha

[omsadja]

صبر جميل و الله المستعان

[rania81]

اختي الزواج قسمة ونصيب يعني مكتوب.اما انتي لازم تعمري وقتك بحاجة باش تجيب الاحترام لنفيك اخرجي تعلمي حاجة حلويات.خيطة او اي حاجة اخرجي اعملي ف الشبكة الاجتماعية روحي اعملي ف المطعم تلمدرسية المهم تعمري وقتك.اما الناس و العيلة تعلمي تبردي قلبك ما يعطوك ما ينحو عليك بهدرتهم الرزاق ربي.

[لاعبة النرد]

السلام عليكم .... اسمحيلي انا هنا نشدد معاك اللهجة .............مرات لازم الواحد يقول شي امور

و انتي يا الزينة علاش ماعندك لا دبلوم لا صنعة ؟؟؟؟؟؟؟؟

هادا تفنين ولا وشنو ؟؟؟

شوفي كما نهدر مع اختي و نعيط عليها راني ندير معاك انا هنا .....

اخرجي .........تثقفي ........... اشركي نفسك في جمعيات ....... روحي لحلقات تحفيظ القرآن ........ شوفي الدنيا و انتي محافظة على روحك و على مظهرك اللائق ...
مانقولوش البسي فيزوات ........معاذ الله .........لكن البسي لباس محترم و مليح ...... مرتب و منسق و محدد ... نقولك حاجة المظاهر هي الأهم لأغلب الناس نتاع درك ...........هادي حقيقة كاينة منها ...........انتي ركزي على مظهرك الخارجي ولكن فيما يرضي الله دائما فالحمد لله المتاجر فيها كلش خمارات و حجابات كما تحبي انتي و بمقاييس مناسبة ....

هادي حاجة .......... وبالنسبة للكلام .... ماشي مطلوب منك تهدري بزاف ... انتي مبدئيا ركزي على الكلام العادي و الأسئلة المشهورة بين الناس و تحدثي و سمات وجهك هي ما يدل عليكي ....ماتضحكي في وجه الناس يقولو بهلولة ....و ما تكشري في وجههم يقولو نبعدوها .....عادي ابتسامة الموناليزا الخجلة مناسبة في كل الاحوال ...........

و نزيدك حاجة مزال ما فاتك والو ... رانا على ابواب افتتاح السنة في مراكز التمهين .... يعي سونتر نتاع التكوين المهني ....

اسمحيلي إذا ما دخلتيش فيه هاد العام ماتلومي الا روحك .... كاين خيرات ربي ...كل التخصصات و مهما كان مستواك الدراسي ....انتي ابداي بالكواقير مثلا و ارواحي رديلي الخبر ........نأكدلك رايحا تلقاي روحك بالبيان ... انا الحمد لله عندي دبلوم جامعي و زدت دخلت و قريت .....مانحكيلكش وليت و كأني موضع الخبيرة ين البنات سيرتو كي نبدا نهدر على التسريحات و الألوان الدارجة ........و هكدا اصبح عندي قدرة على اجراء احاديث و اكتسبت مهارات ....و انتي هكدا ثاني تخلي البنات اللي راهم دايرينك تمسخير ....انتي ديرهم تمسخير لما تولي تعرفي امور ممكن مرة اخرى يقولولك وش معناها و كفاش و كفاش ....

اسمعي مني ........روحي اقراي في السونتر منها تتعرفي على العالم الخارجي و تحتكي بالبنات الآخرين ....طبعارايحين يكونو معاك بنات وهكدا مكاش خلطة كثير ... ومنها دبلوم ......... ومنها صنعة في اليد ...... ممكن مرة أخرى تجيبلك الدرهم و انتي قاعدة في بيتك .....تمشطي و ديريها خدمة ...و الا ما حبيتيش عادي ماديريهاش خدمة ..... ونزيدك حاجة ممكن تعجبي وحدة من البنات تديك لأخ عندها حاب يتزوج .........مراكيش عارفة نتي اسعاي و الباقي على ربي ......

و زيد ممكن لما تكملي قراية الكوافير ... تسمعي بتخصص آخر يعجبك ...الخياطة مثلا ... وهكدا تولي تقراي كل مرة دبلوم ...وكل مرة تتعرفي على العالم الخارجي أكثر .....وتزيد خبراتك و تولي إمرأة و نص و كااااامل يوليو يطلبو خدماتك و غايرين منك و انتي غير على من رضيتي .....

صديقيني راني نهدرلك من نيتي .... انتي برك ادخلي للمركز نتاع التكوين المهني حتى إدا لم تستفيدي مثل الخبيرات ...على الأقل تولي تهني من روحك و من داركم ....مكااااااااااااش كما صنعة اليد ........ ومنها رايحين يعرفوك الناس و يكتبلك ربي مكتوب كما تتمناي و أكثر ........

انتي اهتمي بروحك و ماتخلي حتى وحدة ديرك تمسخيييير أبداااااا ...كاملات بنات تسع اشهر ........ انتي باينة وحدة شاطرة غي ممكن حشامة شوي .... وكما قلتلك غي تدخلي للمركز تاع التكوين .........كلللللللللللش يتبدل ...رايحة حياتك تتحسن بإذن الله والله العظيم صدقيني .............

سلالالالالالالالالالالالام

[intissar98]

دعوة أقسم النبي صلى الله عليه وسلم أن من قالها فرج الله عنه ربي يفرجها عليك

[om rym]

ستغفري ربي واحمديه وارضاي بقدره يا اختى الزواج مكتوب انشاء الله ربي يرزقك بولد لحلال يعوضك على لي فات

[RidhaRezzag]

الاخت ان الشيطان يحب ان يرى المسلم ضعيفا مقهورا تفكري هذي مليح فيبدأ في الوسوسة اليك حتى تمرضي والى قاومتيه يروح يوسوس للناس عليك باش يقهرك تحدي الجميع تحدايهم كلهم اقراي عبر الانترنت تثقفي تعلمي الطبخ الخياطة في البيت اكتبي القصص الخيالية وانشريها على الانترنت اسغلي نفيك بقراءة القران